مازلت ملكة فى بيت أبى
----------------------------- الحلقة 24
فى يوم الخطوبة وبعد ما المأذون انتهى من كتب كتاب رامز ومنار وبعد منهم رامى وصفاء وبدأت الاغانى والرقص من الجميع واثناء ما الكل فرحانين وبيرقصوا فاجئة تتوقف الاغانى ويعم السكوت والتعجب والهمس فى وقت واحد
شخص ما لا يعرفه احد او هذا ما تبين لهم فى الاول يمسك المايك 🎤من الدى چى
الشخص:- اولا انا اسفة انى قطعت عليكم الفرح... انا واحد يمكن فى اللى يعرفنى وفى اللى مش طايق يسمع سيرتى حتى
صفاء ومنار:- عادل
عادل:- انا عادل اللى يمكن اغلبكم سمع بحكايتى مع الاستاذة صفاء ( وقبل ان يكمل يجد بوكس فى وشه من رامى يقع على الارض فى الحال)
عادل:- ارجوك اسمعنى ارجوك
عبد الرحمن:- عايز ايه مش كفاية اللى انت عاملته مع الشيطانة اللى كانت فى بيتنا
عادل:- ارجوكم ادونى فرصة بس انا لازم اقول اللى عندى ربنا انتقم لكم منى ( ومسك المايك🎤 تانى) ربنا انتقم منى فى اغلى انسانة عندى الاول انا عايز احكى من اول يوم دخلت فيه البيت دا ( ويشاور على بيت صفاء) بس من فضلكم سيبونى اكمل للنهاية من غير ما حد يقاطعنى
رامى:- بعصبية.... انجز يا زفت انت بدل ما اموتك
عبد الرحمن:- اهدا بس يا رامى وخلينا نشوف اخرته ايه
رامى:- اخرته سودة على دماغه ان شاء الله
عبد الرحمن:- اتفضل بقا خلصنا وسيب البتاع دا من ايدك (يقصد المايك 🎤)
عادل:-معلش بعد اذنك ان عايز كل الناس اللى هنا تسمع وتعرف الحقيقة كلها..... انا اول مره دخلت البيت مكنتش اعرف ان الاستاذة صفاء ساكنة هنا او انها تقرب ل رضوى وبالصدفة عرفت اما اقبلتها وهى طالعة البيت وانا افتكرتها بتدى رضوى درس هى كمان
فلاش باك
عادل:- وهو نازل من عند رضوى بعد ما خلص الدرس تقابل مع صفاء وهى طالعة البيت.... عادل:- اهلا اهلا بالاستاذة اللى مش بتدى دروس خالص
صفاء:- بتعجب من طريقة كلامه.... اهلا انت بتعمل ايه هنا
عادل:- وهو يقرب منها..... نفس اللى انتى جايه تعمليه بالظبط
صفاء:- وهى تبتعد عنه... والله وايه هو اللى انا جايه اعمله حضرتك
عادل:- جاية تدى رضوى درس طبعآ
صفاء:- طيب ودى فيها ايه... هو ممنوع انى اذاكر لبنت عمى ولا ايه
عادل:- بنت عمك... هى مين دى
صفاء:- وهى تدخل شقتهم..... رضوى طبعآ وتدخل وتغلق الباب دون ان تعيره اى اهتمام
انتهاء الفلاش باك
عادل:- ومن يومها وانا اعجابى بيها ذات وفى نفس الوقت عايز اكسر مناخرها اللى رافعاها فى السما.... وقتها غيرت معاد الحصص وخليتها بعد معاد المدرسة.... وطبعآ دا علشان اقدر اقابلها وهى راجعة لكن هى كانت دايمن تصدنى وتمشى مع زملتها الاستاذة منار..... وفى يوم وانا بحاول معاها شافتنا ولاء اللى كانت مرات رامز... وبعد ما روحت البيت ادى الدرس عرضت عليا تساعدنى انى اوصل لصفاء وفضلت تلعب عليا مرة ورا مرة واخدت رقم تلفونى وبقت تتكلم معايا واتس وتفتح الكاميرا وكانت بتكون بملابس خاصة شوية
عبد الرحمن:- يابنى اختصر فى الكلام وبلاش اعراض الناس
عادل:- حاضر... المهم اننا اقمنا علاقة على التلفون وبعد كدا بقت تبعت صوارها بأشكال مختلفة وانا استغليت دا لصالحى علشان تعمل اى حاجه انا عاوزها.... المهم جات فى يوم اتصلت بيه وقالت لي على خطوبة صفاء ورامى وطبعآ هى كانت هتموت على رامى وهو ولا معبرها واتغاظت اما اتقدم لصفا وطلبت منى انى لازم اتصرف وبدأنا من هنا نخطط للى هنعمله فى صفاء والصورة اللى هنبعتها ل رامى وحصل وبعتنا الصور بس انا فى الوقت دا كنت اتكشفت وقدرت صفاء تكشفنى فى المدرسة واترفد من النقابة بعد التحقيق واراد المولى عز وجل ان يشاء ويحصل ل اختى نفس اللى كان هيحصل لصفاء وواحد ضحك عليها وعمل عملته وهرب وهى ما استحملتش اللى حصل وانتحرت وهى الوحيده اللى كانت فضلة من اهلى... انا كدا خلصت كل اللى عندى واتمنى انكم تسمحونى علشان ربنا يسامحنى
عبد الرحمن:- لا حولا ولا قوة إلا بالله..... روح يا بنى اتكل على الله ربنا يكفينا شر وسوء الناس اللى زى كدا وافتكر دايما ان كما تدين تدان
عادل:- ببكاء شديد وهو يهز راسه ويتركهم ويرحل
وبعد ما رحل عادل وخرج من حياتهم الى الابد
عم محمد (فاكرينوا اللى بيكون مع عبد الرحمن فى المحل بتاعه) الحمد لله الحق ظهر اهو رغم اننا كلنا كنا متاكدين من اللى حصل بس اهو علشان اى لسان لسه بيتكلم يتخرس خالص..... ويلا بقا نكمل فرحنا يلا يا ستات سمعونا زغروطة.... وانت يا بنى شغل الاغانى علشان انا النهاردة هرقص للصبح.... وتبدأ الاغانى والرقص من الجميع الا العرايس والعرسان
صفاء:- ببكاء... الف حمد وشكر ليك يارب انا كنت هموت من الخوف اول ما شفته ومكنتش عارفه اتكلم ولا اقول اى كلمة
منار:- ببكاء أيضاً..... انا كمان كنت خايفه بردو بس مش منه لا كنت خايفه من رامى لا يعمل مصيبة ويقلب الفرح لميتم
رامى:- انتى بتقولى فيها انا فعلاً كنت عايز اموته اول ما قال اسمه وعرفته لولا عمى حشنى منه كان زمانه ميت
صفاء:- اه وتودى نفسك فى مصيبة علشان واحد ما يستهلش
منار:- بس بصراحه اخته صعبت عليا اوى حرام دى كانت صغيرة
صفاء:- انتى تعرفيها ولا ايه
منار:- كانت طالبة فى المدرسة وخلصت من سنتين تقريباً
صفاء:- الله يرحمها ويسمحها بقا
عبد الرحمن:- مش كفاية كلام وتقومه تهيصوا مع الناس ولا ايه
رامى؛- ايو يلا بينا بقا دا انا هعمل زى عم محمد وارقص للصبح...يلا يا رامز
رامز:- لا رد
رامى:- رامز انت سامعنى
رامز:- لا رد
منار:- رامز وهى تهز كتفه رامز
رامز:- ايو يا منار فى حاجه
رامى:- قوم يا رامز وانسى كل حاجه ربنا انتقم منهم هما الاتنين
صفاء:- انسى يا رامز علشان تقدر تعيش وتبدأ حياتك الجديدة.... والحمد لله ان دا حصل علشان تتعرف على البت الموزة دى وتغمز له 😉
رامز؛- بضحك... احلى موزة والله
رامى:- طيب يلا يا عم الحبيب الناس هتولع فينا ويقومه يرقصوا وينسجموا مع الاغانى والرقص وكل واحد يرقص مع عروسته سلوه رغم اعتراضهم ان الفرح فى الشارع ومينفعش.... لكن رامى اصر ورامز شجعه
وينتهى الفرح على خير بعد ما الشر انتهى والحق ظهر وانتصر والقلوب اتجمعت على خير وحب وسعادة.... وذهبا العرسان ومعهم رضوى... وعزت... وعلي اخو عزت... وولاء..... وزوجها أحمد...وابنتهم مكة..... ووفاء اخت صفاء...هى واولادها التى وصلت قبل يومين لتحضر خطوبة صفاء...... ولتكملت الاحتفال بشقة ام منار حتى تستطيع ان تثبت ان ابنتها تزوجت. ...... وبعد مرور الوقت حتى بعد منتصف الليل بوقت كبير ذهبا الكل الى. منازلهم.... وانتهى اليوم على بداية حب جديد (هنعرف بعدين)
____________________________________
وتمر الايام وتظهر ناتيجة الثانوية العامة وتنجح رضوى بمجموع عالى لتحقق حلمها بدخول كلية الطب...... وتلتحق بالكلية وتبدأ مشوارها الطويل...... وينتهى رامز من تغير بعض محتوايات الشقه وتغير الوان الحوائط على زوق منار .... مع تجهيزات شقة رامى ايضآ ولكن تنتهى شقة رامز فى الاول.... ويتفقا على معاد الدخلة قبل بداية العام الدراسى الجديد حتى تستطيع وفاء واولادها حضور الفرح قبل السفر .... ويتم عمل فرح رائع وجميل من اجمل ما يكون وكانت منار فى اجمل صورة بفستانها الاببض وعيونها البنى اللى بلون القهوة وحجابها الجميل اما رامز كان امير فى يوم تتويجه على العرش ببدلته الرمادى التى تشبيه لون عيونه.... وتم الفرح على خير وسافر رامز ومنار الى شرم الشيخ لقضاء اسبوع عسل.... وسافر رامى ايضآ الى عمله..... وعبد الرحمن مازل يهتم بتجهيز شقة رامى حتى تنهى قبل اجازة نصف العام الجديد الذى سيبدأ بعد ايام قليلة...... وتسافر وفاء واولادها الى زوجها حتى يلحق اولادها العام الدراسى من اوله
ويرجع رامز ومنار من اسبوع العسل الخاص بيهم وكانت ام منار وصفاء ورضوى فى انتظارهم
وبعد السلام الكتير والتهنئ بالوصول اخذت ام منار. منار الى داخل غرفتها لتسألها بعض الاسئلة ( كاى ام مصرية اصيلة هههههههههههه)
سهير:- ها طمنينى عليكى عملتوا ايه
منار:- تمام الحمد لله اتبسطنا اوى
سهير:- ايو يعنى عمل معاكى ايه
منار:-بغباء.... هيعمل ايه يعنى يا ماما فسحنى وفرجنى على شرم كلها ونزلنا البحر هنعمل ايه يعنى
سهير:- انتى يابت هبلة ولا شكلك كدا دا انتى حتى مش صغيرة وفاهمة كل حاجه
منار:- بخجل.... كل تمام يا ماما
سهير:- يعنى دخلتى خلاص
منار:- وبعدين معاكى يا ماما ما قولتلك كله تمام.... ويلا علشان نقعد معاهم بقا
سهير:- طيب يلا الحمد لله اطمنت عليكي
ويخرجوا الى مكان وجود صفاء ورامز ورضوى
ويمر الوقت سريعآ ويطلع لهم عبد الرحمن علشان الغدا النهاردة فى شقة رامز...... وولاء رجعت شقتها بعد ان اطمئنت على وضع الجنين
....... وبعد الغداء ذهبت ام منار الى بيتها ونزل عبد الرحمن ليوصلها
اما صفاء ورضوى نزلوا الى شقة عبد الرحمن (فامنذ زواج رامز رضوى تقيم فى شقة عمها ) وترك العرسان براحتهم ليرتاحوا 😉😉
________________________________________
وارتاح انا كمان ويارب الحلقة تعجبكم واشوفكم الحلقة الجاية على خير
والله انا تعبت من الحلقة دى اوى من الفجر وانا بحاول انزل فيها يمكن نزلتها اكتر من عشرين مرة وبردو مش عارفه انزلها انا تعبت والله منها ودى اخر محاولة هعملها ويا رب تنزل
يارب اشوف تفاعل على قد تعبى اللى تعبته النهاردة
مع تحياتى كوثر محمد
