الكل بصوا لبعض و اتصدموا من جاسر و لين و لين فضلت تبص لجاسر و تعيط و راح جاسر خدها فى حضنه و فضلوا يعيطوا هما الاتنين الاتنين كانوا خايفين من البعد الاتنين كان حبهم لبعض اقوى اى حاجه خافوا يموتوا و هما بعاد عن بعض و كل واحد فيهم ناقص من غير التانى الفيلم ابطاله ماتوا فى نفس اللحظه بس كانوا بيحبوا بعض و متمسكين ببعض اما جاسر و لين كان خوفهم من ان الموت يفرقهم و هما زعلانين من بعض كانوا الاتنين فى حاله غريبه حزن و فرح و اللى حواليهم كانوا بيبصولهم و فرحانين على حب صحابهم لبعض و انهم بعد طول السنين دى لسه حبهم جواهم متمحاش مع السنين حنين كانت خايفه على اختها من اللى جى و هيحصل و مكنتش فاهمه لين ازاى رجعت لجاسر
حنين: ممكن افهم فى ايه و ازاى ترجعى لواحد متجوز
دنيا: اهدى يا حنين و انا هحكيلك
و خدت دنيا حنين و حكت ليها كل حاجه حصلت
حنين: يلهوى طب افرضى حصل ليها حاجه دلوقتى
دنيا: متخافيش اكيد جاسر مش هيحط لين فى خطر
حنين: ربنا يستر
دنيا: يارب
حنين راحت لجاسر
حنين: عارف لو جت عيطت بسببك تانى هموتك يا جاسر
جاسر: متخافيش عليها دى فى عينى
و بعدين حنين بصت للين و لين بصتلها و خدت لين فى حضنها
حنين: انا اسفه لو كنت ضغطت عليكى فى موضوع جاسر بس انا كنت خايفه عليكى مكنتش عايزه اشوفك مكسوره بسببه تانى
لين: انا عارفه بس متخافيش عليا هو مش هيقدر يعمل كده تانى و صدقينى لو حاول يعمل كده تانى انا اللى هكسره مش هتكسر
حنين: ربنا يخليكوا لبعض يا قلبى
لين: يارب
جاسر: طب عن اذنكوا يا جماعه هاخد لين و نروح عند البحر
أحمد: ايوه بقا لين رجعتلك و هتنسانا
جاسر: عيب عليك يا صاحبى ده انا هعملكوا بلوكات
أحمد: ده العشم بردو
الكل فضل يضحك و كانوا مبسوطين برجعوا لين و جاسر لبعض و بعد كده جاسر خد لين و مسى و كل واحد فيهم روح بيته
خد جاسر لين و راحوا المكان اللى مكتوب بأسمها على البحر و راحوا قعدوا على رملة البحر و حطوا ايديهم فى ايد بعض و فضلوا يبصوا لبعض و بعدين بصوا للبحر
جاسر: مستعده للى جى يا لين
لين بتنهيده: مستعده بس خايفه اوى
جاسر: من ايه
لين: من اهلى و اهلك من نظره الكل لين و بعدين نورهان ايه ذنبها
جاسر: اهلى و اهلك انا هعرف اتكلم معاهم اما الكل فالكل كان شاهد على حبنا لبعض و محدش يقدر يتكلم اما نورهان مش عارف هعمل معاها ايه
لين: حاسه اننا هنظلمها و هى بتحبك
جاسر: ما دى المشكله بس اكيد ليها حل
لين: بس اوعى تيجى عليها يا جاسر
جاسر: لا متخافيش
بعد كده لين بصت للبحر و فضلت سرحانه فى تفاصيله
جاسر: و بعدين فى البحر اللى بياخدك منى ده
لين: البحر ده استحملنا كتير اوى كان بيفضل يسمعنى عارف هو حياتى و سرى بحس على طول انه حاسس بيا لما بكون زعلانه بيزعل على زعلى و موجه بيعلى و بيبقى شرس لما بفرح بيفرح ليا و موجه بيهدى و بيبقى صافى و جميل لما بحب اهرب من الدنيا بجيله بمجرد النظره ليه برتاح و بهدى جواه حاجه بتشدنى ليه كأنه الدنيا بالنسبالى لما انا و انت كنا بعاد مكنتش بلاقى ملجأ ليا غير عنده كنت باجى احكيله و افضفض ليه كان بيسمعنى كنت بحسه بيقولى انه موجود و انه عمره ما يسبنى انا حكايتى مع البحر غريبه بس بحبها اوى
جاسر: افضلى اشكرى و حبى فيه كتير كده و خلينى انا اولع من الغيره منه
لين بضحك: فى حد يغير من جماد
جاسر: هو انتى خليتى فيها جماد قاعده تحبى و تنبهرى بيه و سيبانى
لين: و انا اقدر اسيبك بردو ده انت العشق
جاسر: انا بحبك اوى يا لين
لين: و انا كمان بحبك اوى بس جاسر حبيبى
جاسر: نعم يا قلبى
لين: ممكن تبطل سجاير و شرب و ترجع جاسر القديم
جاسر: من عينى حاضر
عند يامن
وصل يامن نور اخته لشقتهم و نزل يتمشى على كوبرى الستانلى فضل يتمشى و كان قدامه واحده بتتمشى بس كانت غريبه الحزن واضح عليها فضل مركز معاها لحد ما لاقها طالعه على الحديد و هتنط جرى عليها و شدها
يامن: انتى بتعملى ايه انتى مجنونه
نورهان: سبنى سبنى ارتاح من حياتى دى
يامن: تبقى عبيطه لو فاكره ان الانتحار حل
نورهان: هرتاح من اللى جوايا
يامن: يمكن هترتاحى بس هتتعذبى فى الاخره
كل ده نورهان كانت فى حضن يامن مكنش خد باله من شكلها بس اول ما بعدها عن حضنه شاف ملاك قدامه جمالها خطف قلبه (نورهان كانت قموره جدا كانت قمحاويه و عيونها خضره و واسعه و رموشها تقيله شعرها بنى و قصير و ملامحها هاديه و جميله) و نورهان لما بصتله انسحرت بجماله (يامن كان طويل و جسمه رياضى أبيض و عيونه خضره و شعره بنى غامق و عنده دقن خفيفه)
نورهان بعياط: انا أكيد ربنا بيحاسبنى على اللى عملته
يامن: لو حابه تحكى تعالى نقعد فى كافيه و نتكلم
نورهان: ماشى
خدها يامن و راحوا قعدوا فى كافيه على البحر و طلب ليها عصير ليمون و طلب ليه قهوة و شويه و الجرسون جابلهم الطلبات
يامن: ها يا ستى مالك بقا
نورهان: حاسه ان ربنا بيعاقبنى على الحاجات اللى عملتها
يامن: عملتى ايه عشان ربنا يعاقبك
نورهان: اذيت ناس و كنت انانيه و خدت اللى مش ليا و كنت بشرب و عايشه الدنيا طناش عملت الوحش كله
يامن: بس انتى بأيدك تغيرى ده و ترضى ربنا
نورهان: ازاى
يامن: يعنى تروحى تعتذرلى لناس اللى اذتيهم و لو الحاجه اللى خدتيها بأيدك ترجعيها رجعيها بطلى شرب قربى من ربنا و صلى عيدى حساباتك من اول و جديد
نورهان: تفتكرى كده ربنا هيسامحنى
يامن: طبعا بصى ربنا لما بيحب عبد من عباده و شايفه بعيد و عايزه يرجعله بيخلية يحس بالذنب وعذاب الضمير عشان المعاصي اللي بيعملها وانة مقصر ف حق الله، بيسخرلة حد يشدة لطريق الله تاني ، يبتلية بذنب يكسرة يخلية يرجعلة تاني ، بيسهلة عبادتة ويحس ان الصلاة والعبادات كلها سهلة علي قلبة فيرجع يعملها تاني ، يرزقة بالصحبة الصالحة ، ويبعد عنة أصدقاء السوء وحاجات تانية كتير والله ربنا لطفة واسع وعايزنا قريبين منة عشانا احنا عشان نكون مبسوطين اكتر وراضين
والذكي بقة اللي يفهم الرسالة كويس ويقرب من ربنا تاني مهما بعد وأذنب يتوب ويتوب فأوعى تفقدى ثقتك فى ربنا ابدا
نورهان: فعلا ربنا كبير و حنين على عباده الحمدلله على نعمة الاسلام
يامن: الحمدلله
نورهان بأبتسامه: شكرا ليك على كلامك شكرا ليك على انك انقذتنى من الانتحار
يامن: العفو
نورهان: عن اذنك انا همشى
يامن: ماشى سلام
نورهان: سلام
نورهان مشيت و يامن فضل قاعد كان سرحان فى جمالها و ابتسامتها
يامن بصدمه: يلهوى نسيت اعرف اسمها و اخد رقمها انا حمار
عند دنيا
دنيا: انا فرحانه اوى انهم رجعوا لبعض بجد الحمدلله
أحمد: الحمدلله انا الصراحه كنت فاقد الامل حسيت ان خلاص مفيش فرصة تانيه ليهم
دنيا: مفيش فرصة تانيه ازاى انتى مكنتش شايف الحب و الشوق اللى فى عيونهم لين كانت بتعاند الشوق اللى جواها عشان مكنتش قادره تنسى كلام جاسر ليها و جاسر كان كل شويه يتعصب و يخليها تعاند اكتر الفيلم ده اللى فوقهم و خلاهم يعرفوا ان حبهم لبعض كبير و هما كانت الصعوبات لازم يوجهوها
أحمد: بحب عقلك الكبير ده اوى
دنيا بثقه: طول عمرى عقلى كبير
أحمد بضحك: ايوه ياعم الواثق انت
دنيا: أحمد حبيبى عندى ليك خبر حلو
أحمد: ايه
دنيا قربت منها و همست فى ودنه: انا حامل
أحمد بفرحه: بجد
دنيا: اه و الله روحت لدكتور الصبح و اتأكد
أحمد بفرحه: الحمدلله يارب الحمدلله مبروك علينا يا قلبى
دنيا بفرحه: الله يبارك فيكى يا قلبى مكنتش فاكره انك هتفرح كده
أحمد: و مفرحش ليه الحمدلله ربنا رزقنى من وسع و كل مولود بيجى برزقه و انا بحب الاطفال جدا و نفسى أملى بيتنا أطفال كتير
دنيا بأبتسامه: انا فخور بيكى اوى فخوره ان ربنا رزقنى براجل زيك يا حبيبى
أحمد: أنا اللى فخور بيكى اوى و فخور ان ربنا رزقنى بيكى طلعتى قد المسئوليه و قد ثقتى فيكى انا بحبك اوى يا ام اطفالى و محبوبتى الاولى و الاخيره
دنيا: و انا بحبك اوى بجد
عند مياده
مياده: طلع حبهم كبير و اقوى من اى حاجه
زين: هما الاتنين حبهم باين فى عينيهم الاتنين انكسروا فى البعد و الاتنين مفيش حد غيرهم هيقدر يصلح جروحهم
مياده: ممكن اسأل سؤال
زين: طبعا يا قلبى
مياده: هو انا لو موت او حصلى حاجه او بعدت عنك هتنسانى
زين: بصى يا مياده انا من ساعة ما شوفتك و انتى خطفتى قلبى و استحملت اسلوبك القذر معايا كتير و فضلت مستنيكى سبع سنين عشان توافقى نتجوز تفتكرى كل ده ليه أكيد عشان بحبك و أكيد هفضل أحبك طول عمرى مهما حصل هتفضلى فى قلبى هفضل أحترمك قدام الكل و عمرى ما هعرف احب غيرك او انساكى
مياده: يعنى انت بجد بتحبنى
زين: انتى مجنونه انا بعشقك اصلا مش بحبك بس ربنا يخليكى ليا يارب و ميحرمنيش منك ابدا يا مجنونه
مياده: انا بحبك اوى اوى
زين: و انا بحبك و عايزك تثقى فى انى عمرى ما هعرف احب غيرك و هفضل بحبك لحد ما اموت
مياده: بعد الشر عنك يا حبيبى
زين: طب ما تيجى نفكر نجيب نونو
مياده: لا انا هتفرج على التليفزيون
زين و هو بيشلها: بصى الاوضه بردو فيها تليفزيون ممكن نتفرج جوه
مياده: لا نزلنى انا هتفرج هنا
زين: لا و الله مش هيحصل انتى هتتفرجى جوه
مياده: انت قليل الادب
زين بضحك: عادى
عند لين
كانت قاعده هى و جاسر ماسكين أيدين بعض
لين: يلا نمشى بقا
جاسر: ايه لحقتى تزهقى منى
لين: لا ابدا يا حبيبى بس الوقت اتأخر
جاسر: ماشى يلا بينا
لين: يلا
ركبوا العربيه و فضل جاسر يشغل اغانى رومانسيه و يغنى هو و لين معاها لحد ما وصلوا و نزلت لين
جاسر: لين
لين بصتله: نعم
جاسر: بحبك
لين بأبتسامه: و انا كمان بحبك
طلعت لين و مشى جاسر دخلت لين الشقه لاقت حسن واقف
حسن: اتأخرتى ليه
لين: كنت قاعده مع صحابى يا بابا فى ايه
حسن: بس اختك و جوزها رجعوا من بدرى
لين: مانا كنت مع يامن و نور
حسن: لين تأخير تانى مش هسمح بيه و بلاش تخلينى اقلب عليكى
لين: هو فى ايه يا بابا بتعاملنى كده ليه
حسن: عشان بدأتى تكذبى عليا و ده انا عمرى ما شوفته منك
لين حطت وشها فى الارض: انا اسفه
حسن: اتمنى ترجعى لعقلك و تفكرى صح
لين: حاضر يا بابا عن اذنك
دخلت لين اوضتها و خدت شاور و غيرت هدومها و قعدت لاقيت رساله على الواتساب من يامن و بدأت تتكلم معاها
يامن: لين حصل معايا موقف غريب النهارده
لين: ايه هو احكى
يامن: كنت بتمشى على كوبرى ستانلى و لاقيت واحده راحت تنتحر و انقذتها بس ايه قمر اوى اوى انا حقيقه اتوهمت بجمالها المهم خدتها و اتكلمت معاها و رجعتها عن فكره الانتحار بس من ساعة ما مشيت و انا بفكر فيها و شكلى حبيتها
لين: اوبا حب من اول نظره ده ولا ايه
يامن: تصدقينى لو قولتلك مش عارف بس هى شدتنى ليها هى جميله و رقيقه حاسس ان جواها طيبه و حنينه هى مش عارفه تطلعهم لحد
لين: مش بقولك حب من اول نظره طب ايه خدت رقمها ولا لا و اه صح اسمها ايه
يامن: معرفش
لين: متعرفش ايه
يامن: معرفش رقمها ولا اسمها
لين: بتهزر صح
يامن: لا مش بهزر ده حقيقه
لين: انت مجنون ازاى يعنى
يامن: هى مشيت قبل ما اعرف اسمها
لين: لا بجد شابوه ليك هتعمل ايه بقا يا فالح
يامن: مش عارف
لين: دور عليها
يامن: ازاى
لين: مش عارفه بس لو حبيتها دور عليها
يامن: طيب
عند نورهان
رجعت البيت طلعت خدت شاور و اتوضت و بدأت تصلى و تدعى ربنا و بعدين جابت المصحف و بدأت تقرأ قرآن على دخول جاسر اللى بصلها بأستغراب
جاسر: بتعملى ايه
نورهان كانت قفلت المصحف و بصتله: بقرأ قرآن
جاسر: غريبه
نورهان: عارفه انك مستغرب عشان اول مره تشوفنى كده بس انا حبيت اقرب من ربنا و اصلى
جاسر: هو شئ جميل جدا بس ايه غيرك كده
نورهان: عادى حبيت اتغير بص ادخل خد شاور و فوق كده و لما تطلع من الحمام نتكلم
جاسر: ماشى
دخل جاسر خد شاور و غير هدومه و راح يتكلم مع نورهان لاقها فى البلكونه
جاسر: ها بقا يا ستى فى ايه
نورهان: بصى يا جاسر انا عارفه انك اتجوزتنى عشان ترضى عمو و عارفه انك مبتحبنيش و بتحب لين و حقيقه هى تستاهل حبك ليها انا كنت انانيه و حبيت اخد حاجه مش ليا ولا عمرها هتكون ليا كنت عايزه ارضى حتت الغرور اللى فيا و اخد الشخص اللى البلد كلها بتتكلم عنه و عن شياكته كنت مبهوره بيك و شيفاك حاجه واو محدش يستحقها غيرى و كمان كنت بكرهه لين و كنت شايفه انى لما أخد اللى بتحبها منها انا كده هكسرها و فعلا كسرتها كسرت عمرها كنت انانيه اوى الصراحه الغرور و الغل كانوا مش مخلينى اشوف الغلط من الصح خلونى اتصرف تصرفات كتير غلط
كان جاسر هيتكلم
نورهان: خلينى اكمل كلامى من غير ما تقطعنى
نورهان بتنهيده: قررت ساعتها اقول لبابا انى عايزه اتجوزك عشان بحبك كان بابا معجب بيك جدا ساعتها و وافقنى الرأى و اتجوزنا و يوم فرحنا لما لين جت شوفت نظرات الحب اللى فى عينيك ليها و عينك اللى من ساعة ما جت و انتى منزلتهاش من عليها اضايقت ساعتها جدا و بعد الفرح كنت فاكره انى هغيرك و اخليك متشوفش غيرى بس كنت كل يوم بشوف فى عينك شوقك و حبك للين و فشلت فى انى اخليك تحبنى و طلع حبك للين كبير و لين انتصرت عليا كالعاده بس على قد ما انا طلعت خسرانه من الحكايه دى طلعت كسبانه عارف كسبانه ايه كسبانه تغيرى الجديد و انى بدأت اقرب من ربنا و اغير من نفسى و اغير من حياتى
جاسر: ايه خلاكى تقولى الكلام ده
نورهان: تقدر تقول انى فوقت لنفسى و عرفت ان اللى انا بعمله ده عشان كده عايزه اقولك حاجه
جاسر: تقولى ايه
نورهان: طلقنى يا جاسر و اتجوز لين
جاسر بصلها بصدمه: انتى بتتكلمى بجد
نورهان بأبتسامه: ايوه انت مش هتقدر تعيش من غيرها و هى كمان مش هتقدر تعيش من غيرك ارجعلها و ابدأوا حياتكوا من جديد
جاسر: طب و انتى
نورهان: انا هبدأ حياتى من جديد و هغيرها و أكيد هلاقى الشخص اللى بيحبنى و احبه
جاسر: مش زعلانه ولا مضايقه من قرارك ده
نورهان: لا خالص انا شايفه ان قرارى ده صح و كلنا هنرتاح
جاسر: انتى كويسه اوى يا نورهان
نورهان: و انت كمان يا جاسر كويس اوى و بجد يا بخت لين بيك
جاسر: و يا بخت اللى هيحبك بيكى
نورهان: بكره ورايا كام حاجه هعملها لما اخلصها هجيلك الشركه و اخدك و نروح نطلق
جاسر: ماشى
تانى يوم الصبح
نورهان صحيت دخلت خدت شاور و اتوضت و طلعت صلت و صحت جاسر عشان يروح شغله و قرأت قرآن و بعد كده اتصلت بسالى
نورهان: ازيك يا سالى
سالى: تمام و انتى
نورهان: الحمدلله بقولك يا سالى معلش ممكن طلب
سالى بأستغراب: ايوه طبعا اتفضلى
نورهان: ممكن تنزلى تقابلينى نتكلم شويه
سالى: ايوه طبعا يلا بينا
نورهان: و معلش طلب تانى
سالى: اتفضلى
نورهان: لو تعرفى رقم لين تبعتيه ليا عشان عايزاها
سالى: ايوه معايا هبعته
نورهان: تمام شكرا المهم هقابلك كمان ساعه كده فى نفس مكانا
سالى: ماشى
قفلت سالى مع نورهان و بعتتلها الرقم
سالى: هى مالها بتتكلم بأدب ليه هى وقعت على رأسها ولا ايه
سالى: انا هوجع دماغى ليه اكيد لما اقبلها هعرف
نورهان خدت الرقم سجلته و اتصلت بلين. لين كانت نايمه صحيت على رنت التليفون
لين: ايوه مين
نورهان: ازيك يا لين
لين: تمام مين معايا
نورهان: انا نورهان الدمنهورى
لين بأستغراب: اهاا اهلا ازيك
نورهان: تمام لين ممكن اطلب طلب منك
لين: ايوه اتفضل
نورهان: عايزه اقابلك و نتكلم مع بعض
لين: تمام نتقابل فى كازينو الشاطبى لو تحبى
نورهان: تمام امتى
لين: على الساعه اتنين كده
نورهان: خلاص تمام معلش لو ازعجتك
لين: لا عادى ولا يهمك
قفلت نورهان مع لين على طلوع جاسر
جاسر: كنتى بتكلمى مين
نورهان: صحابى
جاسر: اها تمام يلا ننزل نفطر
نورهان: يلا
نزلوا نورهان و جاسر و كان مصطفى و دولت بيفطروا و قعدوا يفطروا معاهم
نورهان و جاسر بأبتسامه: صباح الخير
دولت و مصطفى: صباح النور
دولت كانت بتبص لجاسر و نورهان بأستغراب الاتنين مبتسمين و بيفطروا معاهم و مفيش خناق
دولت: بس ما شاء الله عليكوا النهارده نازلين تفطروا معانا و بتضحكوا
نورهان: حبينا نفطر معاكوا يا طنط و بعدين الفطار الجماعى حلو و اهو اشبع منكوا
مصطفى: ليه راحه فين
نورهان كانت هتتكلم بس جاسر قطعها و اتكلم هو
جاسر: لا هى بتتكلم عادى
دولت: ربنا يهدى سركوا
مصطفى: ايوه يارب
بعد الفطار جاسر استأذن و راح شغله و نورهان استأذنت و طلعت لبست و نزلت لاقت دولت قاعده لوحدها
نورهان: مالك يا طنط قاعده لوحدك ليه
دولت: عادى عمك راح الشغل و انا قاعده
نورهان: طنط يا حبيبتى مش عايزاكى تزعلى منى لو زعلتك فى يوم انا عارفه انى كنت بتعامل معاكى وحش بس حقيقه اسفه جدا على اللى عملته و على فكره انا بحبك اوى يا طنط و نفسى نبقى على تواصل على طول
دولت: مش زعلانه منك يا حبيبتى عارفه اللى عندك و اكيد هنبقى فى تواصل على طول بس فى ايه
نورهان بأبتسامه: لا مفيش بس انا حبيت اغير من نفسى
دولت: ايوه كده جدعه ربنا معاكى و يريح قلبك و بالك يارب
نورهان: اللهم امين يا طنط عن اذنك هخرج
دولت: ماشى يا حبيبتى
خرجت نورهان و راحت المكان الى هتقابل فيه سالى
نورهان: اسفه انى اتأخرت
سالى بأستغراب: لا عادى ولا يهمك
نورهان: سالى انا عارفه انى اذيتك كتير و كنت بعاملك وحش
سالى بصتلها بحزن و سكتت
نورهان: عارفه انى اللى عملته فيكى كان غلط بس و انى كنت انانيه و وحشه اوى انا اسفه سامحينى الغرور كان مخلينى مش شايفه اللى قدامى اي حاجه انا كنت مسكاها عليكى اهى خدى احرقيها انا كنت مفكره انى كده هخليكى صاحبتى و متعرفيش عنى بس عرفت انى كده بخسرك كصديقه حبتنى فى الاول و انا بغبائى اذيتها كنت بحس ان اللى بيقرب منى بيقرب عشان الفلوس و المصلحه لانى كنت بتخدع فى ناس كتير و جيت عليكى انتى انا اسفه يا سالى متزعليش منى ياريت تسامحينى
سالى: انتى بتتكلمى بجد يعنى الكلام ده طالع منك يعنى مش هيكون مقلب و بتأذينى بيه
نورهان بحزن: لا و الله انا عايزه اتغير و عشان كده طلبت منك نتقابل و اديكى الحاجات اللى تخصك و اطلب منك انك تسامحينى اتا عايزه اتغير و ابقى نورهان جديده كويسه
سالى: ياريت بجد تتغيرى و تبقى كويسه
نورهان: صدقينى انا بتغير ياريت متخافيش منى انا اسفه
سالى: مهما كان اللى عملتيه فيا يا نورهان فأحنا فى الاول و الاخر صحاب و أكلنا مع بعض عيش و ملح انا مش زعلانه منك و بدل انتى هتتغيرى انا هبقى معاكى خطوة خطوة و هساعدك
نورهان: حبيبتى يا سالى و الله
عند لين
صحيت خدت شاور و طلعت غيرت هدومها لهدوم خروج و اتبعت ليها رساله من جاسر
جاسر: صباح الخير يا قلبى
لين: صباح النور يا قلبى
جاسر: عندك ليكى اخبار حلو
لين: بجد ايه هى
جاسر: بالليل هقولك استعدى للمفاجأت
لين: اشطا انا هخرج لما ارجع هكلمك
جاسر: تمام ماشى
خرجت لين من اوضتها لاقت الكل قاعد
لين: صباح الخير
الكل: صباح النور
لين: بابا ماما ممكن اخرج
حسن: راحه فين
لين: هقابل ناس صحابى
حسن: ماشى افطرى الاول
لين: حاضر
قعدت لين تفطر و بعد كده استأذنت منهم و نزلت ركبت عربيتها و راحت على الكازينو دخلت و قعدت على ترابيزتها المفضله و استنت نورهان و شويه و نورهان جت
نورهان: ازيك يا لين
لين: تمام و انتى
نورهان: تمام الحمدلله
لين: كنتى عايزانى فى ايه
نورهان: اولا عايزه اقولك انى اسفه على اي وجع و اذى انا سببته ليكى يا لين ثانيا هتقدرى تسمعى اللى هقوله
لين: ايوه هسمع
نورهان بتنهيده: بصى يا لين مش هنكر انى كنت بكرههك و بحقد عليكى زمان انا فعلا كنت كده كنت بشوف انك متستحقيش حاجات كتير زى مثلا انك تكونى متفوقه او يكون ليكى حبيب زى جاسر كنت بضايق اوى لما أشوفك مع جاسر لدرجه ان الحقد عمىى عيونى و خلانى ابص لحاجه مش ليا ساعتها قررت انى اخد جاسر منك و أكسرك و خليت بابا يروح لباباه و يتفقوا لانى كنت عارفه اهميه الشغل اللى بينهم و ساعتها عرفت اخد جاسر بس مكنتش أعرف ان حبكوا اقوى من اى حاجه انا اذيتكوا انتوا الاتنين و ظلمتكوا بس يمكن اللى حصل ده لانى اتأذيت زمان و الناس كانوا بيعرفونى بس عشان انا غنيه و معايا فلوس يمكن حبيت ارضى غرور بيكوا انا عارفه انى انانيه و مستاهلش ان حد يحبنى بصى هو ربنا عاقبنى بس عقابه ده خلانى افوق و ابص لحياتى من تانى و ابدأ اغيرها متزعليش منى يا لين سامحينى على كل اللى عملته و ارجعى لجاسر انتوا الاتنين بتحبوا بعض انا اللى جيت خليتكوا تبعدوا عن بعض سامحينى و خليه يسامحنى
لين: مبسوطه منك انك جيتى حكيتى ليا اللى حصل يا نورهان دى شئ كبير منك و انا احترامتك جدا بعد الكلام ده و سامحتك
نورهان بأبتسامه: مبسوطه بجد انى اتقبلتى كلامى و سامحتينى شكرا بجد ليكى يا لين
لين: بتشكرينى على ايه بس حقيقه مبسوطه انك اتغيرتى
نورهان: تقبلى اننا نبقى صحاب يا لين
لين: ايوه طبعا موافقه
نورهان: شكرا ليكى بجد يا لين و على فكره جاسر فعلا يستاهل واحده بقلب طيب زيك و انتى تستاهليه هو بيحبك اوى
لين: ممكن اعرف ايه اللى غيرك
نورهان: ممكن بس ممكن توعدينى محدش يعرف غيرك
لين: طبعا اوعدك
نورهان: اكتشفت انى ماليش فى الخلفه و حسيت ان ربنا بيعاقبنى على اللى عملته معاكوا
لين بحزن: بتهزرى
نورهان: لا و الله دى الحقيقه بس الحمدلله انا راضيه الحمدلله
لين: بس اكيد ليكى علاج
نورهان: مش عارفه بس كل اللى يجيبه ربنا كويس و يمكن دى إشارة عشان اتغير
لين: مقولتيش ليه لجاسر
نورهان: لانها تخصنى و عشان مخلهوش يحس بالذنب
لين كانا هتتكلم بس تليفونها رن استأذنت نورهان و رديت
لين: ايوه يا يامن
يامن: انتى فين
لين: فى كازينو الشاطبى
يامن: طب انا داخل عليكى
لين: ماشى مستنياك
نورهان: شكل صحابك جايين استأذن انا
لين: بس لسه كلامنا مخلصش
نورهان: اكيد هنتكلم تانى و هحكيلك تانى يلا باى
قامت نورهان تمشى و كانت طالعه من الكازينو على دخول يامن
#نهايه_الفصل_السادس_عشر
أنت تقرأ
حب لا ينتهى
Roman d'amourنبذه الحب مبينتهيش حبك الكبير لشخص مبيقلش مع مرور الايام ولا بيتنسى بتفضل فاكر كل حصلت فى علاقتكم و كلامكم و حبكم لبعض و مهم حاولت تنسى مش هتنسى لان حبك كان حقيقى و الحب الحقيقى مبيتنساش ولا بينتهى اه كل واحد راح لحاله بس بيفضل الحب معشش فى قلوبنا و...
