تهزمني السمراء وأنا نّد فرسان بقلم الكاتبة أديم الراشد// مكتملة

البارت الثامن والعشرين

«البارت الثامن والعشرين»
.
.
انتهى العرس بفرحه على الكل وحماس
ابو ثنيان اللي ما توقع انه ينبسط انبسط حيل ونواف اللي مابغى يروح ومحمد
والناس بدوا يروحون وثنيان اللي دخل يدور على الترف وشافها جالسه بعد الزواج بتعب وهي تتعشى جلس بجنبها : جعله بالعافيه
الترف : يعافيك اجلس تعشى
ثنيان جلس مقابلها على الصحن : اذا خلصتي بنمشي
الترف : وين نمشي
ثنيان: بيتنا
الترف : لا والله واخلي ابوي لحاله
ثنيان: وش فيها اذا ابوك لحاله صالح تراه قريب
الترف : حبيبي صالح لو تفجر الدنيا ما درا عنها خل عنك وبعدين ابوي بكره بيسافر بنام معه ذا المره وخلاص وبعدين انا تعبانه ومن بيرتب مكان الزواج اخليه يرتب هو
ثنيان: يعني
الترف : يعني بنام هنا
ثنيان : زين وانا بنام هنا
الترف :هاااه
ثنيان: وش فيتس بنام هنا وبكره لا راح عمي نروح مره وحده تعبت وانا رايح جاي
الترف ( هذا اللي ما حسبت حسابه )ابتسمت : ابد نام جعل ماينام غيرك العين اوسع لك من الدار
رفع ثنيان حواجبه باستغراب : ايه الله يسلمتس
................••............
عجاج اللي بعد ماخلص هو والعيال مع ثنيان وابو الترف راح وهو يمشي مع عايض عشان يحط صحون العشاء بمكانها
عايض : شفت الغرفه ذيك
عجاج : ايه
عايض : انت حط الصحون فيها وانا ببروح انادي العامل يغسلهم
عجاج : طيب
راح ودخل مع بابها الاول وهو يحط الصحن وقبل ما يقوم والغرفه ظلام تحرك وهو فيه عطسه وقبل يعطس وما سمع الا صراخ وصحن على راسه طاح عجاج وهو يقول : بسم للله بسم لله
والحال ان نوره كانت هي بعد بتحط صحون العشاء بنفس الغرفه بس كانت خايفه ولما سمعت صوت شيي غريب وظلام خافت وضربته بالصحن وهي تصارخ : يييييمه ييييمه
طلع عجاج يركض من باب ونوره من باب وكل واحد خايف من الثاني
عايض سمع الصراخ وجاء يركض :نوره علامتس نوره
نوره: فيه جني ياعايض جني مدري ذيب
عايض : وينه وينه
نوره: هذاك هو يركض
عايض : حسبي لله عليتس هذا عجاج عجاج
ركض لعجاج اللي انهبل وهو يركض بكل قوته بالقوه مسكه عايض: بسم لله عليك بسم عليك
عجاج : ابك غرفتكم فيها جني
عايض اللي انفجر ضحك: لا ما عليك هاذي نوره الخبله بتحط الصحون وخافت
عجاج جمد وهو ماسك قلبه من الخوف ( حسبي للله عليها وعليك وعلى ثنيان الرخمه اللي راح وتركني)
راح عجاج وركب سيارة محمد وهو قلبه يدق من الخوف وتحركوا متجهين لبيتهم
................••............
وعند الترف
اللي كانت تسولف هي وثنيان ويضحكون يتعشون دخل ابو الترف : ثنيان انت هنا
ثنيان ابتسم : ايه اليوم اناولدك
ضحك ابو الترف : حياك الله البيت بيتك
ثنيان: واسمح لي بنام عندك
ابو الترف : خذ راحتك انت من اهل البيت
ابتسم ثنيان اللي كان للحين جالس على الصحن مع الترف وهو من زمان ما جلس وسولف وضحك
الترف قامت وهي تغسل وقام ثنيان وراحت الترف وهي تاخذ فراش ابوها وقرب ثنيان: وين بتودينه
الترف : الحوش
ثنيان اخذ الفراش عنها وهو يشيله وطلع به للحوش : وين احطه
الترف : هنا
ابتدوا يفرشونه وكان الجو حلو مره
وجاء ابو الترف وهو ينسدح ودخلوا وهو يطفون الانوار
راحوا للقسم الثاني من البيت ووكانت نوره مخلصه بعض الاغراض وراحت لبيتهم وهي تسب عجاج من قوة خرشتها
الترف وقفت : شوف انت ارفع الزل وانا بشيل الباقي
ثنيان:تم
كان الحوش كبير ثنيان يرفع الزل والترف ترتب ويسولفون ويتمشون رغم ان ثنيان مب شغيل ابد ولا يحب يشتغل ويرتب واعتمادي بس هالمره يشتغل من غير شعور والترف تسولف وهي تبي تدوخه بالكلام وينام بس واضح انه صامل
انتهوا ودخلت الترف وهي تعطي ثنيان فراشه : خذ
ثنيان: وش اسوي به
الترف: نام عند ابوي
ثنيان : لا والله
الترف : اي والله
ثنيان: انا ما اعرف انام فالانوار وبعدين جالس بنام معتس مب مع ابوتس
الترف : زين
راحت وهي تحط فراشه بالزاويه وفراشها بالزاويه الثانيه
ثنيان :وهذا وشو بعد
الترف : انت هنا وانا هنا
ثنيان: بالله
الترف : ايه
ثنيان سحب فراشها بجنب فراشه : هنا قصدك ليش لاني زوجك طبيعي مب كل واحد ينام بزاويه
الترف : لحوووول
ثنيان مارد عليها وانسدح وهو يسحبها تنسدحه جنبه وكان بعيد شوي ونام بعد طلعت الترف عينه والترف بعد نامت وهي مرتاحه
.................••............
ومن بكره عند صالح وسلوى اللي كانوا عايشين حبهم بتفاصيله ابتسم صالح وهو يشوف سلوى جايه ومعاها الفطور
صالح : يا جعلني ما اصبح الا بوجهتس
سلوى : جعلني ما افقد شوفتك يارب
ضحك صالح لما شاف الضربه بجبينها وقرب وهو يضحك : هذا جرح يوم فقشتس
ضحكت سلوى: فقشاتك كثيره يامال الصلاح يا صالح
ضحك وهو يبوسها: يا جعلها فيني
سلوى : بسم لله عليك
صالح : خلينا نعجل ونسلم على ابوي قبل يروح
سلوى:زين
................••............
في بيت ابو الترف
الترف اللي من الصبح صحت وهي ترتب وتجهز لجيت صالح وسلوى وجهزت الفطور وهي تنتظر ابوها يجي من الدوانيه ودخلت تبي تصحي ثنيان اللي نايم نومه من قلبه من قللبه
ناظرت فيه شوي وطلعت وهي مبتسمه طلعت من البيت وهي تشوف ام مصبح ( عجوز عندهم )وتشوف غنمها وعنيزاتها برا بس
ابتسمت وهي تنادي مصبح الصغير : مصبح جب لي من عندكم تيس صغير
مصبح: وش تبين فيها
الترف : ابيها شوي وبرجعها جبها
راح مصبح يركض وجاب التيس الصغير وجاء : ها وين اوديه
الترف : تعال تعال
دخلت وهي تدخل على ثنيان: رح احذفه عليه
راح مصبح يركض ورمى التيس اللي قام بفجعه وهم يهبد في ثنيان اللي صحى بفجعه اقوى وهو يدقه عنه وسكرت الترف الباب عليهم وهي تضحك هي ومصبح وثنيان اللي مفجوع من التيس والتيس مفجوع منه ويركضون ورا بعض بالغرفه انتبه ثنيان للضحك وراح للباب وهو يسحبه بغضب ودخل مصبح وهو ياخذ التيس ويروح
ثنيان بعصبيه: ترفوه وجع وش ذا
الترف اللي كانت تضحك بهستريا وهي تبي تشرح الموقف لكن ما قدرت ضحك ثنيان من ضحكها وهو يسحبها وكان فيه قدر كبيييير لعشاء امس ومحترق ومنقوع فيه مويه وبقايا رز دفها ثنيان فيه وانتشر صراخها وقامت الترف وهي تضحك وتصارخ: يا ويلك من ابووووي
ثنيان: خليه يجي وبعلمه سواياتس
الترف : يووه صالح وسلوى بيجون
ركضت وهي تدخل تروشت بسرعه وطلعت وهي تجفف شعرها وتبخر ودخل ثنيان وهو يضحك ولبس
الترف طلعت : مردوده يا ثنيان
ثنيان: على القوه يالترف
قطع عليهم ابو الترف اللي دخل وهو ينادي وجو جلسوا يفطرون وثنيان في اي فرصه يلقاها يقهر الترف فيها
ابو الترف : افطر يا ثنيان افطر هاذي عاد عريكة الترف ما تنتفوت
ثنيان : اي والله تسلم يدها
ابو الترف : الظاهر انك شبعان منها
ثنيان رفع راسه يناظر الترف بلعانه : والله لو قلت لك اول مره اذوقها ما تصدقني
ابو الترف : افاااا وش ذا الحكي كيف ما قد ذقتها
ثنيان : والله بنتك ظالمه يا عمي
ابو الترف : الترف وش ذا الحكي انتي ما تسوين لرجلتس فطور
الترف تورطت : لا يبه معقوله ثنيان يمزح معك
ثنيان ابتسم بلعانه : لا والله صادق
الترف : اييه صح عشان منيره يبه يا زينها منيره ما تخليني اسوي شي كل ما جيت اسوي شي تحلف علي وانا بس اساعدها
ابو الترف : حتى ولو عيب عليتس وش ذا الافعال لا يكون بس جالسه والناس تخدم عليتس
ثنيان ضحك لما شاف الترف اللي تفشلت : بس والله ما تقصر
ابو الترف : حتى لو انها ما تقصر
الترف ناظرت ثنيان بحقد : لا والله يا ثنيان اقصر واقصر كثير بعد
دق الباب ووقفت : صالح جاء
ثنيان وقف : انا بروح اخذ لي اغراض من البقاله
طلع ثنيان وقابل صالح ببتسامه : اووووه يسعد صباح المعرس
ابتسم صالح : يسعد صباح النسيب بايت عندنا
ثنيان: راحت عليك اخذت محلك
صالح : والله مشكله ، ادخل وين رايح
ثنيان: باخذ لي اغراض وانت خذ راحتك
سلوى كانت ورا صالح وهي تراقب تصرفات ثنيان كان حزتها ودها تصفق الترف اللي ماهي معطيته وجهه وجت وهي ترحب فيهم وثنيان طلع
صالح : هلا والله بالترف
الترف : هلا يا معرسنا ، ادخل ابوي وعريكة ينتظرونك
صالح : جيت بوقتي
دخل وقربت الترف بتسلم على سلوى اللي سلمت لكنها قرصتها وضربتها الترف : وجع وش فيتس علي
سلوى: ابي اخلص من وضعي واوريتس
الترف: ليييه
سلوى: ابك الرجال ماشاء الله عليه ينتصلى على طرف ثوبه وانتي ما بقيتي عذروب ما حطيتيه فيه
الترف : اقول ادخلي لعلم صالح يفقع وجهتس
سلوى ضحكت وهي تلف: خليني بس وشوفي رجلتس عند من رايح
ناظرت الترف وهي تشوفه رايح البقاله وشهقت : وش يبي هناك لا يكون بيذبح عايض
سلوى : ليته يذبحتس معه
دخلت سلوى وهي تسلم على ابو الترف وجلست وهي تشوف الترف اللي توترت تنتظر ثنيان يرجع اما ابو الترف اللي كان ندمان ان وافق على زواج صالح لكن انتهى ندمه لما شاف الفرحه بعيون صالح وسلوى
................••............
في بقالة عايض
عند ثنيان اللي دخل البقاله واخذ اغراضه وهو يناظر في عايض بحده وعايض اللي كان حاقد لكن بطبيعة الحال مايناظر ثنيان ابد
طلع ثنيان اللي للحينه يناظره اتجه لسيارته وهو يجلس فيها اخذ الجوال وهو يتصل على رقم من شهر ما اتصل فيه على طول جاه الرد بصوت ملهوف : ثنيان هلا
ثنيان : هلابك كيفك
منيره : حمدلله انت كيفك
ثنيان : بأحسن حال كيف محمد
منيره بحنين : يسلم عليك ومشتاق لك
ثنيان : وانا بعد اشتقت لمحمد الطيب
ابدا ماكان موضوعهم محمد منيره كانت تعبر عن مشاعرها لثنيان وثنيان اللي فاهمها ويرد عليها بنفس النمط والطريقه
منيره سكتت بضيق وقال ثنيان :اجهزي انتي ومحمد راح اجي اخذكم بعد ساعات
منيره بفرح: : ابشر
ثنيان سكر وهو ياخذ نفس ( الحين شلون بتعامل معك يا منيره وشلون )
رجع وهو يدور على الرقم الثاني واتصل وجاها صوت عمر بفرح : يببببه
ثنيان : هلا يا ابوي هلا كيفك وش اخبارك
عمر: حمدلله يبه انا اشتقت لكً
ثنيان : وانا يا ابوي اشتقت لك كثيييييير
عمر : متى بتجينا
ثنيان : عد 3 ساعات واكون عندك
عمر: ومحمد معك
ثنيان: ومحمد معي ، عمر حبيبي وين امك
عمر : الحين اعطيك
ركض عمر وهو يعطي مشاعل اللي كانت جالسه وع اخواتها وابتسمت وهي تطلع : هلا ثنيان
ثنيان : حي الله مشاعل
مشاعل : الله يسلمك
ثنيان : كيييفك وش اخبارك كيف تعبك
مشاعل: الحمدلله مسيطره على الوضع مبدئياً
ثنيان : عساك ما تتعبين بس
مشاعل: لا امي الله يسعدها مب مقصره
ثنيان : الله يسعدها وسلمي عليها
مشاعل : ابشر
ثنيان: خليكم جاهزين ساعتين ثلاث وبكون عندكم
مشاعل: ابشر
ثنيان : فمان الله
سكر ثنيان وهو يدق على مي اللي من ثقتها توقعته انه بيجي ياخذها لوحده وبسرعه قامت وهي تجهز بكل قوتها وجمالها
................••............
وعند محمد اللي وقف وهو يتصل بثنيان
ثنيان : هلا محمد
محمد : هلابك وش بلاك مشغول
ثنيان: كنت اكلم
محمد : طيب اسمعي ابي استشيرك بشغله
ثنيان: وشو
محمد : كيف نتصرف مع الارقام المجهوله
ثنيان: كيف يعني !؟
محمد : ياخي في رقم اشغلني واشغل حياتي سبب لي ازمه ولا اعرف مين يعني مسجل بهوية هندي
ثنيان : مشغلك من اي ناحيه
محمد اللي حب انه يزيد الطين بله : ياخي اول شي دخلي برسايل حب وخرابيط ولما تجاهلته صار يألف اشياء تفجع ويرسلها ولا خلا احد بالعايله ما تكلم عليه هذا غير اشياء تفجع اللي يرسلها شي والله يعني ما ينشاف خليعه جداً
ثنيان : لا والله
محمد : اي والله يعني اشغلني لدرجة صار يتكلم عنا وعنكم وعن اخووانك كلهم واتهامات واشياء كارثيه وانا هنا ما قدرت اسكت
ثنيان: ماعليك ماعليك ارسلي الرقم وانا اطلعه من سابع ارض واربيه
محمد: ايه دخيلك توصى فيه قاهرني
ثنيان ضحك وهو مايدري وش اللي بيطلع ورا هالرقم : زين ارسله
لف لما دقت الترف الشباك : يلا مع السلامه
نزل نص الشباك ودخلت الترف راسها وقالت: ليش جالس بالسياره
ثنيان : مثقله علي العريكه
الترف هزت راسها بيأس : ياخي اللي مثلك يقول تسلم يدتس وانت وش تقول
ثنيان قرب : وش اقول !؟ انا
الترف : اا ايه ليه ما تدخل تقهوى معهم جوى
ثنيان : اكلم حريمي
الترف في نفسها ( مالت عليك وعلى حريمك ): ماشاء الله ما توفر
ثنيان : ليه تغارين
الترف اللي انقهرت : انا اغار !! من من وعلى من
ثنيان ضحك هو يصد
الترف : المهم ادخل تقهوى
ثنيان : مابي قهوه بس ما ودك تستعجلين بنمشي
الترف : لين ابوي يروح
ثنيان: ومتى بيروح
الترف : بعد خمس دقايق
ثنيان: دام كذا روحي أجهزي
الترف : ياخي وش فيك ترا عادي تنتظر !
ثنييان رفع الشباك عليها والترف الللي تعلقت وهي تصرخ: حسبي لله عليك ذبحتني نزلها يا ثنيان لا تخنقني
ثنيان : عادي تنتظرين !
الترف: ثنيان هذا مب مثل ذاك نزلها ذبحتني مقدر اتنفس
ضحك ثنيان وهو يتلفت ماكان فيه احد قرب وهو يبوس خشمها من ورا برقعها ونزل الشباك والترف اللي انقطع صوتها وضحك ثنيان: يلا عجلي
الترف ضربته وهي تتحسس راسها : ماني معجله ووخلك خيس هنا ، مجنون انت بغيت تذبحني
ثنيان :ههههههههههههههههههههههههههههههههههههههههههههههههه ههههه ترا باقي حيه ما متي وااخلصي لا اشتكي عمي عليتس
طلع ابو الترف وهو معاه اغراضه وصالح اللي يسلم عليه نزل ثنيان وهو يسلم عليه ويودعه
وراح وراح صالح بعد وطلعت الترف بعد ما قفلت البيت واعطت صالح المفتاح وركبت وتحرك ثنيان
................••............
في طرف ثاني
عند سيف اللي دخل بيته وهو يشوف فجر اللي جالسه بهدو
سيف : فجر
فجر : هلا يبه
سيف : وينها امك
فجر: في غرفتها
سيف : كيف وضعها
فجر : يبه على وضعها ما طلعت بس على السجاده والقران يادوب تاكل وترجع
سيف : طيب محتاجين شي
فجر : لا يبه بس كيفه بندر
سيف : انا اتصلت بواحد بالسجن ويقول انه بخير
فجر : للله يهديه
سيف : اجل انا بروح اذا احتجتي شي علميني
فجر :طيب
طلع متجهه لبيت اللي استقر فيه بشكل كامل مع امل ................••............
عند ابو ثنيان
اللي كان يشوف سيف اللي طلع وقال بغضب : هذا سيف
لفوا رهام ونواف ونوف : ايه
ابو ثنيان: وش بلاه يمر ولا يجي يسلم
دلال : من يوم انسجن بندر وهذا هو يجي مره ويروح
ابو ثنيان : كل الناس تربى الا سيف كيف يخلي بنته وزوجته كذا كيف
نواف : انا للحين مصدوم انه دايم بايت برا البيت
ام ثنيان: ايييه خلاص ولى راح مع طريق اخوه ساحرينهم هالحريم ولا واحد تارك بنته وزوجته في عز مصيبتهم وجالس عند وحده ماندري وش شكلها والثاني مرمي الحريم عند اهلهم ويطارد لي وحده لا اصل ولا فصل
دلال : يا يمه الله يهداك وش تقولين
ابو ثنيان: ثنيان بيرجع منيره اليوم وحريمه كلهم بيرجعون
نواف ضحك: ههههههههههههههههه براڤو عليه ثنيان يطرشهم ويكفخهم كلهم بوقت واحد ويرجعهم كلهم بوقت واحد اكثر من هذا العدل ما شفت
رهام : هههههههههههههههههه والله يفحمني عدله
نوف : يعني ياجدي الترف بترجع
ابو ثنيان : ايه كلهم بيرجعون
نوف ورهام اللي قاموا للمطبخ : احسن شي بتجي الترف نفلها معها
رهام : ودك لو يطلق مي الغثيثه
نوف : ههههاي حبيبتي خالي مسوي تشكيله ويلعب على انماط مختلفه
رهام: كيف يعني
نوف : يعني يبي وحده طيبه ومسكينه وتطلب رضاه طلب فا رجع منيره ويبي وحده عقل وثقل ومكر وثقافه فا مشاعل موجوده يبي وحده تدوخه بالدلع والجمال هنا مي موجوده ويبي وحده على جوه نفس موده يلعن خيرها وتلعن خيره وفي نفس الوقت يحبها بزود هنا الترف
رهام: والله صادقه يخوفون الرجال والله
نوف : انا بموت واشوف زوجة سيف احس انه انبرد قلبي في ثريا برده العمر كله
رهام : استغفري الشماته مب زينه
نوف : وش نسويها لها ما خلت احد من شرها
صدت رهام اللي تشتغل وتسمع تحليلات نوف
.................••............
في بيت ابو محمد
محمد اللي سكر ببتسامه وهو يدري انه عطى ثنيان الخيط والمخيط وانه سلمه رقبة شوق بسهوله وبيستمتع في اللي بيسويه ثنيان
دخل وهو يشوف منيره مجهزه اغراضها وكاشخه وتنتظر
محمد : منيره خيير وين رايحه
منيره ببتسامه: برجع لبيتي
محمد ابتسم : الله يديم لك بيتك يا منيره انتبهي وخليك ذكيه لا تظلمين يا منيره لا تسمعين لناس اللي بيخربون بيتك خلي همك زوجك وولدك والباقي بالطقاق وخليك منيره القديمه
منيره: لا تخاف يا محمد انا اخذت درسي
محمد ابتسم : الله يهنيك
منيره ابتسمت وهي تسلم على ابوها وتلبس محمد
................••...........
في سيارة ثنيان
ثنيان اللي كان يكلم : ابيك بكل سريه تطلع لي موقع الرقم وتعرف كل المعلومات اللي موجوده بالجهاز اللي يستخدمه الرقم وكل شي ابيك حتى ادق التفاصيل تجيبها واذا حصلت المكالمات يكون حلو
الشرطي : ابشر
ثنيان :يلا موفق
سكر وهو يسمع الترف تقول : وش سالفة هالرقم
ثنيان:رقم مزعج محمد
الترف : ولدك !
ثنيان: لا ولد عمي
الترف : منيره رجعت
ثنيان اشر على البيت : هذا هي بترجع ويلا نطي ورا
الترف : ليه ورا
ثنيان : عشان محمد وعمر قدام وانتم ورا من باب العدل والمساواة
الترف : ياربي على العدل والمساواة
ثنيان : ارجعي بس
رجعت الترف وطلعت منيره ومحمد وقربت منيره بتركب قدام بس قال ثنيان : ورا يا منيره
منيره انصدمت لان ثنيان دايماً كان يخليها قدام ورجعت وركب محمد وهو يسلم على ثنيان والترف اللي قربت تسلم على منيره ومنيره مستغربه انها تسلم عليها
ابتسم ثنيان لما شافهم وتحرك وهو يسوولف مع محمد ومروا واخذوا مشاعل اللي كانت فرحانه
وهي تسلم عليهم وطبعا الحين صار وقت مي اللي جات وهي تتمخطر ومتوقعه ان ثنيان لحاله وفتحت الباب وهي تقول : اهلييين ب حبيب... انقطع كلامها لما شاففت عمر ومححمد ولفت وشافت الترف ومنيره ومشاعل اللي كلهم يناظرونها ب هالنظره😒 لفت وهي تأفف وركبت وهي متضايقه وثنيان اللي كان الكل يناظر مي وهو يناظر الترف اللي كان واضح من عيونها انها مشمأزه من مي وتكرهها ابتسم لما لمعت في باله فكره وقال وهو يلف عليهم : حي الله مي
الترف للي ناظرته بقرف ومي ماصدقت : الله يحيك يا ثنيان وحشتنا
تنحنت الترف وهي تدف مي اللي لازقه فيها وقالت بعمد : يا ليت نمشي يا ابو محمد
مشاعل: ايييه لان انضغطنا كثير
ثنيان لف وهو يكمل طريقه ببتسامه ومر ياخذ غدا واتجهه للبيت ................••............
في بيت ابو محمد
محمد اللي ارسل من نفس الرقم على رهام ( احذفي كل شي وصلك من هذاك الرقم وامحيه من عندك نهائياً)
فتحت رهام الرساله وخافت وردت :ليه
محمد ؛ سوي اللي اقول عشان ما يصير لك شي
رهام :طيب
حذفت رهام كل شي وجلست وهي ما تدري محمد وش يخطط عليه
................••............
وعند عجاج
الللي كان راسه للحين بصداع من ضربة امس رفع راسه وهو يقول : حسبي للله عليك يا ثنيان وين جبتني لديرة المجانين
عيد جاء :عجاج وش فيك
عجاج :راسي بينفجر
عيد: ما تشافى من امس
عجاج : لا
عيد:وش طحت عليه انت
عجاج اللي كان قايلهم انه طاح لكن فالحقيقه كان الصحن ثقيل مره على راسه :مدري
عيد : الله يعينك اجل
عجاج بنفسه ( اييييه الله يعيني دام هالخبل طايح على هالخبول ) .................••............
في بيت ثنيان
وصلو وحضروا الغدا وتغدوا وبعد الغداء قال ثنيان : عمر محمد اطلعوا فوق شوي
طلعوا وثنيان كان جالس بالنص وحريمه حواليه
ثنيان : الكل يركز معي
كلهم ناظروا ثنيان بإستتغراب وقال ثنيان : بما ان كلكم يالاربعه موجودين اللي بيحصل كالاتي لاول واخر مره رح احط نظام لهالبيت ومن البدايه اقول اللي بتخربه رح تندم
مالي خلق مشاكل من جديد وعوار راس
النظام رح يبدا من منيره لمشاعل لمي ل الترف
كل يوم عند وحده وتكون مسؤوله عن البيت ككل واغراضي ما عدا الاشياء الخاصه
مثلا لو اليوم يوم منيره رح تكون مسؤوله فيه عن البيت كامل من طبخ من تنظيف من ملابس لي بذاك اليوم و الاشياء الثانيه وينتهي اليوم بأنها تكون مختمه كل شي بالبيت من وإلى وتسلمه لمي طبعا مشاعل بتكون خارج نظام البيت والشغل لما تقوم بالسلامه مي راح تمشي على نفس النظام وتسلمه الترف اللي أحصل عندها نقص حزتها بتشوف بعيونها وش بسوي
هذا اولا
ثانيا : مشاكل الحريم وقالت لي وقلت لها وسوت وانا ماسويت وشكاوي هاذي ما ابيها نهائيا كل وحده تحط عقلها براسها وتريحنا
واي مشكله ادري بها انا قبل اي تصرف واللي تصرف من راسها تعرف وش بيصير
وباقي النظام زي ماهو الا اذا حدث تغيير وياليت الاحترام يكون متبادل
اليوم رتبوا اموركم ومن بكره يبدا الجدول تمام
الكل : تمام
ثنيان : عندك شي بتقولينه يا منيره
منيره: لا
ثنيان: مشاعل
مشاعل : لا
ثنيان: مي اكيد عندك قولي
مي : ايه ابي اغير غرفتي يا ثنيان
ثنيان: ليييش
مي : يعني صارت قديمه
ثنيان : متى غيرتيها
مي :قبل 4 شهور
ثنيان : معناته اقطعي الموضوع ولا ، الترف
الترف : سلامتك
ثنيان وقف وطلع : بنام مابي ازعاج
طلعوا كلهم ومنيره مبتسمه انه ماشي بطرف غرفتها لكن اختفت ابتسامتها لما شافته متجهه للغرفه المقابله والترف وراه مبتسمه
دخل ثنيان ولف وهو يشوف الترف داخله ببتسامه سكر الباب : وهذا ثاني شروطك يا الترف
ابتسمت الترف : الله ايييه هاذي الغرفه اللي تشرح الصدر
ثنيان: تكسرينها بالعافيه
الترف :بس وين اغراضي اللي بقت
ثنيان : افتحي الدرج
فتحت الترف وهي تشوفها مرتبه ضحكت : هاذي مب من الشروط
ضحك ثنيان اللي استند على كتفها : لا هاذي من لطافتي
وخرت الترف وتماسك ثنيان قبل يطيح وقالت: الله يديم اللطافه
اخذت الترف شنطتها ومسك يدها ثنيان قبل تفتحها : يرحم اهلتس خليها بعدين ميت تعب بنام مابي اي ازعاج
الترف اللي كانت صدق تشوف عيونه تعبانه : خلاص طيب
ثنيان: اصلا انتي بعد عيونتس حمرا نامي شوي
الترف : لا ما عليك مصحصحه
ثنيان : بكيفتس
ارتمى ثنيان وهو يتغطى بتعب : شغلي التكييف
شغلته الترف ولما حست بالبروده حست بتعب ودها تنام ما انتظر ثنيان اللي نام على طول ودخلت هي بعد وهي تنام
................••............
عند منيره اللي كانت هالحركه لها صدمه كيف ثنيان جاب الترف قدامها وكيف رضى كانت واقف وهي تناظر بابهم بصدمه
اما مشاعل اللي وقفت وهي مستغربه دخولهم بس ما فكرت وهي تدخل لغرفتها بتعب
اما مي كانت بنفس صدمة منيره وهي اللي كانت من شهر وهي ثنيان لها لوحدها وفجاءه جات الترف وهي تسحبه منهاا ببساطه .................••............
المغرب كانت منيره جالسه في غرفتها وهي مخليه الباب مفتوح وهي بصدمتها للحين تنتظر ثنيان يطلع ينتبه لها
عند ثنيان اللي صحى بالقوووه شاف الترف نايمه بعد بتعب مد يده وهو يلحفها ووطلع بعد ما بدل شاف منيره جالسه
منيره فزت: ثنيان صحيت جهزت لك القهوه والشاهي
ثنيان اللي تعود لسانه : زين يعطيتس العافيه جهزيها بشوف مشاعل واجي
منيره اللي تركت كل شي وانتبهت انه اخذ حتى لهجتها
دخل ثنيان لمشاعل اللي كانت جالسه وهي تدرس عمر رفعت راسها : كمل يمه هذا
ثنيان جلس وهو يبوس عمر : هاه كيفتس الحين
مشاعل: اوه بخير
ثنيان: دامتس بخير تعالي ننزل نتقهوى تغيرين جو بعد
مشاعل ابتسمت : ماشاء الله اخذت اللهجه
ثنيان ما انتبه : هاه
مشاعل: السين حقت الترف لايقه عليك
ثنيان: اجل قلتها !
مشاعل بضحك : ايه
ثنيان: تعودت عليها المهم يلا
مشاعل : طيب ، عمر امي خلص وتعال تحت
عمر : طيب
وقفت مشاعل ومسكها ثنيان يساعدها تمشي وهي اللي شافت ان زواج ثنيان من الترف غيره حيل للاحسن معاها واعتبرت زواجه خييييره
.
.
انتهى البارت🌟