#البوسيفي29
خداني النوم و من كثر ألم إيدي كل ما نتحرك نفيق .. في الليل متأخر فتحوا علينا الباب و قاموني من فراشي طلعوني ..
لا عرفته حلم لا واقع لا كابوس .. نمشي و نطيح لين فقت مزبوط و دخلوني الأنفرادي ..
و خش عليا واحد طول و عرض .. كان زي الوحش .. قالي ماد أيدك على خالد ؟؟ تربي فيه ؟؟ بانديتي الحبس انت هنا ؟؟
و بدا يضرب فيا بي طوبوا BBR .. على راسي .. على ضهري .. على أيدي .. رجليا ..
كل مكان ..
و ما كانش جسمي الي يتوجع 👌🏻 كانت رجولتي هي الي تتمزق 💔..
شاف إيدي مربوطه و بدا يضرب فيا عليها .. و يعيط على طول صوته و يقولي ابكي .. ابكي .. ابكي ..
و نادى على زوز تانيين بدوا يضربوا معاه .. و شن يخلي راجل يدهش من الضرب 👌🏻🤷🏻♂️
و يرجع يضرب و يقولي راجل ؟؟ راجل ؟؟ تي ابكييييييييييييييييييييي ... ابكييييييييييييييييييييي.....
قتله تفكرني كويس .. تفكر .. تفكر ملامح وجهي كويس .. تفكرهم ..
ضحك و رجع يضرب فيا تاني ......
و في داخلي نقول يارب الموت .. يارب الموت 😔💔 ...
كانت إيدي من كثر الضرب عليها تمنيتها تتقطع .. و في كل ضربه كنت نتألم 💔 نتألم 💔 و هو يقولي ابكي .. ابكي ...
و لما تعبوا مني طلعوا و سكروا عليا الباب .. و ما كنتش قادر حتى انوض نتبول ..
و نزلت دمعه كان شاهد عليها الله عز و جل ☝🏻 بس .. قعدت في نفس الوضعيه لي تاني يوم مش قادر نتحرك ..
في جنتشه تتحرك جنبي .. عيوني بس الي ما يوجعوش ..
جت التانيه .. تقرب مني و تمشي إتجاه الباب .. و ترجعلي .. و ع الحال هدا للضهر .. جوا رفعوني الدار ..
قعدت متلوح و المبروك يحضن فيا و كأني خوه الي ما جاباته أمه ..
أشرف يطيبلي .. جبريل يوكل فيا بي إيده .. عبدالصبور يقرالي في قرآن ..
و شكون المجرم و شكون الشرطي ؟؟ شكون الي نبذه المجتمع و شكون الي بجله ؟؟
شكون المتهم و شكون المنصف ؟؟
و انقلبت الآيه ...
🤷🏻♂️🤷🏻♂️🤷🏻♂️🤷🏻♂️
قعدت 3 أيام في الفراش مش قادر نتحرك .. إيدي بدت كلها زرقاء منفوخه .. نقول للمبروك اجرحني خلي يطلع الدم الفاسد .. و يقولي لا يا راجل ما فيش تعقيم و مرات تصير حاجة ..
احرق بالنار و هات الموس يا راجل ..
3 أيام 👌🏻 عرفت فيهم إن الي يخش حتى على مشاجرة بسيطه ح يشوف العجب هنا ..
المبروك يقولي رفعوك للعيادة ؟؟ قتله لا .. قالي جابولك دكتور ؟؟
قتله مش عارف ..
قالي ضربولك أبرة ؟؟
قتله مش عارف ..
قالي بوسيفي في ناس هنا حقنوها بي فايروس الأيدز .. انضربوا خلاص ..
قتله الولد الصغير وين ؟؟ قالي شن تبي فيه ضربولك ابرة او لا ؟؟
قتله مش عارف .. ما نعرف شي .. نبي نصلي حتى بالتقعميز ..
تيممت ع الحيط و صليت ..
و قعدت متكي .. قالي أشرف الي ضربك أسمه (....) ؟؟؟
قتله ممكن ايه ..
قالولي عندك علم ما يقدرش يخش هنا .. قتلهم ليش ؟ قالولي يخاف من المحبسه ..
قلت لي جبريل وين تليفوني ؟
ناض جابهولي .. قالي قمته خفت يفتشوا و ياخدوه .. خديته فتحته و ع طول وصلتني رسالة .. ( طيارتك أستاحشاتك ❤ )
و بالرغم ألمي و تعبي و ملامح وجهي المنهكة .. بس حسيت بفرحه دغدغتني ..
اتصلت بيا ..
فتحت الخط ..
نسمع في أغنيه ..
في عيونك 🎵 لغز و أسرار 🎵🎵
في عيونك🎵 رحلة و مشوار 🎵🎵
قلبي ده شاعر كلمات عندو مشاعر 🎵🎵
همسات شعر و قصايد 🎵 أبيات جوا عيونك
انا ممكن اضيع عمري و اضيع روحي و اضيع في عيونك 🎵🎵
في عيونك حسيت بأمان 🎵🎵
في عيونك قلبي انا غرقان 🎵🎵
على كيفك وديني 🎵 على كيفك و ناديني و ارميني و خليني في عيونك 🎵🎵
❤🌺❤🌺❤🌺
و برغم قساوة الدنيا على كل رجل .. برغم تركيبته العمليه و الواقعيه ..
لكن نحبوا العالم الوردي البريئ الي تاخدك ليه كل أنثى بي بساطة تفكيرها و عفويتها ❤🌺
و بكل خجل و صوت مبحوح .. قتلي بوسيفي .. قتلها نعم ..
قتلي 3 أيام نتصل مقفل ..
قتلها كان رايح مني الجهاز ..
قتلي قريب هبلت 😔💘
قعدت ساكت و حسيت إنها لازم تعرف إني محبوس .. و كنت خايف من رد فعلها لو قلتلها ..
قتلها ملاك انا عندي مشكله و في الحبس توا ..
قتلي كيف ! 😳😳😳
قتلها محبوس ..
قعدت ساكته ... و لوهله حسيت اني ندمت اني قتلها ..
الوووو ملاك ..
قتلي أنا آسفه سامحني 😔💔 ...
قتلها ليش ؟
قتلي بعتلك رسايل مش حلوة من غير ما نعرف ظروفك أو عذرك ..
قتلها ما وصلني شي ..
قتلي أحسن ..
قعدنا ساكتين .......
بوسيفي ...
يا عيونه ..
ريت كلمة يا عيونه ؟
ايه ...
مستعدة نصبر عمر كله بس تقولهالي و انا عيني في عينك ❤🌺
وعد مني 👌🏻❤
أصلا انا نبي مفتاح سيارتي 😉
قتلها وينه ؟
قتلي اعطيته لي بدر و قتله رجعه لي البوسيفي ..
قتلها بجد ؟
قتلي ايه .. أصلا شريت سيارة جديدة 😌😌 ...
اوووووو مبارك مبارك ..
قتلي ما تباركلي على شي طول ما انت محبوس 💔....
قتلها أيام بس و ربي يفرج ..
به أسمع بوسيفي 😌
نعمين ..
أسمع بوسيفي ..
نعمين ..
بوسيفي 🤨🤨 ..
نعم !!!
ما نبيش نعم انا 🤨🤨
شن تبي ؟؟
بوسيفي 😢❤
يا عيونه ❤ يا نبضه ..
ءءءءءءءءءءءءءأنا بنموت 😭❤
بعيد السوء ❤ نبي نسمعها الاغنيه تاني ..
بوسيفي 😢❤
يا عيونه ..
ركز في كل كلمة و حرف و حسه مني انا ❤🌺
قتلها حاضر ...
فتحتهالي تاني .. و حسيت بسكون داخلي معاها .. بأمان .. بحاجة ..
في عيونك 🎵 وطني و بلادي ..
في عيونك 🎵 أرضي و ميلادي ..
و حياتك دفيني و في ذاتك خبيني من العالم و احميني في عيونك 🎵❤🌺
❤🌺❤🌺❤🌺
و خداني النوم و كأني في حضنها .. و كأني طفلها .. جنين تربى في أحشائها ..
تاني يوم فقت .. في صوت ضرب برا ..
لقيت عبدالصبور يقرأ في قرآن .. المبروك متضايق .. قتله خيرك شن في ؟؟
قالي المرأه طالبه الطلاق ..
سكتت 😔
قتله حكموا عليك ؟؟
قالي خلي يرفعوني نيابه أنا باش يحكموا عليا ..
قتله زيني صار لا نيابات لا شي ..
قتله حقها ..
قام راسه 😟😟
🤷🏻♂️ حقها يا مبروك .. حتى الشرع معاها .. و الحياة تغيرت مش زي زمان ..
المثاليات مش موجودة خلاص .. و معاش يقدروا يصبروا النساوين ..
و في جميع الحالات الراجل هو الملام ..
أستخير الله .. أستخير ..
زاد صوت الضرب .. قتلهم شن في ؟؟
أشرف مطلع راسه يسأل شن في ؟؟
جمعوا السجناء الحوايج الي ما يبوهمش و شعلوا فيهم النار ..
دوشه .. عياط .. تخبيط بيبان .. اشرف يطلع في الحوايج من بين شباك الحديد و يولع فيه النار ..
المبروك يعيط اهو بيخشوا يرموا علينا كلنا بيقتلونا .. جبريل يضحك يقوله ياريت ..
بدوا السجناء يهدوا في البيبان ..
تي شن صاير .. أشرف يقول طلعوا راهو طلعوا ..
اتصلت ملاك ..
رديت .. تعيط و قتلي منزلين في النت ان السجناء هربوا ..
أهاااا .. شبحت لي جبريل .. معناها الدوة رسمي ..
هات السرير ..
جبدنا السرير و نضربوا فيه ع الباب .. تكسر القفل نفتح الباب ..
أشرف يلم في حوايجه ..
لبسنا سبيدروات و طلعت انا و جبريل .. تليفوني بس في جيبي ..
الحراس برا بي جميع انواع الأسلحه ..
السور مستحيل تقدر تتسلقه .. و ما فيش مهرب تاني ..
جبريل طوبوا المجاري 👈🏻 ..
ركب جبريل من الطوبوا بصعوبه و شاد بقوة و حدفلي طوبوا عادي متع غرس و قالي اركب بيه ..
شديته و إيدي توجع مش متحمله وزني و ركبت مع الطوبوا .. و جبريل يقولي بسرعه جايين بسرعه .. كانوا القناصه يرموا من فوق المبنى على سور الحبس .. و كل مرة نشوفوا حد طاح من طلقه ..
وصلت لي نصف الطوبوا بصعوبه و خانتني أيدي و طحت 🤦🏻♂️😔💔
No name ❤🌺
