#غربة_في_الوطن
بقلم : بنية سوق الجمعة 🥀
الجزء الثامن من عشرة أجزاء تقريبا ❄️
منوبة : الله يبارك عليك الله يبارك عليكك💙💙
يا سعد وخيي
مقنينتك هلهولة ربي يحفظك
اني : سلمك سلمك منوبة 💙💙💙
ريتي الناس كيف ترد مش انتي
نهى : 😒مش إنتي تقولي في مقولة عمر بن الخطاب متع " رحم الله إمرءًا أهدى لي عيوبي"
اني : لا انتي تلوحي فيهم عليا تلويح 😁 بعدين لا بأس ببعض المجاملة
نادت عليا أمي 💙
طقطقت باب الصالون وخشيت 💙
كانت عميمه مقعمزة وجاية معاها حماتها يعني اخت راجل عمتي
خشيت قعمزت واني نحس في وجهي أحمر من كثرة ما مركزين عليا وكأنه المرة الأولى يلي نشوف فيها عمتي 😁
عمتي فدوة : كيف حالك هالة؟
كويسة أمورك طيبة؟
اني : الحمدلله الحمدلله😊
حماة عمتي : الله يبارك الله يبارك زين ما أخترتي يا فديوة
شافت عمتي لأمي وقالت : ان شاء الله الزوج الصالح للزوجة الصالحة..
هي قوليلي يا بنيتي شن شروطك شن تبي
اني : والله يا عمتي تعرفيني نبي نكمل قرايتي وكذا وباقي الحاجات بالنسبة للمهر وهكي عادي يلي تقدروا عليه
المهم هوا يكون كويس معاي والباقي يجي في اي وقت 💙
عمتي : ان شاء الله يا بنيتي بالنسبة للدراسة امس تفاهمت معاه وكذا وقالي ما عنديش مشكلة عادي نرفعها ونقريها إنتي بتتخصصي تقنية طبية صح؟
اني : بإذن الله بإذن الله ح نبدوا شهر 1 ان شاء الله
عمتي : بالتوفيق يااا رب
قولي بنيتي كان عندك اي سؤال عليه او هكي ما تتحشميش
امي : والله يا فدوة من أمس بنيتي تحكيلي تقولي أهم شيء يصلي وطباعه كويسة.. شني أحمد يصلي؟
عمتي : اااا الحق يا مرت وخيي ما نكذبش عليك..
يصلي ويقطع
والله نقوله ونشد عليه و يصلوا خوته جماعة وهكي.. يصلي معاهم مرات ومرات ما يصليش
حسيت بشيء نخصني في قلبي وهيا تقول في هاذي الجملة
حماة عمتي : شوفي يا بنيتي
والله أحمد زي ولدي و متربي مع وليداتي
أحمد من النوع يلي عنده استعداد يتغير
يبي فقط شوية تحفيز منك
عمتي : ان شاء الله اي والله هوا أحمد كويس من داخل غر طايش شويا
امي : كيف يعني طايش؟
عمتي : يعني هكي زي ولاد هالجيل
لكن الحق من لما قالي بنتزوج تاب و عقل وصاحب الصحبة الطيبة..
كُنت نتمنى يكون حديث عمتي أحسن من هكي..
كنت نستنا فيها تزيد تشكره كنت محتاجة حد يطمنني أكثر
بس كنت نقول انه زي ما ربي هداني ح يهديه
وح ندعيله ونذكر في روحي بالحديث يلي يقول
" لا يغير القدر إلا الدعاء"
شفت لأمي يلي كانت تشوف للبساط بكل حزن..
وكأنه هوا يلي بيتزوح مش اني
امي : ان شاء الله خير إن شاء الله خير
عمتي : إن شاء الله.. خلاص كانهذا نكلمك بعدين نتفقوا علي موعد النظرة الشرعية ونكلم خوي بعدها نتفقوا علي موعد الفضانية والعرس يكون نهاية شهر السنة
اني : ااا بالك مزال بكري وله؟
امي : لالا بنيتي هوا هذا
حماة عمتي : ان شاء الله زواج الدهر وربي يباركلكم ونتلاقوا علي خير ان شاء الله
عمتي : اصبري قاعد أحمد ما جاش خليني نروح معاك
حماة عمتي : تفضلي تفضلي
عمتي : بالله ناديلي علي منوبة قوليلها هيا الراجل يستنى برا
أنت تقرأ
غربة في الوطن
Short Story#غربة_في_الوطن.. خامس رواية ليا.. وأول رواية ح نحكي فيها عن الزواج.. وعن الخيانة وعن طعنات الناس يلي حكيتلهم أما أكثر اماكن في جسمك ضعيفة! فا طعنوك منها.. عن الناس يلي اعطيتيهم الأسلحة باش يدافعوا عليك وحاربوك بيها .... عن قصص البنات يلي نسمعوا...
