قرارات خاطئة 🌷

14

س#قرارات_خاطئة🌷
🔥الحلقة الرابعة عشر 14🔥

(القصة والسيناريو والاشخاص من وحي الخيال ولا تبث للواقع بي اي صلة ( غير حقيقية ) 🚫)

كل مانعطي موعد للحلقة يهرب النت يتم اشتراكي يصير بلاك اووت ف خلو الموضع مفاجأ خير😂😂

👑H e m o t k 👑
_______________

عند النساوين داخل

خشت وعد وايات شادين القهوة والحلاوات فرقو علي النساوين وطلعو

نجمة:تبي الحق منين قالي عيسى بنت مصطفى ال### فرحت طول قلت انشاء الله تطلع زي عمتها
امال ابتسمت:سلمك ياربي
حواء ام ركان:حق زمان كل مانمشي لي حوش عمتي نلقا فيك عندهم
امال:كانو يسكنو بحدانا بعدين حولو هدا علاش تفارقنا حني
عمت مقدام بدرية: والله ديمة نحكي لي صغاري علينا زمان كيف كنا
امال:لقيت ولدك يا حواء في العيادة يوم اللي مرضت بارك الله فيه مسكين والله ماخلاني
حواء ضحكت :اي حكالي
شرين تليفون اخت مقدام
وجدان:الوو
مقدام:انخش ولا شني مافي حد برا
وجدان:حقاا باهي لحظة بس تو نسأل ماما ...ماما مقدام برا قال مافي حد
نجمة:ااه حي باهي تو انقول لي سميرة وتلفتتلها
سميرة :مقدام جي قال مافي حد برا
سميرة:مصطفى براقوله طقطق ع الباب
نوضي يا اسلام اطلعي لي بابا قوليله
ناضت اسلام فتحت الباب وطلعت ملقت حد
مشت فتحت الباب الرئيسي لي مقدام
مقدام تلفت وابتسملها:اهلا
اسلام:مدت ايدها سلمت عليه :خش بابا مش في الحنان مش عارفة وين مشي
مقدام :لا لا خلي يجي بوك قبل بعدين انخش هي صكري الباب وخشي هي
اسلام:عادي حتى عهد لما جي واحد بيخبطها بابا طلع واني قعمزت معاهم
مقدام ضحك:والله لاحق هوا خبطها

درس باسط ونزل من السيارة وهوا متوتر :السلام عليكم
مقدام:وعليكم السلام . وسلم عليه
باسط:هي تفضل خش هي
مقدام خش :امالا وين عمي مصطفى
باسط:والله مصطفى طلعله موضوع ضروري مايتأجلش اطر يطلع واتصل بيا
اسلام:اهوا تليفون بابا هني يا عمي
باسط خداه منها :بري خشي امشي وقولي لي اختك تطلع
مقدام حس في حاجة صايرة لاكن خش وخلاص

قعمز ويهدرز مع باسط كل مرة كلمة لين فاتت خمسة دقايق طقطق باب المربوعة وخشت ايات
مقدام علي اساس راسه لوطة ومتحشم
ايات:السلام عليكم
مقدام :وعليكم السلام
باسط:خشي قعمزي خشي
ايات عطت القهوة وقعمزت
باسط طلع وخلاهم مع بعض
مقدام شرب من القهوة وحط الفنجال:زعمة مافيها شي القوة
ايات:كيف يعني
مقدام:سحر مثلا باش انوافق
ايات :باش تواافق ؟ علاش مني انت
مقدام:من اولها عاد انبصر خيرك
ايات:والله اللي بيبدا يتحمل مايجيه
مقدام:يعني كل مابنقولك حاجة بتهزبيني
ايات:وانت علاش اتقول في حاجات تخليني انهزبك هدرز عادي مش لازم اطول لسانك
مقدام قام القوة وشرب تاني :ياستي هاا حتى كان فيها سحر اني موافق ننسحر
ايات ضحكت وهزت راسها
مقدام:هي احكيلي عليك شوية عاد انتي خديتي انفرميش تام عليا من الفرخة عهد
ايات: ضحكت:شن تبي تعرف
مقدام:قولي اللي خاطرك اتقوليهولي كله
ايات:تمام طبعا اسمي عارفه ومواليدي 97 نقرا هندسة كيميائية اكبر طموح في حياتي ان نتخرج ونخدم الشي اللي قريته وتعبت فيه
مقدام يشبحلها وساكت :هدا هوا بس
ايات:طبعا لوصار نصيب بينااتنا اول حاجة نبيك اتكون متفهم معاي يعني اني بابا شخصيته صاعبة ومش متفهم ياخد ف كل شي بلعصبية والعياط طول مايعطيكش فرصة تتكلم واني مانبيش الراجل اللي بنكمل حياتي معاه يكون هكي يعني انحب حد ياخد ويعطي معاي
مقدام يشبحلها وساكت
ايات :احمم اي وو نبي نحكيلك حاجة
مقدام عدل تقعميزته وهز راسه :نسمع
ايات:حني من قبل عرس عهد ماكناش ساكنين هني يعني بعد عرسها حولنا والسبب في محوالتنا كان اني
مقدام :كيف يعني
ايات توترت : اني كنت مصورة في تليفون بنت جيرانا صور عاديات يعني وكنت بي وشاحي وبعد فترة تعاركت معاها وهي عطت الصور لي خوها وبعتهم لي بابا وصارت مشكلة كبيرة
مقدام :امم يعني بوك يحسابك انتي باعتة صورك لي ولد جيرانكم
ايات هزت راسها (كأنها صدقت الكدبة ولا ؟!!😒 )
مقدام فرح انها حكتله الموضوع من الاول وماكدبتش عليه :تماام توا خلي اني انقولك اللي عندي لاني لازم نمشي عندي ماندير
ايات تنفست وساوت وشاحها ومروحت علي وجهها
مقدام:طبعا ماعنديش مانع في ولا حاجة من اللي قلتيها يعني ااني متفهم هلبا لاكن اني خدمتي كلها برا البلاد مانعرفش لو تقدري تخدمي برا ولا لا المهم اني بنبني حوش هني لان اكيد مش حنقعد طول عمري برا وتاني شي واهم حاجة عندي مانبيش حد يتدخل بيني وبينك يعني اللي يصير بينا يقعد بيان مش لازم كله تحكيه لي اماليك لان هدا اول سبب في المشاكل
ايات: هزت راسها
مقدام طلع تليفونه وعطاهولها اكتبي رقمك هني باش انزيدو انهدرزو علي التليفون
ايات خدت منه التليفون وكتبت رقمها شرينلها مقدام وصكر خزني رقمي
ايات : تمام
مقدام شرب القهوة في مرة وناض وقف :هي انشاء الله عرقوبك خير
ايات ضحكت علي كلامه :انشاءالله
مقدام مد ايده:بسلامة
ايات سلمت :بسلامة 😊
مقدام فتح الباب وطلع
وايات طالعة وراه فرحانة بطير
مشي مقدام وباسط وصله فم الباب وايات خشت