رغم الظروف

#رغم_الظروف

#البارت_الثالث

#نصيبي

حبيبة ماسكه اعويلتها وتجري طلعت من شارعهم واستمرت في المشي مشت لعند خلاص ادهشت وتباعدت علحوش
الوقت كان قريب من الفجر قعمزت قدام جامع اتريح
القيم للجامع جا بيفتح الجامع لصلاة الفجر تفاجا بوحدة مقعمزة ومرقدة اعويلتها في حظنها

القيم:ياخت ياخت
حبيبة :ااه معليش وصبت سقمت روحها وحجابها اسفة ياخويا والله معندي وين نمشي فالليل انا واعويلتي
القيم:انتي من وين يابنتي
حبيبة:انا مش من هنا كنت في ايجار والراجل طلعني مع اعيالي وتوا معنديش وين نمشي 😭
القيم:لا حول ولا قوة الا بالله تعالي يابنتي تعالي
فتحلها خلوة النساء وخشت
القيم:اقعدي هنا لعند ربي يفرج عليكي يطلع الصبح بس وانشالله نلقولك حل
حبيبة:بارك الله فيك ياخويا

القيم طلع وفتح الجامع وجا الامام واذن الفجر
حبيبة رقدت اعيالها في تركينة وغطتهم وتوضت وصلت وتدعي وتبكي
حبيبة رافعة ايديها تدعي 🙌:ياربي نجيني ونجي اعويلتي من شر صفوان ياربي انا خلاص معش عندي حيل انتحمل انا توا نبي اعويلتي بس يكبرو ويعوضوني علي كل اسى مريت بيه ياربي كان مشيتي فيها خيره افتحها في وجهي انا واعويلتي وارزقني ياربي
وصلت صلاة استخارة وجت جنب اعويلتها وغفت اشوية
حبيبة تحلم
(حبيبة تغرق في البحر هيا واعويلتها واتعيط ياهوو اعويلتي طلعوهم ياهووو 😭واعيالها يغرقو وهيا بطلعهم
ايجيها واحد يمسكها ويكرها يطلعها من البحر وتبكي اتعيط واتقول اعيالي 😭اعيالي
الراجل زقب في البحر وطلعلها العيال حبيبة ظمتهم وتبكي والراجل جاها وظمها هيا واعيالها)
حبيبة وعت مفجوعة من الحلم ورعشت من ظمت الراجل لها في الحلم
........ ...............  
صفوان وعا يدروخ حس راسه صبا وخش للحمام غسل وجهه وخش للدار طاح ع السرير رقد لعند الصبح

ثاني يوم وعا وخش دار حمام وبعد صحصح حس انه الحوش فاضي قبل يوعا علي هرجة العيال حاول يذكر الي صارله امس
صفوان 😱:ايعيط ويدور في الحوش فتح الدرج لقاها واخدة الاوراق الثبوتية والرسمية والفلوس كلهن وواخدة دبشها ودبش العيال عرفها هربت
صفوان هاج في الحوش عياط وتكسير

اهله لوطة يسمعو فيه انفجعو وركبو
طق طق طق طق طق طق
صابرين:افتح ياخويا حاي عليا يامي توا يقتلها 😭
نعيمة:يا صفوان افتح سلم اوليدي

صفوان فتح الباب وطلع يعيط:اهربت الكلبة 🤬 ويعيط ويسب وينزل من الدروج وامه وراه

صابرين خشت ادور في حبيبة وفعلا عرفت انها هربت وخدت اعيالها معاها

نعيمة تلحق فيه :تي غير تعال فهمني
صفوان وقف والتفت علي امه :شنو انفهمك اها بنت الحرام ال  🤬خدت اعيالي وهربت بيهم
نعيمة 😱:حبيبة هربت عليش كنها شنو صار
صفوان:وين نعلم بيها الفاسدة لكن وربي اطيح بين يديا انذبحها😡 وطلع