#غربة_في_الوطن
بقلم : بنية سوق الجمعة 🥀
الجزء السابع من عشرة أجزاء تقريبا ❄️
ابي : الموضوع مش بالبساطة يلي تتصوريها..
غدوا جايه عمتك فدوة وتي روحك..
الجملة يلي سمعتها مرتين قبل..
من بعدها تنقلب حياتنا وتتغير...
كان في سؤال واحد بس شاغلني.. محتاجة إجابته
مشيت وقفت جنب الباب..
اني :علاش هكي اتديروا ؟
ابي : هذا الشيء بالغصب عليا يا بنتي
وكانه مش نفسه الشخص يلي كان يحكي معاي بكل ثقة..
قالها وعيونه في الارض
قالها و نبرة صوته تقول : سامحيني!
اني : مافيش شيء يقدر يغصبك علي تزويج بناتك لرجالة ما يبوهمش..
امي : فيه يا بنتي
اني : شن هوا؟
ضمت شواربها وشافت للارض ورفعت حواجبها!
وقعدت ساكتة
هاذي الاجابة؟
طلعت من الدار و مشيت لداري وسكرت الباب بالمفتاح
كنت نتهرب من الواقع
ومن الحقيقة يلي بنواجهها
كنت حاسة انه ح يكون مصيري زي مصير خواتي..
حسيت من لما بدوا الخطابة يجوني وامي نرفض بدوون حتى ما تعرف عيلة مني او تسئلني او تسأل بوي..
حسيت من معاملة هناء لبوي يلي تغيرت بعد ما تزوجت
حسيت من لما هاجر قنعتنا انها تحب منذر وانه حتى لو كان هذا الزواج بالغصب فا هيا تبيه ❤️
كان كل شيء في راسي يتعاود....
من اليوم يلي جت فيه خالتي منيرة بتخطب هناء لطارق.. لليوم..
كُنت نسٱل في روحي
هل ح نقدر نقنع بوي؟
ام هوا فعلا نصيبي؟
هل ح يكون أحمد كويس معاي زي منذر وسيف؟
هل ح نرضى بالعيشة معاهم زي ما رضت هاجر وفرحت؟
ام ح نتطلقوا زي ما اتطلقت هناء؟
نهرب من الحوش؟
لا اكيد اني مش في مسلسل تركي
توقف كل الاسئلة في راسي ونسأل روحي : باهي علاش؟
علاش ما نتزوجوش من برانية؟
زعما هكي سبر عندنا ولا زي ما قتلي هاجر قبل انه " خيرنا ما يمشيش للبراني"؟ 💔
لكن نحس في الموضوع اكبر من هكي..
لانه لو كان مجرد سبر كان بوي راضي وفرحان..
بس بوي من داخل ما فرحش لما تزوجت هناء.. ولا لما تزوجت هاجر..
كنت نعرف النظرة في عيون بوي لما يطلع فيهم من الخيمة..
مش حزن.. كانت ندم
وامي؟
امي خيرها ساكتة؟
خيرها تساير في بوي وتتعامل وكانها ما ليهاش علاقة بالموضوع ومتبرية منا؟
أحمد؟
من هوا أحمد!
كان اصغر واحد في خوته
مواليد1991 اكبر مني ب4..
من زمان نعرف انه طايش..
من لما كنا نلعبوا في حوش حنينه الله يرحمها كان يدير في المشاكل و يضرب في الصغار ويسب..
من بعد ما توفت حنينه معاش شفته هلبا
ولا عرفت هل تغير او لا؟
زعما يصلي؟
اهم شيء يكون يصلي
علاش نسأل في روحي في هالاسئلة كلهم؟
علاش وكأنه ولى الموضوع هامني!
👑 روايٰاتہٰ بٰٰنيٰة سہٰوق الہٰجمعه 👑
أنت تقرأ
غربة في الوطن
Short Story#غربة_في_الوطن.. خامس رواية ليا.. وأول رواية ح نحكي فيها عن الزواج.. وعن الخيانة وعن طعنات الناس يلي حكيتلهم أما أكثر اماكن في جسمك ضعيفة! فا طعنوك منها.. عن الناس يلي اعطيتيهم الأسلحة باش يدافعوا عليك وحاربوك بيها .... عن قصص البنات يلي نسمعوا...
