4. Bow To Eros (အချစ်နတ်ဘုရားထံဦးညွတ်ခြင်း)(အခ်စ္နတ္ဘုရားထံ ဦးၫြတ္ျခင္း)

Part 21

မြစ်ဆိပ်နားက စွန့်ပစ်အဆောက်အအုံသည် မူလက ကိုအင်ဂိုဏ်း၏ မူလစတည်ရာ နေရာပင်ဖြစ်ပြီး ခေါင်းဆောင်ဟောင်း ကွယ်လွန်သွားသောအခါ စေသူရိန်၏ ဖခင် လက်ထပ်တွင် မြို့လယ်ခေါင်သို့ ပြောင်းရွှေ့ဖွဲ့စည်းခဲ့ကြလေသည်။

သို့သော် ထိုအဆောက်အအုံမှာ ဦးနေမင်း လက်ထပ်တွင် ပြုပြင်ထိန်းသိမ်းထားဆဲ ဖြစ်သော်လည်း ၎င်းကွယ်လွန်သောအခါ စွန့်ပစ် အဆောက်အအုံတစ်ခု ဖြစ်လာခဲ့ပေသည်။ မြစ်ဆိပ်ကို ကျောကပ်၍ ဆောက်ထားတာကြောင့် မြစ်ရေလျှံလျှင် အောက်ထပ်မှာ ရေနစ်မြုပ်မှု မကြာခဏ ဖြစ်လေ့ရှိသောကြောင့်  ရေကျသွားလျှင်ပင် ကြမ်းပြင်ပေါ်တွင် ရွှံ့နွံများ ကျန်ရစ်နေပြီး နံရံများတွင် ရေညှိများ ကပ်ငြိနေကာ အနည်းငယ် ညှီစို့စို့ အနံ့ကိုပင် ရနေသေးသည်။

ဆိုင်ကယ်သည် ရွှံ့မြေကြောင့် အနည်းငယ် ယိမ်းယိုင်သွားသော်လည်း ရသလင်းက အဆင်ပြေပြေ ရပ်လိုက်နိုင်လေသည်။ ဆိုင်ကယ်ပေါ်က ဆင်းသည့်အခါ ဦးသူကို သူတွဲဖို့ ကြိုးစားလိုက်သော်လည်း ဦးသူ၏ ခြေထောက်များက မြေပေါ်တွင် မြဲမြံစွာ ရပ်နေသည်ကို မြင်လိုက်ရလေသည်။

အဘယ်ကြောင့်ဆိုသော် စေသူရိန်မှာ ထပ်မံ၍ ဟန်ဆောင်စရာ မလိုတော့တာကြောင့်ပင်။ ဦးနေမောင်ထံတွင် သူသည် မသန်စွမ်းကဲ့သို့ ပြုမူမှသာ တစ်ပါးသူက အထင်အမြင်လွဲကာ သူ့ကို အထင်သေးပြီး ဟာကွက်များကို ပြုလုပ်လာမှာပင်။

သို့သော် ယခုတွင်တော့ မလိုတော့ပေ။ ပျောက်ဆုံးနေသော အမှန်တရား၏ ဟာကွက်များကို ပြုလုပ်ခဲ့သော လူမှာ သူကိုယ်တိုင် ယုံကြည်၍ အရာအားလုံးကို ချပြခဲ့မိသော လူဖြစ်နေမည်ဟု သူနားလည်သွားခဲ့သည်။

တရားခံဟာ သူ၏ ဘေးတွင် နှစ်ပေါင်းများစွာ ရှိနေခဲ့ပြီး သူ၏ မသန်စွမ်းသည့် ခြေထောက်များအတွက် ဂိုဏ်းကို သူ့ကိုယ်စား ဦးစီးနေခဲ့သူပင်။ ယခုတွင်တော့ သူ၏ လျို့ဝှက်ချက်များသည် အလကားဖြစ်သွားလေပြီ။ ရန်သူဟာ သူ့ရဲ့ လူရင်းဖြစ်ခဲ့ပြီး သူ၏ ပျော့ကွက်များ အားလုံးကို သိနေခဲ့သူပင်။

ထို့ကြောင့်လည်း အဖြေမှန် ပေါ်လာတော့မည်ကို သိတော့ အဂ္ဂလင်းကို လက်ထဲရောက်အောင် အရခေါ်သွားတာပင်။ သူ၏ အားနည်းချက်မှာ ရသလင်းနှင့် အဂ္ဂလင်းဆိုသည်ကို ဦးနေရောင်က ကောင်းကောင်းကြီးကို သိရှိနေလေသည်။