غربة في الوطن

الجزء العاشر

#غربة_في_الوطن

بقلم : بنية سوق الجمعة 🥀

الجزء العاشر  ❄️

كلمت أمي عمتي..
ورجعت للصالون و عيونها دابلات وتشوف بكل حزن..
اني : شن قالت...؟
امي : قالت باهي وفرحت فوقها
اني : باهيي وعلاش زعلانه؟ 😁
امي: لا مش زعلانة هذا قرارك بنيتي
هاجر : ألف مبرووك وخيتي ألف مبروك
اني : سلمك الله يبارك فيك
ما قالتلكش شيء تاني
امي : لا قالت..
قالت الخميس الجاي يديرولك تلبسية و بعدها بوك يكلم بوه ويتفقوا علي الفاتحة تكون الاسبوع الجاي
نهى : باهييي ألف مبرووك يا قردةة 😒😒 سكرتي راسك لكن تو تشوفي شن يصيرلك
امي : بسم الله علي بنيتي خيرك تفاولي عليها
نهى : لاا مش هكي 😁 شني هاذي وخيتي نتمنالها الخير زي ما نتمناه لروحي
هناء : الف مبروك وخيتي
هي أني خلي انوض نوتي روحي خلي نمشي للمدرسة
هاجر : واني خلي نكلم منذر يجيني
اني : اقعدي هاجر شويا معانا
هاجر : والله ما نقدر عندي كدس حوايج يبوا الغسل والغدي وهذا اسامة لبز حوايجه كلهم نروح احسن
اني : باهيي خلاص غر تعاليلنا مرة مرة
واني خلي انوض نصلي الظهر..
ركبت للدار وركبت نهى وراي
نهى: صار هكي يا بقرة 😒
مش مرتاحة والله مش مرتاحة ما نبيكش تتزوجي أحمد
اني : وعلاش؟ 😂
نهى : هكيي
تعرفي حتى امس بعد رقدتي حكيتلهم علي عبد المنعم كلهم انعجبوا بيه
حتى امك قالت مفروض تاخده هوا
اني : عارفتها أمي... كان ما خديتش أحمد ح ناخد عبد المنعم بالسيف وح يقنعوني بعد ما نرفض أحمد بحجة انه باش نبدا قرايتي..
بس يا نهى اني مش مرتاحة لعبد المنعم نهائي حتى لما وريتيني صورته والله لين لحمي كشش..
هكي لو كان كويس وبالنسبة ليا أحسن من أحمد كنت قتلكم أمس..
نهى: باهي به غر صلي صلي
اني : اي اهو بنصلي انتِ لحقتيني
نهى : قاعدة نحاول نقنعك بس انتي شيء زي الحيط
اني : ماهو أمي متوحمه عليك 😁
نهى : بارده
وطلعت من الدار وسكرت الباب بالقوية

صليت صلاتي ونزلت لقيت هاجر روحت
نضت اني ونهى كملنا ضمان حوسة أمس وهكذا..

جي يوم التلبسية ..
ما جتش هاجر وما جتش نهى...
جت خالتي وعمتي ومنوبة وهناء بس 💙

👑 روايٰاتہٰ بٰٰنيٰة سہٰوق الہٰجمعه  👑

كانت تلبيسة بسيطة جدا
جو وجابو معاهم كم سبات.. اثنين فيهم قفاطين وواحد فيه تاكم ذهب واكسسوارات وواحد فيه عباية وواحد فيه عطور ومكياج..
كنت فرحانة بيهم  رغم بساطتهم  💙💙
حددوا موعد الفاتحة  كان الثلات يوم
4/11/201‪4..
قروا الفاتحة في جامع التركي
كانت العيلة كلها في الحوش 💙
خواتي وخالتي وعمتي و صديقات أمي 💙💙
بعد قروا الفاتحة كلم بوي أمي و جو كلهم يباركولي
نهى : الللف مبروووك ياا روحيي ألف مبروكك
اني : سلمك سلمك عقبااالك ياا رب
وين أمي؟
نهى : اا تقريبا في المطبخ

مشيت سلمت عليها وحضنتها وهيا داسة دمعتها💙💙
كانت تقولي شن نبي أني غير إني نشوفك فرحانة 💙💙
بعد روحوا جت عمتي جنبي وقعدت تحصن فيا قتلي باش ما ياخدوكش بالعين..
بعدين شرين تليفونها كان أحمد..
قتلي إنه يبي يكلمك بما إنه خلاص وليتي مرته..