قرارات_خاطئة🌹
🔥الحلقة الحادية عشر 11🔥
👑H e m o t k 👑
_______________
عهد كانت واقفة بعيد شوية وتراقب فيهم شبحت قريب خمسة نفار جاين من ورا الحوش وخشو من تالي ولما رجعت شبحت لي باب الحوش لقت فهد ومقدام خشو
عهد : حيي علياا كيف بنديير تواا 😰
خش فهد هوا ومقدام وقعمزو علي الصالون كان في مدخل الحوش
يزن:تفضلو قولو اللي عندكم لاني مش فاضي لازم نطلع
فهد: من الاخر شن تبي باش اطلق
يزن ضحك:انطلق ؟! من بنطلق
فهد :اطلق مرتك ومن غير غبااء لان جايين نتكلمو جديات
جت رسالة لي تليفون فهد طلع نصه من جيبه
وشافله وهوا قاعد يتكلم مع يزن
فهد:يعني هات كلامك من الاخير مانبوش انطولو معاك
يزن:اني مش مطلقها واللي تقدرو اديروه ديروه
فهد ابتسم:يا خوي حني مش جاين نتعاركو معاك وبنت الناس ماقالت فيك شي غلط غير انها معش تقدر الغربة وتبي تروح هدا علاش هربت منك انتو ليكم سنة متزوجين صح
مقدام يشبح لي فهد وحال فمه
فهد شبح لي يزن:صح ولا ؟
يزن:اي صح انتو غير خلوها اتجي واني نتفاهم معاها
فهد:تمام انخلوها اتجي لاكن شن يضمنلنا انك بطلقها
يزن:احمم ااه هي اكيد مشحتقدر تروح لان جواز السفر متاعها عندي وكل اوراقها عندي خلوها تجي نتفاهمو وتاخد وراقها وتمشي
فهد يدور في الحوش بعيونه وحس حد تحرك مقابله
طبس علي الطاولة وخدي طاسة امية عباها
مقدام ماباش يتكلم حس ان فهد يدير في حاجلة
خدي فهد الطاسة وشبح لي يزن :تمام توا حني متفاهمين قولي انت امتى قاعد باش انحاولو نقنعوها اتجي يعني مدامها مرتك في الشرع والقانون ماحدش يقدر يقولك لا
يزن ابتسم:باهي قلت هكي من الاول اني نسحابكم جاين بتقلبوها
فهد ضحك: لا لا شن دخلنا فيكم حني هي طلبتنا في موضوع وحني جينا بنتكلمو معاك فهد عوج ايده وقلب طاسة المية علي رجله اووووو اسف منتبهتش بليتلك الصالون
يزن:مش مشكلة اركب فوق علي ايدك اليمين في الحمام في مجفف
فهد ابتسم ومشي ركب
يزن:تشرب حاجة
مقدام:لا منور صحيت
يزن ارتاح لما سمع شن قاله فهد :لا مايصيرش لازم تاخدو حاجة عصير علي الاقل
مقدام قعد ساكت
ويزن مشي جيهت الكوجينة وقال لي جماعته اطلعو خلاص الموضوع مش زي ماكنت متوقع وخلاهم يمشو لاكن قاللهم خلوكم قراب اول مانبعتلكم رسالة تتصلو بشرطة طول لاي ظرف طارء
الدور اللي خشله فهد كان عبارة علي حمام ومقابلاته دار مفتوحة وبعدها تراس كبير
خش فهد للحمام فتح المجفف وخلاه والع وقام تليفونه كتب رسالة لي عهد تواني وردت عليه زاد بعتلها رسالة تانية وحط تليفونه في جيبه ومشي ع السريع للدار فتح الدولاب وبدي يفتش يبي يدور اي ورقة فتح قجر لقاه معبي ورق قام اول ورقة لقاها خدمته قعد يقلب ع السريع لين طاحت في ايده ورقة عقد الزواج كانو زوز مدبسات في بعض وحدة بلعربي وحدة بلانجليزي طبقها ودسها في جيبه وكيف بيكمل تدوير سمع صوت في الدروج صكر الدولاب وطلع بسرعة وقف في الحمام وشد المجفف
مقدام:فههد
فهد :هوا انت
مقدام يفنص :هيا عطلنااا
جي يزن:شني جف
فهد:اي اي مية مية صحيت
أنت تقرأ
قرارات خاطئة 🌷
Ficción General《الرواية بلهجة الليبية 🇱🇾》 اتزوجته باش نهرب من روتين حياتي الممل مافكرتش في شي غير الطمع ان بنسافر وبنعيش حياة جديدة ماكنتش نعرف ان هكي بيصير فيا ...💔 _______
