فريق العفة _ Effa Team 💛💗

❤❤

في حاجة محتاجين نعرفها كويس جدا

إن عبادتنا لربنا غير مشروطة..

يعني أنا مش هعبد ربنا مثلا عشان خاطر يرزقني بكذا وكذا
ولا هعبده عشان خاطر حياتي تمشي بالشكل الفلاني
ولا هعبده عشان خاطر ميصيبنيش كذا وكذا ..

أصل العبادة إني بعبد ربنا عشان دي الغاية اللي خلقني من أجلها، وأنا اتخلقت عشان أحقق الغاية دي وبس.. بقية الأساليب فهي مجرد وسائل لتحقيق الغاية دي..

أصل العبادة إني بعبد ربنا عشان أرضيه بعبد عشان رضا الله فقط مش شرط عشان طريقة سير حياتي في الدنيا..

بعبده عشان يرضى عني، عشان بحب ربنا وعاوزة رضاه، عشان بخاف من غضبه، عشان بخشاه، عشان برجو عفوه وكرمه وواسع فضله عشان بحبه وبقدره حق قدره عشان أرجو رحمته وتكون سبب في دخولي الجنة..

وعشان احنا عارفين إن ربنا يعلم الحكمة من كل شيء ومنزه عن أي نقص فاحنا عارفين إن أقداره لينا خير.. فبنطلب الخير وندعي برفع البلاء بدون ما نسيب العبادة ولا نجزع ولا نشك إن ربنا ظالم أو إن ربنا لا يعلم الحكمة من ذلك أو أو..

طبيعي طبعا إني أدعي ربنا من واسع كرمه في الدنيا والآخرة لأن دي من أشكال العبادة وإني أطمع في كل ما هو خير وربنا يحب العبد اللي يطلب منه باستمرار ويلح عليه في الطلب ..

طبيعي جدا إن نطلب من ربنا يرزقنا السعادة والرزق و و و
ونطلب منه يرفع عنا الضر ويرفع عنا البلاء

طبيعي ربنا يجازي خير ويسعدنا وييسر أمورنا

طبيعي يحصل حاجات حلوة للإنسان في حياته ككرم من الله ورحمة منه بعبده

طبيعي ربنا يفرح العبد ويستجيب دعائه ويسترها معاه

لكن طبيعي إن يصيبنا ابتلاءات ..

فمش لما ربنا يصيبني بابتلاء أسيب العبادة، ومش لما ربنا يصيبنا بابتلاء يبقى كدة العبادة ملهاش لازمة ..

"وَمِنَ النَّاسِ مَن يَعْبُدُ اللَّهَ عَلَىٰ حَرْفٍ ۖ فَإِنْ أَصَابَهُ خَيْرٌ اطْمَأَنَّ بِهِ ۖ وَإِنْ أَصَابَتْهُ فِتْنَةٌ انقَلَبَ عَلَىٰ وَجْهِهِ خَسِرَ الدُّنْيَا وَالْآخِرَةَ ۚ ذَٰلِكَ هُوَ الْخُسْرَانُ الْمُبِينُ (11)"

لأن زي ما قولنا الهدف هو عشان ربنا أمرنا ونهانا فاحنا بنقول سمعنا وأطعنا بدون شروط ..

يعني ممكن أكون بصلي وبصوم وفي ابتلاء في الحياة
ممكن أجيب مجموع أقل من ما كنت أتخيل ..

ممكن حد يمر بتجربة زواج فشلت

ممكن حد يكون مبتلى في أهله

ممكن حد يتظلم

ممكن بنت تكون لابسة الحجاب الشرعي ويحصلها ابتلاء عادي

ممكن حد يكون في محيطه ناس بتعصي ربنا ودا ميكونش مبرر ليه يعصي ولازم يحاول يخرج برة الدايرة دي عادي ..

عشان خاطر دي دنيا وطبيعي يبقى فيها كبد وابتلاءات

طبيعي متكونش كاملة ١٠٠٪

قَالَ رَسُولُ الله ﷺ: عَجَباً لأمْرِ الْمُؤْمِنِ إِنَّ أَمْرَهُ كُلَّهُ لَهُ خَيْرٌ، وَلَيْسَ ذَلِكَ لأِحَدٍ إِلاَّ للْمُؤْمِن: إِنْ أَصَابَتْهُ سَرَّاءُ شَكَرَ فَكَانَ خَيْراً لَهُ، وَإِنْ أَصَابَتْهُ ضَرَّاءُ صَبَرَ فَكَانَ خيْراً لَهُ. رواه مسلم.

وإلا ايه لازمتها الجنة والنار ؟ وايه لازمة الكمال في الجنة لما الدنيا هتبقى كاملة ؟

طبيعي ربنا يختبر عبده وعبده يصبر ويرضى ويدعي ربنا

طبيعي ربنا يوزع الأرزاق كيفما شاء ويختبر كل واحد كيفما شاء ومش احنا اللي هنقول اشمعنى دول عندهم كذا ودول عندهم كذا ..

طبيعي لما ربنا يأمرنا وينهانا احنا نقول سمعنا وأطعنا بدون مزايدات بدون شروط بكامل اليقين إن دا خير لينا وربنا يعلم حكمته سواء عرفنا احنا الحكمة دي أو معرفناهاش ..

محتاجين نعرف ربنا صح

ونعرف نعبده صح

ونعرف يعني ايه عبادة

#فريق_العفة