تهزمني السمراء وأنا نّد فرسان بقلم الكاتبة أديم الراشد// مكتملة

البارت الواحد والثلاثين

«البارت الواحد والثلاثين»
.
.
في غرفة شوق
شوق اللي شبه جثه كل مكان منها ينزف يدها ماتحس بها راسها في الم فضيع من كثر ما نخبط فالجدار كانت يغمى عليها ساعات وتصحى دقايق
................••............
الليل اللي كان ببدايتة وناسه وضحك انقلب اخره لليل كئيب يضغط على انفاس الجميع وأولهم دلال اللي كانت صدمتها في بنتها اللي ربتها وتعبت عليها وعطتها من روحها روح هاذي نهاية تصرفاتها هاذي اخرة التربيه اللي تعبت عليها كانت حزينه جدا وهي ماتدري كيف يتودع بنتها وتسلمها لعمها وقبل كيف تبي ترضى على اللي سوته بنتها كيف بتستوعب فعلتها في رهام ومع محمد
اما شوق اللي كانت رغم كل اللي جاها ما رضخت وهي تنتظر متى بس يشعشع نور الصبح وتتصل في اعمامها وتقلب الدنيا على ثنيان
نوف اللي كانت مصدومه كل الصدمه وهي كانت تدري شوق حقود لكن ما توقعت توصل كذا وهي فالحقيقه شايله هم نفسها لانها الوحيده اللي بتضيع في حرب خوالها واعمامها
ابو ثنيان اللي كان اليوم سيء جدا بالنسبه له وهو يشوف قد ايش ان التربيه صعبه قد ايش موضوع انك تخاير على عيالك يهد الحيل
رهام اللي ما تدري كيف بتقبل الصدمه من اي جهه بالضبط تفرح انها هي ومحمد طلعوا منها بسلامه او تضيق على حال دلال ولا تحقد على شوق او كيف هي بتتجاوز ذا الصدمه
................••.........
ثنيان اللي طبيعي جداً ان دروبه ترمي به لبيت عجاج المنقذ الوحيد له من كل ذا الفجعه وصل وهو يمر من ممرات الحاره الخاليه في الوقت المتأخر طلع لما وصل بيت عجاج وهو يدق عليه رد عجاج : هلا
ثنيان: عجاج اطلع لي بررا
عجاج : ليه وش فيك
ثنيان :اطلع
جلس ثنيان جنب الباب ينتظر عجاج لكن عجاج اللي نط من الجدار وفز ثنيان: ياخي وش بك فجعتني وش مطلعك من هنا
عجاج : بسم للله عليك كأنك ماتعرف ابوي لو شافني طالع بذا الوقت بيجلس يهاوش وحاله
ثنيان: اووه وبعد ابوك قصه
عجاج اللي راح لحوض السياره وفتحه وهو يجلس : تعال هنا وش فيك
ثنيان اللي جاء وجلس بهدوء وهو مايدري وش بيقوله يقوله بنت اختي تغازل ولد عمي ولا يقول بنت اختي تتهم اختي ولا وش بالضبط كان صعب عليه ان يشرح حتى لو لعجاج بس لف بهدوء : اتوقع اني هالمره صعب اشرح لك
عجاج : ليه وش صاير وش هالكارثه اللي صايره
ثنيان بعد صمت طويل وصعب فهمه عجاج قال ثنيان السالفه بتردد كبير وماكان على عجاج الا انه يوقف بصدمه : لا عاد
ثنيان كان ساكت وعجاج اللي يحاول انه يفهم الموضوع ومايسأل لان وضع عجاج ما يسمح بس قال : نهاية القصه !؟ وش بتكون
وثنيان : بتروح تعيش عند عمها
عجاج : وتتوقع من عمها ما يسأل ليه جبتوها وانتم رافضين من البدايه !؟ وليش جبتوها ما جبتوا اختها
ثنيان: ما يهمني يسأل او ما يسأل يا ياخذ هالزفت يا انا ادبرها
عجاج : ومحمد مايدري
ثنيان: لا
عجاج : احسن شي انه مادرا
ثنيان : ماني مقهور على احد كثر دلال
عجاج : الله يعينها اراد ربي يمتحن صبرها ببنتها
ثنيان : متى يجي الصبح احس اني اختنقت
عجاج ابتسم لما سمع الاذان اللي صدح : يناديك المؤذن والصباح
وقف عجاج وهو ينزل اكمامه : وان شاء الله اني من اللي يلبي النداء
عجاج : خلني اخذ ثوبي وبجيك
اخذ عجاج ثوبه وطلعوا متجهين للمسجد
................••............
اما الترف اللي من اول ما دخلت ومشاعل ومنيره يسألونها اذا تدري وش الموضوع وهي تقول ما تدري ما سمعت شي رغم انها سمعت وكان الخبر لها صادم كانت جالسه وهي بس تفكر وش بيسوون بشوق بعد
لفت اول ماسمعت دق على باب غرفتها منيره : الترف الترف
الترف: هلا منيره ادخلي
فتحت منيره الباب بهدوء : ثنيان فيه !!!
الترف : لااا مب اليوم عندتس !؟
منيره : ايييه بس ماجاء قلت يمكن عندك
مشاعل جات من وراهم بجلال الصلاة : صاحيين !؟ باقي ثنيان ما جاء
منيره جلست وهي تناظر غرفة الترف بهدوء : والله ماجاء مدري وين راح
مشاعل : لا يكون رجع لشوق
الترف : لا وين يرجع لها تلقينه يلف ولا شي
منيره: اكيد انه ضايق مره ومنحرق قلبه
مشاعل: مدري وش صار والله للحين بفجعتي
منيره : يعني انتي يالترف ما سمعتي ولا شي ولا حتى طراطيش كلام
الترف : لا يا منيره اقولك انا كنت برا بالحوش وهو اخذ عمي ونواف ودلال ودخلو ما ادري وش قال
منيره: الله يستر بس
قبل ينتهون من كلامهم فزت منيره اول ماسمعت الباب ووقفوا وهم يشوفون ثنيان اللي جاء وهو بيده علبه مويه
منيره:ثنيان وينك خوفتنا عليك
ثنيان : وش فيييه وش يخوف
مشاعل : طلعت وانت معصب وتسوق وانشغل بالنا
ثنيان : مافيني شي هذا انا بخير جيبوا لي بدلتي واغراضي بداوم
مشاعل: بس انت ما نمت
منيره: لا تروح اليوم
الترف ما تكلمت كثير وطلعت وهي تجيب البدله بهدوء واعطته وهي ساكته ولا نطقت بحرف رفع ثنيان راسه وهو يناظرها ومستغرب سكوتها اخذ البدله ودخل لوحده من الغرف
اما مي اللي قامت وهي تقول : وش فيكم ! وش ذا الازعاج
مشاعل: صلاة صلاااه
مي صفقت الباب في وجههم وهي تدخل
منيره: ليتك ما عطيتيه يالترف مابي يداوم اليوم ابد
الترف: لييه !! ما يداوم بالعكس خليه يداوم ويطلع ويغير جو والا تبينه يجلس هنا ويفكر ويعصب زياده وينقهر لا خليه جلسة البيت ماتنفع
مشاعل: صادقه بس لو نام شوي
الترف ماحست بنفسها: اصلا لو اني اعرفه لو شوي بس اعرف انه ما يجيه النوم بذا الوضع لو يموت
منيره:وضع ايش !
الترف : يعني عصبيته هاذي وشوق اكيد مسويه شي
مشاعل: والله مدري
ثنيان كان يلبس قريب ويسمع الحكي رغم ضيقته الا انه حس ان فيه احد وراه يبيه يظل بقوته ما يبيه ينهزم للهم ابتسم بضيق وطلع بدون يناقش احد وطلع متجهه لدوامه
................••............
اما عند سيف اللي كان جالس بشقته بعد ما رجع من عند امل وهو يفكر في هواش ابوه والمشكله اللي صارت ما فكر كثير وقام طلع متجهه المستشفى ياخذ امل لانه من الان اعتبر ان اهله انتهوا نهائياً
.................••............
وبعد الظهر كانوا في بيت ابو ثنيان
ينتظرون ثنيان اللي دخل بهدوء : سلام
ابو ثنيان: زين جيت انا اتصلت في سامي يجي ( عم شوق )
ثنيان : زين
دلال : يبه لو تراجعون والله بعد ما اخليها والله اربيها من جديد
ثنيان بحده : دلاااال شفنا التربيه ! الموضوع منتهي وهاذي مالها جلسه ابد
نواف جاء : سامي وصل
وقفوا ودخل سامي وهي يسلم عليهم ببرود معتادين عليه وبعد سلام وسؤال عن الاحوال
ابوثنيان : والله ياسامي احنا جلسنا وفكرنا وخذينا وعطينا وانت طول عمرك تحاول انك تاخذ شوق عندك وتطلبها اكثر من مره ورفضنا لكن انا تكلمت مع شوق وبتروح عندك وتعيش معك
سامي : وش ذا الرغبه المفاجئه
ثنيان: هذا الوضع
سامي : ونوف
ثنيان: نوف ماتبي تروح
سامي : هو فالحقيقه انا لما شفت اصراركم على الرفض قررت انا وولدي زياد اني اخطب له شوق ودام على قولكم هذا الوضع اجل انا بخطب شوق منكم لزياد
لفو يناظرون بعض بهدوء وكإن طلب سامي كان منقذ لهم
ابوثنيان : ابد هي بنتك وعند ولدك واعتبرها من الحين زوجة لولدك
سامي : ليه ما تاخذون شورها
نواف : هي شوق تحبك واكيذ بتفرح وبتوافق
سامي : اجل نادها بسلم عليها وفاتحها
نواف : الحين مب موجوده لا جت بنخليها تحكي معك
سامي بشك : زين انتظرها
طلع سامي اللي كان شاك في تصرفاتهم الغاضبه وعيون ثنيان اللي ماتريح وخصوصا انه ساكت ونواف يتكلم
اما ثنيان اللي وقف وهو يرمي الجوال على نواف : خذ بعد نص ساعه تتصل فيه وخلها تكلمه ولا تنطق الا بخير وموافقه وان قالت غيرها قلها انها اخر كلام لها وخلها تستر على نفسها ازين
طلع ثنيان لبيته ونواف طلع هو وابو ثنيان لشوق اللي كانت دلال عندها تضمد جروحها
ابو ثنيان بغضب : قووومي قومي فزي وكلميني
وقفت شوق بصراخ: وش بتسون بعد بتكملون علي اللي بداه المريض اللي تحت
نواف : اقققققصري صوتك وجع لا اكمل انا عليك
دقها ابو ثنيان بعصاته في راسها بغضب : حطي عقلك براسك واسمعيني لاني ما زالت ساكت عن الموضوع لو بحاسبك انا والله لتموتين مانسيتي وش صار فيك ساعه وبيعطيك نواف الجوال تتصلين على عمك وقولي له انك موافقه على ولده بدون نقاش وان سألك عن حالك حالك بخير
نواف : وحطيي في بالك إنا لاخر لحظه سكتنا وسترنا عليك وطلعناك بكرامتك من البيت
شوق كانت ساكته وهي تسمع وتنتظر بس متى يسلمونها الجوال ................••............
في بيت ثنيان
اللي دخل وشاف منيره ومشاعل اللي كالعاده جالسين بالصاله
ثنيان : سلام
الكل : وعليكم السلام
منيره وقفت وهي تاخذ اغراضه من يده : كيفك الحين
ثنيان: ماشي حالي لكن بطلع انام مابي صوت وازعاج
منيره: طيب
ثنيان: وين الترف
منيره: نايمه
وقفت مشاعل وهي تطلع ورا ثنيان للي دخل غرفتها وهو يرمي ملابسه بضيق ودخل يتروش
جلست مشاعل وهي ترتب له ملابسه وطلع بعد ما لبس ورمى نفسه بهدوء
وقربت مشاعل وهي تمسج كتفه : ثنيان وش صاير
ثنيان: ما صاير شي
مشاعل : كيف ما صاير شي وانت معصب وحايس الدنيا
ثنيان بغضب: مشااااعل انا جاي برتاح
مشاعل: طيب خلاص
تغطى ثنيان وهو ماهو مرتاح لشوق هاذي ابد ابد
................••............
في بيت اب ثنيان
وعند شوق اللي كانت تنتظر اول ما فتح نواف الجوال واتصل وجاء صوت سامي : هلا بحبيبتي هلا
انهلت شوق وهي تصارخ وتبكي : ألحقني يا عمي إلحقني
سحب نواف الجوال بغضب وقفله وهو يضرب شوق كف من كل قلبه : وش قلنا لك احنا ما تفهمين
ركضت دلال وهي تبكي : وش فيك يا نواف وش فيك
نواف سحب دلال برا وطلع وهو يقفل الباب ويسمع شوق تبكي نزل لابوه مسرع وهو يشرح له اللي صار
ابو ثنيان وقف بغضب : اركض ناد ثنيان
نواف اللي راح ركض وهو يدق الباب فتحت منيره بخوف : نواف وش فيك
نواف : وين ثنيان
منيره: نايم
نواف : صحيه يجي للبيت بسرعه بسرعه يا منيره ابوي يبيه
ركضت منيره لثنيان اللي يادوب دخل بنومه الا دخلت منيره تركض : ثنيان عمي يناديك اركض له
فز ثنيان اللي انطلق يركض وهو ماطرا له شوق بتسوي شي
وصل بوصول سامي اللي نزل وهو يركض وسمك ثنيان: وش فيها شووق وش مسوين فيها
ثنيان بعد يده بغضب : نزززل يدك وش تخربط انت
سامي : شوف يا ثنيان انا اعرفك زييين اكيد مسوي لشوق شي طلع بنت اخوي ازين لك والا بتوصل للمحاكم
ثنيان : بنت اخوك هذا هي جوا بتاخذها بتخليها بكيفك واللي ماتطوله بيدك طوله برجلك
دخل ثنيان ولحقه سامي اللي ينادي شوق
اخذ ثنيان مفتاح الغرفه وطلع بغضب الدنيا فتح الباب وهو يشوف شوق الللي واقفه بقوه وتنتظر
ثنيان: يعني ما فاد معك شي ابد هاه حقارتك هي هي
شوق : صدقني لتندم على كل مره مديت يدك فيها علي
اتسعت عيون ثنيان بقهر: من بيندمي ان شاء الله
شوق : عمي
طلعت شوق وهي تركض وثنيان اللي ما اهتم فيها لا هي ولا عمها القهر انها تكلمه بذا الاسلوب
نزل ثنيان وراها وهو ناوي لها الذبحه ركضت شوق وهي تحتمي بسامي اللي دف ثنيان بغضب : تنكسر يدك قبل تمدها عليها
ثنيان : اقولك وخر من قدامي ازين لك لا ادفنك وادفنها معك
سامي اللي لف واول ماشاف وجهه شوق احتدت ملامحه بغضب ولف وهو يصرخ في وجهه ثنيان : والله لابتر يدك اللي تجرأت وانمدت على بنت اخوي
شوق ببكى: عمي تكفى خذني من عندهم اذبحوني
سامي اللي حاطوها بغضب: بتندمون كلكم بتندمووون نووووفف نوووف
ابو ثنيان اللي بعد ماشاف الوضع قال: اقول اسكت يا سامي واعرف سواتها قبل تكلم
سامي : مابي اعرف شي باخذ بنات اخوي والله والله لتندمون
نوف طلعت : انا ما راح اطلع مع احد انا بجلس عند خوالي
سامي : نوف لا تخافين محد يقدر يسوي لك شي انا معك
نوف : مابي
ثنيان اللي قال بصراخ: اقول خذ هالسافله للي مثلك وانقلع برا واعلى مافي خيلك اركبه ونوف مانعطيها لاشكالكم القذره
طلع سامي وهو يهدد وصرخ ثنيان لنواف : جيب لي مويه
جاب نواف وهو يعطيها ثنيان المقهور اللي انزعج من بكى دلال ولف بصراخ: تبكييييين على مييين يا دلال على ميييين تبكين على هالواطيه اللي راحت ولا على ايش
دلال : هاذي بنتي يا ثنيان بنتي
ثنيان : بنتك راحت خلاص من الساعه اللي سوت سواتها رمتك وراها ومشت
سحب نوف وهو يحطها قدامها: هاذي بنتك هاذي بنتك وهاذيك ادفنيها بأرضها ازين
ابو ثنيان : ثنيان خلاص
رمى ثنيان الكوب وقام بغضب وطلع
ابو ثنيان:دلال انسيها احسن لك
قامت دلال وهي تبكي ولحقتها نوف ورهام
اما ام ثنيان اللي جلست وهي تهاوش :هاللي ما تستحي انكرت جميلنا عليها وانكرت سترنا عليها
ابو ثنيان: خلااص هالموضوع ينتهي خلاص
نواف : يبه اخاف هالخبل يسوي لثنيان شي
ابو ثنيان: الله يستر
................••............
في بيت ابو محمد
محمد اللي كان يدري ان الجو منحاس ومتوتر لكن ما يبي يحسس ثنيان انه عرف الشخص اتصل على ثنيان لكن ما يرد نزل الجوال وهو يضربه بكفه ببتسامه : هانت يا رهام كلها شهور وكل شي يعدي
................••...........
في سيارة سامي
. وعند شوق اللي كانت منهاره نهيار اغلبه تمثيل وهي تشكي شكاوي كاذبه لعمها
سامي : لا تخافين ماني مخليه يسلم بفعلته واالله ما يسلم والله
شوق : وش بنسوي
وقف سامي عند المستشفى: بنشوف جروحك الحين وبعدها اقولك
شوق كانت شوي جروحها بليغه وعميقه وهذا شي كان في صالحها بعد ما انتهت شوق من الكشف وعالجت جروحها اخذوا تقرير بالضرب وطلعوا متجهين للقسم
شوق : عمي وش بنسوي
سامي : بتقدمين على هالحيوان بلاغ عنف اسري وبيتحاسب على كل شي سواه فيك
شوق اللي كانت خايفه ان ثنيان لو سجنته يبرر بقضيتها وهي بعد بتدخل في مصيبه بس قال سامي : فيه شي انا ما ادري به
شوق : لا
سامي : اجل انزلي
نزلوا ودخلو القسم وشوق للحين بحقدها على ثنيان
................••............
في بيت ثنيان
دخل ثنيان البيت وركضت مشاعل ومي : وش فيك عمي فيه شي
ثنيان مارد وطلع ولحقته منيره: ثنيان حلفتك بالله وش فيه ابوي فيه شي عمي فيه شي
ثنيان لف بغضب : لااااا لااااا خليني بحالي
دخل غرفة مشاعل وجلس بضيق ودخلت مشاعل: ثنيان لا تخوفنا قلنا اللي يصير طيب
وقف ثنيان بإنزعاج: كم مره قلت لكم فكوووني
من الاسئله والازعاج ماتفهمين
طلع وهو يشوف منيره ومي واقفين ينتظرون مشاعل بس وخروا اول ماشافوه يناظره بغضب : خيييير وش فيه
منيره: مافيه شي
ثنيان: كل وحده على غرفتها
افترقوا ولف ثنيان وهو يتجهه لغرفة الترف دخل وشافها تكلم نوره ولف وهي تناظره لما جلس بغضب وقالت: نوره اكلمك لا فضيت
سكرت ونزلت الجوال وتشوف ثنيان اللي يفور من غضبه سكتت وهي تجلس بدون ولا كلمه
ثنيان اللي ملاحظ انها على كثر عنادها في ذا الوقت وذا الظروف ما تضغط عليه بعد يدها وهو ينسدح على رجولها : ليش ما سألتي انتي بعد !؟ ولا تدرين باللي صار
الترف ما حبت انها تقهره زياده وقالت : مادريت لكن ما ابي اسأل
ثنيان: لييه ! ولا ما يهمك اللي يصير معي
الترف ناظرت فيه بهدو : لو ما يهمني ما جلست امس معك ولكن اشوف انه مب وقته ازيد الطين بله واسأل ومهما كان الموضوع ادري انك ما تأذي شوق من لا شي
ثنيان ابتسم من بين ضيقه : خليني اقول شي ايجابي وسط ذا الزحمه في كل ذا اللي صار الحلو هو اني عرفت واحد من اطباعك الحلوه
ابتسمت الترف بدون ماترد وجلس ثنيان بضيق وهو يشرح لها اللي صاربدون ما تسأل هو يحس انها مهتمه لمشكلته هو ،وش احساسه هو من ذا كله وماهي مثل الباقين يبون بس يعرفون ليش هو سوا كذا ! وليش صار في شوق كذا !وهل من حق ثنيان يسوي كذا او لا
ختم ثنيان كلامه وهو يده بيد الترف وشاد عليها بقوته وبغضبه : ماني مستهين بقلب دلال ودموعها بس هالزفت ما تستاهل منها كل ذا ما قلت لمحمد ولا يدري عن ذا الشي ابي لها الستر وهي ماتبيه لنفسها ترد وتتكلم وهي اللي مثلها يندفن راسه بالارض تعارض وكأن اقطعها من فرض صح كنت حاقد عليها بس ماكان هاين علي اضربها بس قهرتني قهرتني واحرقت كبدي كل شي كان يصير بسببها
الترف كانت ماهي مستوعبه اللي صار وتبي تعرف شوق ليش تسوي كذا بخوالها والا اذا هي على شوق تتوقع كل شي منها بس قهر ثنيان الواضح بعيونه وصوته ونواف وحركاته المغبونه وابو ثنيان ودموع دلال هاذي اللي فعلاً كانت هامه الترف شده على يده بهدو : كيفها خلها تروح عند عمها خلها تسوي اللي تبيه بكره بتعرف خطاها وذنبها
انت سويت اللي عليك ك خال وعزوه لها وهي بكيفها ودلال الله يعوضها ببر نوف لها
ثنيان وقف وهو يحس بإختناق
الترف ما عرفت وش ترد وسكتت وجلس ثنيان وهو يمسح وجهه : قولي شي يالترف قولي شي يطلعني من ذا القهر
الترف ناظرته بعيون ثابته وهي داخليا مهزوزه ماتدري كيف بتلملم قهره
لكن كانت عيونها كافيه انها تعطي ثنيان قوه ينتعش بها وقالت : ما راح اقول شي الا انك انت كفو انك توقف بوجهه هالمصيبه وتحلها مايهمك وش بيكون تأثريها المهم تطلعون منها بأقل الاضرار
غمض ثنيان وهو يحاول يحفظ هالنظره وهالجمله بس وقف كل شي لما سمع باب البيت يدق وفتح الشباك وشاف سامي تحت ومعاه الشرطه ابتسم بقهر وهو يلف لترف : الظاهر اقل هالاضرار بتكسر ظهري
اسرعت الترف ولما شافت الشرطه تزلزل داخلها ولا شعوريا مسكت ذراع ثنيان لللي لف وهو صامت : اتركيني يالترف
نزل وهو هذا للي ما حسب ثنيان حسابه وهي يدري وش بيصير فيه بالحرف الواحد والنص
................••............
عند نواف
اللي طلع من البيت وهو يكلم عجاج اللي دق يسأل عن ثنيان ليه مقفل جواله وقبل يتكلم جمدت عيونه على الشرطه وسامي شوق اللي بسيارة سامي ركض وهو يقفل الجوال : ثنيان وش صاير
الضابط اللي اخذ ثنيان وهو يدخله السياره وقال لنواف : ابعد لو سمحت
سامي : قول لابوك انكم بتدفعون حق كل شي سويتوه بشوق
ثنيان : نواف ارجع لابوي وانتبه له
نواف اللي ما استوعب الا بعد نظرات شوق الوقحه
................••............
الترف نزلت بعد ثنيان
وهي خايفه وطلعت منيره :وش تبي الشرطه بثنيان
الترف: اتوقع شوق اشتكت عليه
مي اللي جات تركض بخوف : بنات اخذوا ثنيان معاهم
مشاعل : لا تخافون ان شاء الله ما فيه شي يحمل وبعدين ثنيان اكيد يعرف كيف يصرف وضعه
مي وهي تكلم الترف : قولي لنا وش صاير اكيد تعرفين لا تصيرين انانيه
الترف كان ودها لو تقول لهم وتريح قلقهم بس ان ثنيان كان حريص ان هالموضوع ما يطلع ابد
الترف تكتفت بضيق : اقولتس اسمعيني زين لا تسوين مهتمه وبتموتين ادري انتس تنبشين عشان تعرفين شوق وش مسويه وماهتميتي لثنيان لكن ضفي وجهتس ازين لتس قبل اكفر فيتس
منيره: خلاص عاد مانبي مشاكل بعد
مشاعل : انا بروح اشوف العيال والله يسهلها
افترقوا وكل وحده راحت لغرفتها
.................••............
في بيت ابو ثنيان
نواف رجع لابوه وهو يقول : يبه شوق اشتكت على ثنيان
ابو ثنيان وقف بذهول : وشووووو !
شهقت نوف بخوف وهي تناظرهم بقلق وقال نواف : يبه سامي يهدد
ابو ثنيان : شغل السياره بسرعه بسرعه
ركض نواف يشغلها وركب ابو ثنيان وراحوا ورا ثنيان للقسم ................••............
في القسم
ثنيان اللي كان يحاول انه ينسق دفاع لنفسه يقدر يطلع فيه بهدوء كان ساكت لما وصلوا ونزلوا والكل يناظر دخلوه غرفه التحقيق وجلس وهو يدري بكل شي بالتفاصيل حافظها حفظ رفع راسه لما دخل ضابط وهو يقول : سلام
ثنيان: وعليكم
منصور بذهول : ثنيان صح!!!
ثنيان ابتسم : وصلت يا منصور
منصور بصدمه : وش جابك هنا ! كيف تكون انت متهم بهالقضيه
ثنيان اللي صعب عليه الموضوع اكثر وقال بضيق : هي كذا الحياة
منصور : ثنيان اجلس اجلس واشرح لي الموضوع وابدا لي من بعد فقرة الجنان والعصبيه حقتك لانها اكيد اساس القضيه
ثنيان ابتسم : ابد الموضوع مثل ماهو عندك بالملف
منصور : ثنيان تدري وش مكتوب فالملف تدري وش التهم اللي موجهه لك !؟
ثنيان سكت وقف منصور وهو يفتح الملف وعرضه قدام ثنيان: مستحيل تكون سويتها
اتسعت عيون ثنيان لما قرا البدايه وكانت ان شوق تتهمه انه معرضها للعنف الاسري المبرح
غمض بضيق وهو يوخر الملف
منصور : ثنيان انا ادري بك عصبي وحار لكن هل توصل فيك تعذب بنت اختك وتعنفها
ثنيان : منصور ابي توريني التقرير
منصور عطاه تقرير شوق
والحال ان ثنيان عارف تماماً وين ضرب وكيف ضرب وهل ضربته لها مبرحه او لا
لكن شوق اللي بعد ما قفل ثنيان عليها الغرفه زادت نفسها جروح وضرب لدرجة فضيعه
ثنيان بهدو نزل التقرير
واخذه منصور: قول انه افترا وانقض القضيه يا ثنيان
ثنيان : لا
منصور: وشو لا
ثنيان اللي كان يدري لو نقض القضيه بيجبرونه يقول الاسباب وليش ضربها وهو يشوف انه صعب عليه يشرح وضع بنت اخته في قسم الكل يعرفه فيه
ثنيان : لو تسمح لي يا منصور شوي ابي ارتب وضعي
منصور : ابشر يا ثنيان طلع منصور المذهول اما ثنيان اللي الحين نشب نشبه حياته وهو مايدري كيف يبدا وكيف ينتهي الوضع انه ما يقدر يسمح ان شوق تنسجن ابد ابد ولا يسمح انه يشرح كارثتها عند الناس
اخذ نفس وهو ينادي منصور اللي دخل وجلس
منصور: ثنيان انا ادري وواثق ان هالسكوت ماهو سكوت مذنب
ثنيان : انا اقبل التهم
منصور: وش تقبل يا ثنيان !!
ثنيان : كل التهمه يا منصور
منصور: ثنيان ادري الوضع حساس بنت اختك ووضعكم صعب يمكن فيه لبس او تحريض
ثنيان : لللي عليك يا منصور انك تقبل اني قبلت التهم
منصور :تدري انك بتنسجن
ثنيان : ادري
منصور: سنه
ثنيان: ادري
منصور : شوف هالرجال اللي معها ماعجبني على الاقل ارفض نص التهمه
ثنيان : وش بستفيد؟
منصور: اقل شي تخفف مدة السجن والغرامه
مارد ثنيان وقرب منصور اللي كان صديق قديم ثنيان بس فرقتهم السنين والظروف ولكن مازالوا صحبه : اسمعني يا اخوي انا احس انك مظلوم وتقدر تقولي وضعك وانا اوعدك اساعدك بدون ما يمسك ويمس بنت اختك شر
ثنيان : وش بتسوي يا منصور
منصور: اقل شي اني بضمن لك وظيفك اخفف عقوبتك
ثنيان سكت وبعدين قال : سو اللي تسويه
منصور طلع وهو يكذب نص التقرير واتصل على المدير اللي ثنيان تحت ادارته وشرح له وضع ثنيان وكان جدا متفهم وقرروا يعاونون ثنيان باللي يقدرون عليه
منصور اللي رجع لثنيان : ان شاءالله بتنحل بس وكل امرك لله
ثنيان : لله فوق ، بس منصور تكفى ابوي اكيد انه برا ابيك تطمنه وتخليه يروح
منصور: ايه صح برا كنت بكلمهم بس استعجلت ابوك ومعاه الظاهر اخوانك
ثنيان: زين طمنهم
منصور:ادخلهم لك
ثنيان: لا بس قلهم يروحون
منصور: اجل انا مضطر اني اخذك لتوقيف
ثنيان هز راسه وهو مقهور قهر الدنيا بس اقل شي ما يبي يقهر دلال بعد .................••............
عند محمد اللي كان واقف مع ابو ثنيان ونواف
وهو ندمان ندم عمره انه دخل بذا الموضوع ليته طنش شوق الزفت وتركها ليته ما انتقم ماكان يدري انها خطيره لذا الدرجه
جاء منصور وهو يقول : سلام عليكم
وقفوا يناظرون : وعليكم السلام
منصور: اذا ما خانتني الذاكره ابو ثنيان
ابو ثنيان: اي والله
منصور: انا منصور اليوسف مدري تذكرني ولا لا
ابو ثنيان: هلا والله يا منصور كيفك كيف ابوك
منصور: انا الحمدلله بخير وابوي الله يرحمه
ابو ثنيان: لا والله الله يرحمه
منصور: الله يرحمه ويطول بعمرك ولكن يا عم ليش جاي متعب نفسك
ابو ثنيان: والله نبي نشوف وش وضع ثنيان
محمد : ان شاء الله اموره سلميه
منصور: لا ان شاء الله سلميه لا تخافون
عجاج : وش الشكوى وكيف وضعها
منصور : شكوى عنف اسري لكن ان شاء الله ما رح تضر ثنيان
ابو ثنيان: وش عنفه يا ولدي
منصور: ما عندي وقت اعطيكم والله التفاصيل لكن اوعدك انها بتعدي على خير بأذن لله انت روح وارتاح وبينا اتصال
نواف : منصور يا ليت تكون حساس في ذا الموضوع
منصور:لا تخاف عندي انتم ارتاحوا وانا اتصل بكم
اخذوا رقم منصور وطلعوا ومحمد كل شوي يسأل وكانه مايعرف شي
.
.
انتهى البارت✨
اتمنى من القراء الاعزاء بعض التفاعل😇