النِهايـــة بدايـــه ، والقَــفلــة نُقطـه علي نهايــة سطــر عِــشق بــداء في بِــلاد حُــروبِهـا لا تنتّٰــــهي 🥀🍃
سلسلة عشق في بلاد حروبها لا تنتهي تعود لكم بـ جزءها السادس 🎈
كتابة #الياقوت
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
عِــشق فـي بِـلاد حُـروُبِهـــا لا تنتّٰــهي 6 { الـقَـفـلــــة } . . في البارت السابق تلفت مجدي طول وهوا يعافر ويبعد في الامن ويشبح في البنت اللي تبكي وهيا تقرب منه بخطوات متعتره برجلين خانوها وماعاد شالوها وطاحت وهيا تحس بشي سخون نزل منها خلاها اطبس راسها وتشبح لدم لنزل منها ولوت حوايجها وارضيت المدرسه لكانت اخر شي تشوفه وهيا تفقد في الوعي علي صوت المدرسات والاخصائيات لتلمدو عليها ..............
قراءة ممتعة 💛 البــــ التـ2ـاني ــــارت سلامـــاً علي قُــلوب أرهقتهــا صدمــات الحيـــاة 🥀 . . الدكتور :حالتها استقرت الحمدالله بس نبولها دم فصيلة A+ خسرت دم واجد هز محمد راسه :وكيف حال العيل الدكتور بتسم :لا اخر لحظه كنا بنزلوهن بس ربي رايدهن ينورولكم حياتكم ضيق محمد عيونه في الدكتو لفهم عدم فهمه وقال وهوا يطبطب علي كتف محمد :زوجتك حامل بـ توأم ضحك محمد بـ ستغراب :بس مراجعتها كانت الاسبوع لفات ماجابتش دكتورتها سيره كيف هكي الدكتور :في اغلب الحالات لكيف هكي مايوضحوش الا في الاسابيع الاخيره وحاولنا نعرفو جنسهم بس جايين عكس بعض ونازلين نهاية الرحم واااجد بسبب وعكتها الصحيه محمد :مافيش خظر عليها الدكتور :نقولو ان شاءالله ولادتها احتمال حـ تكون ولاده مبكره وفي سنها الصغير حـ تكون صاعبه شوي بس ان شاءالله خير وتو نحتاجو دم في اسرع وقت هز محمد راسه بتنهيده من كلام الدكتور لمشي بعد ماضايق قلبه وخلاه يتلفت وهوا يطلع تليفونه من جيبه واتصل بـ سفيان لـ رد عليه من اول رنه :كيف بنتصل بنقولك غدوة جاي مسح محمد بقفا يده علي جبهته وهوا يبعد في التليفون ويشوف في سالم لخش عليه انتظار ورجع رد علي سفيان :كان فيه رحلات اليوم تعالا اليوم سفيان قرن حواجبه من صوت محمد المخنوق وقال :مافتحوش الرحلات بنجي في السياره ، وخيرك شن فيه محمد :مجدي فركس الدنيا ياسفيان سفيان :تمام تمام نشوف زياد وكان هدا نطلعو اني وياه من توا سكر محمد من سفيان ورد علي سالم لجاه صوته :ايوه محمد وينك محمد قرن حواجبه :كنك شني فيه سالم :امي تعبت واجد وشلناها للمستشفي حس محمد بـ الدنيا لـ لفت بيه وهوا يسند في روحه علي الحيط :كيف سالم :طاحت علينا فجأة وصارت حوسه حاولت نتصل بيك مارديتش اتصلت بـ مراد وشلناها نا وياه وجدي خدي محمد نفسه ووقف علي حيله :في اما مستشفي سالم :في #### محمد مسح علي لحيته وسكت لـ لحظات بـ تفكير ملخبط وبعدها قال :شن فصيلة دمك سالم ستغرب :A+ ممكن عليش شن فيه محمد :تعالا انت ومراد لـ مستشفي ### غاليه تبي دم نا تو نتخطاكم ونعدي لـ أمي سالم حط يده علي راسه لين خلا مراد لمقعمز جنب عبدالسلام لمحاوط راسه بديه بخوف علي رقيه ، وقرب من سالم وقال :شن فيه سالم رد علي محمد :تمام نحنا جايين وسكر منه وتلفت لـ مراد لضيق عيونه :خير ان شاءالله سالم :مرت محمد تعبت وتبي دم قالي تعالا انت ومراد لـ ### وهوا جاي هنا مراد :لا حولي ولا قوة الا بالله كلها في مره وحده تمام هيا عدي سالم :اسبقني مغير نقول لجدي مراد :تمام . . . فــي #طـرابلـــس 💛 نزلت من السياره وهيا تصيح :باهي يابابا اهو تو انزلهم اني برا لخدمتك انت ونفخت وهيا تفتح في باب السياره التالاني ونزلت لبارز التقال وحطتهم قدام باب حوشهم وتلفتت رفعت يدها لبوها :خلاص برا تو ندخلهم الحاج فتحي :قولي لـ أمك متغذي عند حوش عمك فرح :حاضر مشي فتحي وخلا فرح لـ نفخت وهيا اطق علي باب الجنان بـ كل قوتها بـ تنقريز منها وهيا متكمشه في بعضها من الصقع تحت نظرات سراج لـ كيف درس سيارته قدام الحوش وقعد يشبحلها كيف اطق وتنفخ وهيا تتلفت حولينها تقول خايفه واول ماجت عينها في عينه قعدت تشبحله لـ لحظه واول مابتسملها وهوا يأشرلها بـ يده بـ معني كلميني قرنت حواجبها وتلفتت علي فتحت باب الجنان وهيا تصيح علي خوها عمر :ساعه باش تفتحو عمر :تي احمدي ربك سمعناك ، خيرك ماشرينتيش بالجرس فرح طبست شدت لبارز لمدت منهم لـ عمر وقالت :مش فاسد عمر :صلحته اني وبوي فرح :وين نندري عليه اني نوحي خيركم ماقلتوش ونفخت وتلفتت سكرت الباب بكل قوتها لقبل ماتسكره زادت ضيقت عيونها لـ سراج لضحك علي حركاتها الغريبه اتجاهه . . لـ كُــل شي بديــل ، " لـ كُــل شــي " ، عــادا لـ تـلكـ الـتي الجنــه تحـت أقدامهــا 🥀 . . فـــي #بـنغـــــازي 💛 مسحت ميسم دموعها وهيا تقرب من هداية لحطت يدها علي فمها بشهقه:كنك ماما فيها حاجه هداية ردت علي مراد لمعاها علي خط التليفون :وكيف حالها توا مراد :الحمدالله وسالم كيف خش بيتبرعلها بالدم تنهدت هداية :كله في مره وحده لطفك ياربي وخلاص وشن حال امي مراد :نحنا جينا لغاليه ومحمد عدالها ، خلينا جدي في حاله سكري مغير نتصل بـ محمد نشوفهم هداية :وبالله ظمني شن يصير سكر مراد من هداية واتصل بـ محمد لـ سكر الخط في وجهه وقرب من جده لـ واقف علي الدكتور:السلام عليكم ردو عليه سلامه بـ ملامح عابسه خلت محمد يقرن حواجبه بضيق زاد علي قلبه وقال:كيف حالها الدكتور :درنا لـي علينا نحنا ، لو مصار اي مضاعفات وتخطت الـ 48 ساعه الجايه علي خير نقدرو نقولو الحمدالله عبدالسلام :باهي شن لصارلها ياباتي الدكتور :ياباتي الحاجه تعرضة لسكته قلبيه حاوط محمد وجهه بديه الزوز وهوا ياخد في نفسه لـ لحظه وبعدها حول يديه وقال :نقدرو نشوفوها الدكتور :شوي وتوعي وتقدرو تخشولها هز محمد راسه :شكراً مشي الدكتور وخلا محمد لشبح لجده لـ قعمز علي الكراسي لقدام العيناية ورجع تلفت لـ الممرضه لطلعت من عند أمه لوقفها قبل ماتمشي :لو سمحتي تلفتتله الممرضه :تفضل محمد :وعت الممرضه :ايه نشيلوها لغرفه لخرا وتقدرو تحقوها بس ممنوع اطولو عشان ماتتعب واجد محمد :بارك الله فيكه . . تَــــركتنـي أنــزف نـدم علي جرحــي لكـ 🩸🥀 . . فـــي #طـرابلــــس 💛 حطت ايلاف صفرة القهوي علي الطاوله وقعمزت وهيا تشبح لـ صفاء لـ نفخت :خيرك صفاء :من امبكري نحاول مع غاليه وماتردش ايلاف :بالك راقده صفاء :تي هدي حتي في عز نومها لما يشرين التليفون تنوض تفز ضحكت ايلاف :تو شوي وتلقيها متصله جربي مع روان قالت بتجي صفاء :توا كيف كنت نكلم فيها قالت في الطريق تنهدت ايلاف وخدت فنجان القهوه لرشفت منه تحت انظار صفاء لرفعت حاجبها :خيره جوك مش تمام اليوم حطت ايلاف فنجان القهوه علي الطاوله قدامها وقالت وهيا تشبح للفنجان:شفته الصبح نفخت صفاء :اووووف بتقعدي كل ماتشوفيه هكي بديري ليك سنه كل ماتشوفيه ولا تلمحيه تقلبيها نكد مايصيرش هكي عاد ايلاف :مش قادره ننساه ولا ننسي خذلاني ليه صفاء :مش خدلان هدا اي شخص في مكانك واللي شاف لشفتيه حـ يدير لدرتيه ويخي اكتر ايلاف هزت راسها :لا المفروض سمعته كان يحلفلي ومتمسك فيا ومهتم يطلع برائته قدامي اني قبل الكل بس اني تخليت عليه وسكرت عليه كل البيبان ودموعها ملو عيونها وشبحت لصفاء وكملت :البيبان اللي زادت تسكرت بينا توا حتي برغم بيان برائته لـ علنه قدام الكل الا انه مش قادره نوصل فيه صفاء :صعب توصلو في بعض حتي كان برئ خوتك مش حـ يعطوك ليه مسحت ايلاف دمعة قهر سالت علي خدها :وحتي كان خوتي رضو هوا خلاص ماعاش يرضي ونزلت عيونها اللي ستسلمو لدموع لنهمرت منهم بوجع مدفون من سنين فيهم . تنهدت صفاء وقربت منها بـ الكرسي وشدت يدها :ربي يعوضك باللي احسن منه واللي ينسيك فيه ياارب وقفت ايلاف وهيا تمسح في دموعها علي صوت شرين جرس الباب :اكيد روان ومشت تجري وخلت صفاء لرجعت اتكت بضهرها علي الكرسي وهيا تعاود اتصال بـ غاليه لـ بعدت يد الممرضه بـ تنقنيق متعب ومرهق تحت نظرات محمد لـ بعد الستار وهوا يشبحلها كيف قالت بصوت هادي تاعب : لالا مافيا شي حولي حولي خلاص الممرضه :لازم نركبه لكي سكرك هابط واجد هزت غاليه راسها :لالا نرتاح تو يتعدل مانبيش اركبه خلاص الممرضه :مغير اهدي لازم نركبه لكي وقبل ماغاليه تزيد تنق وتتكلم خش عليهم محمد لـ اول ماشفاته غاليه عيونها ملوهم الدموع وقالت :حمودي مسح محمد بيده علي جبهته وهوا يوطي في عيونه لوطه اول ماسمع تحمحيم الممرضه لشدت بتسامتها وهيا تنزل في عيونها من علي محمد لـ قرب شد يد غاليه وقال :كنك مش مخليتيها تركبه لكي تنهدت غاليه وهيا تشد في يده بـ القوه :يديا يوجعو من ليبر مش قادره حس محمد بغصه في قلبه من لهجتها التاعبه زي حركاتها ووجها الاصفر وقال وهوا يشبح للممرضه :لازم منه هزت الممرضه راسها :ايه سكرها هابط واجد محمد :اخر واحد وله ماعاش فيه بعده وغمز للممرضه لبتسمت وقالت :ايه ماعاش فيه محمد شبح لـ غاليه :ها اخر واحد وروحو قرنت غاليه حواجبها :شوفتك وانت تغمزلها تضحكوش عليا ضحك محمد مع الممرضه لخدت يد غاليه لـ ستسلمتلها وركبتلها التغديه وقبل ماتطلع وقفها محمد لقال :طلبت ينقلاها لغرفه خاصه بالله زيدي حقيهم الممرضه :حاضر ان شاءالله وطلعت وخلت غاليه تقول :علاش غرفه خاصه مانبيش نبات اني طبس محمد وباسها بين عيونها وبعد مسح علي خدها بيده وقال:نزيدو للعصر بيش نظمن عليكن وبعدين روحو هزت غاليه راسها وهيا تاخد في نفسها وتشبحله كيف بعد تلفت جبد الكرسي وقعمز جنبها وشد يدها بين يديه الزوز وباسها بـ بتسامه وقال :تحسي في روحك كويسه هزت غاليه راسها بـ معني اي محمد :قوليلي كيف صار معاكي هكي ملو عيون غاليه بالدموع وقالت :شـ ـوفت شوفت مجدي خوي زمط محمد ريقه وقال :كلمك هزت غاليه راسها بـ عبره خلت دموعها ينزلو :ماعرفنيش وشبحت قدامها لستار وكملت :بس اني عرفته كويس ورجعت شبحت لمحمد لـ ناض وقعمز قبالها علي السرير وهوا يحضن فيها لصدره :اششش ياقلبي لفت غاليه يديها عليه وهيا تبكي بالعبره حست بغضب مش مفهوم ، غضب من الحياة او من خوها اومن محمد ، من الحياة لجت عليها ومصره انها توجعها، او من مجدي لماعرفهاش ، او من محمد لكان السبب في بعده لسنين طوال لدرجه لما ولا ماعرفش اخته . هدت غاليه شوي وبعدت وهيا تشبح لـ محمد بعيون مغبشات من الدموع المليانات فيهم وقالت :نبي خوي اني محمد جيبلي خوي باللهي عليك هز محمد راسه :حاضر ياقلبي حاضر نجيبه لكي مغير اهدي بس مسحت غاليه دموعها بـ عبت وهيا تنزل في راسها تشبح لبطنها لحاوطتها بـ يداها ورجعت شبحت لـ محمد وقالت :الممرضه قالت حال البيبي كويس شوفت الدكتور رفع محمد يده ومسحلها دمعه سالت علي خدها وهز راسه :اي حالهن كويس ضيقت غاليه عيونها وهيا تركز علي كلمة "حـالـهـن" بس قبل ماتسأل خشو الممرضات وخلو محمد لـ قرب باسها من جبهتها بخفه وبعد وهوا يتلفت يتناقش معاهم علي نقلها . . . . فـــات الـــوقت وجــت لعشيــه وحوش اهل محمد تعبه بعد ماخبر مرض رقيه انتشر في العيله . حطت ميسم صفرة الشاهي علي الرخامه وشبحت لـ هدايه :شني قالك جدي علي ماما هدايه :شي قالي حالها الحمدالله استقر وبعدين محمد ومراد بعدو يشيلولها حاجات وبيدفعو للمستشفي لي ليلتين تنهدت ميسم وهيا تتلفت لـ ميسون بنت خالهم لخشت عليهم وهيا تنفخ :لنقنها مرت عمكم مؤفره وهيا تصيح وتنوح اعوذ بـ الله منها ضحكت هدايه :والله ماخاطري في الضحك اسكتي واجعها الحال ميسم :تره فكيني حتي نا حسها رقتهالي ميسون :حقا كيف حال غاليه ميسم :ايه بالي مشغول عليها واجد وسالم زاد قلقني لما قالي نزفت واجد ميسون :ياناري شلتولها دبش ميسم :ايه درتلها شنطه دزيتها مع سالم ، هدايه اتصلي بـ محمد اسألي كيف حالها هدايه :باهي ديرو وكال لجدي ياناري ماذاق فيها حتي حاجه اليوم ميسون :تو انادي لبنات نجو نديرو مره وحده لعشي هزت هدايه راسها وطلعت برا وهيا تحاول مع محمد لـ رد عليها في اخر لحظه :ايوه هدايه :الو محمد كيف حالك توا محمد :الحمدالله هدايه :وكيف حال غاليه محمد :كويسه الحمدالله اهو شوي ومروح بيها هدايه :باهي الحمدالله وامي تنهد محمد وهوا يمسح علي صدره :مش عارف والله ماني عارف خلاص سكري تو سكرت هدايه منه والدموع تجمعو في عيونها بـ خوف وقلق علي حال امها المجهول . . . و فــي قــــلبي رجُــل قَــتل كُــل الرجال فـي عَينــــاي 💛🍃 . . نهضت غاليه روحها وهيا تشد في يد الممرضه لساعدتها تقعمز و تنزل رجليها من علي السرير وهيا تاخد في نفسها وتتحسس بـ يدها علي بطنها وقالت :البيبي كويس وله بتسمت الممرضه :ايه انتي والبيبيات كويسيين الحمدالله قرنت غاليه عيونها وقبل ماتسأل خشت عليهم الممرضه التانيه وهيا مدخله شنطه صغيره حطتها علي السرير وقالت :راجلك جاب لكي دبش خشي دوشي بيش تطلعي نديرلك التغذيه قبل ماتروحي هزت غاليه راسها بتنقنيق :تغذيه تاني ضحكت الممرضه :هههه هدي بالحق اخر وحده بتسمت غاليه وهيا توقف بمساعدت الممرضه لقالتلها :تمشي شوي في الدار مابين عديت جبت لكي فوطه غاليه :اكيد جابلي خلاص شكراً تو نخش ندوش مانبي شي الممرضه :لالا ارجيني علي الاقل نساعدك انتي مش قادره تصبي علي كراعك زين مغير اصبري ننزل شوي ونجيك غاليه :تمام نتمشي نطلق رجليا شوي مابين جيتي بتسمت الممرضه وطلعت وخلت غاليه تتمشي في الدار وهيا تسند في روحها علي الحيط وتفكيرها يودي فيها ويجيب علي مجدي لاول ماذكراته عيونها ملوهم الدموع وخلو توازنها يختل وتشد في منيلية الباب المردود بتعب وكانت بتتلفت تمشي لسرير بس جي في ودنها صوت محمد لواقف مع الدكتور قدام الدار ، سندت روحها علي الحيط وهيا شاده في منيلية الباب وقعدت تسمع في الدكتور لقال :ظروري تجهض ظروري والا خطر عليها ضمت غاليه فمها وهيا تسكر في باب الدار وتلفتت لسرير بدموع انهمرو من عيونها وغبشو عليها الرؤيه مع شهقاتها لعلو وهيا تقعمز علي السرير وحاوطت بطنها وتشبح للباب لواقف وراه محمد والدكتور لكمل باقي جملته :لولا ستر ربي ومناعتها واردتها قويه وقدرت تتحمل ره اظرينا زي ماقلت لك علي الاجهاض بس الحمدالله ربي اكتبلكم في الظنوه النصيب محمد :وتوا زال الخظر عنها الدكتور :نقدرو نقولو زال لو تحافظ شوي وتبعد عن التوتر النفسي والبدني وبدات الاجهاد تبعد عنه محمد بتسم :ان شاءالله دكتور بارك الله فيك الدكتور هز راسه :هضا واجبي مغير هتمو بيها بزياده الفتره هدي مهمه في الحمل وتلفت لـ الممرضه لجت وقال :ركبتولها التغديه الممرضه :لا مغير ادوش وركبهالها وتخطت محمد والدكتور وخشت لغاليه اللي كانت مهناش ، تنهدت الممرضه وقربت من شنطتها وطلعت حوايجها وفوطتها وقربت من الحمام لطقت عليه وفتحت وهيا تخش علي غاليه لسانده روحها علي الحيط وهيا لافه روحها بشرشاف وكانت قريب الطيح لو لا الممرضه لقربت وشدتها :انتي كويسه هزت غاليه راسها من بين دموعها :ايه خلاص اطلعي تو ندوش بروحي قعدت الممرضه شادتها بـ يد وتلفتت علقت حوايجها والفوطه ورجعت تلفتت لـ غاليه لـ زادت شدت شرشاف المستشفي عليها مع دموعها لنزلو وقالت لـ الممرضه :اطلعي اطلعي ندوش بروحي اطلعي الممرضه :حـ نساعدك شوي شوي بس انتي مش قادره حتي تصبي علي كرعيك هزت غاليه راسها وصيحت :لا اطلعي اطلعي الممرضه تنهدت وهيا تتلفت لـ الباب الحمام لطق عليهم ، بعدت الممرضه وخلت غاليه لخشت تحت الدوش بدون ماتفتحه وهيا تشبح لـ الممرضه لـ فتحت الباب وهيا تطلع تشبح لـ محمد لقال :خلاص عدي تو نتفاهم معاها نا الممرضه هزت راسها وخلت محمد لفتح الباب لاول مافتحه صيحت غاليه :قتلك اطلعي وله اطلعي اطلعي سكر محمد الباب وقال :حتي نا نطلع تلفتت غاليه لـ في الدوش مع دموعها لزادو من سيولهم اكتر وقالت بعبرتها :اي قرب محمد منها وخش معاها في الدوش :نطلع ولي من بنخلي بنتي غاليه :حقا بياخدو مني والدي قرن محمد حواجبه :من بياخده منكي غاليه :سمعتك رهو ره انت ودكتو قال انه بنزل البيبي محمد نزل بطوله علي مستوي طولها ونفخ علي وجها لين غاليه غمظت عيونها:لو كان خطر عليكي رهو ره خليتهم ينزلوه وانتي مغمي عليكي ياقلبي فتحت غاليه عيونها :ترضي تقتل والدك هز محمد راسه :اي نرضي وعليش مانرضي كان بيخسرني فيكي ضرباته غاليه بيدها علي صدره وقبل ماتعيط عليه قرب محمد وطبع بوسه علي جبينها وهوا يلف في يديه علي خصرها ويخلي فيها ترخي الشرشاف لـ لافه روحها فيه وتخليه يطيح وهيا تبعد اتكي في جبهتها علي جبهته وقالت :مانبيش انزله محمد :ومن قال بتنزليه غاليه فتحت عيونها :الدكتور محمد :ولادنا قعدين ماحد يقدر ياخدهم منك يانبضي تمام هزت غاليه راسها وهيا تشبحله كيف ميل راسه وهوا يفتح في الدوش عليهم وهمس في ودنها :توا تخليني ندوش لبنتي غمظت غاليه عيونها وقالت بتنهيده :اي بتسم محمد وبعد شبحلها كيف نزلت عليها لميه لـ خلت شعرها ينزل علي وجها لـ رجعهولها لورا وهوا يتبلل معاها بـ الميه بدون مايهمه الامر ، اللي هامه انه تحس بـ الامان وتهداء ، لي همه راحتها لماتحس بيها الا معاه ، همه هيا وبس ، هيا بنته ومرته وغلاه . . بَلِغوهــــا بـِ أننــي لا أرا فــي الإنـــاث سواهــــا 💕 . . . . #يتبــــ ( للبـ3ــارت ) ــــع النهايــه بدايــه ، والقَـفـلــة نقطه علي السطر 🥀🍃 ____________________________________ عِــشق فـي بِـلاد حُـروُبِهـــا لا تنتّٰــهي 6 بداء كتابة الروايه في 2020/ سبتــ9ــمبر / 1 تم تجهيز البارت في 2020 / سبتــ9ــمبر / 26 عدد كلمات البارت 2544 من كتــابة #اليَــاقُــوت
