#البوسيفي4
و في داخلي نقول قطعيه توا نجيك .. و ما عرفتش شن نرد و شن نكتب ..
اتكيت و حطيت ايدي ع راسي .. شن الي صايرلي ! شن الي نحس بيه !
خشت أمي قعمزت جنبي .. قتلي خيرها رجلك ؟ 😳😳 قتلها طاحت عليا جمره 🔥 .. قتلي هلبا مكانها متقرح ..
قتلها عادي تو تبرا .. قتلي شن عادي توا تبرا 😳 تو نشوفلك بماطة حروق ..
به شوفي يا أمي بماطة حروق .. طلعت و جت جابتلي بماطه و تحط فيها ع رجلي و تقولي وووووك كيف متحملها ؟ ما توجعش هادي ؟ ..
و في داخلي نقول هذا الي يوجع 💔
كل تفكيري فيها و ليش تحكي هكي !!
قعدت أمي تحكيلي ع عرس البنات و شن ناقص و شن مزال ..
قتلها الفلوس الي عندك كملي بيهم أي حاجة ناقصه ..
قتلي عقبال ما نفرحوا بيك يارب ..
قتلها إن شاءالله ..
يوم الاحد طلعنا الساعه 6:00 الصبح لي مصراته وصلنا تقريبا الساعه 8:00 .. خطمنا على صديق الوالد شربنا قهوتنا و طلعنا مشينا للكليه الجويه .. قدمت ملفي و قعمزنا مع عقيد طيار كان مقرب من صديق والدي و قالي اسبوع و نكلمك .. طلعنا تغذينا في حوش صديق الوالد و العصر طلعنا روحنا ...
وصلت الحوش متعب هلبا .. دوشت و رقدت ..
تاني يوم نضت لقيت ريان باعتتلي رساله .. ( 😢 )
......
اووووووو شكلها زعلانه 😳😳
شن درت زعمه أنا !!
حسيت الوقت مزال بكري .. قلت ساعتين تانيات نتصل بيها نكلمها ..
نضت طلعت جبت خبزه و حاجات للحوش و قعمزت فطرت مع امي و بوي .. قتلي أمي راهو غدوة الميلود ..
قتلها به !!!
قتلي بترفعني ناخد قناديل و شماعي و بناخذ رشته نديروا موسمنا ..
قتلها أمي ربي يهديك قنديل شنو !! هذا كله بدع و دوة فاضيه ..
قتلي انا نحبها البدع 🤨 هادي عاداتنا ليها سنين توا انت طلعتها حرام ؟؟
تي هي واضحه حرام ما طلعت فيها شي أنا .. شن قنديل و شمعه و عصيده والأعتقادات هادي !! ........
قتلي بلاش تو يرفعني بوك 🤨 ...
تلفتت لي بوي قتله حاج الله يربحك اخطانا من هالبدع الزايده ..
قعد يضحك 😄😄
قتلي امي تنكر في بوك عليا ؟؟ 🤨🤨
قتلها خودي مصحفك و اقري قرآنك و سعيك مشكور .. أما قناديل و شموع و نجوم الليل .. فوتيه الجو هذا ..
قتلي تو نبعت بشير ياخدلي و كل شي الدبل بنشريه 🤨🤨 و ناضت من جنبنا ..
خشيت الدار نبي نكلمها ♥️ .. بعتت رساله .. ( مرحب )
بعد ما بعتها قعدت نقول شن مرحب هادي 🤦🏻♂️........
ردت عليا .. ( مرحبتين )
اتصلت بيها ..
قتلها كيف الحال ؟
ضحكت و قتلي الحمدلله 🙈 ..
قتلها تعرفي شن قال عمر ذياب ؟
قتلي شنو ؟
قتلها قال : ضحكت يعني قلبها مال ♥️
قتلي هلبا مال 🙈♥️ ...
ضحكت ..
قتلي بس عمر ذياب ما قالش ضحك يعني قلبه مال 😢😢
قتلها ما عليك منه .. مال مال ♥️♥️
قعدت تضحك .. و انا طاير في السماء وما اعتقدش اني كنت راقد عالفراش وقتها ..
طقت امي الباب خشت .. لقتني شاد التليفون .. كلمتني بالأشاره تطلعني انت ؟؟
قتلها علاش ؟؟
قتلي خوتك الي نكلمه يقولي انا بعيد ..
قتلها به تمام ..
قتلي راهو بناخد قناديل و كل شي نبيه 👌🏻👌🏻 ... به حاضر خودي الي تبيه حتى خط و لوح تو نشريهولك انا غير اطلعي بس ..
طلعت امي .. و كملنا نحكوا أنا و أياها .. و مره تحكي عادي و مره تتلعثم ..
و سكرت الخط و نضت طلعت انا و امي .. و طول الطريق نقوللها انا قتلك عادي خودي قناديل ؟؟ 😳😳😳😳😳
تحلف امي و تقولي ايه قتلي 🤨 .. كله منك يا ريان 🤦🏻♂️🤦🏻♂️ ..
و بعد جهد اقنعتها تفوتهم و خدت قضيه للحوش و روحنا ..
العشيه الدنيا انقلبت في الشارع من الخط و لوح و التنوير ..
قعدت مقعمز في الشارع انا و وسام .. بعتلها رساله .. ( 🎆🎆🕯🕯 )
بعتتلي .. ( 😢💔 )
اتصلت بيها طول .. قتلها كيف الحال ؟
قتلي الحمدلله ..
قتلها خيرك من مزعلك ؟؟
قتلي امي ما شرتليش شمعه و دربوكه ..
قتلها نجيبهملك انا كان تبي ..
فرحت و قتلي ايه 🙈♥️ .. قتلها جايك يا حميدا مسافة الطريق بس ..
تلفتت لي وسام قتله عندي مشوار ع السريع شويه و نجيك ..
طلعت بالسياره و انا ندور وين مكان مش بعيد يبيع في بضاعة الميلود ..
و لقيت محل و نزلت نزاحم في الصغار الي يشروا في الدرابيك 😅
و خديتلها كل شي موجود في المحل .. و طالع من المحل و نقول وين يا بوسيف وين !!
وين البدع ! وين الحرام ! وين ! 😄😄
وصلت قدام حوشهم قتلها انا برا .. نزلتلي و قتلي امي مشت للعياده خالي دار عمليه ع قلبه ..
اعطيتها حاجاتها و قتلها خشي و سكري الباب .. و رجعت و طول الطريق ضميري يأنب فيا ..
ترضى يا بوسيفي حد يدرس قدام حوشكم يعطي حاجة لي اختك !!
ترضى يا بوسيفي يشوفك حد و البنت تركبها الدوة !!
أستغفر الله العلي العضيم .. خيرني أنا شن صارلي ؟؟
اتصلت بيا و قعدت تشكر فيا .. قتلها ريان مش ح نجي قدام حوشكم تاني من غير علم امك بكل ..
قتلي ليش ؟
قتلها ما نبيش ندير اي شي غلط .. و ما نبيكش تساعديني عليه ..
توترت .. و معاش قدرت تتكلم .. و كل ما تحاول تنطق حرف تعلق فيه ..
و بصعوبه قتلي نسكر الخط و نكلمك كتابه ع الفايبر ..
قتلها تمام ..
وصلت الحوش و قعدت مع وسام و جماعة الشارع .. و خشيت بنتوضأ و نصلي .. لقيت امي مولعه القناديل في الجنان داخل ..
خشيت و سكتت .. قتلها من شراهم ؟ قتلي بهاء جابهم ..
صليت و طلعت جنب وسام و في الليل متأخر خشيت الفراش و فتحت النت .. لقيتها باعتتلي هلبا رسايل ..
رديت عليها و قتلها ما كانش عندي نت ..
قتلي امك اتصلت بي امي عزمتها ع عرس البنات .. قتلها امي 😳😳 !!
قتلي ايه ..
قتلها بتجوا ؟
قتلي ايه 🙈♥️
و قعدنا نحكوا لين رقدنا ..
و فاتت أيام و بدت حوسة العرس .. خشيت الدار و لميت حوايجي و سكرتها بالمفتاح و طلعت .. قتلي امي وين على خير !!
قتلها عرس و بنات و دوشه شن تبيني نقعد هنا ؟؟ قتلي اقعد حتى في المربوعه الخارجيه ..
قتلها قاعد في استراحة وسام تبي حاجة كلميني .. قتلي اللطف عرس اخواتك هذا ؟ 🤨
به و كان عرس اخواتي ؟ عندك بدر و بهاء و بشير ..
قتلي انت الكبير مفروض تكون حاضر كل شي ..
قتلها الاستراحه قريبه عليكم كلميني نجيك ..
قتلي لا خليك ما نعباش عليهم خوتك .. و الحوش ما فيشي برانيه ..
قتلها امي تبي حاجة كلميني .. ما نقعدش في حوش عرس و زحمة بنات ..
و طلعت مشيت للاستراحه .. و كل ما يبو حاجة يكلموني .. نمشي للحوش و نرجع للاستراحه تاني .. و قبل الحفله بي يوم كلمتني ريان و قتلي انا جايه .. و كنت نبي نشوفها و مش قادر نقاوم رغبتي في شوفتها بكل ..
نستعوذ من الشيطان و نقول لا لا لا تو تشوفك امك او وحدة من بنات عمك يا بوسيفي ..
بعدين نقول بنشوفها و الي بيصير يصير ..
في الليل بعتتلي رساله و قتلي انا وصلت ..
بدا عقلي مش عليا .. مقعمز ناخد في رجيله في الاستراحه و نفكر كيف بنمشي للحوش ..
قطعت وردتين 🌸🌺 من الاستراحه و طلعت و كنت نفكر كيف بنركب بيهم قدام امي ..
ركبت السياره و كلمت امي قتلها بنجي ندوش و نغير و نطلع طول ..
قتلي به تمام ..
قتلها بنركب من الباب الخلفي و ما نبيش حد في الدروج ..
قتلي تعالى ما فيش حد في الجنان الخلفي ..
وصلت و ركبت و ما فيش حد .. خشيت الدار و سكرت على روحي .. كلمتها قتلها وين انتي ؟ قتلي في الخيمه برا ..
قتلها نبي نشوفك ..
قتلي وين ؟
قتلها لفي من الجنان تلقي دروج اركبي منه ..
كنت واقف نستنى فيها و نقول ان شاءالله ما تجيش .. ان شاءالله تقولي لا ..
و جسمي كله يستنى فيها .. ركبت من الدروج .. سلمت عليا ..
و ما قدرتش نرخي ايدها .. و كنت جاهز نعاشرها معاشرة الازواج ..
شعرها ♥️
قفطانها ..♥️
عطرها .......♥️
عيونها ..........♥️
كنت ناخد في النفس بالسيف .. و كانت متحشمه مني هلبا ..
و من قبل ما نتطقوا اي حرف .. نسمع في صوت بنات عمي راكبين ..
خديتها من ايدها و دخلتها الدار و سكرت بالمفتاح ..
قتلي : لللللللل .... حطيت ايدي ع فمها و قتلها اسسسس .. ما تخافيش مني ..
كان واضح صوت بنات عمي و هما ينزلوا في السفر متع العشاء ..
نزلوا .. و وقتها بس ارتاحت ريان شويه .. قتلي نبي ننزل .. قتلها تمام ..
بس قبل ما تنزلي .. انتي اليوم زي العروسه و احلى عروسه 🌺♥️
و مديت ايدي اعطيتها الوردات 🌸🌺 و لي أول مره في حياتي نعطي وردة لي بنت ..
ضحكت 🙈♥️ و قتلي محلاهم ..
قتلها انتي الي محلاك ..
قتلي : ح ح ح ح 🤦🏻♀️ سكتت
قربت منها قتلها قولي مره و اتنين و عشره ..
قتلي : ح ننننحتفظ ببببببببيهم دددديما ..
زدت قربت منها و شديت من خصرها قربتها مني .. ثمل أنا حد النخاع .. و مش على وعيي شن ندير نهائي ..
استغربت فيا و تحشمت مني ..
قتلها معاش تتوتري بكل لما تحكي معاي ..
قتلي : ءءءءءءءأنا ما كنتش هكي ببببببببببس ككككككككنت نخاف من بابا هلبا
بببببببديت نننننننحكي هكي ..
قتلها و انا تخافي مني ؟
قتلي لا لا ..
قتلها معناها استريحي و معاش تخافي و لا تتوتري .. و عيونها في عيوني قتلي به ..
هلاك .. هلاك نظرة العين ..
أيدي تقرب فيها لي صدري .. عقلي يقولي ارخيها ارخيها يا بوسيفي
وقفتها قدامي حسيت روحي اجتمعت فيا كل شخصيات الرجولة أنا صلاح الدين الايوبي و ندير ع خاطرها حروب ..
أنا الحجاج بن يوسف الثقفي و نقتل ع خاطرها ..
أنا قيس ابن الملوح و نقول فيها شعر ..
و كيف ما تبيني هي نكون .. مره محارب .. مره شاعر ..
و لأني كنت خايف عليها مني و ما نبيش نزعلها ارخيتها و هي حاسه إني منهار كلياً ..
و تستمتع بي إنهياري ..
عاودت شدت إيدي و لفتها ع خصرها و كأنها تقولي من قالك نحيها ..
و تتلاعب بيا كيف ما تبي و حقها و مسموحلها هي بس ..
قتلها انزلي خايف عليك ..
قتلي ليش عروق ايديك بارزات هكي هلبا ؟
قلت باهي الي لاحظتي عروقي بس بارزات 🤦🏻♂️🤦🏻♂️ قتلي نعم !
قتلها دمي من بكري يلهد .. و انزلي هيا قبل ما يجيني حد ..
قتلي به ..
فتحت الباب و طلعت شفت الدروج و شاورتلها انزلي ..
طلعت و نزلت من الدروج ..
و في كل درجه تنزلها نقول نحبك ♥️🌺 نحبك ♥️🌺 نحبك ♥️🌺
No name ♥️🌺
