غربة في الوطن

الجزء الثاني عشر

#غربة_في_الوطن

بقلم : بنية سوق الجمعة 🥀

الجزء الثاني عشر ❄

كانت ٱول مرة نشوف الفرحة في عيونه من ليلة عرسنا 💙
درت الجهاز بس كان خط واحد!
احمد : والترجيع هذا كله ولا كذب ؟!
اني : لا والله مش كذب.. يمكن من الهريسة الفاسدة يلي في الثلاجة!
احمد : لااا حول ولا قوة الا بالله..
شن بندير اني شن بنقول للولاد
اني : اا اما ولاد؟
احمد : ماهو حضرتك لما اتصلتي ورديت عليك واني جنبهم قتلهممم.. توا كيف نقوللهم مرتي تكذب عليا ولا واكلة هريسة فاسدة؟
اني : باهي خلاص
احمد : شنن باهيي خلاص؟ خيرك هكي زي المسبوهه
اني : بطني توجع فيا
احمد : ااهاا اكيد حامل خلي نكلم احمد 107‪
اني : احمد حتى اني نبي صغار زيك راه..
وتشوف فيا ندير في كل يلي نقدر عليه وانته عارف انه الموضوع مش بايدي..
احمد : مش هاميني الصغار لكن معاش توهميني وتوهمي روحك الدكتور قال عندك مشكلة خلاص افهمي... ومعاش تكلميني واني جنب صحابي
وطلع وسكر الباب بالقوة..

الشعور يلي كنت نحس بيه
يهد الحيل
هد رغبتي في كل شيء..
كانوا يلوموا فيا علي شيء لاحول لي فيه ولا قوة

حضنت مخدتي..
يلي بعد سنتين من الزواج.. شهدت علي معارك بيني وبين نفسي وبيني وبين أحمد أكثر من مخدتي الاولى

كنت نحارب في نفسي.. نحارب في عيوني يلي كانت توري فيا في أحمد وهوا يعطي فيا بظهره وقت نبدا محتاجاته
نحارب في وداني يلي كانوا ينقلولي في كلام يجرح جي من أحمد..
و يجي من عيلتي 💙
كانوا يتعمدوا يجرحوني بكلام وكنت ندير في روحي قوية قدامهم..
كنت نكتم في كل كلمة في داخلي
في كل دمعة وفي كل ردة فعل تبين إني متضايقة من يلي قاعد يصير حولي..
كنت كل ما نتظاهر بالقوة من برا نزيد نضعف من داخل
كان شعوري هذا يتكرر في كل نظرة مش حلوة من أحمد
وفي كل كلمة قاسية يقولها..
هذا شيء كنت نكره نبينه لنفسي..
ونحاول نوهم روحي ونطلعله أعذار تانيه
زي " معليشي ضغط شغل ، معليشي مريض ، معليشي طول الوقت وهوا يخدم ، معليشي متعارك مع خوه "..

فيقني من تفكيري هذا صوت رسالة..
رسالة مسنجر جاية من نهى..
قام أحمد التليفون دار روحه بيشوف من مني ومدلهولي

كانت باعتتلي " نايضة؟
اني : اي اي
نهى : خيرك ساهره؟
اني : اهو قاعدة ما احمد ما حسيتش بالوقت
نهى : باهي غر بنسالك كيف حالك؟

وكانها كانت حاسة بيا 💔

اني : الحمدلله كويسة
نهى: يومها قتيلي انك بتمشي للدكتور يوم الخميس شن صار فيه؟
اني : اا اي مشيت كشف عليا وقالي السبت تعالي نقولك شن المشكلة ..
نهى : ايي شن مشيتي؟
اني : لا مشي أحمد.. كنت تعبانه شويا ومشي هوا
نهى : اي وشن طلع... من مني المشكلة؟

شفت رسالتها وما رديتش..
كان الفجر كيف أذن.. نضت صليت.. حتى دعائي كان مش مرتب.. كانت العبرة خانقتني..
احيانا نحس انه كل الوجع يلي سببوهولي الناس.. يقعد عالق في رقبتي... ما يطلعش الا وقت نبكي بصوت عالي وأني ما نبكيش بصوت عالي قدام حد ..
لانهم مشحا يحسوا بيلي نحس بيه..
هذا الشعور يلي خانقني يلي محسسني اني بروحيي شن اسمه! شن يقولوله كيف نوصفه واههم شيء كيف انحيه! ..