4. Bow To Eros (အချစ်နတ်ဘုရားထံဦးညွတ်ခြင်း)(အခ်စ္နတ္ဘုရားထံ ဦးၫြတ္ျခင္း)

P 8 (U+Z)

"မင်းခြေထောက်က သက်သာရဲ့လား"

စေသူရိန်၏ အမေးစကားကို ခေါင်းညိတ်၍ သူအဖြေပေးလိုက်သည်။ ဒဏ်ရာရလျှင် အသည်းခိုက်အောင် နာနေပါစေ သူ့အတွက်က ရိုးနေပြီလေ။

စေသူရိန်က အနောက်မှ အဂ္ဂကို ဝှီးချဲတွန်းခိုင်းလိုက်သည်။ ပြီးတော့ ရသလင်းအနား ရောက်လာပြီး ခြေသလုံးကို လက်ဖြင့် ကုန်း၍ ထိမည်ကြံလျှင် ရသလင်းက အနောက်ကို ဆုတ်သွားသည်။

"ကျွန်တော် တကယ်မနာတော့ပါဘူး"

စေသူရိန်၏ ရင်ထဲ စိတ်မကောင်းဖြစ်သွားရသော်လည်း မျက်နှာထားကမူ မပြောင်းလဲပဲ အေးဆေး ငြိမ်သက်နေသည်။

"အခုဆို အဂ္ဂအတွက် အန္တရာယ်များလာပြီ၊ အနုပညာအလုပ်တွေ နားထားပြီး ဒီမှာပဲ လာနေလိုက်တော့လေ"

စေသူရိန်က အဂ္ဂကို လှည့်၍ ပြောလေလျှင် အဂ္ဂက ခေါင်းညိတ်ပြသည်။ သူဘ၀မှာ ဘယ်သောအခါမှ ဦးသူကို မလွန်ဆန်ရဲခဲ့ဘူး။

"ဒါဆိုရင် ကျွန်တော်တို့ ကြိုးစားခဲ့သမျှ သဲထဲရေသွန်လို ဖြစ်သွားမှာပေါ့၊ Eros club ပိုင်ရှင်က အခု လှုပ်ရှားလာပြီလေ"

ရသက ပီကေဝါးနေရင်း လက်တစ်ဖက်ဖြင့် ဓါးကိုဆော့နေသည်။ သူ၏ အကြံပေးစကားကြောင့် စေသူရိန်က မျက်ခုံးပင့်သွားရသည်။

"နေရာလဲလိုက်မယ်လေ၊ ကျွန်တော်နဲ့ အဂ္ဂက ဘာများ ကွာခြားနေလို့လဲ၊ နေရာလဲလိုက်ရင် အဂ္ဂမထိခိုက်တော့ဘူးပေါ့"

သူ့စိတ်ထဲမှာ ဦးသူက အဂ္ဂလင်းကို စိတ်ပူနေသည်ဟု ထင်မြင်တာကြောင့် ထိုကဲ့သို့ စကားဆိုလိုက်သည်။ စေသူရိန်က အတန်ငယ် စဉ်းစားပြီးနောက် ခေါင်းညိတ်၍ ဆိုသည်။

"အင်း ဒီလိုဆို အဂ္ဂ နေရာကနေ၊ မင်းကောင်းကောင်း လှုပ်ရှားလို့ရတာပေါ့"

အဂ္ဂသည် ဦးသူ၏ ခွင့်ပြုချက်ကို ကြားတော့ ‌တုန်လှုပ်ခြောက်ခြားရသည်။ သူ့ကို အန္တရာယ်ကြားထဲက ပုန်းခိုင်းပြီး ရသကိုတော့ ဒုက္ခတွင်းထဲ တွန်းပို့နေသည် မဟုတ်လား။

သို့ပေမယ့် သူအသံမထွက်ရဲပါ။ ဦးသူ၏ စိတ်က ဆုံးဖြတ်ပြီးရင် မပြင်တတ်ဘူးလေ။