#دقيقة_فقه
الإسلام مسابش حاجة مهمة إلا لما كلمنا عنها.. حتى قضاء الحاجة 🌿
فـ تعالوا سوا نعرف يعني إيه قضاء الحاجة، وإيه هي آدابها..
#قضاء_الحاجة: كناية عن خروج البول والغائط " البراز"
وعندنا مجموعة من الآداب اللي لازم نكون عارفينها كمسلمين ونعلمها لأولادنا ونطبقها:
1- واحنا داخلين الحمّام بنقول: بسم الله، اللهم إني أعوذ بك من الخُبُث والخبائث
الخُبُث: ذكور الشياطين الخبائث: إناث الشياطين
عن أنس رضي الله عنه قال: كان رسول الله صلى الله عليه وسلم إذا دخل الخلاء قال: اللهم إني أعوذ بك من الخُبُث والخبائث. رواه البخاري و مسلم
2- لما نخرج من الحمّام بنقول: غفرانك.
عن عائشة رضي الله عنها قالت: كان رسول الله صلى الله عليه وسلم إذا خرج من الخلاء قال: غفرانك.
3- مناخدش معانا الحمّام حاجة فيها ذكر الله سواء سلسلة أو خاتم أو غيره، إلا لو خوفنا عليها من الضياع.. وده نوع من تعظيم شعائر الله.. أما المصحف فحرام ناخده الحمام سواء كان ظاهر أو مخفي.
والمقصود بالحمّام.. المكان اللي فيه عين النجاسة وخصوصًا لو حمام بلدي، أما المكان اللي بيكون فيه الأحواض والمرايات في الحمامات العامة أو النوادي مثلًا فـ ده مش تبع الموضوع.
4- يجب الاستنجاء (أو الاستجمار) لإزالة ما على السبيلين من نجاسة.
الاستنجاء: إزالة النجاسة بالماء
الاستجمار: إزالة النجاسة بحجارة أو مناديل أو قماش
كله ينفع.. المهم إن النجاسة تتشال بأي شكل بعد قضاء الحاجة.
يُفضل إن عدد المسحات سواء بالماء أو المناديل أو غيره متقلش عن 3 مرات، وتكون وتر (عدد فردي)
طيب لو بعد الـ 3 مرات لسه فيه نجاسة؟
يبقى نعمل مرة رابعة وخامسة، أو نخليهم سبعة، أو تسعة، المهم يبقى عدد فردي.
الدليل: عن جابر رضي الله عنه أن رسول الله صلى الله عليه وسلم قال: إذا استجمر أحدكم فليستجمر ثلاثًا.
طيب لو حد مسح بالماء أو غيره مرة واحدة بس؟
عادي مفيش مشكلة طالما النجاسة اتشالت.. بس لو عاوزين نطبق السُنة يبقى نخليهم ثلاثة أو أي عدد فردي.
5- الاستنجاء يكون بالإيد الشمال.
6- نغسل إيدينا بعد الاستنجاء لإزالة أي نجاسة جات فيها.
7- ندخل الحمّام بالرجل الشمال ونخرج بالرجل اليمين.
طيب ولو حد اضطر إنه يقضي حاجته في الشارع، المفروض يعمل إيه؟
ده اللي هنعرفه المرة الجاية بإذن الله علشان مطولش عليكم 😊
#سلسلة_فقه_الطهارة
#رقية_طه
#فريق_العفة
أنت تقرأ
فريق العفة _ Effa Team 💛💗
Non-Fictionالسلام عليكم ورحمة الله وبركاته 💕 فريق العفة غني عن التعريف .. وانا بحثت في الواتباد ما لقيت كتاب عنهم .. وفي بنات ما عندهمش فيس بوك يقدرو يدخلو على مجموعتهم او صفحتهم .. انا هنقل اللي هم بينشروا ان شاء الله .. انا مش منهم ولكن كصدقة جارية لي وله...
