#غربة_في_الوطن
بقلم : بنية سوق الجمعة 🥀
الجزء الرابع عشر ❄️
في يوم 1/7/2018..
كانت الساعة 5 الصبح.. كنت نصلي في الفجر..
كملت صلاتي.. وجتني صوت رسالة مسنجر..
كانت من "نهى الفلاني"..
تفاجئت إني كنت فاتحة بحساب احمد وقتها..
فتحت الدردشة وكانت باعته " السلام عليكم.. أهلين أحمد" منذ دقيقة..
ولانه الرسالة جتني في طلبات المراسلة مشحا يجيها اني شفتها..
استنيتها دقيقة و بعتت رسالة تانية
نهى : اني نهى بنت خالة هالة
اكيد حاكيتلك عليا
الصراحة بديت نشوف في هالة متضايقة هلبا الايام هاذم.. حسيتها متغيرة مع الكل
يمكن من مشكلة الحمل
فصل الشحن..
كنت فرحانة واني نقرا في رسائلها.. حسيت قداش ما انها تحبني
يعني لدرجة انها بتكلم راجلي وبتقوله اني متغيرة واكيد بتقوله يتغير معاي ويبدا يعامل فيا احسن 💙
حطيت التليفون في الشحن
مشيت درت قهوة ووليت فتحته..
كانت في 5 رسائل جديدة..
نهى : واني الحق لاحظت عليك حتى إنته التعب..
قلت نهدرز معاك نحاول نلقالكم حل لإني الصراحة يئست مع هالة.
شربت رشفة قهوة ورديت
اني : وعليكم السلام ورحمة الله وبركاته
اي حاكيتلي زوجتي عليك
اهلين بيك
الحق اي متعبتنا قصة الصغار
لو عندك حل او دكتور كويس قوليلي
نهى: فرحانة لانك رديت عليا 💙
قداش ليا نبي ناخدها الخطوة هاذي بس كنت مترددة
خفت تاخد عليا فكرة مش كويسة
اني : لالا حاكيتلي نهى عليك ومقايلتلي انك زي اختها ولا يهمك
نهى : اي كويس
هالة راقدة؟
اني : ايه
نهى : الحق قداش ما مسخفتني..
كمية الادوية يلي تاخد فيها بدي تأثيرها عكسي عليها
اني : اي والله ان شاء الله ربي يباركلي فيها ويرزقنا بالذرية الصالحة
نهى : حتى نفسية هالة تغيرت.. بدت تتصرف في تصرفات غريبة
اني : زي شني؟
كنت نبي نعرف لوين تبي توصل؟
شن هدفها؟ مستحيل تكون نيتها مش صافية معاي.. هاذي نهى نشك في روحي ولا نشك فيها 💙
نهى : بدت اتدير في المشاكل وعصبية زيادة عن اللزوم
اكيد لاحظت حتى انته هالشيء
اني : لالا بالعكس.. حسيتها بدت حنينه اكثر معاي و راده بالها كويس عليا
نهى : كان راده بالها عليك راك ما تكلمش فيا توا😁
مع كل رسالة مع كل كلمة كنت نزيد ننصدم اكثر..
خشيت كذا مرة لملفها الشخصي باش نتأكد هاذي نهى بجديات أو لا؟
علاش تبي تبين لأحمد اني وليت مش طبيعية في جرت الأدوية
بالرغم من إني وقفت عليهم من سنة تقريبا!
اني : ما فهمتش
نهى : ولاشيء
إنته متأكده إنه مشكلة الحمل من هالة؟
اني : ايه متأكد
نهى : معليشي ربي يرزقك بالذرية الصالحة
"يرزقك"!
اني : ان شاء الله..
كنت بسؤال واحد نقدر نعرف نية نهى..
بس كنت خايفة..
كان في شيء لداخل مش مطمني..
اي اني ضعيفة..
ضعيفة لدرجة إني ما نقدرش نواجه حقيقة الناس يلي حولي.. إنه أحمد ما يحبنيش
أو إنه نهى تتقرب لأحمد..
أنت تقرأ
غربة في الوطن
Short Story#غربة_في_الوطن.. خامس رواية ليا.. وأول رواية ح نحكي فيها عن الزواج.. وعن الخيانة وعن طعنات الناس يلي حكيتلهم أما أكثر اماكن في جسمك ضعيفة! فا طعنوك منها.. عن الناس يلي اعطيتيهم الأسلحة باش يدافعوا عليك وحاربوك بيها .... عن قصص البنات يلي نسمعوا...
