فريق العفة _ Effa Team 💛💗

#دقيقة_فقه

#دقيقة_فقه (1)

ينفع أتوضأ بالشاي أو العصير؟ 🤔

طيب ينفع أتوضأ بمايه وقع فيها تراب أو ورق شجر؟

طيب وبالنسبة لطبق المايه اللي سيبته في الحمام وشاكة إن جه فيه نجاسة من ابني الصغير؟

#الجواب_ببساطة :

الماء 3 أنواع:

1- طاهر مُطهر
2- طاهر
3- نجس

(1) طاهر مُطهر: يعني طاهر وينفع أتطهر بيه ( أغتسل أو اتوضأ)

مثال: كل أنواع المياه في الأساس طاهرة مُطهرة طالما محصلش فيها تغير كبير أو جه فيها نجاسة غيرت في أحد أوصافها

زي " ماء المطر والبحار والأنهار والآبار"

(2) طاهر فقط:

ودي المايه اللي نزل فيها حاجة طاهرة بس غيرت في المايه كتير لدرجة إنها مبقاش يُطلق عليها مايه

مثال: العصير، الشاي، ماية الورد

دول طاهرين، لو نزلوا على الملابس عادي أو مكان الصلاة عادي، ولكن مينفعش أتطهر بهم.

(3) الماء النجس:

ودي المايه اللي نزلت فيها نجاسة وغيرت في لونها أو طعمها أو رائحتها، ودي طبعًا مينفعش أتطهر بيها.

أما لو شكيت إنها نزل فيها نجاسة وملقتش حاجة تغيرت في الماء لا لون ولا رائحة ولا طعم يبقى ترجع المايه لأصلها طاهرة مُطهرة

#طيب_ سؤال:

لو عندي شوية مايه ووقع فيهم تراب أو ورق شجر أو أي شيء طاهر ، ينفع أتوضأ بيهم؟

آه ينفع.. لأن الماء لم يتغير تغير كبير وما زال في النهاية اسمه ماء، واللي سقط فيه طاهر.

#الدليل:

عن أم هانئ رضي الله عنها قالت:

اغتسل النبي صلى الله عليه وسلم وميمونة من إناء واحد من قصعة كان بها أثر عجين. رواه أحمد والنسائي وبن ماجه

يعني طبق فيه بواقي عجين ومليان مايه.. وحصل للماء تغير ولكن مش كبير، في النهاية اسمه ماء، فـ النبي عليه الصلاة والسلام اغتسل بيه هو وزوجته عادي خالص.

ونكتفي بهذا القدر الآن ❤

#سلسلة_فقه_الطهارة

المصدر: كتاب تمام المنة للشيخ عادل العزازي من صفحة 15 لـ 19.

#رقية_طه
#فريق_العفة