4. Bow To Eros (အချစ်နတ်ဘုရားထံဦးညွတ်ခြင်း)(အခ်စ္နတ္ဘုရားထံ ဦးၫြတ္ျခင္း)

P 9 (U+Z)

"အဂ္ဂ၊ ဟေ့ကောင်"

ဇွဲမင်းက ကားမောင်းနေရာကနေ အနောက်မှာ ခြေ‌ထောက်ချိတ်ထိုင်၍ ဖုန်းသုံး‌နေသည့်လူကို ခေါ်ရသည်။ ပါးစပ်ကလည်း ငြိမ်ငြိမ်မနေ၊ တလှုပ်လှူပ်နဲ့ ပီကေဝါးနေသေးသည်။

"ရသလင်း"

"ဟမ်"

ဇွဲမင်းက သက်ပြင်းချ၍ ခေါင်းခါသည်။ ရှုတင်ရှိပါတယ်ဆို အခုထိ ရသလင်းက အဂ္ဂလို့ ခေါ်ရင်သူ့ကိုခေါ်နေမှန်း မသိသေးပေ။ ဒါနဲ့များ လူစားလဲဖို့ သူကအကြံပေးလိုက်သေးသည်။

"မင်းမလုပ်နိုင်ရင် နေမကောင်းဘူးလို့ အကြောင်းပြလိုက်၊ သူတို့မင်းကို အတင်းလုပ်ခိုင်းမှာ မဟုတ်ဘူး"

"ငါက ဘာလို့ မလုပ်နိုင်ရမှာလဲ၊ ရသလင်းပါကွ၊ ‌ကျောက်တိုင် မင်းစောင့်ကြည့်နေလိုက်"

"အဲ့ဒါဆို ပီကေ အရင်ထွေးထုတ်လိုက်၊ အဂ္ဂက ပီကေဝါးရတာ မကြိုက်ဘူး၊ ပါးညောင်းရင် ရိုက်ကွင်းမှာ စကားပြောခန်း သရုပ်ဆောင်ရတာ အဆင်မပြေဘူး"

"ဟုတ်ပါပြီ၊ ကျောက်တိုင်ရယ်၊ မင်းကလေ အဂ္ဂနားမှာဆို ငြိမ်ကုတ်ပြီးတော့ ခပ်တည်တည်နဲ့၊ ငါ့ရှေ့ရောက်ရင်တော့ ဆရာကြီး လုပ်လိုက်တာ ပြောမနေနဲ့၊ မင်းရဲ့ မျက်နှာသာပေးမှုတွေက သိပ်ကို သိသာနေတယ်နော်"

ရသက တစ်သျှူးထဲ ပီကေ ထွေးချလိုက်ပြီး ဇွဲမင်းကို ခနဲ့၍ ပြောသည်။ ကားနောက်ကြည့်မှန်က တစ်ဆင့် သန့်ရှင်းကျော့မော့နေသည့် ထိုယောကျာ်းသားကို ကြည့်၍ ဇွဲမင်းက ပြုံးလိုက်သည်။ ရသက သပ်သပ်ရပ်ရပ်နေရင် ယောကျာ်းပီသစွာ ကြည့်ကောင်းသည်။ သွယ်လျသည့် ခန္ဓာကိုယ်မှာ အဖုအထစ်မာမာများ ရှိနေသည်ကို ဇွဲမင်းတစ်ယောက်ပဲ မြင်တွေ့ဖူးသည်။ အတူတူ လေ့ကျင့်ကြတဲ့အခါ ရသက အမြဲတမ်း သူ့ကို အနိုင်ရသည်။ နောက်တစ်မျိုးပြောင်းပြောရလျှင် သူအနိုင်ပေးချင်သည့် တစ်ဦးတည်းသော ပုဂ္ဂိုလ်က ရသလင်းပဲ။

"မင်း မဟုတ်မှလွဲရော ကြိုက်နေတာလား"

ရသ၏ အစမရှိ အဆုံးမရှိစကားကြောင့် ဇွဲမင်း မျက်ခုံးတွေ တွန့်ချိုးသွားရသည်။

"ငါ့အကိုကိုလေ"

နောက်ဆက်တွဲ စကားကိုကြားမှ သူသက်ပြင်းချရသည်။ သူ့ရင်ခုန်သံ ကျယ်လောင်သွားပြီလားဟု စိတ်ပူသွားရပေမယ့် ဒီငတုံးကောင်ကတော့ လွယ်လွယ်သတိ ထားမိနိုင်မည် မဟုတ်ပါ။ ရသ၏ အညံ့ဆုံးဘာသာရပ်က လူတစ်ဖက်သား၏ ခံစားချက်ကို မခန့်မှန်းတတ်တာပဲ ဖြစ်သည်။