دار بينا الوكت(مكتملة)

البــــــارتـــــــ22🧡

مســـآء المســــــرات🌺🍃

بنوتات حبايب وصيتكم تعلقون عالفقرات وكلشي ماشفت عدا كم بنيه ليش!! يعني القصة معاجبتكم ممأثرة بيكم متتفاعلون وتعلقون عالاحداث البيها بارت 3000 كلمة بس اربعين تعليق ليش!!! غير اريد اعرف رأيكم وتعليقكم عالاحداث!!! طبعا كتبت هالبارت بسرعة ومالي نفس اصلا اكتب تفاعلكم ميت ومايشجع ابد عود اني اجيتكم بعد غياب اسبوعين وهيج التفاعل ميت لعد بالايام الجايه شلون!!!

البارت22
دار بينا الوكت

أقبل رجعتك بس عندي كومه شروط
أولهن تردلي سنين محسوبه
وثانيهن شبابي الهدر بين أوراق
وسهر ذيـچ الليالي المالهن حوبه
وثالثهن دموعي الصبّن بفرگـاك
على كل دمعه أفصلك فصل منهوبه
ورابعهن تروح تسكّت الشّمات
وتگلّهم حيل أحبّه وأبقه محبوبه

صعدنا والممر فارغ تقريبا الساعة 1 بليل هدوء وظلمه مطفين ضوا الممر

فتح باب الجناح وطبينا سحبت ايدي من ايده توني مشيت وجان اسمعه يگولي: اوگفي عندي حجي وياج!!

التفتت اله وجان يأشرلي عالقنفات: تعالي گعدي مبًيِّج حيل،، سليمه گالت لامتغديه ولا متعشيه

باوعتله: ما الي نفس..

گعدت عالقنفه وهو اجا وگعد بسدي: شوفي دُنى اريدج تنأّمين رغد بناتج باجر او بعده بحضنج..

متحملت نزلت دموعي: محد حاس بنار قلبي تريدني اصبر وانا خلص صبري بناتي من ولادتهم مايوم ناموا بعيد عن حضني ونظر عيني ابوهم اجى اخذهم ما فكر بمشاعرهم مايتعرفون علينو يخافون منو واشون راح يأثر سلبا على نفسيتهم كل همو يقهرني بيهم...

حضن ايديني بين ايديه وهمس ووجهه مقابل وجهي: وعد مني اندمه على سوايته واخلي يگول التوبه..

باوعتله وعيوني متروسه دمع: اشون راح تعرف مكانه اخاف ياخذهم وينهزم بيهم لغير محافظه!

هز راسه: لاتخافين مخطط لكلشي بس صبريلي انتي كافي تبجين شوفي عيونج صايرات دم گومي سبحي وتعالي نصلي سوا..

هزيت راسي وگمت من يمه وعيني على باب غرفة بناتي طاحت دموعي ربي مابقى عندي بس هن لاتحملني ما لا طاقة لي به...

اخذتلي دشداشه قصيرة نص ردن زيتونيه وطبيت للحمام سبحت متت بجي بالحمام جان هسه اني گاعدة وياهن بالغرفة اتحيل عليهن ينامن واحجيلهن قصص وهن يجلبن بيه اكثر ويريدن بعد قصص لحد ما يتعبن وينامن..شدعي عليك ضاري دمرت حياتي ونفسيتي وهسه لاحگني على بناتي...

لبست ولفيت المنشفه على شعري وطلعت باوعت باقر ماكو توجهت للغرفة باوعت لنفسي بالمراية وجهي شاحب و عيوني حمر دم گد ما بجيت زفرت ونزعت المنشفه لفيت شعري هو ومبلل