تهزمني السمراء وأنا نّد فرسان بقلم الكاتبة أديم الراشد// مكتملة

البارت الخامس والثلاثين

«البارت الخامس والثلاثين »
.
.
في حاره عجاج
عجاج اللي رجع لبيت ابوه وهو ينتظر متى يوصله الخبر عشان يقلب الدنيا وكان ابوه طالع طلع وجلس على سيارته وجاء عيد : عجاج وينك
عجاج : وش فيك
عيد: اركض ابوك مسوي سالفه في اسفل الحاره عند بيت ابو نعيمه
فز عجاج وركض وهو يشوف ابوه يتهدد والناس ماسكينه
عجاج : يبه وش فيك يا يبه
ابو عجاج : انقلع انت الثاني
ابو نعيمه : اسمعني يا رجال معاد عندي بنت ازوجها لك وفلوسك رجعتها لك ويفتح الله
عجاج مسك راسه لما سمع تهديد ابوه وصراخه مسكه وهو يبعده لما دخله البيت : يا يبه وش ذا اللي تسويه انت رجال كبير حرام حرام اللي تسويه انت حرام
دفه وهو يقول : اقولك انقلع من بيتي انت كله من تحت راسك لكن انقلع انقلع
عجاج:يبه الله يهديك
ابو عجاج اللي صفق الباب في وجهه عجاج وهو يسب ويلعن
وطبعا ضاق عجاج وجلس وجاء عيد : تعوذ ابليس يا عجاج فتره وتعدي
عجاج : اي فتره مدري متى بارتاح انا
عيد : ان شاء الله بتنحل خله هو الحين معصب وبيهداء ويفهم
عجاج وقف ياخذ نفس وهو يمسح على وجهه : تخاويني
عيد: قدام بس وين
عجاج: بنروح لعشاء عند صالح
عيد : اجل قدام نوسع خاطرنا شوي
تحركوا بيمشون وجات مرزوقه : عجاج خييير وش فيه ابوك .
عجاج : اقول مرزوقه ترا ماني فاضي لك انتي بعد روحي لاهلك
مرزقه: تكلم من كذا يا عجه
عجاج اللي كان معصب : اقول طسي من هنا ازين لك والا والله والله لتروحين للمرايه ماتعرفين من انتي
راح وهو مب ناقصها اما عيد اللي كان ينتظر انفجار وهوشه بس مرزوقه راحت وعجاج راح وعيد يناظر بصدمه ولحق عجاج قبل تصير كارثه
................••............
في ديرة الترف
ثنيان والترف اللي وصلوا القريه وكان بوجههم عايض اللي عند باب اهل الترف كان فتره صمت
الترف ( ياااليل وش جابك انت )
ثنيان( ايييه وهذا بعد فيه لازم ندبرك يا ذا العايض )
الترف : يلا ننزل
ثنيان : يلا
نزلوا وتقدم ثنيان اللي غطاء على الترف بجسمه وهو يحاول انه يبعدها عن نظر عايض اللي صح ماكان يناظر بس مازال يحن لترف
ثنيان قرب يسلم عليه بشده وشوية حقد وعايض اللي مب بالع ثينان بس عاد يسلك
لف ثنيان على الترف وهو يإشر لها تدخل بس الترف استلعنت وهي تقول : هاه وش تقول
احتدت نظرة ثنيان :ادخلي
الترف بلعانه : عايض وشلون امك وابوك طيبين
عايض انلخم وهو يناظر ثنيان: بخير الحمدلله يسلمون عليتس
ثنيان اتجهه لترف بعصبيه وهو يهمس : ادخلي البيت احسن لك لا وربي تششوفين شي ما شفتيه
الترف ضحكت بخفه : خلنا نسلم على الربع مبطين عنهم
ثنيان : قولي كلمه ثانيه وشوفي كيف اعلمتس السلام
عايض اللي انسحب وضحكت الترف: بالله عيد كلامك بالسين حلوه عليك تونسني
ثنيان كان بيرد بس جاء صالح ومد يده وهو يقبصها بقهر وصرخت الترف بخفه وابتسم ثنيان وهو يسلم على صالح وابو الترف بحراره
اما الترف دخلت للبنات وهي تمسح على يدها : وجع يا ثنيان وجع
نوره ضحكت: الناس ترد السلام وانتي تهاوشين
قربت الترف تسلم عليهم : وش اسوي قهرني
سلوى وهي تنزل القهوه: وش مسويه فيه اكيد مسويه شي
الترف : قهرته بس
سلوى ضحكت : يا صبره عليتس يا صبره
الترف : اقول كيفتس وكيف ولد اخوي
سلوى : ما علينا نكرف في عشاء رجلتس عساه بس بالعافيه
الترف : اقول اجلسوا عندي لكم سوالف بالدرزن
نوره: حشى توتس رحتي امداتس تعبين سوالف
الترف : ايييه اجلسي بس
................••............
في مجلس ابو الترف
عند ثنيان اللي كان يفكر كيف يقش هالعايض من قدام وجهه ويشغله ابتسم وهو يشوف عايض اللي جلس قريب منه لف : اقول عايض انت للحين عزابي
عايض : ايه ليه
ثنيان: وراء ما تزوج يا اخوك انت ماشاء الله عليك كامل والكامل الله
عايض حزتها كان وده يكفخ ثنيان وناظره بهدوء وقال: يمكن انا مبسوط من وضعي
ثنيان : ان شاء الله انك مبسوط بس مثلك عارف الواحد وده يتزوج ويتسقر
ابو الترف : اي والله انك صادق يا ثنيان وترا العزوبيه الطويله مب زينه
ابو عايض : والله انه معيي مايبي من بنات الديره عجزت فيه
ثنيان ابتسم وزانت له السالفه ( ايييه عز الله ان طبك عندي ): افا والله بنات الحلال واجد
ابو عايض: اقوله مايطيع
ثنيان ابتسم: والله لو يبي عايض يبشر عندنا جار لنا في الحاره من قبيلتكم بس من فخذ ثاني رجال وعنده بنات والله انه طيب ومشهود لهم بالخير اذا وده عايض تخطبون له من عندهم
عايض لللي كان وده يهف ثنيان بصينية الفناجيل بس مسك نفسه وقال ابوه : اذا ثنيان شاهد لهم اكيد ان فيهم خير
ثنيان: الله يسلمك لكن اعرف الرجال ماشاء الله عليه واما الحريم الترف اعرف بهم مني
ابو عايض : ان شاء الله خير ان شاءالله
ثنيان كان كل همه يزوج عايض ماكان يدري ان الترف تخطط بنفس المووضوع من اول ماشافت عايض وهي تفكر تزوجه نعيمه
وراحت تنادي ام عايض وجلست جنبها وهي تقول: اقول يا خاله مازوجتوا عايض
ام عايض : لا والله ندور له بس معيي
سلوى جلست : اقول يا خاله والله يالترف عندها جيران ماشاء الله عليهم منا وفينا
الترف : اييه وصدقيني بيعجبونتس حتى بناتهم ماشاء الله عليهم صح انهم على قد حالهم بس البنات سنعات سنعات
نوره اللي تراقبهم وهي مصدومه كيف يلعبون براس ام عايض لعب وطلعت الحرمه وهي مقتنعه انها بتزوج عايض منهم
جلست الترف بوناسسه: اييه وعايض وافتكينا من همه
سلوى: واالله من زمان عن التخطيط والتدبير
ضحكت نوره: انا مصدومه كيف قلبتن راسها
الترف : يا بنت ابي افتك من همه كل ما تقابلنا معه طارت عيون ثنيان لو مافيه شي
نوره: ما الومه دامتس تقهرينه به يحق له
سلوى: يا صبره عليتس بس
الترف : الحين بتفرغ لمنيره ذا العوبا صادمتني يابنات صدمه عمري
سلوى: يا حسافه والله كانت حليله
نوره: عشانها سمعت لاختها هاللي ماتخاف الله
الترف :كنت والله اتحاشاها بس هي اللي حدتني
سلوى: اجل لا تسكتين وريها شغلها زين
وقفت نوره : يابنت الحلال ذبحنا الحر
فتحت الشباك لكن شهقت وهي تشوف عجاج وعيد نازلين وصالح يستقبلههم فزوا سلوى والترف معها : من
انفجرت سلوى تضحك: ايييه هذا ضحيتس جاء
الترف لفت : ضحيه وش ضحيته !؟
نوره: ماعليتس منها تخثردتز
الترف : لا والله انه صدق من يوم خفتي وش السالفه .
سلوى كانت بتتكلم وجات نوره بتطقها بس صرخت: هيييييه وخري عني انا حامل
نوره: الله ياخذتتس يا سلوى وياخذ اللي يعلمتس
جلست سلوى وهي تعلمها موقف نوره وعجاج وانفجرت الترف تضحك : اييييه صار عندنا موضوع تزويج جديد تدرين والله انه حليل ذا العجاج
نوره: وش دخلني فيه
الترف جلست : تعالي يا خبله هذا رزق من ربي ماتدرين يمكن يكون من نصيبتس
سلوى: اي والله
نوره: :يمممه لا لا فكوني منكم
الترف : الله يا نوره تزوجين وتجين عندي الللللللله
نوره: لاا يا بنت وش ذا الحتسي اعقلي
سلوى: والله صدق ما ينتفوت
نوره كانت تضحك بطقطقه وصدمه : خير وش ذا اقول وخروا بس
راحت نوره تصب الشاهي والترف تكت وهي تخطط فعليا على عجاج وابتسامتها شاقه وجهها
................••............
وعند منيره اللي اخذها محمد وراحوا للمستفى لابوها وكانت تراعيه لما طلع للبيت بس بالها مشغول
محمد جاء جلس : منيره عندي لك خبر بيونسك
منيره: وشو
محمد ببتسامه : ابشرك اخيرا خطبت رهام
وقفت منيره بفرحه : في ذمتتتك
محمد : والله
منيره: وش قال عمي
محمد : بيسأل رهام والدكتور ويرد
منيره جلست بضيق: اخاف يرفضون
محمد : لا ان شاءالله والله اذا رفضوا بموت
منيره: لا ماعليك ان شاءالله ربيي يكتبها من نصيبك
محمد بفرح: امين يا رب امين
كان فرح محمد ينطق من عيونه لكن بينها لمحات خوف وتردد
ومنيره اللي كانت تناظر وضعهم مع عيال عمهم هي تطرد ورا ثنيان ومحمد ورا رهام وثريا عند سيف لكن محد منهم راسي على بر
اخذت نفس وهي تفكر وينه ثنيان ووش يسوي رفعت جوالها وهي تتصل برقم ثنيان
................••............
في ديرة الترف
عند ثنيان اللي كانوا مندمجين بالسوالف والحكي والضحك طلع جواله واستغرب من رقم منيره ووقف وطلع برا شوي : هلا مناير
منيره:سللام كيفك
ثنيان: حمدلله انتي كيفك فيكم شي !
منيره: لا بس اشتقت لك قلت اشوف وش تسوي
ثنيان اللي استغرب وهو بطبيعة الحال منيره مب دايم تقول ذا الحكي ابتسم : الله وش ذا الشوق المفاجئ عسى خير
منيره: الله يسامحك دايما مشتاقين لك لكن ماتدري عن هوا دارنا
ثنيان قبل يرد ناداه صالح: ثنيان أقلط على عشاك يا رجال
ثنيان: ابشر ، شوي واتصل فيك انتبهي لنفسك
سكر ثنيان وهو يروح لصالح
اما منيره اللي سكرت بضيق وهي تلف على ابوها وتلحفه .................••............
في بيت ابو ثنيان
عند رهام اللي كانت جالسه بغرفتها بعد ما سملت على امل طلعت السلسال من درجها ولبسته وهي مبتسمه على كل لحظه مرت فيها طاري محمد كان الشي الوحيد اللي يفصلها عن محمد موافقه ثنيان وسيف ومن بعدها عقد القران
................••............
في ديرة الترف
عند الترف وسلوى ونوره اللي بعد ما انتهى العشاء كانوا متجمعين فالمطبخ وينظفون نوره وهي تمسح يدها : خلاص يا بنات انا بروح لامي لا تعصب
الترف: روحي بس فكري بالموضوع
نوره: يا شينتس اذا عرفتي شي
سلوى: تعالي بالله خذي ذا الاكل الزايد حطيه عند جهة الغنم
الترف وهي تضحك : انتبهي لا يطلع لتس عجاج
نوره وهي تاخذه بضحك: خيييير ماعاد الا هي احصله عند الغنم
ضحكوا وطلعت نوره وهي ماتدري هالصدف كيف تجمع
................••............
في جهة الرجال
ثنيان وعجاج اللي كانوا واقفين خلف البيت وهم يسولفون عن اليوم
عجاج وهو متكي بتعجب : صراحه استغربت من الترف ما توقعتها على هبالها تسوي كذا
ثنييان : يعني خلني اقولك اني انصدمت بعد
عجاج : كنت ألومك بس الحين ابد ما ألومك
ثنيان ضحك : والله لو اقولك يا عجاج اني اتمنى ان الترف كانت اول حريمي وكانت اول من عرفت ما تصدقني وما تزوجت بعدها ابد
عجاج كان منشد مع ثنيان لكن شد انتباهه احد يمشي وكأنه يكلم احد : والله بصدقك بس وش ذا
ثنيان لف : وش !
لف يناظرون وشافوه فجاءه جلس واختفى وطلع ورجعوا شوي لوراء : عجاج لايكون جني
عجاج : بسم لله الرحمن الرحيم والله مدري هذا جاي من جهة الغنم
ثنيان اتسعت عيونه وهو يشوف الظل على انوار خفيفه : عجاج هذا جاي لنا
عجاج دقق بالنظر : امش امش بسم لله بسم للله
اللي حاصل كاان ان نوره شايله قدر الاكل والشحم على راسها وطاحت وانحاست عبايتها وطرحتها وانكب الاكل عليها وكانت بتتوخره وطار شعرها هي كانت خايفه وتتلفت لكن شافت ظلال ورا البيت وانخرشت وركضت وطارت عبايتها وطرحتها وهي تحس احد يركض وراها ولفت وشافت الكلب وركضت وهي تصرخ صراخ رعب متجهه للبيت
اما عجاج وثنيان اللي شهقوا اول ماشافو الظل يركض لهم ويصارخ ومع اصوات كلاب
تمسكوا ببعض وصرخ عجاج: هججج ييا ثنيان هههج
ماكان ثنيان منتظر اشاره وانطلق وهو يسمي ويقرا وعجاج مثله ونوره تركض وراهم بصراخ والكلاب وراها
طبعا ثنيان وعجاج وصلوا لرجال وهي مازالت وراهم صالح فز هو وعيد وقبل يتكلمون كانت نوره تصرررخ وجايتهم وهي كلها رز وشحم ومرق طبعا صالح ما عرفها وصرخ هو بعد
وانفجعوا ورجعوا كلهم المجلس وصفققوا الباب في وجهها نوره كانت بيغمى عليها من اللي صار صفقت بالباب وطاحت والكلاب اختفت وفزت وهي تتذكر اشكال الشباب وهي تبكي وركضت لترف وسلوى وهي تتمنى ان محد عرفها
اما ثنيان وعيد وعجاج كانوا طايحين على بعض برعب وصالح واقف على الباب وقلبه يرقع
صالح : بسم لله الرحمن الرحيم وش ذا من وين جايين انتم وين كنتوا وش سويتوا
عجاج دف ثنيان وعيد عنه وهو يسمي : مدري الله ياخذكم انتم وديرتكم يممممه قلبي بموت بموت
عيد: وش صار
ثنيان: مدري كنا نمشي شوي ورا وفجاءه طلع ذا الظل وكان يمشي ويجلس ويختفي ويطلع وفجاءه صرخ وركض ورانا
صالح: بسم للله وش ذا
عيد: وش تسوون انتم هناك
عجاج : راسي بينفجر ياربي
صالح : اجلسوا اجلسوا قبل يجي ابوي وسموا بالله
ثنيان: ابوك وينه
صالح : راح يودي عشاء للامام مريض
ثنيان: ااااه ياربي قلبي وقف
صالح : لا اله الا الله خلني بجيب مويه
................••............
عند سلوى والترف
اللي كانوا ينظفون ويغنون ودخلت نوره وهي تبكي : بنات
صرخوا كلهم بفجعه وركضت وهي تسكتهم : اسكتوا مانيب ناقصه فضايح
سلوى: نوووره وش بلاتس كذا
الترف : يممه يا بنت وش ذا
نوره سمعت صوت صالح وركضت وهي تخبى ورا الدولاب : لا يدري اني هنا خلكم طبيعين
صالح : سلوى
سلوى لفت بفجعه: سم
صالح اللي كان وجهه مفجوع: عطيني مويه بسرعه
الترف : علامك وش فيه وجهك كذا
صالح : مابي شي عطيني مويه بس
عطوه مويه وراح اما نوره اللي كانت تبكي
سلوى طلعتها: علامتس اخلصي
نوره: دقيقه عطيني عبايه ولا شي ببدل
عطتها سلوى وغسلت نوره وبدلت وجلست وهي تبكي
الترف : نوره علامتس
نوره اللي قامت تشرح وهي تبكي وقالت : وركضت وراهم مدري من هم بس دخلوا عندكم وانا منفجعه منهم وهم انفجعوا مني والكلاب وراي وانا خفت بموت يا بنات
الترف وسلوى ماتوا ضحك عليها
الترف : عسى بس مب عجاج
سلوى: يا ويلي يا نوره روعتي المسلمين
نوره: وش اسوي مادريت انهم اوادم احسبهم جن
الترف : اشوف صالح مختبص
نوره: تكفون لا تعلمونه تكفون
الترف : لا معليتس قومي قومي خليني اوديتس بيتكم تنامين وترتاحين وجهتس اصفر
راحت الترف توديها وهي تضحك وسلوى تضحك
................••............
اما العيال اللي كانوا كلهم جالسين جنب بعض برعب
عجاج لف على عيد: يلا يلا بنروح
صالح : اجلسوا يا رجال ناموا هنا
عجاج : فالمشمش يا قلبي لو تموت ما نمت هنا
صالح : يا رجال تعوذ من ابليس
ثنيان: ياخي اجلسوا ليل وحوسه اجلسوا
عيد: لا لا بنمشي
طلعوا عيد وعجاج وراحوا وهم مشغلين القرآن من الخرشه
صالح وثنيان اللي كانوا كلهم يناظرون بعض
صالح : تجي معي بنشوف حوالين البيت اخاف شي ويدخل للحريم
ثنيان: ايه ايه
وقفوااوطلعوا وهم يمشون بحذر وكل واحد يراقب الثاني وقبل يدخلون شافوا احد جاي يمشي
ودقق ثنيان: الترف من وين جايه !
الترف وهي تشوف خرشتهم وتحاول تمسك نفسها: رحت اوصل نوره وجيت ليه فيكم شي
صالح : لا بس وش مطلعتس بذا الليل ادخلي يلا
دخل صالح وثنيان والترف باقي واقفين وثنيان يتلفت
الترف : وش فيكم وجيهكم ما تبشر
ثنيان ماكان يبي يخوفها: لا ولا شي بس لا عاد تطلعين بذا الليل كان قلتي لنا نجي معتس
الترف : لا عادي
ثنيان: ادخلي ادخلي
الترف ابتسمت بخفه وهي تمثل الفجعه : ثنيان تشوف هناك شي
لف ثنيان وهو مفتح عيونه برعب :وين
الترف : هناك
ثنيان اللي كان مايبي يشوف ويدقق كثير: لا لا مافيه شي بس ادخلي ادخلي
دخلوا والترف داخلياً ميته ضحك على ثنيان وصالح ورعبهم
دخلت لسلوى وهي تضحك: اقولتس شكل نوره اخذت عقولهم
سلوى: ليييه
الترف : لقيتهم برا يتلفتون اصلا يوم شافوني بغوا يموتون وثنيان قلت له شفت شي بغى يغمى عليه
سلوى:ههههههههههههههههههههههههههههههههههههههههههههه ههههههههههه والله انا انفجعت منها في عز النور كيف هم في ظلام وراها كلاب
الترف وهي تضحك : خليني بدور لهم عصفر اعطيهم قبل ينهبلون
سلوى : تعالي عجاج معهم
الترف: الظاهر طيرت عقل الرجال الخبله قبل يتزوجها
سلوى: تعالي تعالي بنفرش بالحوش ونتقهوى
ابو الترف اللي جاء : الترف الترف وين فراشي وفراش رجلتس
الترف : ابشر يبه الحين اجيبه
اخذت الترف فراش ابوها وطلعت وهي تشوف ثنيان وصالح جالسين وكل واحد بيده كاسة مويه
نزلت الترف الفراش وهي مبتسمه فرشته
ابو الترف : وين تبي فراشك يا ثنيان
الترف بلعانه : بحطه قريب الباب ثنيان ينخنق في نومه يبي هوا
ثنيان لف لها : لا لا خليني جنب عمي
الترف : ورا ما تنامون بالحوش براد وجو حلو
ابو الترف : اي والله تدرين حطيه حطيه فالحوش
الترف ابتسمت وثنيان وصالح اللي كانوا ودهم يكفخونها وفرشت وهي تحاول تقربهم من الباب
صالح : بجيب لك قميص ترتاح فيه يا ثنيان
ابو الترف دخل يبدل وثنيان اللي تقدم لترف : وشوله حاطتني عند الباب
الترف : عشان توسع
ثنيان اللي كان متاكد انها ماتدري بسالفه الخرعه والا كان اتهمها انها تلعب به : قربي فراشي هنا
الترف : وش فيك كأنك خايف
ثنيان: وش يخوفني بس مب زين النوم عند الباب
الترف : اييه صادق
جاء صالح يعطي ثنيان القميص ودخل يبدل والترف واقف قريب عطاها ثنيان ثوبه ولفت الترف وهي تضحك على قميص صالح اللي واصل لنص ساق ثنيان وضحك ثنيان
الترف: تبي شاهي يا حاج
ثنيان: اي والله وقته
الترف :اجل خلك هنا عشان ابوي ينام على طول ومابي نزعجه
صالح جاء وضحك : اووه اثرني قصير
ثنيان: مدري قصير ولا شمرت من الخرعه
صالح : ههههههههههههههههههههههههه واليوم بذات ابوي اصر على نوم الحوش الله يعينا بس
ثنيان: الله يستر
صالح : بتنام الحين
ثنيان: بتقهوى شاهي يمكن يخف الصداع
صالح: اجل انا والله ماشوف بموت من النوم
ثنيان : نوم العوافي
طلع صالح ينام وثنيان اللي وقف فالجهه الثانيه من الحوش وهو للحين في اثر الفجعه ويناظر يمين ويسار
عند الترف اللي لقت سلوى ميته تعب وبتنام اخذت الشاهي وراحت لثنيان
لف ثنيان بقوه لما حس بحركه: انتي
الترف : ثنيان وش بلاك تلفت وش شايف
ثنيان : لا مافيني شي
الترف مدت له الصينيه : امسك
اخذها ثنيان وفرشت الترف فرشه صغيره يجلسون عليها
وجلست وجلس ثنيان : اوووه وربي اني مصدع
الترف : ليه غريبه !
ثنيان : مدري
الترف : يمكن نوم انت صاحي من بدري
ثنيان: يمكن
سكتت الترف وثنيان اللي كان يمسج راسه بألم
الترف : انسدح شوي
ثنيان اللي انسدح على رجولها وهو مغمض قطع عليهم اتصال منيره اللي نساها مع الحوسه وكان الجوال صامت مدت الترف يدها بخفه وهي تعطيها مشغول
ثنيان: وينها سلوى !؟ هي هنا
الترف : ايه بس نايمه
ثنيان : شكلك انتي بعد تبين تنامين
الترف : لا عادي
الترف وهي تشوف صرار منيره على الاتصال وهي تسكر وتسكر في وجهها
واخر شي سحبت الجوال وفتحته وهي تقربه
الترف كملت جملتها وهي بس تبي تقهر منيره : اصلا انا احب السهر عاد كيف لو السهر في ليلة 15 والقمر كامل والوجه الحسن موجود
ثنيان اللي كان مغمض ويسمع بس فتح عيونه وهو يحس ان الصداع تبخر وابتسم : حددي من هو الوجهه الحسن انا ولا انتي
الترف اللي كان قلبها يدق ماهي متعوده كذا بس كله كيد في منيره ضحكت : اوووه محد ينافس وجودك
ثنيان ماصدق وهو يناظره ببتسامه : لا لا هذا الحكي لي راضيه علينا اليوم
الترف ( ياربي ساعدني والله اني بقره بس ماعليه ) : الله يسامحك دايم وانا راضيه بس انت ماتخلي لي مجال
ثنيان اللي بدال مايصدع راسه صدع قلبه وراسه مع بعض جلس وهو يناظرها وهي تضحك : هالحكي ماتعرفينه الا هنا
الترف : لا بس الواحد في ديرته ياخذ راحته
ثنيان : ليه من مضايق راحتك بالبيت
الترف ( اييييه عز الله جاني سبب وانا ماسعيت له ) : لااا بس يعني هنا اريح اصلا لو بيدي نعيش هنا
ثنيان تذكر ان منيره هالفتره تضغط على الترف تنحنح وهو يقول : اذا مزعجتك تصرفات منيره ذا الفتره فا لا تعطيها اهتمام تعرفين منيره ذا الايام عمي تعبان ويإثر على نفسيتها وانتي تدرين منيره طيبه وبنت حلال
الترف ابتسمت : ادري ولا بزعل منها بس يعني الواحد يتضايق شوي مهما كان ماودي ازعلك اول شوي ولا ودي ازعلها
ثنيان اللي ابتسم وهو يبوس كفها : لا لا ماعليك انا بكلم منيره وارتب الامور المهم لا تزعلين تراك طاقه للبيت كله
ضحكت الترف وثنيان اللي اوجعهه قلبه من ضحكتها : والله اذا جيتنا لهالديره بتخليك رايقه دوم وهالضحكه الحلوه موجوده كل يوم بنجي اجل
الترف اللي كانت تضحك بفرح وتضحك وهي متاكده ان منيره الحين مغمى عليها من القهر كانت بتقفل بس ماتدري كيف بتقفل وثنيان مقابلها مدت يدها وهي تسحب ثنيان بشويش : خلنا من الروقان وحاول تنام عيونك تعبت
ثنيان انسدح : والله اذذا بتجلسين كذا ما توقع اني بنام ابد
ابتسمت الترف وهي تسكر السماعه وقلبت الجوال وهي تحذف المكالمه وسكتت وهي تسمع ثنيان يسولف لما تعب ونام وصحته يروح لفراشه وراحت هي تنام
................••............
عند منيره
الللي كان النوم في هالليله عليها حرام وهي ترمي جوالها بغضب وقهر وبكي : اجل انا نفسيتي تعبانه يا ثنيان انا وانتي يالترف التبن طلعتي حيه لكن هين اوريك اورييييكم
محمد اللي صحى : يمه وشفيك
منيره بصراخ: مافيني شي نام انت
انسدح وهو مستغرب حالاات امه
................••............
في بيت سيف
عند فجر اللي كانت عند امها وقالت لها ان امل موجوده بس ثريا ماكان لها اي ردت فعل الا انها فتحت القران تقرا
طلعت فجر وهي مستغربه امها وهدوءها جاء سيف : فجر امك وش تسوي
فجر: تقرا قران
سيف : هي باقي على ذا الحال
فجر: ايه
سيف :زين اجل انتي نامي تاخر الوقت
فجر : طيب
اما سيف اللي دخل لغرفك امل اللي كانت نايمه هي بعد وهو مايدري كيف بيرتب اموره على بيتين
................••............
من بكره الصبح في الديره
عند ثنيان اللي كان نايم بكل تعب صحى لما حس احد يناديه بشويش شاف الترف جالسه جنب راسه : يلا صحصح طلع النور لين متى بتنام
رفع ثنيان راسه يناظر الجو وكان توووه الفجر ناظرها بتعب : وشوله مصحيتني الحين بدري
الترف : قم ناظر حولك فالديره هنا مافيه بدري ابوي قام من زمان وشوي بيجي وصالح بعد صحى قوم انت بعد لا تفوت عليك الجو مع هالصبح
ثنيان وهو يتمغط :عطيني مويه طيب
جابت الترف مويه وجلس ثنيان وهو يناظر كان فعلا جو يفتح النفس
الترف :جيعان مره ولا عادي تصبر
ثنيان : عادي ليه
الترف : عشان عندي شغله ابيك معي فيها وبعدين نرجع نفطر
ثنيان: وشو
الترف جابت ثوبه : اللبس بجمع فراشك واجي
لبس ثنيان ورجعت الترف وهي ولابسه طرحتها وغطاها : بنروح للحلال ابوي ( الغنم والتيوس والدواب بشكل عام ) كلفني بها اليوم وهو بيروح يخلص اشغاله
ثنيان : اما
الترف : لييه ماتعرف لها
ثنيان: والله اول مره اروح
ابتسمت الترف : اجل اليوم بنضحك عليك
ثنيان وهو باقي فيه نوم :امشي بس
طلعوا وثنيان مازال يتلفت والترف تسولف وقف ثنيان قريب الشبك وقالت الترف: ثنيان بالله افتحه لكن التيس هذا لا تفتح عنه
ثنيان: لييه
الترف : لانه جني بيلعن خيرنا لو طلع
ثنيان ابتسم وهو يسوي اللي قالته ووكان يراقب الترف شلون حريفه في ذا الشغله وعارفه شغلها وعادي
جات الترف وهي معاها عصا : خذ خلها معك
ثنيان: ليه
الترف وهي تأشر له على التيس اللي كان يضرب الشبك بغضب : هذا يمكن يكسر الشبك بأي لحظه لكن من الحين اقولك يا تضربه بالعصاء يا تهج وترقى على اطول شي تشوفه لانه اذا مسكك بيقطع بطنك وخصوصا انك غريب عليه
ثنيان: والله ماندري من وين نلقاها حتى تيوسكم مجانين
ضحكت الترف الللي كانت براسها خطه وراحت بخفه وفتحت الشبك وركضت وهي تركب فوق دبات المويه الكبيره وصرخت: ثنيااااان اركض
ثنيان اللي كان قاعد ومستأمن لها لف وهو يشوف التيس جاي له طاير
فز وهو يضربه بالعصاء لكن مانفع وشاف انه ما ينفع انه يهج مايدري ثنيان كيف واجهه هالتيس الهايج وفي ذا اللحظه جاء صالح وهو يفزع مع ثنيان على التيس وبالقوه رجعوه والترف تضحك : اوووه والله وقدرت عليه يا ثنيان
ثنيان اللي حرفيا انقطع نفسه من ذا الجني لف يناظرها بحقدولف لصالح: تحتاجون بنتكم في شي
ضحك صالح اللي عرف ان الترف ورا ذا الحركه : ابد لك اللحم ولنا العظم
رمى ثنيان العصاء وركض وصرخت الترف ونطت وهي تركض وصالح يركض وراها كانت تضحك بفجعه وثنيان وراها وصالح قدامها
فالنهايه مسكها ثنيان بطرف عبايتها وطاح وطاحت الترف مع طيحته ووقف بسرعه وهو يثبتها ربطها بعبايتها وهي تصارخ: افزع لاختك يا صاالح
صالح: لا والله عسى خليه يربيك
ثنيان اللي اخذها لين شبك التيس وهو مقرر يرميها عنده بس صالح يأشر بالخفا ( لا )
وجاء ابو الترف : صالح صالح علامكم
نزل ثنيان الترف بسرعه وهو يفكها وهي تضحك ووقفوا كلهم بهدوء: مافيها شي يبه خلصنا ونرجع البيت
ابو الترف : يلا ترا الفطور زهب
تقدموا له كلهم وهم يمشون ورا ابو الترف وثنيان يدف الترف على صالح وصالح يدفها عليها وهي تضرب فيهم على الصامت
.
.
انتهى ✨اتمنى التفاعل