تهزمني السمراء وأنا نّد فرسان بقلم الكاتبة أديم الراشد// مكتملة

البارت السابع

البااارت السابع>>
.
.
عند ثنيان
اللي بعد ما وصلهم للبيت واخذ منيره لبيت ابوها طلع متجهه لدوامه ورفع صوت المسجل وهو يقلب فالاغاني وطاح على مقطع زاد الطين بله (لا لا تضايقونه الترف لا تضايقونه لا لا خلوه يجني من حياته ثمرها
لا لا والقلب ما يسمع ولو تعذلونه
لا لا والروح عنده باللواحظ أسرها )
اخذ نفس لما وصل وهو يسكر المسجل وهو يقول : كأنك ناقص يا ثنيان مشاكل
دخل وهو متجهه لمكتبه وابتداء عاد يستلم القضايا
................••............
عند صالح
نزل عند القسم وهو متجهه لشرطي ويستفسر عن منير
الشرطي : ما اقدر اعطيك اي شي الا لما يجي الضابط
صالح: والضابط وينه
الشرطي : عنده كم قضيه قبلك انتظر هنا
عايض: ليه بتسحب الشكوى والترف ما تبي
صالح: عايض فكني شرك انت بعد مانيب ناقص
عايض سكت وهو عيونه على السياره والترف اللي فيها
وبعد شوي دخل صالح وعايض على الضابط
ورفع راسه ثنيان وهو يقول : وش قضيتكم ..!؟ صالح
صالح: ثنيان هاذي والله الساعه المباركه
وقف ثنيان وهو يسلم عليه : سلامات وش بك هنا عسى ما شر
صالح اللي ماعرف وش يقول تمنى الارض تنشق وتبلعه ( الحين ربي كاتب لي الفضايح مع ذا الرجال وكل فضيحه من تحت راس الترف ) : والله مدري وش اقولك قضيتنا معقده لكن محلوله
ثنيان: اجلس اجلس
صالح : فيه واحد من الجماعه مقدمين عليه شكوى وبنسحبها
ثنيان: وش اسمه !!
صالح : منير ....
ثنيان قطب : منيير بس منير قضية متهاوش مع بنت
صالح وعايض : متهاوش مع بنت !؟
صالح : لا الله يعافيك الموضوع غلط كذا
ثنيان: كيف !
صالح : والله مدري وش اقولك بس الهوشه كانت بيني وبينه واختي الله يهديها دخلت مدري كيف دخلت وصقعها بالغلط
طارت عيون ثنيان بصدمه لكن تدارك نفسه وهو يتنحنح : بس اللي قدمت البلاغ تقول انه صابها اصابه قاتله
صالح :ابك يا راسي يا ابن الحلال اللي قدمت البلاغ مطفوقه ما عليك منها البنت طيبه وبخير وحنا جايين نتنازل
ثنيان كان في صدمه وفي نفسه يقول ( وش ذا الادميه القادحه !! ) : بس يا صالح لازم البنت هي اللي تتنازل
صالح : يا ثنيان الله يهديك انا اخوها مافيه مشكله
ثنيان: والله يا صالح ودي اخدمك بعيوني بس الوضع كذا صعب
عايض : حنا نقول انها متنازله
ثنيان لف يطالع عايض بهدوء: انت اخوها !؟
صالح: لا هذا واحد من الجماعه انا اخوها
لف ثنيان: والله لو هي شي بيدي تبشر يا صالح بس على الاقل ولو انها تتصل بس
صالح: هي بالحقيقه معيي بالسياره برا
ثنيان: زين اجل كذا كويس نروح وهي تقول متنازله وينتهي هذا اذا مافيه اصابات بالغه
عايض :حنا معنا تقرير المستشفى تبي تشوفه
صالح اللي كان وده يتوطى في بطن عايض : لا يا عايض
ثنيان: لا عطني اشوف
عطاه عايض وثنيان اللي كان يقدر يخلص كل شي بورقه بس كان يبي يعرف اذا هي الترف ولا لا واذا هي الترف هي بخير ولا لا
ابتسم وهو يقول في نفسه ( افا والله 6 غرز في راس السمراء المزيونه والله لو تموت ما تطلع يا منير ) : 6 غرز يا صالح
صالح: اييه يعني بسيطه هي
ثنيان: انا اعتذر ماهي بسيطه للحق العام
صالح: يا رجال مالها داعي
ثنيان: اول شي نشوف البنت ورايها
صالح اللي وقف وهو لو بيده يحط عايض والترف ويكفخهم وقفوا متجهين لسياره وبالعاده ثنيان يرسل شرطي لكن الحين يروح بنفسه ................••............
في السياره
عند الترف اللي كانت منسدحه وهي تتحسس راسها بألم وهي تبكي : الله ياخذتس يا نوير وياخذ اخووووتس ااااه يا ربي رباه بغيت اموووت
جلست وهي تبكي لكن طارت عيونها وهي تشوف صالح وعايض ومعهم الضابط فتح صالح الباب وهو يدخل راسه ويهمس بسرعه: تنازلي الضابط بيكلمتس
الترف بخوف وهي تسمع صوت ثنيان: سلام عليكم
الترف: وعليكم السلام
ثنيان: فيه شكوى على منير اللي طقك ! بتنازلين عنه
الترف ببكي : لا مانيب متنازله عنه خله يخيس
ابتسم ثنيان بخفى ( وتبكين بعد والله يا منير ما تسلم ): طيب تطالبينه بشي
الترف : ايه افقشوه مثل ما فقشني
صالح صفق الباب وهو يقول : حسبي للله ربي يا ثنيان يهداك الله الوضع ما يحتاج كذا
ابتسم ثنيان: مو بيدي ياصالح والله اعتذر لك
لكن تعال نكمل الاجراءات
صالح : يا ثنيان عديت سلاح
ثنيان: سلاح ما اذى احد
صالح : واذا طلبتك
ثنيان : اطلبني بالحق العام وابشر
صالح : اجل انت نزل الحق العام وانا بقنع البنت
ثنيان: صالح لا تجبرها وحده منها انا افكك منها يا العام يالخاص
صالح : اجل دامه مسجون مسجون خذها كلها
ثنيان: اجل يلا
ابتسم ثنيان وهو يكمل الاجراءات وفيه ضحك الدنيا وده يروح بس يسمع كيف تحكي
................••............
عند الترف رجع عايض وصالح وركب صالح وهو يهبد عايض : من قالك عطه التقرير خبل انت
عايض : وش اسوي
صالح: وانتي يا كمخه تبين ابوي يذبحتس فوق بلاويتس مشتكيه عليه
الترف: احسن والله لوريه هو واخته
صالح اللي عصب صدق : الترف اصص ولا كلمه من الحين اقولتس والله ما اتدخل بينتس وبين ابوي
الترف وهي تبكي : احسن بعد خله يذحبني واموت وارتاح
صالح: لا تبكين وتفكين الخيوط
سكتت ترف وهي كل ما تلمس الجرح تبكي وصالح انهبل وهو يفكر وش يرقع لابوه ومسك عايض وهو يهدده لو يتكلم كلمه توطى ببطنه
................••............
في القسم
وعند ثنيان اللي رجع بالاوراق وهي مبتسم ابتساااامه راضيه طلع وهو يدور منير يبي يطلع حق دموع ( السمراء ) من عيونه
دخل وهو يقول : وينه منير
منير : هنا يا طويل العمر
ثنيان:جيبوه
جابوه وقف ثنيان وهو يناظره : الحين ما تستحي على وجهك تطق بنت
منير: هي دخلت بالهوشه ما دريت
ثنيان : اقول اص
لف وهو يقول لشرطي : عندك شي متضايق منه ودك تكفخ احد شي منا منا
الشرطي : يعني فيه والله
ثنيان : اجل كفخوووه وامنعوا عنه الزياره ولا تعطونه اكل الا مرتين عشان يتادب
الشرطي : ابشر
طلع ثنيان وترك منير وهو يدري لو بيكفخه هو بيرتكب جريمه
وطار لعجاج يبي يقوله وش صار من جنون اليوم
................••............
في بيت ابو الترف
وعند الترف اللي دخلها صالح البيت وقالت الترف : تكفى صالح ناد نوره
صالح : ابشري يا قلبي اصلا انا بجيبها عشان اللعن خيرتس وخيرها
مايمديه سكت الا نوره مدرعمه :الترف حبيبتي اختي وش صار فيتس
وقف صالح بوجهها : جيتي وجابتس الله
نوره: بسم لله وش فيك وخر بسلم عليها
صالح: الله لا يسلم فيتس وفيها مغز ابره
نوره وخرته وركضت لترف : يمه يالترف وش بلاه
صالح: من قالتس اتصلي وبلغي الشرطه ياا خبله
نوره: ماشاء الله تبيني اسكت واخليهم يذبحونها
صالح : ليته ليييييتهم ذبحوها وذبحوتس معها عشان انا ارتاح واعيش طبيعي مثل الاودام
الترف : افا يا صالح وش ذا الحتسي وش سوينا حنا هذا جزاتنا ندافع عنك
صالح: من طلب منكم تدافعون
نوره: انت وش فيك مشتط
صالح : ابك انا وش اقول لابوي الحين وش اقوله اسمعيني انت وياها ابوي جاي لكن والله لو سمعت صوت وحده فيكم لتوطى بطنها تسمعن
الترف ونوره : طيب
صالح : وانتي مالتس شغل تتكلمين انا بتكلم انتي انصرعي سوي شي
الترف: خلاص طيب لا تصارخ
دخل ابو الترف وهو يتلفت: وينها وينها
صالح وقف : يبه هذا هي بس تعبانه
ابو الترف : منير ذا الكلب وشلون جاها
صالح: بشرح لك ................. وهاذي كل السالفه
ابو الترف: من الضابط اللي ماسك القضيه
صالح: ثنيان
ابو الترف : قله لا يطلع الخسيس خله يخيس لين يتربى وان طلع كفخه انت بعد اجل يطق الترف ونسكت
صالح طارت عيونه بصدمه وهو يشوف ابوه طالع وطلع هو بعد وهو مو مستوعب
نوره: اقول الترف الحين المطقوق انتي ولا ابوتس
الترف : ههههههههههههههههه مدري بس اتوقع نفس العرق متأثر
نوره: لا بدايه جيده
شهقت الترف وهي تقول : اصبرري ما قلت لتس
نوره: وششششو
ابتدت الترف تشرح كل شي لنوره
................••............
في حارة عجاج
عند عجاج كان واقف ويكلم هندي المغسله لكن انقطع صوته لما حس احد طييييره بالسماء وصرخ عجاج لكن وقفه صوت ثنيان الضاحك : افا يالخاااال طلعت خواف
عجاج: ياويلي ويلااااه بيذبحني ذا الادمي وبعدين معك انت
ثنيان : اقول اسمع العلم اللي يجمد على الشارب
عجاج : يا رجال اخلص بس لو هي على شاربي قطرة الماء ما توقف عليه
ثنيان : هههههههههههههههههه تعجبني الروح الرياضيه
عجاج : مستانس اليوم وش عندك
ثنيان: لا اصبر ماشفت شي من الوناسه عازمك بعد
عجاج: امااا عاد
ثنيان : تنزلك اطنخ فول وتميس على وجهه الكره الارضيه
عجاج : داري والله انك مايطلع من وراك خير
ثنيان: اقول اسمع بس انقز صلح شاهي وضبط الفرشه على حوض سيارتك وانا بجي
عجاج : الحين بسألك اناا الخال ولا انت
ثنيان: انت
عجاج : وشوله تاخذ اطباعي واخذ اطباعك
ثنيان: اصحاب يا عييين
عجاج : ياخي تونا باول العصر بتشوينا الشمس
ثنيان: خلها تشويني اشويييني يا شمس تكفين شويني
عجاج : اقول اذلف بس
نزل ثنيان ياخذ التميس وعجاج طلع يسوي الشاهي وبعد عشر دقايق تلاقوا في حوض سيارة عجاج
عجاج : غرد وش عندك
ثنيان: شوف والله لو اقولك مايجيك بس صدمه الا تنهار عصبياً
عجاج : حبيبي شالجديد من عرفتك انا يوميا انهار بس اللي يفرق انه عصبي مره وجسدي مره
ثنيان: مصختها ترا
عجاج : خلاص امزح
ثنيان ابتداء يحكي لعجاج اللي عجز يكمل وهو يقول : يا ابووووي نعم من صدقك انت بتزوج ذي حبيبي هاذي عندها الحزام الاسود في داعش قسم بالله لطشر وجهك اذا الاسبوع اللي فات مكفخه حريم جماعتها كل القبيله راحت تفرق بينهم والحين متهاوشه مع رجال وفقشها بعد لا والاعظم والامر انها وقفت في وجهك عشان ما تصادر سلاح اخوها
ثنيان : هههههههههههههههههههههههه وربي ياعجاج انها رهيبه اترك بس عنك انا خلاص انشلع قلبي تكفى يا عجاج تكفى
عجاج :اقول اعقل بس والله لو تزوجها لتحك وجهك بالزفلت وانت ساكت ولا مانيب رجال
ثنيان: يا رجال استريح لو هي على رجولتك كنا خالصين
عجاج : لا انت من زمان ماغسلت شراعك
انقلب الحوض لمعركه لكن وقفها سالم : الحين انتم ما عندكم فعاليات الا تهاوشون
عجاج رجع يجلس: وانت وش دخلك
ثنيان: معليك يا سالم تعال تعال ياخال اكل معنا تعال
سالم اللي طب على طول : افا يا ثنيان وش بلاك ضايق
ثنيان: ابي اتزوج
سالم: تزوج وش يردك
ثنيان: ابي اتزوج سمراء تكفى يا سالم
سالم اللي خذته النخوه : افا والله ان ازوجك اختي
شرق عجاج بصدمه: لا سالم سالم قوم ابوك يناديك روح
سالم: وينه ما سمعته
عجاج وهو يدفه: الا سمعته انا روح اخلص
راح سالم ولف عجاج: خبل انت خبل والله ان يزوجك سالم اخته مرزوقه وثم حلها قسم بالله تلعب بك كرة تنس
ضحك ثنيان : ليييه
عجاج: اقول دامك مدمن زواج تزوج الترف ارحم والله يا مرزوقه انها قايده الدواعش كلهم يا حبيبي مسمينها مرزوقه مفك نص عيال الحاره مسببه لهم اعاقه
ثنيان: يعني اجلس على الترف
عجاج : مع اني مب راضي بس ارحم والله
طارت عيون عجاج وهو يقول : يوووووك اذكر الكلب وجهز عصاك
ثنيان : شفيك
عجاج: لا تلتفت ابد ولا تضحك مرزوقه جايه
ثنيان: هاااه وش جايبها
عجاج: اسكت اسكت
مرزوقه اللي كانت عريضه وطويله ومعامله العبايه معاملة مشلح : عججججه
عجاج تنحنح : نعم
مرزوقه : شفت سالم مرك منا ولا منا
عجاج : ايه توه نزل لابوك اتوقع تلقينه تحت
مرزوقه : انا بنزل واذا مرك وانا ما شفته قله اني ابيه
عجاج : زين
راحت مرزوقه وثنيان اللي ماسك نفسه ولف او ماشافها لا شعوريا كب الشاهي من فمه ودخل في حاله ضحك هستيري نط عجاج وهو يكتم ثنيان قبل تنتبه له مرزوقه : يا خبل اص فكنا منها
ثنيان: اي والله مفك وش بها خارشتك كذا
عجاج : ياخي مريضه والله ما تقول رجال انها تدبغك ولا احد يفزع معك ولا احد اصلا يفكر ينقذك
ثنيان وخر وهو يمسح دموعه: اجل خلني اروح بيتي قبل اموت
عجاج : روح روح
نزل ثنيان وهو يضحك وكمل طريقه متجهه لبيته
................••.........
في بيت ابو محمد كانت
منيره جالسه وهي تقرا على ابوها ولفت وهي تشوف محمد اللي سرحان ماهو مع العالم
منيره راحت عنده : اسمع لو تموت ما بتهرب مني الحين تقول وش فيك
تحرك محمد وغمض عيونه بألم الحرق : وش بيكون فيني يا منيره لا تبتدين انتي بعد
منيره : وش يوجعك
محمد : ولا شي
منيره: تدري انك ما تقدر تكذب علي
محمد لف يبي يدور عذر لكن وقفته منيره : وش ذا الدم اللي بظهرك
محمد : ولا شي
منيره اللي لفته بسرعه : محمد لا تكذب هذا محل شاش ودم وش صاير
محمد رجع : منيره بشويش وش فيك انجنيتي
منيره : والله اني داريه فيك شي وساكت
محمد : يا بنت الحلال بسيطه بسيطه حرق بسيط
منيره: حرررق متى انحرقت وكيف
محمد حس انه ما بيطلع من دوامه خوف منيره وجلس وهو يشرح لها القصه
منيره: ما قلت لثريا ما فيك شي
محمد : الله عاد انتي عارفه ثريا وزحمتها اللي تسويها
منيره: كبير جرحك
محمد : لا
منيره: خلني اشوف
محمد :منيره الله لا تضايقني اكثر قلت بسيطه
منيره : طيب خلاص عطني اللفه من جديد عشان ما يعدم ثوبك
جلست منيره وهي تفك الشاش وشهقت: وين البسيط يا محمد
.
.
انتهى البارت✨