اسكريبتاتي 💛

1

قلت له بغضب شديد :أنت أي اللي جابك مش إحنا متخانقين.
ضحك :إنتِ زعلتي بجد؟
رفعت حاجبي :أمال بهزار، عايز أي يا مراد؟
_ دا انتي زعلانة بجد.
_أيوة بجد.
قال بهدوء:بطلي هبل بقي يا أسيف إنتِ كبرتي.
قلت له ببرود: أنا مش هبلة يا مراد فاهمني؟
_لا هبلة واحدة عندها 20سنة وعايزة تلعب كورة مع الأطفال في الحارة تبقي هبلة ولا لا..
_مش هبلة وبعدين انا حرة
قال بصوت عالي خوفني: نعم يا أختي، أي انا حرة دي إنتِ عبيطة معندكيش أهل يعني ولا أي، هو أنا مش راجل عشان أخليكِ تجري في الشارع يا بنت إنتِ؟
قلت له بخوف: حقك عليّ يا كبير مش عايزة ألعب والله.
ملامحه بدأت تهدا: أيوة كدا ناس مش بتيجي غير بالعين الحمرا.
إبتسمت: ما خلاص بقي يا مراد الله مش كدا.

(أنا أسيف عندي 20سنة بدرس فنون جميلة معنديش أخوات ولا أصحاب، بس أنا من يوم ما إتولدت ومراد صاحبي وأخويا
مراد ابن عمي أكبر مني بـ أربع سنين ومحسسني إنهم أربعين مش أربعة، عنده أخ واحد إسمه نوح عندة 22سنة )
ضرب بإيده علي الكرسي: روحتي فين يا بنتي؟
إبتسمت:هتاكلني برا صح؟
ضحك :أمري علي الله مش عارف أنا مصاحبك ليه، دا أنا كان زماني مريح دماغي ومتجوز.
قلت بنبرة حزينة:أنت عايز تتجوز وتسبني يا مارو؟
ضحك :إنتِ بتدلعي في ابنك ولا إيه، ولا مش عايز أتجوز أنا عايز أطفح هتطفحي معايا ولا أي؟
_نطفح وماله.
_بيتزا تاني أنا مش عارف بتحبيها علي أي؟

قلت له وأنا بريح ضهري: أنت من إمتي بتفهم في الأكل يا حبيبي بطل هبل.
_إطفحي وإنتِ ساكتة يا بومة.
شاورت له بإيدي: عمرك شوفت بومة عسل زي كدا؟
ضحك وقال:الصراحة لا.
تليفونه رن
_ألو أيوة يا نوح.
_إمتي دا؟
_أنا جاي حالا سلام.
قلت بقلق:فيه أي.
قال وهو بيحاسب:قومي نوح إتكسر
قمت بسرعة :ربنا يستر.

_يا وجع رجلك يا نوح آآة.
_ليه كدا بس يابني قول يا رب.
_آة يا مرات عمي يا قمر رجلي إتكسرت.
_يا إبني الدكتور قال إنه ألم بسيط مش أكتر.
_مش همشي عليها تاني آآة ولا هقابل بنات تاني.
مراد قال له بضيق:إن شاء الله تقابلهم في الجنة يا حبيبي
نوح صرخ بقلق:م مراد.

ماما قالت له بخوف :حرام عليك يا مراد يا إبني الواد يا عين أمه إتخض
إبتسمت وقربت من نوح وأنا بهز رجله: بتوجعك يا ولد؟
صرخ وقال:إنتِ غبية يا بنت إنتِ؟
مراد ضربه علي رأسه وقال:إحترم نفسك يا نوح وإعرف إنها بنت عمك، ولا إحترم أمها اللي قاعدة بيك دي يا أخي الله.
هزيت رأسي بهدوء:فعلا مراد معاه حق يا ولد.
شاور لِي :وإنتِ إسكتِ خالص فاهمة.
هزيت رأسي وسكت

كنت قاعدة في البلكونة وبرسم
لما مراد وقف قصادي وقال :بتعملي أي
إتخضيت فصرخت:خوفتني يا مراد لا إله إلا الله
ضحك فقلت له :برسم
قال بهدوء:بترسميني ولا أي
قلت له بغرور:أنت مين أنا مش شايفاك؟
رفع حاجبه وقال :نعم؟
قلت له ببرود :مش سامعك من الدي چي.
ماما ندهت بصوت عالي:يا أسييف
قلت بقلق: سمعت الدي چي أهو ولا تزعل، أيوة يا نونو جاية، سلام يا مراد.