غربة في الوطن

الجزء الثالت عشر

#غربة_في_الوطن

بقلم : بنية سوق الجمعة 🥀

الجزء الثالت عشر  ❄️

نهى : الو أمي
اي  اي نسمع فيك
شنيييي!
لا حول ولا قوة الا بالله
هيا هي هاني مروحة..
اني : بسم الله شن فيه؟
نهى : عبد المنعم قتلوه!
اني : شنيي؟ لا حول ولا قوة الا بالله
وين هوا توا
نهى :هيا هيا جري.. في الطبي
لا حول ولا قوة الا بالله

مشينا للطبي والسيارة قريب انقلبت بينا في الطريق..
خشينا لجيهة الاسعاف وكانت الدنيا كلها زحمة..
لقيت خالتي غادي وعمة نهى يلي هيا ام عبد المنعم..
مسكينة وجهها اصفر ولا قادرة تتحرك ولا تتكلم..
طلع الدكتور وقال إنه عبد المنعم توفى..
طلعوا الرصاصة يلي جت في القلب وللاسف الرصاصة يلي في الفخذ سببت نزيف وتوفى..
فهمت من دوة الولاد يلي كانوا في المستشفى انهم بياخدوا الثأر من اهل زوجة عبد المنعم..
لانه هما يلي وقفوا سيارته وضربوه..
حكتلي نهى قبل انه هوا وزوجته الثانية مش متفاهمين..
وانه هيا مقصرة معاه وانها بنية مش كويسة..

لكن من العزي.. فهمت عكس هذا..
كان عبد المنعم هوا يلي مش كويس..
كان يشرب ويروح يضرب في مرته..
لما حكت لأهلها كلموه
ولانه كان خايف انهم يبلغوا عليه هرب..
ووقت بيهرب شدوه وقتلوه
كنت مصدومة نوعاً ما..
صح أهل البنت غالطين.. ومفروض مهما كان ما يوصلش الموضوع للقتل..
بس علاش كانوا يقولولنا انه كويس؟
وانه مرته هيا يلي ما تنفعش..
مسيكينة لما ريتها قاعد اثار الضرب باين علي وجهها وجسمها

👑 روايٰاتہٰ بٰٰنيٰة سہٰوق الہٰجمعه  👑

بعد ثلاته ايام العزي روحت لحوش أهلي..
والحقيقة يعني انه احمد ما كلمنيش ولا قالي روحي.. فقط تلاقينا في العزي وبعدين معاش شفته ولا كلمته..
كنت محتاحة شوية ايام راحة بعيدة عليه..
بس كنت غالطة..
اني : اي بس كل شيء نصيب واهو حتى عبد المنعم يلي حاولتوا تقنعوني انه ناخده حتى بعد الزواج طلع مش كويس..
و مرته الاوله حتى هيا قالت انه كان يضرب فيها.. يعني الخلل فيه هوا..
امي : يعني توا علي اساس احمد ملائكة.. .
ماهو ملوحك 4 ايام  لا كلمك ولا سأل عليك
اني :  ااا اقل شيء احمد ما يضربش فيا
امي : كله زي بعضه..
هاكي قاعده بروحك لا صغار ولا حوش زي الناس ولا راجل زي الناس
اني : امي موضوع الصغار عادي تفوتوه؟
امي : مش عادي مش عادي  من حقي نشوف صغارك
اني : باهيي شن ندير شنن اندير نحملل من إيدي؟ شن ندير قال الدكتور فيا اني المشكلة..
وانتم حاطين اللوم عليا وكأنه اني درتها بإيدي .. اقل شيء احمد ما يلومش فيا هكي..
امي : هيي غر ما تعرفيهمش الرجالة يا بنيتي..
تو يوم تاني تلقيه مدخلك مرا للحوش..
ووقتها مشحا تقدري تتكلمي..
اني : باهي اني عندي حل توا؟ ما عنديش.. خلاص اهو اني واحمد قاعدين صابرين.. بعدين امي كيف سكرنا سنتين يعني عادي مزال العمر قدامنا..
امي : منن زماان يا بنتي من قبل ما  يطلع هالطب..
نعرفوا انه لما المرا تجهض تنقص فرص حملها
اني : باهي نحط البيبي فوق راسي باش ما يطيحش؟ ولا شن ندير
امي : دبري راسك.. هذا احمد يلي اصريتي عليه..
هاكي قاعدة بروحك..
اقل شيء كان خديتيلك واحد فلوس راكي توا ماشية تتفسحي برا ولا عندك استراحة ولا شقيقة توسع الخاطر.. مش معيشك في حكة طماطم
اني : اهم شيء رزقه حلال....
بعدين هذا رزق ربي واني راضية بيه
امي : كانك راضية بيه راكي مش ملوحه هنايا..