قرارات خاطئة 🌷

الحلقة 6

#قرارات_خاطئة🌷
🔥الحلقة السادسة6🔥

👑H e m o t k 👑

______________________

درس يزن السيارة وشبح لي امال:احمم انزلو هي

نزلت امال:مش قبل يقولو التأشيرة يديرو فيها من تونس
يزن:لا هادي واسطات واحد صاحبي بيخدمها
امال:باهي كويس

خشت عهد هيا وامها لي مكان كانو يصورو فيه في الجوازات قعمزت تراجي شوية وبعدين نادو عليها خشت صورت وطلعت ركبو في السيارة

امال:توا كيف بتندارلها تأشيرة
يزن:مش قتلك صاحبي بيخدمها يعني بيبعت لي واحد غادي في تونس صورتها ومعلوماتها وهوا بيقدملها علي التأشيرة
امال:بيبعتهم بلمنضومة
يزن :: اي
امال :هوا جواز عهد قريب يطيح تقريبا
يزن:اي قالي الولد مش مشكلة هي بتقيم غادي ماعندها مابدير بيه
عهد الطريق كلها ساكتة وامال تهدرز هي ويزن

شوية ووصلو قدام الحوش لقو مصطفى واقف شبحلهم وهوا قارن حواجبه وخش
امال:هي بسلامة صحيت
يزن: سلمك
ونزلت

عهد :بسلامة نتلاقو علي الخير
يزن:ااء عهد
عهد شبحتله:نعم
يزن طلع ربطة من جيبه مدهالها
عهد:لا لا صحيت عندي
يزن:خوديهم مرات تستحقي تاخدي حاجة
عهد:والله لا اني ...
يزن:خلاص عاد مش بيناتنا انتي خطيبتي وبعد شهور بتولي مرتي
عهد ابتسمت وخدتهم منه :صحيت بارك الله فيك
وفتحت الباب ونزلت
يزن تنهد بي ملل ومشي

خشت عهد للحوش تسمع في امها تتناقش هياا ومصطفى

مصطفى :طالعة معاه زي الفاسدة لا شيرة لا مشاورة هكي تو يبانلها
امال:لااا كترتها هكي بنتي طاالعة اني معااها وجت شااورتني قبل اي حد اني امها واني مسؤلة عليها
مصطفى علا صوته اكتر :مرة تااانية تطلع معااه معش ترووحيلي لا انتي لا هياا فااهمةة
عهد ولعت خلاص وماقدرتش تتحمل ان خالها يعيط علي امها هكي
عهد:اول حااجة اني مش فاااسدة وامي هني قااعدة في حوش بوها يعني تخش وتطلع امتى ماتبي وماااانسمحلكش تعيط عليها بطريقة هادي حني مغلطنااش وعمرنا مادرنا الغلط
مصطفى قعد يشبحلها بغيض وعطااها كف :اخرلك مرة تقللي ادبك عليا تسمعي فيااا 😡
سميرة جت تجري دفاته وشدت عهد :علاش هكي البنت ماقالتش شي غلط مشت بتصور لي التأشيرة وامها معاها ماهربتش هروب يااعليك جهللل بري بنتي بري خشي امشي
قعدت عهد شادة خدها وعيونها دمووع شبحت لي خاالها وهي قارنة حواجبها وتحسبت فيه من وسط قلبهااا ومشت خشت للدار ومشو البنات وراها

امال:اني يوم اللي نضت الصبح لقيت راجلي مهناش جيت لي حوش بوي وماندليتش عند حد صرفت من فلوسي وماتسخفتش لي حد ربيت بنااتي احسن ربااية ولا اليوم ماداروش حاجة توطيلي راسي منهم ربيتهم علي انك خالهم وزي بوهم وكلمتك ديمة مسموعة وعمرهم ماعلو صوتهم عليك ولا قامو عين فيك لااكن انت عمرك ماعتبرتهم صغارك ولا وديتلهم الخير حتى تواا جي عريس لي بنتي رفضته وقتلي لزيهم ولما جي عريس لي بنتك وافقت وضحكت من عيونك علاش بس علاش هدا كله صفي قلبك ياا وخي راهو كلنا نهااينتا في شبرين ومادايما لي حد
سميرة:تعالي وخيتي تعالي معش تحرقي دمك تو يرتفعلك الضغط هوني بنيتك بتسافر برا ربي يهنيها ورفعتها لي دارها تعدي فيها
ومصطفى فتح الباب وطلع