4. Bow To Eros (အချစ်နတ်ဘုရားထံဦးညွတ်ခြင်း)(အခ်စ္နတ္ဘုရားထံ ဦးၫြတ္ျခင္း)

P 5 (U+Z)

"ဘယ်လိုအခြေအနေရှိလဲ ဒေါက်တာ"

"လူနာက လည်ပင်းရိုးကျိုးပြီး သေသွားခဲ့တာပဲ၊ ဟိုဘက်က လူနဲ့ တစ်ပုံစံတည်းပဲ၊ ဒီလိုသတ်နည်းမျိုးက ရက်စက်သလို လုပ်ဖို့လည်း ခက်တယ်၊ တော်တော် လက်ယဉ်နေတဲ့သူ ဖြစ်ရမယ်"

ရင်ခွဲထားသည့် အလောင်းနှစ်လောင်းကို ကြည့်၍ အဖြေထုတ်နေကြသည့် လူတစ်စုသည် အခုထိ တရားခံကို စဉ်းစားလို့မရကြသေးချေ။

"လွန်ခဲ့တဲ့ ၁၃နှစ်က ကိုအင် (Co In)ဂိုဏ်းဆိုတာ ရှိခဲ့ဖူးတယ်၊ တစ်ဂိုဏ်းလုံး အမြစ်ပြတ်ချေမှုန်းခံလိုက်ရပြီးတာ ကြာပြီ၊ ဒီလို လည်ပင်းရိုးချိုးပြီး သတ်နည်းက ကိုအင် ဂိုဏ်းရဲ့ နာမည်ကြီးလူသတ်နည်းပဲ"

ရှေ့မှီနောက်မှီဖြစ်သော အမှုစစ်ကြီး ဦး‌မင်းရောင်၏ စကားကို နားထောင်ရင်း ဆရာ၀န်က ခေါင်းညိတ်ပြသည်။

"အဲ့တုန်းကဆိုရင် ကျွန်တော် တော်တော် ငယ်သေးတယ်၊ ဒီနိုင်ငံမှာ အကြီးအကျယ်ဆုံးဖြစ်သွားခဲ့တဲ့ ဖြစ်ရပ်ပဲ၊ ဘယ်က စပြီး ဘယ်လိုဆုံးသွားသလဲဆိုတာတော့ မသိခဲ့ရဘူး"

"လူယုံ သစ္စာဖောက်တယ်လို့ ကြားလိုက်ရတယ်၊ ကိုအင်ဂိုဏ်းက မကောင်းမှုချည်းပဲ လုပ်နေတဲ့ ဂိုဏ်းတစ်ဂိုဏ်းတော့ မဟုတ်ဘူး၊ အရင်တုန်းက‌ဆို ကိုအင်ဂိုဏ်းကပါလို့ ပြောလိုက်ရင်၊ ထမင်းတစ်နပ်တော့ အလကားစားလို့ရတယ်"

"ကျွန်တော်လည်း ကြားခဲ့ဖူးပါတယ်၊ တစ်ဂိုဏ်းလုံး မီးလောင်တိုက်သွင်း ခံရတယ်ဆိုတာက တော်တော်ကို ရက်ရက်စက်စက် အသတ်ခံလိုက်ရတာမျိုးပဲ၊ အဲ့ဒီတုန်းက မီးတောက်တွေကြောင့် ကောင်းကင်တစ်ခုလုံးတောင် နီရဲသွားသေးတယ်လေ"

ဆရာ၀န်က တွေးစစဖြင့် ပြောတော့ ဦးမင်းရောင်ကလည်း လက်ခံလေသည်။ ဒီအဖြစ်အပျက်ကို မျက်ဝါးထင်ထင် မြင်လိုက်ရသူအဖို့ ရင်နာစရာတောင် ကောင်းသေးသည်။ အစိုးရတောင် ခွင့်ပြုထားရသည့် သမာဓိရှိသော အဖြူရောင်ဂိုဏ်းက အဖြစ်ဆိုးမျိုးနဲ့ ကြုံခဲ့ရတယ်မလား။

ကိုအင်ဂိုဏ်း ကျဆုံးသွားတဲ့ အချိန်ကစပြီး ထိုဂိုဏ်းရှိစဉ်က ဖိနှိပ်နိုင်ခဲ့သည့် အကြမ်းဖက် ဂိုဏ်းပေါင်းများစွာက အခုလက်ရှိတွင် လွတ်လပ်သွားပြီး မကောင်းမှုများစွာ ကျူးလွန်လျက်ရှိနေသည်။