ထာဝရအတွက်
အပိုင်း ( ၄)
She (season 2)' မွေးသန္ဓေဆိုတာ သေခါမှသာပျောက်တာ သမီးရဲ့ ဒေါ်လေးလည်း သူ့ကိိုနေ့တိုင်းသင်နေတာ နှစ်ပေါင်းလည်းမနည်းတော့ဘူး ၊ မြတ်နိုးတို့တစ်သက်တောင်ရှိပြီထင်တယ် '
စျေးဆိုင်အတွက်အကူခေါ်ထားသည့် ကောင်မလေးအကြောင်းကိုပြောရင်းမှ ကွပ်ပျစ်ပေါ်၌ စိတ်ပျက်လက်ပျက်ဖြင့်ထိုင်ချလိုက်သည်။
'ဘာပဲဖြစ်ဖြစ် သည်းခံပါဒေါ်လေးရယ် ခုခောတ်ခုခါကြီးမှာ ဒိီလိုလူတစ်ယောက်ရဖို့ကမလွယ်ဘူး။ ပြီးတော့ ကောင်မလေးက စပ်စလူးလေးလည်းမဟုတ်တာတော်သေးတယ် '
ပြည့်က ဖြောင့်ဖြောင့်ဖျဖျဝင်ပြောလိုက်သည်။ သူတို့နှင့်အတူထိုင်နေသည့် အမေက ဟတ်ခနဲရယ်လိုက်ပြီး။
'ကဲ ကဲ ပေါက်ကြီးကတောင် သည်းခံခိုင်းနေရပြီဆိုမှတော့ ညည်းတော်တော်လွန်နေတာဖြစ်မယ်'
' ပြည့် ခုတစ်လော စိတ်ကိုအတတ်နိုင်ဆုံးလျော့နေတာ၊ ဘုရားကန်တော့ တရားလေးဘာလေးမှတ်နဲ့ ဒေါသကိုထိန်းနိုင်နေပြီ '
' ကောင်းတယ် ကောင်းတယ်၊ ဒေါသမရှိတဲ့သူက ငြိမ်းချမ်းတယ် သမီး။ ဒါနဲ့ အိမ်အခြေအနေရော ကြည့်ခဲ့သေးလား'
' တိုင်တွေထောင်နေတာတွေ့ခဲ့တယ် ၊ ပြည့် ဒီလအမေ့သုံးဖို့မပေးတော့ဘူးနော် မနက်ဖြန် မန္တလေးသွားရမှာမလို့'
' မပေးနဲ့လို့ အမေပြောသားပဲကို ၊ မန္တလေးသွားမှာဆို ဖြူ့အတွက် ငံပြာရည်ကြော်ပေးလိုက်ဦးမယ် ၊ငါ့သမီးလေးက သိပ်ကြိုက်တာ'
' မကြော်ပါနဲ့အမေရယ် ပင်ပန်းရတဲ့ထဲ ။ ခုကြော်ခုရတာမှမဟုတ်ပဲနဲ့ကို နေနေ နောက်ကြုံမှပို့ပေးလိုက်မယ်'
' မပန်းပါဘူးအေ ။ မနက်ဖြန် အဝေးပြေးကွင်းသွားရင်းနဲ့ဝင်ယူယုံပဲကို '
စကားကိုပင် သွားရင်းလာရင်းပြောသွားပြီး မီးဖိုခန်းသို့တက်ကြွစွာဝင်သွားသည့် အမေ့အား ကြည်နူးစွာလှမ်းကြည့်မိသည်။
' ဟာ မမ ရောက်နေတာ အတော်ပဲ '
ကြည်နူးမှုလေးပျောက်အောင်လုပ်နိုင်သည့် အသံပိုင်ရှင်တွေအား ဆတ်ခနဲလှည့်ကြည့်လိုက်မိသည်။