رغم الظروف

#رغم_الظروف

#قارب_الهجرة

#البارت_الرابع

مبروكة:😂😂
عمر:كنك تضحكي نحكي جديات انا 😒
مبروكة:تي غير نلقى بيش انزوز خوتك الكبار 😂 انزوزك انت الي معندكش حتى عمل 😂صبت وهيا تضحك علي ولدها وطلعت
عمر:توا اتشوفو نشتغل وانلم افلوس ونزوز دعاء 😍وننقضها من العذاب الي عايشة فيه
📲📲📲📲📲
عمر:الو     باهي اوكي انتلاقو   خلاص تم نفطر وانجيك
....................
ابتهال قاعدة جنب دعاء في دارها ومطلعنش بكل
مبروكة خشت عليهن:دعاء اطلعي برة اشوية في الخيمة غيري جوك ياحبيبتي
دعاء:فكينا ياعمتي مبروكة والله ماعندي راس لاسماء ونادية توا يديرن راسهن براسي
مبروكة:لا حول الله
ابتهال:ماما نبيك في حاجة وطلعت معاها
مبروكة:كنك
ابتهال:قتلك ياماما بعد ايحطو الغداء جيبي للدعاء راه اسماء حارمتها من الوكال
مبروكة 😲:هضيسما الحكي هضا معقوله
ابتهال:اقسم بالله ياماما هي كيف مانحكيلك
مبروكة:لالالا مش طبيعية الولية هذي
ابتهال:مريضة هذي 😒
مبروكة:باهي خشي توا انتي وبعدين ساهل وعدت

ابتهال خشت وقعمزت جنب دعاء ودعاء مازالت مرة مرة يخطر عليها باتها تبكي لعند راسها ايدوخ
.......................
مرن ايام العزاء علي دعاء كيف الحلم او الاحرى كابوس مش حلم
ابتهال روحت من ثالث ليلة وقعدت كل يوم اتجي في العشية واتروح عالمغرب
الحوش تما يفضى من الناس بلشوية واسماء مرة مرة اتحصل فرصة في دعاء اتخش تضرب فيها واطلع فيها من شعرها اتظم واتسيق واطيب

📲📲📲📲📲📲
دعاء:الو
ابتهال:ها كيف حالك اليوم
دعاء:اهو مزلت عايشة 😔
ابتهال:بعيد الشر عليكي ياعمري،اسمعي جبتلك الي خاشات في الامتحان راه الدكاترة تمو يسالو عليكي خلاص ابدي في الجامعة
دعاء:والله انا بنبدا لكن اسماء كل يوم اتقولي بكرا بكرا
ابتهال:توا اطلعي احكيلها وحطيلها حد خلاص هذي قرايتك ياماما مش لعب
دعاء:باهي خلاص توا نحكي معاها
ابتهال :توا اها مش اتمشي فيا صبي تحركي ديري لروحك شخصية لعند امتى بتمي هكي
دعاء:انشاالله خير😔اوكي وسكرت وقعدت اتخمم في طريقة تفتح بيها موضوع الجامعة

اسماء قاعدة في الدار جنب نادية وسراج امقعمز معاهم
دعاء خشت وصبت تفرك في ايديها مع بعضهن مترددة
اسماء:كنك شنو تبي😒
سراج رفع اعيونه شافلها برفعة حاجب

دعاء:اانا من بكرا منبدا في الجامعة
اسماء:شنو شنو شنو
نادية 😒
اسماء:لالا ياماما انسيها الجامعة
سراج 😳
دعاء:😲كيف ننساها
اسماء:الي سمعتيه ياماما تمشي الجامعة منو بينا هنا اها منو الي يبي ينظف ويطيب ويمسح
دعاء:ببس قرايتي منقدرش انسيبها
اسماء:لالا مش اول وحدة اتوقفي قراية بعدين الجامعة تبي مصاريف وانا معنديش لكي افلوس😒
سراج 😠
دعاء اعيونها امتلن بلدموع :والله منطلب منك قرش ولو نبي افلوس حندور عمل انشالله حتى خدامة الله ايربحك خليني نقرا
اسماء:والله بتخدمي خدامة اخدمي هنا اقل حاجة تخدمي وتاكلي وتشربي وترقدي بلاش 😒
دعاء طاحت ومسكت ايديها طبست بتحب عليهن وتبكي:الله ايربحك الا قرايتي منقدرش انسيبها الله يربحك 😭
اسماء فكت ايدها منها ودفتها:خلاص كلمة وحدة انا قلتها اقراية انسيها خلاص
دعاء شافتلهم كلهم مفيش حد دافع عليها او دار موقف صبت تجري وفتحت الباب وطلعت وراء الحوش تبكي تحت السور المكان الوحيد الي تلجا له بعد تنظلم من اسماء