رغم نار الحب

الخامس والخمسون

ممنوع همس الشفَه
ممنوع بالحب رجفه
وذبلة خدود الترفه
ابغداد ممنوع العشك.
نسكت كلبنه يحترك؟
ممنوع ان نحجي الصدك
كدامي اخرس ماحجه اشر وكصوا جفه
ممنوع الياشر ...صدك؟؟؟؟؟
وزعو موت اعله الخلك
خفنه ورجعنه ليوره
وجبرونه ان نلزم سره
الكدام يسال بالوره
شنهي الحصل ؟؟شنهي الجره؟؟
ثاري مثل موت النخل واحدنه ميت وكفه

رانيه __ اليوم مسويه حمله على الغرفه
طلعت الفراشات والمدات من اجه الشته
لليوم مشايلتهم

الجهال صعدتهم على السرير وملبستهم
دافين خليتلهم العاب وكم شغله يلتهون

لبست دشداشه كودري مو اشتغل واحر
مااتحمل القديفه والثخين

جريت السطله مي وقاصر ومعطر ارضيه
ضليت امسح واجر بلميوزه وصلت
للزاويه عليها ملابسه طاح السويتر

شلته بي عطر قوي مدري ليش حبيته
ضليت اشم بي لحد منترست ريتي

كملت خالتي جوه بارق بلصاله نايم
سهران ويه جماعته عاد نزلت فضل
ورقو يمهم

شغلت البنكه تنشف الارضيه العطر
هب من الارضيه هسه حسيت
الغرفه نضفت شكد اكره الشته
احسه وصخ يقيد مااكدر اغسل
وانضف براحتي 

بلصيف يوميه ماسحه ومعطره
الغرفه وبين يوم ويوم غاسله
الحصير ضل نضيفه

نزلت كفيت الغده ويه خالتي الجوه
نضيف ماعدنه شي بس من يجن البنات
يصير تشريب والوصخ مدري منين يجي
المسواك ميضل بلثلاجه طابين طالعين
راسهم بيها عاد اني خاله فوك بثلاجتي
فواكه وحلويات اذا يجوعن انطيهم

طب بارق يفرك بوجها ستوه كاعد
غسل وكعد

_ستكان جاي اكو

اي بي القوري

_حمي راسي راح ينفجر

طب نور ونسرين هم ستوهن كاعدات
حالتي صلي

كالت نسرين سوين ريوك

لا حميت الجاي

نبت حبابه بطريقج طكيلنه بيضتين

هنا عزت عليه نفسي ميشتغلن
البيت كله براسي من غير الجهال
وغرفتي يكعدن تالي الضهر

واليل سهر وضحك ومكياج
وشوكت ماافوتلهن يكدرن
ملابس وينسقن ومامعترفات
بيه يطبن يطلعن معتبراتني
خدامه للبيت

مرديت فتت فضل يسوي
باسكله بوسطت الهول طلعته
وجريته اعدل ملابسه

القوري صفر فتت صبيتله
ونطيته جان مدد وايده على راسه

كتله جايك كعد اخذه رقو يمه
رادت اجر الستكان زمخ بيها
لتنجوي

نور دلغمت كامت هي سوي
نسرين كاعده