غربة في الوطن

الجزء السابع عشر والأخير

#غربة_في_الوطن

بقلم : بنية سوق الجمعة 🥀

الجزء السابع عشر والأخير ❄️

اني : باهي كان تزوجنا واتطلقنا..
امي : هذا يلي مفروض ما يصيرش...
لكن لأنه راجل عمتك نفسه ما ارتحلهاش هناء و دارتلهم مشاكل مسكينه ... قاله عادي تطلق..
اني :دقيقة بس
نفهم من كلامك انه ما نقدرش نتطلق!
امي  : ايه  يا بنيتي
اني : كيف يا أمي؟
امي اني معاش قادرة نتفاهم معاه احمد ولا هوا طايقني ولا اني طايقاته!
بتجبرونيي نعيش مع شخص نكرهه!
امي : مش حني  يا بنتي
اني : والله كان نزيد معاه يووم تاني احمد هذا نهبل خلاص كرهته يا امي كرهته
امي : بري انتي وياه لبوه.. كلميه شوفيه.. اني بوك كذا مرة منبهني علي موضوع طلاقك
يقولي ردي بالك
اني : تيي يا امي هالحوش اصلا معاش مناسب لينا.. كبير وضمانه صعب
امي : به واختك هاجر تتطلق ولا شني؟
اني : بالك لانه منذر يحبها يخليها
امي : مستحيل
اني :  يا امي والله ما قادرة نتخيل يلي قااعد يصير مش قادرة نركبه في دماغي.. معقولة حياة 3 بنات ايجار لحوش؟
مني الغبي هذا منيي يلي يشرط هكي ؟
امي : تحشمي راجل عمتك هذا
بعدين بوك ما يبينيش ندوي في الموضوع معاه
كل ما ندوي يقولي خلاص تم وانتهي
اني :باهي تمام مشحا نتطلقوا اني واحمد
لكن معاش بنوليله خلي نقعد هكي معلقه اصلا ما اظنش في حد ح يقبل بيا
لكنن تو نكلمه بوي
ركبت للدور الثاني طقطقت
ابي : تفضل
اني : السلام عليكم
بسم الله خيرك ابي
ابي : حاس روحي تعبان شويا الايام هاذي
اني : وجهك اصفر وضاعف
مشيت عاينت؟
ابي : وين بنعاين يا بنتي.. هوا هذا العمر
اني : بعيد السو عليك لكن الواحد يدير يلي عليه
بالك عندك هبوط او شيء هكي بسيط تتعالج عليه وتم؟
ابي : ما اظنش يا بنيتي ما اظنش
نحس فيه هني
وأشر علي قلبه
اني : بعيد السو عليك.. قلبك يوجع؟
ابي : هلبا يا بنتي هلباا
اني : والله ما يجي يا ابي تقعد هكي باهي اهو نكلم حد يجي يرفعك تعاين
ابي : خليه يوجع خليه.. بالك ربي يكفرلي عن ذنوبي
اني : ربي يغفرلك ويسامحك يا بوي.. كلم واحد من اصدقاءك ولا كلم منذر او اي حد يجي
ابي : لالا يا بنتي ما نبيش الناس تتعب معاي وتعانيني.. احكي  احكي ما تسايرينيش
اني : لالا تو غدوا بالك او بعده نحكيلك ارتاح اليوم
ابي : سمعتك قلتي معاش طايقة تعيشي معاه أحمد..
اني : ايه يا بوي خلاص💔
اني : اتطلقي لو كان يضربك فيك هكي اتطلقي
اني : اا لا هاذي خدي هكي تورم شويا
ابي : ما تكذبيش عليا.. شفت في عيونك نظرة الحزن نفسها يلي كانت عند هناء  من أول يوم بعد زواجك
اني : والله حاولت يا بوي اقسم بالله حاولت 💔💔💔 يشهد ربي عليا الا قاعده نحاول
حاولت نصلحه نصلح الوضع حاولت نهديه حاولت نحمل ونكون عيلة حاولت نطلعله اعذار
بس ما يحبنيش يا بوي ما يحبنيش 💔 واني بديت معاش نحبه ولا قادرة نضحي علي خاطره بصحتي يا بوي 💔 حطمني من داخل ما فيش كلمة شينة الا وقالهالي ما فيش مرة اتاحتله الفرصة الا وخانني ما فيش مرة شافني ضعيفة الا وزادني يا بوي
تخيل انه من لما وقفت الدوايات معاش يرقد في دار النوم 💔
تحملت علي خاطر روحي وخفت من المجتمع فكرت في هند ألف مرة
كنت عارفة إنه لو اتطلقت ويبدوا في الحوش زوز مطلقات ح تنقص فرصة زواجها
ابي : الرزق عند ربي يا بنيتي.. بتتحملي هذا كله علي خاطر هند؟
اني : اختي هاذي ونحبها 💔 حتى امي قالتهالي الجملة هاذي
قتلي اصبري لين تتزوج هند بعدها اطلبي الطلاق
بس توا جاية بكل بساطة تصدمني بحقيقة اني ما نقدرش نتطلق يا بوي علي خاطر الحوش
ابي :  امك واخده هند سبلة لإني مقايللها ما تخليكش تفتحي موضوع الطلاق.. لكن  اسمعيني يا هالة..
دبرت لهند كل شيء
في ابن صديق ليا أسمه حمزة
محصل بعثة وبيقرا في ماليزيا
اني : بس هند صغير قاعدة  17 سنة يعني ما نبيهاش تعيش نفس تجربتي
ابي : حني مش مغصبينها علي شيء.. وافقت عليه اللهم بارك ما وافقتش بإذن الله يصير خير
اني : بس اني ما نقدرش نحطم حياة اختي في سبيل اني نتطلق من الراجل يلي اني قلت " لا نبيه"
ابي : اسمعي يلي نقول فيه يا هالة. 
لبين ما جي تقدملها وخدت هند قرارها ح تكون المشكلة انحلت 
اني :  شن نقدر ندير الايام هاذم؟
ابي : ارجعي لحوشك جيبي حوايجك وتعالي اقعدي هنايا
صدقيني يا بنيتي مش مطول الموضوع 💙 اليوم يلي استنيته اني وياك ح يجي قريييب