Spoken Word Poetry (Compilation)

Paggising Sa Umaga

'Pag gising sa umaga'y tila wala ng gana para gawin ang mga bagay na sa akin ay inatas.

Babangon at magtitimpla ng kape o kaya'y gatas,

Kailangan ko nito para sa online class.

Minsa'y hindi na nga kakain para sa itinakdang oras ay hindi lumagpas.

Kailangang makilahok para ang grado ay tumaas,

Pero nakakahiya dahil sa mga sigaw na malalakas.

Hindi ako makapag pokus at parang gusto ko nalang tumakas.

Darating ang oras para sa mga gawain,

Sa school, I mean.

Pero kailangan ko ring isipin,

Ang mga gawain sa bahay namin.

Okay lang naman, kaya ko naman.

Pero pwedeng isa-isa lang?

May oras pa akong kailangang habulin,

Ang daming kailangang gawin,

Ang daming kailangang isipin,

Ang daming kailangang tiisin,

At ang dami ko ring gustong sabihin.

Pero 'wag nalang,

Baka sabihin niyo wala akong galang.

Hindi ako matapang,

Hindi ko kayang humingi ng tulong sa magulang,

Kasi natatakot ako na sila'y manghinayang.

Natatakot akong marinig na sana'y hindi nalang ako isinilang.

Nakakasawa na ring marinig ang mga paratang,

Na masyado akong maarte at tamad para kumilos at sumunod sa mga utos.

Sino ba namang hindi tatamarin?

Kung ginawa mo na yung best mo pero kulang parin?

Pamilya na lang ang tangi kong pag-asa,

Kaso lahat ay sa akin niyo inaasa,

Tapos kailangan mataas pa 'yung marka.

Ang dami ko ng sinasabi,

Tama na nga, masyado na bang ma-drama?

Dapat pala inumpisahan ko nalang 'to sa...

"'Pag gising sa umaga'y tila wala ng gana...na gumising sa umaga."