تهزمني السمراء وأنا نّد فرسان بقلم الكاتبة أديم الراشد// مكتملة

البارت التاسع والاربعين

«التاسع والاربعين »
.
.
مثل هالمشاعر اللي تحتوي ثنيان والترف بالضبط كانت بقلب محمد لرهام وبقلب منصور لنوف وبقلب عجاج لنوره وبقلب صالح لسسلوى وبقلوب الكل للي يحبونهم مر اليوم وهم يجهزون لطلعة مكه ومن بكره الفجر نواف وابو ثنيان وام ثنيان ودلال طاروا لمكه
وسيف واهله جهزوا عشان يمشون عجاج ونوره ومنصور ونوف وبعد محمد ورهام وابو محمد
كلهم صاروا جاهزين عشان يمشون لمكه
................••............
في بيت ثنيان
اللي كانوا مستعجلين بما ان ثنيان مستنفر
ثنيان : منيره اخذتي حرامي
منيره: ايه واخذت حرامات العيال بعد
ثنيان: زين يلا ترا تأخرنا
مشاعل: ثنيان الله يعافيك اخذ وحده من التوأم معاك
ثنيان : زين يلا اركبوا
ثنيان اخذ حياة اللي كانت هاديه ومشاعل اخذت الترفي وابتدوا يستقرون بالسياره بس الترف باقي ما جت نزل ثنيان بعد ما اعطى منيره حياة
دخل وهو يدور عليها دخل الغرفه : ترف وينك يلا ننتظر
ركض اول ماشاف جالسه عند الحمام وتبكي : الترف الترف وش فيك
الترف : مدري يا ثنيان احس بدوخه وغثيان عجزت اوقف انهد حيلي وصوتي راح وانا اناديك ما جيت
ثنيان سندها وهو يغسل وجهها : والله ما سمعت توقعتك تجهزين كنتي بخييير
الترف اللي كانت تكرهه هالغثيان اللي جديد عليها مع فتره الحمل : مدري وش صار لي فجاءه
ثنيان اللي خاف عليها صح بس انه عارف الوضع : ما عليك بسيطه تعالي ارتاحي شوي
جاب ثنيان مويه لها وعطاها بعض ادويتها اللي تخفف عليها وجلس جنبها
الترف : اذا بجلس كذا معاد ابي ما احب الغثيان يا ثنيان
ابتسم ثنيان : اووه يالترف اذا بتستسلمين على اول مرحله بتتعبين وبعدين بسيطه كل هالتعب منسي اذا ولدتي ان شاء الله وشفتيه بعيونك
الترف : يا طوول المشوار
ثنيان وقف وهو يوقفها بشويش : ما دام تحلطمتي معناته بخير
الترف وقفت وهي تلبس عبايتها بضيق وثنيان يضحك عليها نزلوا وهو ما زال معها لما ركبت
مشاعل: الترف وش فيك
ثنيان : وضع الحوامل المعتاد
ابدت الترف تشكي على مشاعل ومنيره وطبعا ثنيان مستمع وهم يعطونها حلول
................••............
اما عند عجاج
اللي كان يسوووق على مهل مهله من جهه حريص على نوره ومن جهه ثانيه مايبي يصحيها لان بطبيعة الحال بدت حالات النوم معاها
لكن مر من جنبه ثنيان وهو يدق بووووووري بإزعاج
فتح عجاج الشباك بغضب لما صصحت نوره مفجوعه: وش بلااااك يا هوووه
ثنيان :والله ابتلشنا بهالمستجدييين حبيبي انت مسافر يعني خط سريع يعني لازم تسرع شوي ترا ما بيطير ولدك بيجلس ببطن امه اسرع شوي
عجاج : الحين انت وش دخلك انت ووجهك يا بن فهره جعلني امشي 20 سيارة ابوك
ثنيان: اقول اخلص ترا ان جلست تمشي كذا بتقابلك الشمس وتصلخكم صلخ وحزتها تعرف كيف تكون حريص هذا واحد واثنيين قابلني بالولد الخامس نشوف كيف تمشي ترا حماسك هذا حماس بزر مسجلينه اول سنه
عجاج: اكبر غلط غلطته اني طحت على وجهي وصاحبتك يا مزواج يا متعدد الخبرات
ضحك ثنيان وهو يعلق عليه بوري وعجاج يرميه بأي علبه تقابله
منيره: ههههههههههههه ياخي حرام عليك خله يستانس بولده الاول
ثنيان: معه وقت يستانس الحين الخط سريع بيقشونه الناس
الترف : لو سمحت خل صديقتي ترتاح ازعجتها
ثنيان ابتسم وهو يناظرها ومنسسدحه : انتي اهم عندي من صديقتس وازعجتس تبيني اداريها
الترف : يعني من باب الصحبه
ثنيان : لا باقي محمدوه وينه للحين ما لحق
منيره: تكفى لا تقولهم شي مساكين
ثنيان : الله يا مساكين ما نسيت انا اللي صار فيني منهم هدا ثنيان وهو ينتظر محمد
ومحمد اللي ما يفرق عن عجاج ابد اللهم ان رهام كل ما اشتكت من شي فوراً يتخلص محمد منه
رهام: يووه يا محمد كارهه ريحة فواحة سيارتك مره مدري ليه
محمد اللي طلعها وهو يرميها من الشباك : وش بس اللي كارهته وانا ارميه
ابتسمت رهام : لا بس هي وودي في دونات مررره
محمد وهو يدور بعيونه على محل واخيراً شافه : ابشري الحين تجي دونات ووش بعد
رهام: بس
نزل محمد ياخذ دونات وشافهم ثنيان ونزل هو بعد يبي يطقطق ومنها ياخذ لترف شي حالي يصحصح فيها يحتاج سوالفها مع هالطريق
شاف رهام ماهي منتبه للسياره ومحمد يناظر بالسياره من المحل تلثم بشويش وجاء مسرع وركب السياره وتحرك ورفعت راسها رهام وصرخت بفجعه : من انت مححححمد محمددد
محمد اللي اول ماشاف الرجال ركب سيارته انهبل وركض تارك الطلب وراه وهو يركض ورا السياره ووقف ثنيان من قوة صراخ رهام وهو ييضحك : امزح امزح ثنيان
لا شعوريا ضربته رهام بخوف : حسبي لله
فتح محمد الباب لما وصل وهو ميت خوف اول ماشاف ثنيان طاح فيه ضرب وثنيان يضحك لما اخر شي نزله وهو ما زال يضحك
محمد : يا سامج طاح قلبي تجمدت كل اعضائي
ثنيان :ههههههههههههههههههههههههههههههههههههههههههههههههه ههههههه والله ما اخبل منك الا هي ، بنت انتي ياخسارة اني اخوتس المفروض تعرفيني واذا ماعرفتيني كفخيني كيف تسكتين لحرامي
لا وتصارخ محممممممد
رهام اللي ككانت ميته ضحك: وش اسوي خفت
محمد : قم انقلع
ثنيان اللي انتهى من كثر ما ضحك عليهم: اقول استعجل وانت تمشي على بيض وبعدين مب لازم كل ما قالت ابي شي توقف وتاخذه اسحب عليها لا تعطي الحريم وجهه
رهام: ثنيان حسبي لله تشيشه علييي
محمد : اقول انقلع شفناك كيف كنت تسوي
راح ثنيان لكن ما اكتفى اخذ طلب محمد وانحاش واضطر محمد انه يطلب من جديد وهو يضحك على ثنيان اللي من زمان ماشافه بهالفله ................••............
رجع ثنيان لسيارته وهو ما زال يضحك
منيره: يا ثنيان الله يهديك حرام عليك خوفته
ثنيان: ما عليه نحرك دمه شوي
مشاعل: اهم شي جبت غنايم
ثنيان اللي عطاهم علبه وعنده علبه : حلّوعلى شرف خرشة محمد وحاولوا تغيرون سوالف الحمل لاني جاني غثيان انا
الترف : معليك نشبع ونضبطك
ابتسم ثنيان وهم يتقهوون وطبعا انطلقوا يسولفون ومن بين السوالف كانت الترف تحاول تشرح لهم شخصية نوره من مواقفها عشان يندمجون معها البنات بس جابت العيد وقالت لهم سالفة الجنيه وضرب ثنيان برييييييك : هااااه هي الجنيه
شهقت الترف : لا لا من قاله اقصد قلنا لها سالفة الجنيه ذكرتنا بسالفه ثانيه
ثنيان: وش دراكم عن الجنيه وحنا ما قلنا لاحد
الترف : اا صالح صالح قال لسلوى عرفت
ثنيان : لا والللله تستهبلين علي
منيره: وش السالفه
الترف عفست وجهها بضيق وهي نست نفسها وعلمت ثنيان بس ثنيان بيعلم عجاج لما حست انها انكشفت نطت وهي تمسك كتف ثنيان: تكفى طلبتك لا تقول لعجاج
ثنيان :ههههههههههههههههههههههههههههههههههههههههههههههههه ههههههه يعني هي الخبله اللي خلعت عقولنا وفوق ذا ساكته ومتعمده تسحبين فراشي بكل الحوش وتسوين نفسك مجنونه
الترف ضحكت : هي بالغلط بس انا تعبطت عليك شي
مشاعل: ترا ما فهمنا السالفه
الترف : بقولكم السالفه بس قبل توعدني يا ثنيان ماتقول لعجاج
منيره: ثنيان اوعدها
مشاعل : تكفى بنسمع السالفه دامها خرشتكم
ثنيان اللي مايقدر ما يقول لعجاج بس ضغط على نفسه: وعد يلا قولي بالتفاصيل
الترف اللي كانت كعادتها متكيه بالنص ويد على كتف ثنيان ويد على كتف منيره وقالت لهم السالفه والكل يضحك على خرشتهم وثنيان اللي انحرج انه خاف من نوره
مشاعل: خطيره هالبنت هي مسويته ولا بالغلط
الترف :لا مسكينه بالغلط وهي انفجعت وهم فجعوها
ثنيان:هههههههههههههههههههههههههههههههههههههههههههه هههههههههههه يا ربي ليتني داري عسى بس ما تخلع عقل الضعيف اللي عندها
الترف : بس وجهك ذاك اليوم ينشرى لا انت ولا صالح واااضح مروعين بس ما تبون احد يدري
ثنيان: انتي لو شفتي كيف جت لنا والله ان تنهبلين
الترف :ههههههههههههههههههههههههههههههههههههههههههههههههه ههههههه يعني هي بعد جت لنا وخرعتنا بس كانت تبكي
مر الوقت والترف وثنيان ما زالوا يضحكون على الموقف
................••............
طبعا الكل كملو طريقهم بالرتم اللي يحبونه ووصلوا مكه بسلام وريحوا والمغرب الكل صحى يتجهزون ينزلون للحرم وللي يتجهز للعمره
في شقة ابو ثنيان كان ابو ثنيان ونواف ودلال وام ثنيان جاهزين
وبجنب شقة محمد ورهام وابو محمد والخادمه طبعا ابو محمد بيكون بالشقه مع الخادمه ومحمد ورهام يجهزون يصلون بس لان محمد مستحيل يخاطر بأن رهام تعتمر وتتعب وهي توها ببداية حملها
وعجاج ونوره نفس وضعهم بس كان عجاج وثنيان شققهم شوي بعيد عن باقي الشقق
اما سيف واهله من زمان واصلين ومن زمان نازلين الحرم
اما منصور ونوف اللي كلهم يجهزون للعمره وهذا اللي يبيه منصور عشان تهدى نفس نوف وترتاح وطبعا توجهوا لشقة ابو ثنيان
................••............
وفي شقة ثنيان
منيره ومشاعل اللي خلاص جاهزين ويجهزون العيال عشان ياخذونهم عند ابو محمد ويجلسون مع الخادمه
طلع ثنيان المحرم وطلعت بعده الترف اللي جاهزه
ثنيان : يلا عشان ما نتأخر على ابوي
منيره: خالصين بنوصل العيال ونطلع
الترف : ثنيان احنا كلنا معك ولا ننقسم
ثنيان قطب حواجبه : نواف وفجر معهم امي وابوي ودلال ومنيره ومشاعل معي وانتي ورهام ونوره بتجلسون تصلون وتدعون لين نخلص
الترف : لا والله ليه نجلس
ثنيان: لا يكون بس بتعتمرين
الترف : ايه بعتمر ما جيت لين هنا عشان اجلس
منيره: الترف انتي حامل كيف بتعتمرين وزحمه وحوسه ومشي
مشاعل: اذكري الله يا بنت صعب عليك
الترف : لا مب صعب مانيب رايحه من مكه لين اعتمر
ثنيان: الترف بلا عبط مافيها مزح ذي لو يصير لك شي وش بتسوين
الترف : ثنيان معتمره معتمره ان شاء الله ولا بيصير لي شي
انهبل ثنيان: مو وقت العناد ! انتي في بطنك روح تضرينه اجلسي واذا ولدتي على خير ان شاء الله جبتك تعتمرين عشرين مره
الترف لما شافته مصر انهارت :حرام عليك يا ثنيان اجي لين مكه ما اعتمر خاف ربك فيني ابي اعتمر لو يصير لي شي والعمره بنفسي تراها برقبتك
ثنيان: يالترف انا ماني حاسدك بس خايف علييييك
منيره: الترف يا حبيبتي حرام لو يصير في ولدك شي ترا برقبتك
ولا سمعت الترف اللي انهارت تبكي وهي مستعده ومتجهزه ومشاعل تحاول ومنيره تحاول وابد مافيه فايده وهنا عصب ثنيان : لو تموتين مارح تعتمرين وخصوصاً ان فيه زحمه اجلسي واذا ولدتي جبتك تعتمرين
الترف : وش يضمني بعيش اذا ولدت
منيره: قولي خيرر ان شاء الله بتكونين طيبه
ثنيان: قلت لك اتركي هالوساويس وفوق انك حامل معك دوخه وحوسه انسي بتجلسين وهذا اخر كلام ويلا
طلع ثنيان والترف اللي نزلت وهي مقهوره ومشاعل ومنيره يحاولون مافيه فايده
................••............
في شقة عجاج
عجاج اللي احرم وانتهى وجاء لنوره اللي جاهزه
عجاج : الحين تمام تقدرين تنزلين للحرم
نوره: ايه ماعليك
عجاج: مثل ما وصيتك تجلسين في مكان مافيه تدافع وزحمه وتصلين وتدعين واقري قران سوي اللي تبين بس انتبهي من الناس
نوره: ماعليك انا احرص بعدين معي الترف ورهام
عجااج: اجل يلا بننزل للحرم ويقابلنا ثنيان هناك
................••............
في شقة ابو ثنيان
جات نوف ومنصور اللي جلسوا ينتظرون ثنيان ويسولفون وشوي جو رهام ومحمد ونفس التوصيات انطبقت على رهام
وصل ثنيان اللي كان معصب من بكى الترف وهي تحاول تقنعه طول الطريق قرب يبوس راس امه وابوه
ثنيان: يلا جاهزين نطلع
الكل : يلا
ابو ثنيان : علامك انت
ثنيان: مافيني شي بس ودي ننزل بسرعه
هنا الكل نزلوا للحرم وبدوا يفترقون منصور ونوف راحوا وابو ثنيان ونواف وفجر وام ثنيان راحوا ودلال راحت بلحالها وبقى محمد وثنيان
رهام قربت لترف: هاه كلمي نوره عشان نشوف مكان مافيه زحمه ونجلس وبعدين وين نقابك كذا بطيحين
الترف : دقيقه رهام
رهام لفت لمشاعل: وش فيها تبكي
مشاعل: تبي تعتمر ورفض ثنيان
رهام: وش فيها انهبلت
منيره: عجزنا فيها وعصب ثنيان من هالموضوع وهي مصره تناقش
الترف اللي راحت لثنيان اللي كان يكلم عجاج ويوصف له مكانه وسكر ومحمد جنبه
الترف قربت : ثنيان
لف ثنيان وهو يغمض بضيق وهو عارف صوتها الباكي وجاء : وش فيك الترف ما تسكر الموضوع خلااص وقفي بكى
الترف : تكفى يا ثنيان لا تخليها بنفسي تكفى والله بمشي بشويش وبوخر عن الزحمه طلبتك لا تردني
ثنيان اللي مسك راسه وهو مايقدر يردها وخصوصاً انها تترجاه ولا يقدر يخاطر فيها لكن اصرت الترف عليه لين لف وقال: طيب طيب خلاص وقفي بكى ذبحتي نفسك
الترف ضحكت : من جد
ثنيان: وش اسوي فيك بالله عليك وش اسوي في عنادك
الترف : ان شاءالله مايصير لي شي
ثنيان : حسبي الله ربي ونعم الوكييل يا ذا البنت انتي جاهزه للعمره
الترف : ايه من زمان
ثنيان: امشي امشي الله يصبرني بس على هالعناد واسمعيني زين ياويلك ثاني مره تسوين كذا
الترف : خلاص والله يكفيني هالعمره
جاء عجاج ونوره : ثنيان
ثنيان:هلا عجاج
عجاج : هاه جاهزين
ثنيان : ايه بس دقيقه
نادى رهام : خذي نوره ودورا لكم مكان تمام وقولي لنا وين طيب
رهام: طيب بس الترف
ثنيان: الترف معي
نوره قربت لترف: امشي
الترف : بروح اعتمر
نوره : وشو وش تقولين انتي انضرب عقلتس
الترف : بعدين اعلمتس روحي الحين لا يهون ثنيان
الكل انجلط من قرار ثنيان اللي واضح انه استسلم
محمد بهمس : ثنيان انهبلت الادميه حامل
ثنيان: بحفظ الله ان شاءالله
عجاج: هذا والله التبذير بالنعمه انت هيه مب عشان عندك عيال معاد عليك من ذا حرام روح روح
ثنيان ضحك غصب : ياخي مشكلتكم يالخوال مشكله قولي وش اسوي بالعناد
محمد : ايييه السالفه عناد اجل حمدلله ان ربي نصرنا على عنادك
ثنيان : المهم محمد خذ منيره ومشاعل معك وانا بروح ادور مكان بعيد عن الزحمه شوي وامشي على مهلي واذا خلصتوا علموني
عجاج: روح روح
راح ثنيان لمشاعل : مشااعل روحي مع محمد ومنيره وانا باخذ الترف عن الزحمه بعيد لين تخلص
مشاعل: ثنيان خطر عليها
ثنيان:مشاعل انتهى خلاص روحي
مشاعل: يلا
راحوا ورجع ثنيان لترف : شرفي
الترف : ادري اني عصبتك بس لا تجلس تعصب علي والله نفسي فيها
ثنيان:سكري الموضوع لانه اذا زاد بنطلع من هنا قاتل ومقتول
الترف : طيب تكفى قدام نبدا لا تجلس كذا معصب وزعلان
ثنيان ابتسم غصب : وانا اقدر امشي امشي
مشوا وكان ثنيان يحاول انه يكون يحمي الترف مع جميع الجهات ويمشي على مهل ومنتبه لها وهو يحاول يركز بعمرته وهي تدعي وهو يأمن .................••............
في طرف ثاني
منصور اللي كان يمشي مع نوف وهو يسمع دعائها اغلبه لشوق ودعاء صادق بقلب خاشع ودموع كانت كثير مرات تتعثر من دموعها ويسندها منصور اللي اوجعهه قلبه عليها
في نفس المشاعر كانت تشاركها دلال اللي بكت وبكت وبكت لما فاض كل اللي بقلبها من حزن وحل محله الطمأنينه
وطبعا عجاج ومحمد اللي كانوا يدعون مرات واحيان كثير يختلط دعائهم بدعاء الحملات اللي تمر
منيره كانت تدعي بعد ومشاعل وابو ثنيان وفجر اللي كان اشد دعائها ان ربي يبدل حاله ابوها واهلها من حال إلى حال ويعينها
ونواف اللي كان من بين ادعيته تطري له شهد ويستغفر ويتناسى بس ما قدر ما يرفع يده ويدعي ان ربي يعينها على حياتها ويكتب لها كل خيييير
ونهاية الحال مع ثنيان اللي يتخلل دعاءه ناس كثير امه اللي يطلب الله يسخرها لترف ويهدي بالها ويطلب لها الجنه وابوه وعياله ومشاعل ومنيره وعجاج وكل اللي يحبهم حتى شوق مانساها ابد ويدعي لها
ويتخلل صوته بالدعاء صوت الترف اللي ركز ثنيان ان يأمن وراها ولما طلعوا للصفا المروه بدا يرتاح ثنيان لان فيه شوي وسع ولما يهرول كان يلتفت لترف كل شوي يحاول مايسرع وينتظر لما توصله
كانت ترف تسمعه وهو يدعي حتى لشوق وهي الحين ايقنت بطيبة قلب ثنيان وصفائه وكانت تؤمن كثير بأن اصدق الحب الدعاء وكل ما شافت ثنيان ينتظرها بعد ما يهرول كانت تردد بكل حب وخشوع (يارب سخر له أحبابك ويسر له أسبابك وأجزه خير ثوابك يارب كن له حبيبا وكن له قريبا ولدعائه مجيبا يارب ارضى عنه رضا لايحزن بعده أبد، اللهُم لآ تكسر له ظهراُ , ولآ تصعب له حآجَه ... ولآ تعظّم عليْه أمراً ! وأعمر أيامه بذكرك واحفظه واحفظ عليه دينه وأسعد قلبه دائماً) في الطرف المقابل كان ثنيان يدعي للكل وبقلب صادق وحب عظيم ولكن لا شعورياً كان يستثني الترف كثير كان يراقبها لين توصله وهو خايف لو فعلا طلع خوفها صدق لو يصير لها اللي صار لامها لو فقدها وش بيصير فيه كيف بيعيش هو كل ماتقدمت له الترف خطوه كان لا شعوريا يقول ( اللهم إني أحبها حبا تجهله هي وتعلمه أنت اللهم فلا تريني فيها بآسا )
وصلت له للمره الاخيره والسابعه واخذ ثنيان نفس وهو يبتسم ويأمن للمره الاخيره لدعائه والترف بعد
طلعوا وعلى طول جلسها ثنيان وهو يجيب لها مويه : تعبتي
الترف : يعني تعب المشي بس ان شاء الله بخير
جلس ثنيان يرتاح شوي جنبها ويشرب مويه طلعت الترف مقصها وهي تقول : قص لي طرف شعري
قرب ثنيان مبتسم وقصه لها
وبعدها وقف : تعالي بنروح عندهم وبروح أحلق
وقفت الترف وراحوا لعجاج ومحمد اللي محلقين وخالصين وترك ثنيان الترف عندهم وراح يحلق
................••............
في طرف ثالث
رهام ونوره اللي بعد ماصلو ودعوا وشافوا لترف جايه
نوره: تعالي اجلسي اجلسي انهبلتي
الترف : ابد بعقليي
رهام: الترف وشلون تخاطرين كذا
الترف : ان شاء الله مايصير لي شي لا تبالغون
رهام: ان شاء الله بس مدري كيف وافق ثنييان
نوره: عشانتس ماتعرفين جنيتنا ما تخلي شي ليييين انها تسويه
الترف تذكرت سالفه الجنيه وماتت ضحك
وكلهم يناظرونها بأستغراب وبعد شوي الكل جوا وطلعوا لشقق يرتاحون ويتعشون
والكل كانوا بشقة ثنيان وطبعا ام ثنيان اللي ماطولت وهي تقول انها تعبانه
نوره بهمس لترف : زين راحت وترتني
الترف : الله يستر عليها بس
وطبعا بعد روحتها صار الجو حلووو والسوالف حلوه
اما عند الرجال ماكان فيه نفس ثقيله ما عدا سيف للي كان اغلب الوقت ساكت وان تكلم يغث احد
كانوا يلعبون وثنيان يقولهم وش سوا في محمد اليوم وطبعا قاموا عليه محمد وعجاج وهو فاقع قلبهم من الصبح وكفخوه وانحاشوا
وحلف ثنيان انه يحجز نوره ورهام عنده ولا يروحون معهم ودخل منصور طلابه وتنازل ثنيان بعد ما اخذ حقه
الكل بدون استثناء كانوا مرتاحييين نفسياً وافترقوا والوعد بكره
................••............
من بكره الفجر الكل صحى بما انهم نايمين بدري وتكفل عجاج يختار لهم مكان يفطرون فيه ومن صبح الله وهو ونوره يدورون واخيرا استقروا
نوره : خلاص تعبت قرر
عجاج: هذا خلاص حلو وصاد
نوره : اجل خلنا ننزل مليت من السياره
عجاج : افا والله جعل عدوتس الملل والله انزلي انزلي
بعد شوي وصل منصور ونوف وابتدا منصور يفرش مع عجاج
نوف : نوره مبروك
نوره: يبارك فيك يا قلبي وعقبالك
حست نوف بمغص من الطاري : ان شاء الله وكيفك مع الحمل ان شاء الله مو مثل الترف لان نفسيتها مجننتهم
نوره ضحكت: للحين احسن
لفوا على صوت منصور اللي يسحب الفرش يمين وعجاج يسار
منصور: يا عجاج افهم بتطلع علينا الشمس تشوينا
عجاج : ياخي تونا 6 باقي على الشمس وبعدين شمس الضحى فيها بركه
منصور: يا رجال الله ولا هالبركه اللي بتحمسنا
عجاج : يوووه انا حمار ليه ما فرشت لحالي قبل تجي
منصور: ايه يحق لك مايهمك الامر ماعليك من الشمس بس انا انسان تشويني الشمس مب مثلك يالخال
عجاج: والله انها اريح نقطه فالموضوع بس ياخي ترا عادي ياما جلست مع ثنيان ما انحمس هذت هو يلق ماشااء الله
منصور: اخلص علي ياللون الاصلي
عجاج: اسمع خطوتين من عندك وخطوتين من عندي ونثبت
منصور : تم
اخيراً فرشوا وجلسوا
وبعدها وصلوا ابوثنيان ونواف واهلهم وام ثنيان تخز نوره خز ونوره تنتظر من تجي الترف وجاء سيف وامل وثريا وجاء محمد ورهام وابوه
محمد : يالليل ثنيان اخر من يجي دايم دقوا عليه وينه
عجاج: كلمته يقول يجيب الفطور ويجي انت بس جبت القهوه والشاهي
محمد : ايه
نواف: واحنا حبنا
منصور:واحنا بعد
ابو ثنيان: زيادة الخير خيرين
امل تأقلمت مع البنات وحبتهم وانبسطت معهم وثريا اللي جالسه جنب ام ثنيان بصمت
واخيراً وصل ثنيان قاموا يساعدونه بالاغراض
ويقسمون الاغراض
محمد : نسحب الفرش شوي جوا
عجاج : يالليل هالفرش اشغلكم تشمسوا ياخي
ثنيان: لا اشوفه كويس انا
منصور: انت اي موضوع فيه عجاج تشوفه 100٪
عجاج اللي وقف يحضن ثنيان اللي حضنه بعد :وش حارق رزك انت طبيعي كل شي يقوله عجاج صح
محمد منصور ونواف لا شعوريا : وععععععع وش ذااا الغثيان
رجعوا عجاج وثنيان يضمون بعد وهم يضحكون
سيف :اخلصوا فكونا من الحركات اللي مالها سنع
طنشه ثنيان وهو يفرش السفره وابتدوا يفطرون
................••............
جهة الحريم
لفت دلال لترف : هاه كيفك بعد امس ان شاء الله ما تعبتي
الترف: حمدلله عدت على خير
منيره: اي والله عدت اسكتي تجننا كلنا امس طول الليل رايحين جايين على غرفتها نشوف فيها شي يوجعها شي
مشاعل : وما خطر لها تنام نومة التعب كذا الا امس
ماتت ضحك الترف لما تذكرت موقف امس
رهام: ليييه ! صار شي امس
منيره : وش ما صار بعد ما الكل راحوا عاد قمنا ننام وتوني هه دخلت بالنوم الا ضرب ثنيان باب الغرفه ويركض ينادينا ورحنا نركض معه ما ندري وش السالفه
نوف: ييممه وش السالفه
مشاعل : هو اصلا طول ليله يشيك على الترف يقول احس نومتها ماش مب طبيعيه وهي اثاريها من التعب مرميه كذا يا ناس الللي يشوفها يقول مب حيييه ابد يوم شك ثنيان قرر انه يصحيها يقول اصحيها اناديها اهزها ما فيه فايده ولا ترد ولا تحرك وعاد نادانا فزعه وننادي معه وننادي مافيه أمل هنا انهبل ثنيان ولا شعوريا صكها كف يبي يصحيها وتحركت لكن الجلطه وشو تحركت بشوييييش وتقول : وش فيكم علي لييييه تصحوني حرام عليكم واللي يشوفها يقول غلطانين عليها
من بدت تحلطم عرفنا انها بخييير
رهام : حشششى الترف وش ذااا
الترف اللي كانت تضحك: والله ترا من التعب وربي ما حسيت فيهم يعني بالقوه لين لقيت سدحه تريحني ونمت واثاريهم يصيحون ولا دريت بهم واصلا الكف الاخير ماحسيت الا بشي خفيف وكنت احس اني بحلم اصلا
نوف : نومتك هاذي انا احتاجها نفسياً ومعنوياً
نوره: لا يا قلبي ما عليكم تعودوا اذا صارت تعبانه لا تصحونها ابد ابد
مننيره: اول مره تمر علي بس ماعليك بندرس حالتها
افطروا وتقهووا وبعدها قرروا يطلعون يتمشون بالمولات ورجعوا ابو ثنيان وام ثنيان لشققق
تقدم ثنيان ياخذ الاغراض من الترف: هاه فطرتي زيين
الترف : ايه
ثنيان: اجل جهزي نفستس بتجلسين مافيه لف بالمولات محل محلين ونطلع
الترف ؛ ابشر
ثنيان: ابشر الحين وشوي تقلبين اذبحتس وبعدين مره لا تتعبين اذا بيصير زي امس لا تتعبين
ضحكت الترف : والله للحين اضحك على امس
ثنيان: انتي اضحكي وانا ينخلع قلبي قسم بالله بغيت اتوفى زين اني كفختس بأخر لحظه
الترف : بسم لله عليك
ثنيان ابتسم: يلا يلا نادي الباقين بنطلع
الكل طلعوا وطبعا ثنيان عجاج ومحمد متفقين في مرحله محلين ويرجعون للمقاهي ما يطولون
................••............
قضوا في مكه اجواء حلوه وحلوه كثير بعد ما بين طلعات وطاعات صار وقت الرجعه لرياض والكل رجع وابتدا روتينه من جديد وبنفس النظااام ومرت 7 اشهر كان كلها فرح وكلها ايام سعييده ومثل الفل ...
الحال في بيت ابو ثنيان كان هادي دلال اللي تحسنت حالتها كثيير وربط الله على قلبها ورجعت تعيش مع ابوها وامها بأريحية وهي تنتظر من نوف مولود بعد 5 اشهر وكان خبر حمل نوف بنفس ثقل حمل رهام وفرحته
ام ثنيان اللي بدت تتقبل وجود الترف بشكل كبير لكن ما زال رمي الكلام مستمر
وابو ثنيان اللي كعادته ما يشكل خطر ابد
ونواف اللي من 7 اشهر وهو يدور وظيفه لما حصلها وابتدا يشتغل وكل تفكيره ينتبه لشهد وابوها اللي مايدري ليه يحس انه مسؤول عنها
اما عند سيف اللي بدا يخف على امل كثير وصارت تروح وتجي وتستانس وابتدا يبطل لقافه ولا له شغل بأي احد
ثريا نفس وضعها لكن فجر اللي خطبها عبد الرحمن اخو منصور الاصغر ملكت وكأن ربي استجاب دعائها وغير الاحوال
اما محمد ورهام كان محمد داير باله على رهام بشكل كبييير ومسويها يا دهينه لا تنكتين وهو ينتظر هالشهرين تقضي ويفرح فيها هي وطفلها
ومنصور اللي فرحان انه لما قرر يستقر استقر مع نوف اللي عمره ما توقع انه بيتفاهم معها بس صارت الحين تسووى عيونه وعمره ما يكون منصور الا مع نوف اللي لقت فيه حب الحبيب وحب الاب وسنده كان منصور تعويض لصبرها وهي فرحانه انها بيجمعهم طفل ويربطها بمنصور كثير
عجاج ونوره كان عجاج في معركه عظيمه مع مرزوقه وهو يحاول ما يخليها تقرب لنوره كثير لكن فرحته بنوره وفرحة ابوه بطفله اللي يتنظرونه الحاره بكبرها واللي من يوم ما حملت نوره وهم يسألون عنها كل يوم ويتنقصون لها من كل شي يسوونه كأن هالطفل المنشود خير خلف لخير سلف
واخيرا مع صالح وسلوى اللي ولدت سلوى وانولدت لهم حياة جديده حرفياً تغيييير ابو الترف وصار غير بشوفة حفيدته اللي صارت تسوى عيونه ( المها ) وصار مراعي لسلوى كثير حتى انه صار يحبها
وكان نص فرحة صالح بتغير ابوه ونصه الثاني ببنته اللي تممت اول ثمار حبهم النقي العذري
وطبعا شعور سلوى وفرحتها محد يضاهيه وحتى انها ركدت كثيييير كثير وبالها من صالح بالاكثر والاهتمام كله له والحب كله له
طبعاً عند ابطالنا ثنييان والترف اللي طول هالفتره اللي عدت لين دخلت الترف شهرها التاسع وهي مجننه ثنيان قول وفعل وخصوصا اخر شهر زاد خوفها وزاد تعبت نفسيتها وفي هالحاله طلب ثنيان من منيرت ومشاعل انه الفتره كلها بيكون مع الترف لان قلبه بدا يوجعه من خوفها اللي صار مصدر رعب لهم كلهم وصار ما يبعد ابد يا دوب يداوم ولا مع عجاج عند باب بيته بعد ويرجع لها
الترف اللي كان خوفها مب في يدها كانت من رعبها تحلم وتفزز كانت تحاول تكون هاديه بس لا شعورياً تخاف وتختبص وخصوصا ان بطنها صغيير وهذا مخوفها
الترف اللي كان خوفها مب في يدها كانت من رعبها تحلم وتفزز كانت تحاول تكون هاديه بس لا شعورياً تخاف وتختبص وخصوصا ان بطنها صغيير وهذا مخوفها
اما منيره اللي كانت متناسيه الخلاف اللي بينها وبين الترف وتحاول تساعدها وتكون معها وهي تشوف خوف ثنيان الفارق عليها
ونفس المشاعر كانت تحملها مشاعل لترف والكل بالبيت مهتم بالترف بشكل واضح
.
.
انتهى البارت💛