غربة في الوطن

الجزء الحادي عشر

#غربة_في_الوطن

بقلم : بنية سوق الجمعة 🥀

الجزء الحادي عشر  ❄️

وصلنا لخيمة الحوش..
خششني وقفت قدام الخيمة واني نلمح في هناء وهاجر ونهى ومنوبة من بعيد يشوفولي
هناء فرحانة واتديرلي في باي بإيد بنتها😁..
هاجر تأشرلي وتقولي أضحكي
امي  تشوفلي و قايمة يديها فوق تدعي
اما نهى فكانت تبكي وتخبط علي الطاولة 😐

جت امي توسعلي في الطريق وتزغرط والناس كلها عيونها عليا..
في هاذيكا اللحظة يجيك ألف سؤال..
كان طحت؟
كان طاحت الطرحة؟
زعما مكياجي قاعد مساوي؟
زعما التسريحة قاعدة زي ما هيا؟..

قلت بسم الله و خشيت للخيمة

جو وخياتي بالوحدة شدولي الفيلو من تالي
امي تزغرط وتقول بسم الله عليك اللهم صل على النبي اللهم صل على النبي..

وصلت لكرسي العروسة أو " الكوشة"
كان ابيض وحوله ورد من كل مكان..
بدوا البنيات يجوا بالوحدة يباركولي
ونكذب عليكم لو قتلكم اني وقتها كنت بكامل قواي العقلية 😁
كنت وكأني في غيبوبة
حتى انه هناء مرة مرة تجيني تقولي خيرك هكي زي المسبوهه فيقي 😂
نهى تجي جنبي مرة مرة تواسيلي في التسريحة والطرحة وتقعد تبكي جنبي وتمشي بدون ما ترد عليا ولا تكلمني 😂
امي كانت مشغولة بالناس و بالاكل
هاجر كانت شادة وليدها في ايدها لانه طول الوقت وهوا يعيط.. تجي مرة مرة تقولي : ردي بالك حد غريب يعطيك حاجة أو ياخد منك حاجة خاصة
كانت خايفة عليا من السحر 
اما هند فا ما شفتهاش ولا حتى جت سلمت عليا من كثرة انشغالها باللعب..

جت هاجر جابتلي تل يفوني قتلي نسيتيه في السيارة
فتحته لقيت 4 رسائل من أحمد
طلعتي من المزين؟
خشي للخيمة خيرك هكي واقفة؟
نقصوا صوت التزغريط
هيا وينك؟....

جت نهى قتلي : بدي ينكد عليك؟ 😁😁

مدوا العشي
جت عمتي تباركلي   وجت منوبة تحضن فيا وتقولي نحبك والله نحبك
وتسأل فيا لو محتاجة شي 💙

شرين تليفوني كان أحمد
اني : السلام عليكم
أحمد : وعليكم السلام ورحمة الله وبركاته يا مرتي
اني : امم وين إنته؟
أحمد : اني قدام الخيمة نستنا فيك
اني : في هلبا زحمة؟
احمد : ايه بس السيارة مدرسة فم باب الخيمة  مشحا نخلي حد يشوفك
اني : اا خلاص نطلع؟
احمد: ايه هيا
اني : تمام هي في امان الله

جت أمي  وقتلي : خلاص كلمك؟
اني : اي اي وين الكاب متعي؟
امي : عند هناء ..
جت هناء  لبستني الكاب
جو وخياتي جنبي..
سلمت عليهم.. 
كان في حضن كل وحدة منهم شعور مختلف..
هناء كان باين انها خايفة عليا
هاجر كانت الفرحة باينه من عيونها
أمي كانت مليانة احتواء  وأمان
اما عند نهى فكان في شعور مختلف فيها  ❤️