غربة في الوطن

الجزء السادس عشر وما قبل الاخير

#غربة_في_الوطن

بقلم : بنية سوق الجمعة 🥀

الجزء السادس عشر  وما قبل الأخير ❄️

كل القوة يلي كانت عندي فرغتها في كف...
علي قد ما كان قوي . ما كانش بقوة الكف يلي عطتهولي هيا..
ما كنتش من الناس يلي تنتقم او تفرغ عصبيتها بالضرب كنت نكتفي بالكلام او  نكتفي بإني نبعد عنك.. يمكن مش بالمسافة.. بس بالتفيكر والحب .. .. وكانت اول مرة نضرب فيها حد....

سمعت صوت شخص تاني طاح..
تلفتت وكانت خالتي
طايحة علي الارض وترجف كلها!
خالتي : اشهد ان لا اله الا الله اشهد ان لا اله الا الله
اني : بسم الله بسم الله
جيبي اميه وسكر يا هناء
امي :وووه علياا ووه علياا تسمعي فياا يا منيررة؟
منيرةة؟
مننييييرة؟
نهى : ماما يا مامااا يا ماما افتحيي عيونك ياا ماما
هاجر : قولي اشهد ان لا اله الا الله
قولي اشهد ان لا اله الا الله
هناء : لا حول ولا قوة الا بالله اشربي يا خالتي قيمي راسك..

كانت امي شادتلها راسها.. حاولت تقيمه بس للاسف كانت مرخيه..
جسمها بارد
ووجها اصفر
سمعنا صوت شهقه...
وكانت روحها تطلع وقتها..

👑 روايٰاتہٰ بٰٰنيٰة سہٰوق الہٰجمعه  👑

بعد يومين
نهى : كلهه مننك ياا كلبة كلهه منك
لجين مرت طارق : استهدي بالله يا نهى  عيب هذا عزي امك
نهى : عيييب! عيبب تو علي اساس تعرفه العيبب حسبي الله ونعم الوكيل فيك
يا خنابة الرجالة يا قطاعة الرزق يا قليلة الادب
قتلتيلي اميي حسبي الله ونعم الوكيل فيك
هاجر بصوت واطي: انتي قتلتي امك نهى
لولا العار يلي مدايرتيه لكانت امك توا جنبنا
نهى : هياا خطفت منيي أحمد
قتلها قتلهااا ألف مررة نبهتها قتلهاا يا نهى ما تاخديشي راهو مش كويس يا نهى طلقيييه
ما تبيش
يا خطافة الرجالة يا خطافة الأمهات

" اتذكرت وقت نهى كانت تنصح فيا في نصائح تجرح.. 
تحاول تكرهني في الواقع متعي
تغطي في بصيص الٱمل يلي كان عندي..
كنت نقول" لا هيا تبي مصلحتي ".. بس للاسف كانت تبي مصلحتها فقط ..
ما نعرفش هل كانت تحب احمد من قبل ما نتزوجه.. او فقط حسدتني عليه زي ما حسدتني وقت جبت نسبة أعلى منها في الثانوي.. ومنها قررت تقول لخالتي علي
موضوع سعد.. واكتشفت انها طلعت عليا كلام مش حلو يومها..
وقتلهم اني ندوي معاه في دوة عيب هلبا ونتلاقى معاه..
يعني نهى ما تغيرتش.. نهى كانت هكي من الأول 💙

ما رديتش عليها
كنت حاسة بيها ..
فقد اشخاص حبيتيهم ووثقتي فيهم شيء مش صعب..
يبدو إنه ربي خدالي حقي وانتقاملي بكري بكري..

مزال موضوع احمد فقط..
وح يتم الايام الجاية

👑 روايٰاتہٰ بٰٰنيٰة سہٰوق الہٰجمعه  👑

بعد شهر من العزي :
اني : بدلل ما  اتدس هالفلوس.. اشريلي اثات كويسة.. نكملوا تفريش الشقة.. حوايج ماكلة زي الناسس خيرني شن ناقصنيي
هوا : شن ناقصك؟
بعد هذا كله تقوليلي شن ناقصك؟
تيي والله يا هالة
لولا بوك الحيوان وبوي يلي لعبولنا في حياتنا
تي رانيي مطلقك من اول يوم
كرهتني في عيشتي بدييت نشووف في الدنيا سوودة من وراك
اني : تشووف فيها سوودة من الحشيش يلي تاكل فيهه ووتعرفف مزااال توصلل في بويي.. اقسم بالله...
قاطعني
هوا : شن بتديري؟
بتطلبي الطلاق؟
اني : اي نطلب الطلاق اي..  هالة  الضعيفة مشتت  من زماان
هوا : ومن بيرضى بيك؟
رايح منظرك تقول وحدة مربية ستة صغار
وهيا ما فيش بيبي قعد في بطنها 5 شهور
مني بيرضى بيك مننيي؟
اني : الرجالللة مش كل شيء في الدنيا..  كان انته تحساب روحك مخلوق باش تعاكس النساوين.. فا اني مخلوقة باش نعبد ربي
هوا : مش كل شيء في الدنيا؟
تي هوا اني نرقد في الصالون انوض الصبح نلقاك تبكي زي الكلبة..
تبي تعيشي من غير راجل باقي حياتك؟
اني : حسستني انك راجل يعني
تي ماك عقاب واحد رخيص حتى بنت عمرها 6 تخطم في الشارع يبدا قريب ياكلها!
بعدين.. الكلاب وفية.. الكلاب اقل شيء عندها مشاعر
تخيل حتى بعد ما يموتوا صحابها تقعد تزور فيهم في قبورهم... تي حتى نص كلب ما تكسابه
مش انته قتلتني وردمتني واني حية
تذكر اخر مرة قتلي كلمة حلوة امتى؟
ما تذكرش..
تعرف علاش؟
لانه مافيييش!
تذكر امتى اخر مرة رقدنا جنب بعض؟
من لما قتلي بطلي الدوايات وليتي زي المهبولة!
كذّبت روحي كذبت وداني وكذبت عيوني
طلعتلك الف عذر
قلت تو يتغير قلت معاه حق
لكن اني خسرت روحي واني ندور عليك!
احمد : خسرتي روحك!
تي تحسابيني عمري ما طلبت الطلاق وفتحت الموضوع للعيلة!
كله باش تعيشوا إنتم في حوش هكي كبره.. قاععد اني نعاني
اني : حوش شني؟
هوا : تي شن دار روحك مش فاهمه..
مش عارفه انه بوك باعكم باش يسكنكم في الڤيلا يلي ساكنين فيها!
اني : ڤيلة شني؟
علاش باعنا؟
هوا : تستغبي عليا؟
تبي نركك كف زي متع امس ولا شني
اني : غر جرب تمد ايدك علياا بسس.. تي والله لما نلم عليك الجيران
ارفعني لحوش اهلي..
احمد : سحيقة.. حتى اني معاش متحملك وتي روحك وتي..
لبست عبايتي ووشاحي  خديت معاي شنطة فيها شوية حوايج ومشيت..

طقطقت وفتحتلي امي  الباب..

اني : السلام عليكم
امي : وعليكم السلام
امي : خيرك يا بنتي وجهك أصفر
اني : احمد يقول في كلام مش مفهموم
امي : زي شني يعني
اني : قالي بوي باعنا علي خاطر الحوش.. ابصر خيره

شافتلي امي وشافت للأرض بكل حزن
اني : خيرك امي؟
امي : الكلام يلي قاله احمد صح يا بنتي..
بوكم باعكم من قبل ما تنخلقي يا بنتي
اني : شن تقولي ياا امي  فهميني
امي : هالحوش هذا عنده قصة يا بنتي
وهوا يلي خلى حياتكم هكي
اني : قصة شني؟
امي : عام1988  قبل سنة من زواجنا اني وبوك
كان بأسم راجل عمتك  صالح..
كان وقتها بوك ما عنده شيء..
شافني واعجب بيا.. جي طلبني بس عيلتي رفضوه لانه ما عنده شيء..
عرض عليه راجل عمتك انه ياخد الحوش هذا.. وبالبلاش وقتها.. وطبعا وقتها كان حاجة كبيرة هلبا
بشرط واحد..
وهوا انه يزوج البنات يلي بيجيبهم لولاده وكانه ما دارش هالشي بيرفع فيه قضية ولانه محامي طبعا بوك ح يخسر ..
بوك لانه كان بيتزوجني قال باهي
وقال تو مع الوقت و20 سنة تانية ينسى ولا يموت راجل عمك صالح
جي خطبني وتزوجنا
وجبت بنت.. و من اول ما جبتها قال انها لسيف
وجبت هاجر وجبتك انتي..
وهند ما عندهاش حصة في ولاد عمتها

كل الاسئلة يلي كانت في راسي تجاوبت، 💙 علاش هكي كان عرس هناء..، وعلاش ما كانتش فرحانة.. وعلاش وقت اتطلقت قالت جملة ما قدرتش ننساها... لما قاللها بوي "تعرفي الحوش يلي راجعتيله حوش مني؟
قتله  : حوشنا!
وحنييي دافعين حقققه! "..
وعلاش هناء ما سامحتش بوي يومها وعلاش ضربها كف حتى... علاش امي كانت ترفض في الخطابة وعلاش عمتي ما كانتش راضية بيلي صاير..

اني : لا حول ولا قوة الا بالله
لا حول ولا قوة الا بالله
معقولة يا امي هذاا وين نسمع!
يا امي حرام عليكم!
اقل شيء كنتوا قلتولي ما نرفعش سقف توقعاتي
ليه سنين احمد يلمحلي واني نكذب فيه!
علاش ما قتوليش علاش؟
امي : كنا بنقولوك.. بس خفنا وقت تحسي انك اتديري في شيء بالغصب تكرهيه
اني : اي بس اني احمد ما تزوجتاش غصب
امي : وقت قال احمد " اعطوا لهالة حريتها" كانت جملة قالها هوا مش بوه..
من شهور... قالي بوك انك راجل عمتك ما كانش راضي انه احمد ياخد غيرك.. هذا باش ما رفضوش وقت كلمت عمتك وقتلها فيه نصيب
اني : باهي مش حني عندنا فلوس؟
علاش ما نشروش حوش جديد؟
امي : شن فايدة الفلوس؟
هذا وعد وكلمة راجل وبتخش فيه محاكم واحتمال بوك ينسجن لو ما وفاش بيلي قاله..
مش كلمة وفاتت هيا
اني : باهي علاش يعني كان يبينا لولاده من قبل حتى ما نجوا؟ ومن قاله انتي بتجيبي بنات..
امي : هوا قال لبوك لو ما جبتش بنات خلاص حلال عليه.  وعموما فيه ورقة داسها بوك فيها العهد هذا بتفاصيله..
اني : باهي كان تزوجنا واتطلقنا..
امي : هذا يلي مفروض ما يصيرش...
لكن لأنه راجل عمتك نفسه ما ارتحلهاش هناء و دارتلهم مشاكل مسكينه ... قاله عادي تطلق..
اني :دقيقة بس
نفهم من كلامك انه ما نقدرش نتطلق!
امي  : ايه  يا بنيتي
اني :....

يتبع ❤️
👑 روايٰاتہٰ بٰٰنيٰة سہٰوق الہٰجمعه  👑

غدوا ح ينزل أخر جزء من الرواية 💙
استنوها 🌷🌷