تهزمني السمراء وأنا نّد فرسان بقلم الكاتبة أديم الراشد// مكتملة

البارت الثالث والاربعين

«البارت الثالث والاربعين»
.
.
ورجعت الانظار لمحمد اللي ابتسم وهو يقول: مناير يلا بنطلع ولا لقيتي ثنيان وكشتي فيني
منيره ضحكت: الكشته متبادله بس يلا
طلعوا رهام ومحمد بس كانوا يكملون جلست التصوير ومحمد لو يقولون طب النار طب
ماصدق طلعت المصوره ولف وهو يحتضن رهام اللي كان قلبها يدق بفرح وخوف مختلط
طلعوا متجهين للفندق ومحمد اللي ماكان احد فرحان كثثثثر فرحته
ورغم فرحته دق وهو يوصي نواف على ابوه ويوصي منيره .................••............
في قسم الرجال
عجاج ونواف ومنصور اللي لقوا بعض ونواف عجاج اللي كانوا يطقطقون على منصور اللي مايعرف يرقص
جاء ثنيان وهو مستانس : خير وش ذا الضحك
منصور: يطقطقون علي عشان ما اعرف ارقص
عجاج: بالله عليك في احد ما يحب الرقص ولا يعرف يرقص
منصور: انا
نواف : اجل اللله يعينك بتبلش بنوف
منصور ابتسم : عاد وقتها نتعلم الرقص
ثنيان: اشوف الناس راحوا
نواف: ايه معاد بقى احد
عجاج : تحتاجون مساعده شي
نواف : لا سلامتك هذا العمال بس يضفون الاغراض
عجاج : اجل يلا
منصور : انا بعد بروح الله يوفقهم
ثنيان: امين ، عجاج انتظر
عجاج وقف وراح له ثنيان:وين بتروح
عجاج : خلاص بروح اصفي اخر اغراضي ببيتي وبحط راسي وبنام تعرف بكره
ثنيان: بتقنعني بتنام
عجاج: هههههههههههههه صعبه صح بس ما عليك معي حبوب منومه على كيفك
ثنيان بخوف: عجاج لا تاكل حبوب خطيره
عجاج: لا ما عليك
ثنيان: اجل انا يمكن اطلع لديرة الترف وتجون بكره هناك
عجاج: احسن بعد عشان تستقبل العمال
ثنيان: يلا اجل وان طعتني اترك هالحبوب
عجاج : ماعليك يلا
راح عجاج وثنيان اللي ضاق مب متطمن لذا الحبوب طلع وهو متجهه لحاره عجاج خصيصا بيت ابو عجاج
................••............
في بيت ابو عجاج
اللي كان مب مهتم ان كل الحاره بأكملها تحكي بعرس ولده والحاره كلها فرحانه ما فيه شارع الا معلقين به عقد سكر الباب وجلس لكن اشغله الدق على الباب وقف وهو يفتح الباب واحتدت ملامحه بغضب: وشش تبي انت
ثنيان مسك الباب قبل يسكره : وقف واسمعني
ابو عجاج: خييير
ثنيان: يا رجال خاف الله بنفسك وبولدك
ابو عجاج : مب شغلك واذلف معاد الا انت تعلمني اخاف الله
ثنيان : الا شغلي ونص جالس هنا وانت ولا هامك الدنيا برا قايمه قاعده فرحانين بولدك وانت جالس مثل المره في ذا البيت ما تخاف الله انت وش بيقولون الناس عليك عرس ولدك الوحيد ما تحضره ما تخاف لله من كسرة خاطره كل الدنيا فرحانه له بس عجاج مب فرحان لانك ما انت معه ولا تسمع له ولا حتى تفكر تسأل عنه بخير او لا طول عمري اعرف ان الابو هو للي يراعي ولده ويداريه ويمنعه من الغلط لكن عجاج اثبت لي العكس طول عمره تفكيره فيك وش اكلت وش شربت وش تسوي من بلاوي وهو يصلح وراك وانت ولا داري مستكثر عليه فرحته فيك في يوم عرسه خاف الله فيه جامله مره وحده مرره حسسه ان له ابو ماتت امه بخيرها وشرها بغض النظر عن مشاكلكم وهواشكم بس عجاج ماله شغل بأي شي بينكم اتمنى انك تصحى وتطلع برا وتشوف مافيه كبير ولا صغير ما فرحوا بعجاج الحاره منوره بفرحة عجاج الناس ما توقف اغانيها فرح بعجاج اللي ما فيه واحد مايحبه وانت جالس هنا يا خساره عجاج فيك ياخسارته
طلع ثنيان بعد ما طلع كل شي بقلبه وبقلب الحاره بكبرها وبقلب عجاج اللي الكل كانوا يدرون بأبوه واسلوبه وحياته عجاج بأختصار كان ولد نفسه ثم ولد هالحاره عمره ماكان ولد ابوه
كان ثنيان متعجب من امر هالحاره اللي كلها تفز لعجاج ابتسم وهو يشوفهم متجمعين على عجاج ويرقصون ومستانسين ابتسم ثنيان بقهر على حظ عجاج بس ان شاء الله نوره تعوضه تقدم وهو يدخل معهم بالاحتفال اللي من ثلاث ايام قايم وكان عجاج فرحان فيهم بس فيه كسرة ابوه بس ابتسسم وهو يشوف ثنيان بين صفوفهم اخو وصديق وعزيز كلهم فرحانين مع بعض وكلهم يحبون بعض ما فرق لا لون ولا شكل المهم القلوب بيضاء
بعد ما الكل فرح لف عجاج وهو يحتضن ثنيان بحب الدنيا : الله يديمك لي ظهر
ثنيان : الله يديمك لي سند ياعجاج الله لا يوريني هالدنيا بدونك
افترقوا بطبيعة الحال وكل واحد اخذ قائمة اشغاله بكره وكل واحد راح يستعد لبكره
................••............
في القاعه انتهوا المعازيم نهائيا والكل بدا يطلع لبيته وصل ثنيان وهو ينادي على اهله يطلعون
منيره: ثنيان اذا تسمح بروح انام عند ابوي عند عمي عشان اكون عنده من بدري
ام مشاعل: ولا عليك كلافه يمه دامك بكره بتروح لعرس صاحبك نزلني انا ومشاعل في بيتي وروح واذا رجعت تجي تاخذها
ثنيان: ابشري ياعمه
كان ثنيان مبسوط لكن فيه زي الغصه كان هادي ونزل الكل والكل راحوا ولف لترف : جيبي اغراضي واغراضك وتعالي
نزلت الترف تجيب الاغراض وثنيان ينتظر بهدوء
رجعت وركبت وهي تناظره بأستغراب : ثنيان صاير شي
ثنيان: لا
الترف : فيك شي وشو ! لا تخوفني
ثنيان: يالترف مافيني شي
الترف : تلعب علي انا اعرفك والله لتقول
ثنيان: والله ما فيني شي بس متضايق من ابو عجاج لكن بوصيك وصيه وصليها لنوره يالترف لا تنسين حرف واحد
الترف خافت : قول
ثنيان : ابيك توصينها على عجاج قوليلها تحطه بعيونها ولا تكفي عيونها الا تحطه مكان روحها قولي لها لا توجعه مهما كان السبب وصيها عليه زيين فهميها ان عجاج مب مثل غيره هو بيكون لنوره الدنيا بس لازم نوره توصى فيه لازم تكون له عوض عن كل شي في حياته فهميها تخاف الله فيه
الترف انرعبت من كلام ثنيان :ليش تقول كذا ؟ عجاج فيه شي
ثنيان : لا ، ما فيه الا انه طيب قلب والدنيا ما رحمته على الاقل نوره تكون معه
كان يكفي الترف تفهم خوف ثنيان ان نوره تضيق حياة عجاج ما تبي تعرف التفاصيل لانها تدري ما وصل صوت ثنيان لضيق كذا الا معاناة عجاج شدت على يد ثنيان: ابشر يا ثنيان ابشر وتأكد ان نوره ما تأذيه
ابتسم ثنيان اللي وقف وهو ياخذ نفس ويمسح وجهه : ماكان ودي اضيق خاطرتس بس ودي اني اوصي الدنيا بكبرها عليه
الترف : ما يحتاج توصي احد انت الدنيا كلها موصيتك على عجاج المفروض مايخاف ووراه مثلك
ابتسم ثنيان: اجل فيه احد ثاني موصيني عليه
الترف ابتسمت: وهي بعد موصينها عليك
ثنيان اللي كان واقف عند نفس الفندق اللي كانوا فيه عرسان : اجل تعالي بنعيد الذكريات ابي انعش قلبي من جديد
نزلت الترف معاه اللي ما زالت بكل فرح دخل ثنيان نفس الجناح وابتدا ليلة مع الترف اللي يحبها ماكان ثنيان مستاء من حياته بس وده انه قبل لا يكون بصورة زوج ثلاث حريم كان وده يكتفي بالترف بعيد بس فات الاوان ما معه الا ينسى ويعيش اللحظات مع الترف ويرجع للواقع بكثير احيان .................••............
في الفندق
عند محمد ورهام اللي بعد ما بدلت رهام وتعشوا كانوا جالسين بهدوء كان محمد مثل اللي مب مصدق وينتظر انه يصدق اعتدل لما جلست رهام بجنبه مد يده وهو يشد على يدها بحب
محمد ببحة حُب : ياالله قبل سنين طويله فاليوم اللي انكشفت لي فيه اوراق حبي لك خفت وانهرت خفت يجيي يوم مقدر اكون معك خفت ينتهي عمري ما تشاركت معك فيه خفت يختفي اسمي وهو مو مرتبط بأسمك خفت
محمد ببحة حُب : ياالله قبل سنين طويله فاليوم اللي انكشفت لي فيه اوراق حبي لك خفت وانهرت خفت يجيي يوم مقدر اكون معك خفت ينتهي عمري ما تشاركت معك فيه خفت يختفي اسمي وهو مو مرتبط بأسمك خفت يختفي محمد قبل يكون مع رهام عايشت هالخوف لين قبل شوي كنت انام واصحى وانا شغلي الشاغل كيفك اليوم ! تعبانه ؟ فيك شي؟ متضايقه ؟ يوجعك شي ؟وما كنت ارتاح الا لما اقنع ابوي ونزوركم واقوم واطيح تسعين مره عشان بس اعرف انك بخير على كثر الاغلاط اللي كانت تصير والمشاكل كنت حريص انها تنتهي قبل تنهيني وتنهي حبي كنت ادعي ان هالصدف اللي يسولفون عنها تجمعنا والحمدلله استجاب لي ربي ولاخيبني لا بالصدف ولا بالواقع
رهام اللي كانت تسمع محمد وهي ما تدري وش ترد عليه كيف انها كانت في غفله كيف ما انتبهت لهالحب العظيم كيف ماعرفت هالحنيه من زمان
باس محمد يدها وهو يوعدها انه يصون هالحب بصدره لين يموت ماعرفت وش ترد الا انها تستجيب لمحمد وحبه اللي عمرها ما تخيلته ...🌚
................••............
من بكره الصبح بدري
اتجهه ثنيان والترف لديرة ونزلوا تقدم ثنيان يسلم على ابو صالح وشوي وصلوا العمال وطبعا كان معهم ثنيان وصالح وسالم وبعض عيال حارة عجاج
وابتدوا وهم يفرشون ويعلقون العقود وامتلت الديره بالحياه والاصوات
ثنيان اللي كان واقف بطرف وهو يدق على عجاج لكن عجاج ما يرد وقف قلب ثنيان وهو متوتر اتصل بعيد اللي بعد ما يرد راح لسالم: سالم شفت عجاج وعيد اليوم
سالم: لا قال عجاج رح خذ العمال وروح معهم
ثنيان: يا حبيبي
صالح: وش فيك
ثنيان: مافيني شي
رجع يتصل وهو متوتر بشكل
................••............
في بيت نوره
عند الترف اللي دخلت وهي تزغرط وترقص بشعرها وسلوى تصفق معها
ام نوره ضحكت وهي تسلم على الترف اللي سلمت وركضت وهي تحضن نوره: اخيرا يا ربي بتعرسين اخيرا
نوره: اللي يشوفتس يقول تعيليني
الترف اول ماشافت ام نوره طلعت قربت : اقول اسمعي جايبه لتس سلام ووصيه
شهقت سلوى: لا يكون عجاج فيه شي
الترف كفختها على راسها: لو فيه شي بجي ارقص
نوره: وش بتس لا تخوفيني
الترف :من ثنيان
جلست الترف وهي توصل كل شي قاله ثنيان لنوره اللي احتارت وسلوى مثلها
سلوى: وش معنى !؟
الترف : مدري بس اتوقع عواطف ثنيان
نوره : بس لا توتروني تعالوا نشوف بس وش مسوين
.................••............
في بيت عيد
عند عجاج اللي من امس كان يفكر وعشان ما يفكر اخذ هالحبوب وبالقوه صحاه عيد
عيد: خييير وش بك احسبك مت
عجاج: بس اخذت حبوب كم الساعه !؟
عيد: 9 يللا يادوب نخلص
عجاج : وين جوالي
عيد : مدري حتى جوالي طافي بدور شاحن
وقف عجاج وشاف مكالمات الدنيا من ثنيان ودق ورد ثنيان بخوف : عجاج
عجاج: هلا وش فيك
ثنيان: بخير !؟
عجاج : بخير وش فيك
ثنيان: خفت يوم ما رديت خلصتوا شغلكم
عجاج: توني صحيت بروح احلق واخلص
ثنيان: زين لا تتاخر انا خلصت اللي عندي تقريبا
عجاج : يعطيك العافيه
سكر ثنيان براحة الدنيا وهو يرجع يكمل بكل حيويته ويركب ويفرش معهم ................••............
العصر تقريبا كل المعازيم وصلوا والكل متعودين على العرس البدوي اللي يبتدي من العصر وينتهي على 11:30 الليل
عند ثنيان اللي ماصدق يشوف عجاج قدامه بخير كان عجاج كاشخ بكل قلبه وفرحان ودخل وهو يسلم على الكل
اما ثنيان اللي طلع يلبس دخل وهو ينادي الترف اللي جات وهي معاها اغراضه : جاء عجاج
ثنيان: ايه عطيني بطلع
اخذ ثنيان ملابسه ولبسه وهو يشد حزام الرصاص ويرتب شخصيته ولف على الترف اللي تبخره وهي اللي كانت كاشخه كشختها البسيطه اللي تسوى عندها وعند ثنيان من الف كشخه
ابتسم ثنيان وهو ياخذ من العود ويتبخر وابتسم: الوعد شوي بالساحه ترا اما برد قلبي امس( يقصد انهم بيرقصون)
الترف ضحكت: اجل لا تشد حيلك بالرقص برا وتتعب شوي
ثنيان طلع وهو يضحك ويرمي ومبسوط وشوي شوي جاء نواف وابو ثنيان وبعد المغرب مباشره مع اجواء العقود وريحة العود والقهوه واصوات التهاني والسامري القايم وصوت الرمي من هنا نقدر نقول ابتداء العرس لكن وقفت الدنيا اول ما دخل ابو عجاج
ثنيان وعجاج كل حارة عجاج يناظرون ابو عجاج اللي كان كاشخ ولابس بشته وقرب وهو يتقدم لعجاج اللي طاح قلبه خوفاً ابوه يخرب زوااجه بس تفاجئ انه حضنه وهو يقول: ادري اني ضايقتك كثير وادري اني ما رحمتك واني أذيتك لكن جيت وانا بفرح مع ولدي بشوفه عريس بزفه وبرقص معه وانا ندمان اني ضيعت سنيني بحقد تافهه جيت وانا بطلب منك السموحه
عجاج بردت اطرافه وجاء ثنيان بغضب لما شاف ملامح عجاج: وش تسوي هنا
ابو عجاج : بفرح مع ولدي
ثنيان قبل يتكلم تفاجئ بعجاج اللي حضن ابوه بفرح : مسامحك يا تاج راسي وانا من لي غيرك
ثنيان تشقق من الفرح لما شافهم تراضوا والكل يناظر بفرح وحماس
كانت فرحة ثنيان توازي فرحة عجاج اللي حتى عيونه دمعت من الفرحه واندمج ابو عجاج مع العرس وابتداء عجاج اللي يرقص بفرح
والدنيا قايمه معهم
................••............
في بيت ام نوره
وعند نوره اللي كانت الترف وسلوى يجهزونها وهي اللي سرحانه بكلام ثنيان اللي غير صورة عجاج بنظرها حست انهت بتحصل شي غير عن الواقع
الترف : نوره علامتس
نوره: تقولين ابو عجاج مب حاظر
الترف : مدري بس ثنيان متضايق منه مررره
سلوى: ايه انا سألت صالح عن اللي جو بالملكه وماذكر ابو ابد
نوره : يعني وش بينهم ! معقوله سالفة قويه لذا الدرجه
الترف: هذا اللي ماعرفته ولا قدرت اعرفه
سلوى: الحين انتي على لقافتس ماعرفتي سالفه عجاج مع ابوه
الترف : مب سالفة لقافه بس والله مقدر اسأل خصوصا ان كل مره يسولف ثنيان عنه يكون متضايق حتى صوته مختنق فا خفت اسأل
نوره: اشغلني والله
الترف : ماعليتس ان شاء الله تهون ما عليتس
سلوى: يمكن متهاوشين على سالفة زواجه من نعيمه
الترف : ماظنتي بس يمكن
سلوى ضحكت بحماس: ايه عاد اليوم ام عايض بتشرف مع مرت عايض نعيمه
سلوى: ايه هذا اللي محمسني
نوره: بنات عبسووه فيه اخاف تخرب العرس
سلوى: لا ابشرتس قشها خالها وذلف بها للمدينه
الترف : روحه بلا رجعه
ام نوره: بنات وينهم يلا تعالوا
طلعوا الترف سلوى للمعازيم وهم بمثابة خوات العروس
................••............
عند الرجال اللي كان صفهم قايم عجاج اللي من فرحته يطير برقصه يطيييير ومقابله ثنيان اللي كان يحس ضلوعه تدق مع قلبه من فرحته ب عجاج الرقص كان محتدم وثنيان اللي صاير معروف عند الكل عيد وسالم ابو حمود وابو سعيد واهل حارة عجاج اللي صدق كانوا عزوه وابو عجاج اللي لاول مره يحس انه يعيش ان له حياة ثانيه مسفر وابو ثنيان وابو الترف اللي صاروا اصدقاء سريع وانقلب ابو ثنيان اللي ماكان يحب السمر ولا يحب صحبتههم الا انه صار ينبسط معهم ومحد كان حاس ان احد غريب على الثاني كانوا كلهم اهل
وقف ابو ثنيان اللي كان يردد مع الفرقه بصوت عالي ( سلام ياللي تبون اللعب مني سلام
واثني التحيه على اللي يستحقونها)
اعتلت اصوات التشجيع واعتلى الدق واصوات الناس تردد هالشطر اللي يعلن السلام التام
نواف ضحك وهو يقول لثنيان: امي لو تشوف حالة ابوي بتموت
ثنيان ضحك: يا رجال الحمدلله اني اخييييرا قدرت اقنع ابوي واطلع من قوقعته وشكوكه
نواف : تشكر يا ضابطنا
ضحك عجاج اللي كان يردد معهم بحماس وهو ينتظر اللحظه اللي بيقابل الترف فيها وهو اللي ما عاد يسوى معاه الرقص الا معها .................••............
في عرس الحريم
سلوى اللي كانت كثير احيان تصفق وكل ما نوت ترقص طردتها ام نوره لكن الترف اللي كانت مكفيه وموفيه وسعديه اللي مشعلله العرس بكبره كانت الترف في تحدي مع بعض الاعداء زي ما تسميهم وكل وحده تغطي على رقص الثانيه لكن يكفي حضور مرزوقه
سلوى :الترف هاذي من
الترف : يا بنت مدري بس واضح الشر
سلوى شهقت : جتنا جتنا
وقفت الترف وتقدمت مرزوقه: انتي !
الترف : هلا
مرزوقه: يقولون انتس مرت ثنيان ولدنا
الترف : ولدكم!
مرزوقه : ايه يعني صديق الحاره ويسمونه ولدنا
الترف : ايه ، امري كيف اخدمتس
مرزوقه: لا ابد سلامتس نبي برادي شاهي
الترف : الحين ارسلتس البنت
راحت مرزوقه ونادت الترف البنتت تعطيهم شاهي
سلوى: وش ذا المصارع وراها تتكلم كذا
الترف : مدري بغيت اكفخها يوم قالت ثنيان ولدنا بس فكرت اني يمكن اكسبها صديقه
سلوى: احسن لتس لانها لو كفختس انا اول وحده معرفتس ومانيب فازعتن معتس
الترف: اعرفتس رخمه
ما يمديهم خلصوا كلمتهم الا وقفت ام شوشه : اقول سعديووه دوري لنا اغنية عن السحر يمكنها تفك اللي على الشايب واتباعه اشوف ترفوه مسلمينها الخيط والمخيط
الترف تكتفت: ااقووول ام شوشه انثبري محلتس ولا عطيتس كف اعلمتس كيف يجي السحر
ام شوشه: جربي حظتس هالمره
مرزوقه اللي تدخلت بالوقت الصح ولاول مره تكون مرزوقه صح : انتي هيه وش عندتس!؟ ولا تبين اجي انفض شوشتس ذي
ام شوشه: من انتي ياللي تصايحين من شلة السحره هاه!
ماكانت تدري ام شوشه انها نشبت بالشخص الغلط قامت مرزوقه ويا ليتها ما قامت نتفت ام شوشه من بين الناس نتف ومسكتها وهي تلعن خيرها وطبعا مقارنه بحجم مرزوقه ما قدرت ام شوشه تقاوم لكن كان اقوى تجاهل ان سعديه رجعت تغني والترف تكمل رقص هي وسلوى كإن ماصار شي وطبعا مرزوقه اللي كفتخها لما عضت الارض وتركتها وكملوا الزواج عادي ورجعت تشرب شاهيها اما الحضور محد فكر يتدخل في ام شووشه حتى شلتها وتكريما لمرزوقه ما خلت الترف شي الا وجابت لها منه
................••............
في غرفة نوره
اللي كانت تراقب الرجال من الشباك وهي تشوف عجاج من بينهم فرحان ويرقص صار في راسها تضاد كبير على اللي قاله ثنيان واللي تشوفه وخرت اول ما فتحوا سلوى والترف وهم يضحكون: فاااتس نص عمرتس
نوره : وشو
الترف جلست وهي تحكي لها بضحك الدنيا ونوره تضحك : خساره فاتتني
ام نوره جات تركض : نوره نوره يلا قومي المعرس بيجي
فزوا كلهم وهم يرتبون يعطرون المكان جلست نوره وهي متوترره بإنتظار عجاج
عجاج اللي كان عند الباب هو وابوه وثنيان ومسفر
عجاج همس: ثنيان شكلي ضابط
ثنيان: تشلع القلب ياعجه
عجاج:زين الله يطمنك
ثنيان: موفق يا حبيبي
دخلوا ودخل عجاج اول واحد وابتسم ( اخسسس هاذي فتاه الصحن والله طلعت مزيونه ) : سلام عليكم
ردت نوره بهمس ودخل ابو عجاج : سلام عليكم
سلم على نوره اللي اول ما قال ابو عجاج رفعت راسها بصدمه وبعدها نزلتها( ابووه ذا وش جابه، يا ربي عجزت استوعب )
طلع ابو عجاج ومسفر وجلسوا عجاج ونوره
عجاج كان مرتبك ما يدري وش يقول بس شاف الصحن اللي على الطاوله وقرر انه يلطف الجو: ماشاء الله جايبين صحن عسى مب ثقيل ترا راسي يرج من ذاك اليوم
نوره اللي شرقت وهي كانت تدعي انه مايتذكر
ضحك عجاج وهو يعطيها المويه: بسم لله عليتس امزح معتس
نوره اخذت المويه وهي بتموت وقرب عجاج : لا تخافين كل شي تسوينه على عيني وراسي ويشهد الله انتس امانه بعيون عجاج
نوره كان ودها يغمى عليها بس الوضع ما ينفع
بعد سكوت ماقدر عجاج يغطيه وقف وهو يقول : مشينا
نوره رغم انها كلمه عاديه بس عجزت تستوعبها
نزل عجاج لها ببتسامه:نوره .. نمشي ؟
نوره بذاك الوقت حتى اسمها جحدته ارتفعت ضحكة عجاج اللي مسك ارتباكه على ضحك هدا شوي وجلس : : يعني اذا تبين نجلس هنا عادي بس انا افضل نمشي
وقف وهو يمسك يدها نوره وقفت وهي خلاص منتهيه وطلعوا لسياره ورغم ان نوره ثرثاره الا انها ماعرفت تنطق بحرف رغم محاولات عجاج ................••............
بما ان المعاريس راحوا معناته العشاء حظر وبعد ما انتهى ابتدوا الناس يمشون شوي شوي وجاء الوقت المنتظر لثنيان والترف وهالمره بدى فيها ثنيان اللي ارسل بزر يقول لسعديه تقول للحريم يلبسون ومن بعدها تغني هالاغنيه اللي طلبها ثنيان
في لحظات وقوف الترف اللي كانت متوقعه الحريم بيمشون وكانت تتقهوى وتعدل شكلها تفاجات بالزر اللي يقول: ثنيان هنا
لفت وشافته واقف على الباب مادخل والناس متغطين وهو يأشر لها تجي
قربت ببتسامه: ثنيان ليش انت هنا ؟!
ثنيان وهو يهمس : عشان تبتسمين وترقصين فرح و تدللين وتمردين
الترف ابتسمت بفرح : ليش اسوي ذا كله
ثنيان : لاني احبتس
وصدح صوت سعديه : يازين ماترحم المبــــــــــــلي اللي بحبـــــــك بلاه الله
ثنيان ابتسم: شرفي
دخلت الترف وهي تطير بكلمات ثنيان للي معاد يهتم من حوله ولا وين هو كل اللي همه هالايقاع الحلو اللي يجمعه هو والترف لا ينقطع لا يضيع منه خلااااص حس انه معاد يجوز له الرقص الا معها
سلوى اللي كانت مبتسمه ان اخيرا الترف لقت لها اللي يصبر على عنادها ويحبها رغم الاختلاف الكبير اللي بينهم
................••............
بما ان اليوم انتهى وانتهت احلى الفقرات الحين صار وقت الشغل خلصوا ثنيان وصالح شغل الرجال وكانت الترف ترتب لهم ألحفتهم بالحوش وهي مبتسمه بحب وهي تراقب ثنيان طبعا ابو الترف اللي نام من مده وصالح اللي دخل يشوف سلوى
تقدم ثنيان لترف وهو يهمس : هاه عسى ما تعبتي
ضحكت الترف : انت خليت فيها تعب
ثنيان: وش اسوي قلبي يتكلم
الترف: اللله يسلم قلبك يارب
ثنيان: كيف كان عرسكم
الترف : تعرف مرزوقه
ثنيان لف بسرعه: سوت لك شي
الترف :لا ليييه
ثنيان: مجنونه ذي لا تقربين منها ترا مب عبسوه هاذي اسمها مرزوقه مفك تلعن خيرتس محد يفكتس
الترف ضحكت : عز الله مفك
ابتدت تشرح لثنيان اللي سوته وثنيان اللي انفجر ضحك: لا بالله ماهيب صاحيه
الترف : يا كثر ما حبيتها بردت قلبي
ثنيان: ايييه جاء من يساعدتس
الترف : خلاص اعتزلت من بعدها
ثنيان ابتسم : احسن اعتزلي اصلا خلاص اتركي الساحه للجايين
الترف : يعني نقول ان شاء الله
ثنيان اللي انسدح بفراشه اللي بعيد شوي عن ابو الترف : تعالي خليتس هنا لين انام
الترف : ليه حبيبي انت باقي بزر وبعدين ابوي اذا قام وانا هنا بيكفخني
ثنيان: الله عليتس صرفتيها كلها
الترف وهي تلحفه : والله عاد اليوم نام بلحالك حسب ذنوبك على راحتك
ضحك ثنيان وهو يراقبها لما دخلت
الترف اللي كان ودها تجلس بس تدري ان وضعها غلط وهي جالسه بينهم عشان ثنيان ينام
.
.
انتهى البارت✨تفاعلكم لروايه يثلج صدري لا تبخلون باللي يسعدني💓