تهزمني السمراء وأنا نّد فرسان بقلم الكاتبة أديم الراشد// مكتملة

البارت التاسع عشر

« البارت التاسع عشر »
.
.
في بيت ابو ثنيان
عند رهام اللي كانت ضايقه هي ودلال من امهم وكلامهم وثريا اللي بعد ما خربت الجو اخذت فجر وطلعت وشوق بعد طلعت وكانت نوف عند رهام
نوف: الله يستر من اللي بيصير
رهام : تكفين نوف انزلي شوفي وش صاير بعد
نوف: الحين بروح
نزلت نوف وقبل تطلع ددخل ثنيان اللي كان وجهه احمر : يمممه يمممممه
ام ثنيان وقفت : ايييييه جاء جاء رجال البيت جاء ابو الحرييييم
ثنيان اللي يحاول ما يصرخ : يمه وش ذا الحكي وش اللي قلتيه لترف مب حرام عليك هذا وانتي الكبيره
ام ثنيان: اقولك اسمعني بس خل عمك الكلام الفاضي هالسويده ما تدخل بيتي وانا حييييه تسمعني
ابو ثنيان: ماشاء الله من عطاك الحق تطردين انتي
ام ثنيان: لا والله تبيها تذبح بنتي وترد علي الكلام واسكت
ثنيان: يمه هذا انتي تعبي راسك هاللي ما تستحي وانتي وراها الترف مالها شغل برهام وطيحتها مايصير اللي تسوينه
ام ثنيان: علمتك وان كنت تبيني اغضب عليك جبها
ثنيان: زين يمه زييين
راح ثنيان لنواف : وش مسوي هالكلب لترف
نواف نزل راسه: ماعليك منه عطيته جزاه
ثنيان سحب نواف من تيشيرته : نوافوه انا ماني بزر تسكتني اخلص قولي وش مسوي
نواف بعد سكوت قاله ودفه ثنيان وهو يضرب الجدار : ويييينه ذا وينه
نواف: مدري اخذه سيف وطلع
ثنيان رجع وهو يدق الطاوله بغضب : يببببه يبببه وصل لسيف ان ماربى ذا الكلب بيكون موته على يدي وقله زوجته وولده لو ما يفارقون حياتي حزتها والله ما اقول اخوي وولده وبنت عمي وعلمه زين ان شفت بندر والله اني ما اخليه
طلع وهو يدف اي شي يواجهه
................••............
في طرف ثاني
عند سيف اللي ما قصر في بندر ضرب لكن بعيد رجع وهو مصعب وقبل يطلع قابله ابوه اسمعي يا سيف امسك مرتك وولدك عن ثنيان
سيف : لا تخاف يبه بسمك كل شي واطلع واخلي ثنيان يشبع
دخل سيف وجلس ابو ثنيان بغضب
نواف :يبه هدي لا يرتفع ضغطك
ابو ثنيان: انا وش اسوي وش اسوي
نواف: تعال تعال بنروح لعمي ومحمد توسع خاطرك عندهم
وقف ابو ثنيان وطلع مع نواف
.................••............
في ببت ثنيان في المجلس الخارجي تحديداً
الترف اللي كانت تمنى جوالها معها وتدق على صالح يجي ياخذها انسدحت بتعب من كثر ما بكت وانقهرت
وثنيان اللي رجع وهو الحين ماصار يلوم الترف على اللي سوته ابد
راح لمنيره : منيره كلمي اختك وقولي لها ان هذا اخر شي اتحمله منها والا والله والله لتشوف شي مني يزعلها
منيره سكتت بضيق وهي تدري ان ثريا غلطانه
لف لمشاعل: وينها الترف
مشاعل : بالمجلس الخارجي
نزل ثنيان وهو يفتح الباب بس ما انفتح هزه شوي وهو يناديها بس ماردت رجع يدق وبعد شوي فتحت الترف وهي تناظر بغضب ومرت بس رجعها ثنيان وهو يدخل ويسكر الباب
الترف: ابعد بطلع
ثنيان اخذ نفس : اجلسي بكلمك
الترف : مابي اسمع
ثنيان: لا بتسمعين
الترف تكتفت وجلست ثنيان: بعيد عن كل اللي صار مع اهلي ابي افهم وش ذا اللي سويتيه في مي
الترف : لايكون ودك اسكت واصفق لها
ثنيان بغضب : ببببنت انا ماني طرطور هنا مب سكت اسبوع اسبوعين صارت الدنيا فوضى كان عندك حل انك تدقين علي وانا اجي مب تروحين تكفخين من راسك
الترف: اذا انت تشوف انها كبيره بحقك انا اشوفها بحقي اكبر وعمري ماسكت عن حقي ولا بسكت
ثنيان: تفهمين اللي اقوله ولا لا مهما صار تتصلين فيني
سكتت الترف وهي تستغفر ثنيان: اخر مره يصير هالتصرف في بيتي
الترف :والله اذا ما تبيه ينعاد اعرف كيف تسد فمها عني
ثنيان: لا تردين الكلام واسمعي ثاني مره يصير شي تتصلين فيني وتبلغيني سامعه
الترف اللي كانت ساكته وهي تتجاهد مع دمعتها
ثنيان: هذا اول شي وثاني شي بخصوص اللي صار عند اهلي
الترف وقفت : ايه الحين جاء وقتك تصفق وتقول اهلي معهم حق ومهما صار تدقين علي بغض النظر عن اللي قالوه هم صادقين وانتي يا سويده اسمعي واسكتي
ثنيان طارت عيونه : انتي مجنونه انتظري اخلص كلامي ما قلت معهم حق هم غلطانين مليون بالميه وماني راضي ابد ادري ان ثريا وولدها زودوها مررره وماني ساكت لهم وباخذ لك حقك
لكن امي كل اللي بيصير لا تروحين لها ولا هي تجيك
الترف: مابي اروح لاحد اصلا لكن ريحني من ذا الدوامه وقلها مالي شغل برهام ابد ابد
ثنيان : ماهي فاهمه هالحكي ابد لكن ما بتركها لين تفهم وانتي الله يخليك خليها تقول اللي تقوله ما عليك فالنهايه حرمه كبيره
صدت الترف وهي ترفع راسها تحاول تشيل دموعها : اذا هاذي خلصت بروح غرفتي
ثنيان : ماخلصت انا
الترف : وش باقي بعد
ثنيان : لا تكلمين مي ولا تكلمك نهائي
الترف اللي ملت وهي تحاول ما تبكي قدامه وقفت وهي تقول : ابشر وتامر بس طلعها من غرفتي خلاص بروح لغرفتي
ثنيان اللي حس انها بتنهار وانه ضغط كثير : زين بس اني حبيت اعتذر بالنيابه عن امي وبقولك اني ابد ما رضيت ابد
الترف وهي منزله راسها: طيب بس بروح
طلع ثنيان وهو متجهه لغرفه الترف اللي تمشي وراه وهي متكتفه
مشاعل ومنيره يناظرونها بضيق فتح ثنيان الباب وشاف مي مخلصه اغلب الغرفه: اطلعي من هنا
مي طلعت والترف تخزها دخلت الترف وهي تتجه لملابسها وتجمعها بسرعه وغضب
ثنيان اللي طلع ونزل وجلس وهو يمسح على راسه
رفع راسه : مشاعل انتبهي عليهم مابي مشاكل اي شي يصير تتصلين فيني
مشاعل : ابشر
ثنيان: جيبي لي مويه وفيفادول
منيره اللي كانت جالسه بضيق لف ثنيان وهو يسحب يدها لحضنه : منيره لا تزعلين ما قصدت اضايقك ابد بس انتي تعرفين ثريا واللي تسويه وبندر هالزفت مو مقصر مالي خلق مشاكل بعد كفايه اللي راح
منيره بعدت : ادري يا ثنيان وادري بثريا الله يصلحها بس وش اسوي بها
ثنيان : مدري انا وش نسوي بها بس لو تكلمين محمد المهم تفكني من شرها
منيره: زين
قامت منيره وجات مشاعل وجلست وهي تعطيه المويه اخذها ثنيان ونزلها وهو ينسدح على رجول مشاعل : همزيني
مشاعل اللي بدت وهي تفكر كيف تخلي ثنيان مايعصب على الترف بس فجعها ثنيان اللي جلس بسرعه : مشاعل
مشاعل : هاه
ثنيان ابتسم : اثاريك حامل صدق نسيتك
مشاعل انصدمت وضحكت : فجعتني ايه حامل وش فيك ناسي الدنيا
ثنيان قرب : اييه غريبه هالمره ما سمعنا شروط وحركات
مشاعل : وانت عطيتني وجهه اصلا عشان اقول شروط
ثنيان : افااا وهذا زعل ولا
مشاعل: يعني نقول نعاتب
ثنيان : ولا يهمك نرضيك كم مشاعل عندنا
مشاعل اللي ماتدري وش تسوي تضحك على المشاكل اللي خلت ثنيان يتذكرها ولا وش تسوي
ثنيان: انتي في اي شهر
مشاعل : الثاني
ثنيان : مطولين ننتظر يعني
مشاعل ضحكت : ماعليك بتعدي سبع شهور وانت لاهي
ثنيان اللي توه ينتبهه انه من زمان عن مشاعل ابتداء يسولف معها ويضحك .
...............••............
في ديرة الترف
وعند سلوى اللي كانت جالسه ترتب عندها عرس اليوم ورفعت راسها لكن صرخت لما طاحت على راسها حجر وهي تنط
سعديه : يييمه وش فيتس
سلوى: راسي راسي
سعديه : من رمى الحجر
سلوى : يا راسي
سعديه : ياووك ياسلوى انقشتي
سلوى سمعت ولا ما سمعت انهارت : روحي شوفي الحمار اللي رماها
راحت سعديه وكان صالح جالس وشاف سعديه طالعه وهي ترمي العيال : انقلعوا انقلعوا
صالح : سعديه وش فيتس
سعديه : ذا المهبل رموا حجر وفقشوا سلوى
طارت عيون صالح : صار لها شي
سعديه : لا لا بسيطه
صالح اللي رجع وهو يضرب جبينه : مسوي انت وجهك ما تبي احد يدري هذا انت فقشتها ما بقى احد ما درا
سلوى الله كانت تغسل جرحها وهي تصارخ وتلعن
سعديه : خلاص بس حطي عليه مناديل وشوي ويطيب مب كبير تراه
سلوى: ياا راسيي بموت
سعديه : بتروحين العرس ولا لا
سلوى: لا روحي انتي
سعديه : بكيفتس
اخذت اغراضها وطلعت هي والفرقه وصالح اللي ماصدق طلعوا ودخل وهو يدق باب الحوش: سلوى سلوى
سلوى فزت وسكتت وهي تسحب طرحتها وتغطى : صالح وينك
صالح: هنا عند الباب
سلوى لبست عبايتها وهي ماسكه راسها: وش فيك
صالح : انتي للي وش فيتس
سلوى تذكرت : ااااه يا راسي انفقشت ياصالح
صالح وهو معفس وجهه بضيق : ايه ادري انا اللي فقشتس
سلووى : وشو وشو وشووووو
صالح : اسمعي قبل تصارخين يا جنيه
سلوى: وش اسمع دمي طلع دمي
صالح : يابعد دمي انتي اسمعي
سلوى : بعد دمك!!! ياويلي ويلااه
صالح : خلصنا عاد بتسمعين ولا بكيفتس
سلوى: وشو
صالح : خفت عندتس احد وانا اشتقت لتس قلت بحذف حجر وبتجي لكن وش اسوي دامتس مدخله راستس في كل مكان
سلوى: اللي يشتاق يسوي كذا
صالح : اي والله بذات اللي ذابحه الشوق
سلوى: ايه يا صالح هذا اللي انت فالح فيه
صالح : لا لا ما عليتس عندي لتس خبر بيفتح نفستس
سلوى: وشو
صالح : ابكلم وابوي وبنجي نخطبتس
سلوى اللي نست انها انفقشت : في ذمتك
صالح : في ذمتي
سلوى: خلاص يعني
صالح : ايه ايه بكلمه وان شاء الله قريب نجي
استحت سلوى وهي تصفق الباب بوجهه اختفت ابتسامة صالح: سلوى وجع
تذكرت سلوى وفتحت الباب : مادريت والله
صالح : ما عليه بتصيرين عروس وتدلعين علي
سلوى ضحكت لكن اختفت ضحكتها لما حست بالفقشه: بس انت فاقشني
صالح : ماعليه ازين عشان تصير ذكرى خطوبتنا
سلوى: اي والله
نوره جت : جعلكم اللي مانيب قايله وش تسوين هنا اعنبوكم احد يتغزل باحد في عز القوايل ضبان انتم
سلوى: وش تبين انتي
نوره: اقول وخروا بس بحط قهوتي واجلس
صالح: انا بروح اصلا
نوره: يعني لو تكرمت استح مني شوي
صالح : اقول على شحم
راح صالح وهو مبتسم ودخلت سلوى وهي ترقص وتغني : انتصرنا والناصر الله وانتصرنا ونحمد الله
نوره: وش بتس يالعوبا
سلوى جلست : ايييه تذكرت راسي مفقوش بالله شوفيه
نوره وهي تشوف: مافيتس عله توتس ترقصين وش انتصرتي عليه
سلوى:صالح فقشني
نوره: اما عاد
سلوى: وصالح بيخطبني
نوره : هاااه
سلوى: اي والله
نوره: من جدتس
سلوى: ايه توه قالي وقال ان فقشه تذكار
نوره : يا راسي انا راساه اعنبوكم بعارين وش ذا الحب اللي كله فقش وهوايش
سلوى: هذا الحب النقي
نوره: اقول انقلعي ما كلمتي التوف
سلوى: لا هي تقول بتدق عشان ما يخلص ورصيدي
نوره: اقول تقهوي بس
سلوى اللي كانت ترقص شوي وتصارخ شوي ................••............
ومن بكره الاوضاع في بيت ثنيان هاديه ومحد عند احد ابد نزلت الترف بهدوء ودخلت المطبخ وشافت منيره: صباح الخير
منيره: هلا صباح النور كيفك اليوم
الترف : حمدلله ، اساعدتس بشي
منيره: لا حبيبتي خلصت
جلست الترف وقربت منيره: الترف ياحبيبتي بعتذر لك بالنيابه عن ثريا
الترف : لا يا منيره لا تعتذرين ولا هم يحزنون موضوع تاففه
منيره: الله يسعدك
مشاعل وهي نازله : اووه الترف صحت صبحها بالخير
الترف ببتسامه: يا صباح الخير
منيره: مشاعل صحيتي العيال
مشاعل :ايه
نزل ثنيان : صبحهم بالخير
الكل : صباح النور
جلس ثنيان ونزلو بعده عمر ومحمد جلسوا وهم يناظرون الترف اللي تصب الشاهي وهي مبتسمه
ثنيان ناظرها بهدوء ولف : منيره كيف عمي
منيره: كلمت محمد من شوي وقال انه بخير وبيجيبه عند عمي
ثنيان: زين اجل بعد الظهر خلوكم جاهزين
لف يناظر الترف : الترف
الترف لفت: سم
ثنيان سكت شوي : سم الله عدوك ،بعد الظهر بنطلع لمخيم تجهزي
الترف : زين
محمد : يبه وين الضبان نبي ناخذها معنا
ثنيان: وديتها بعيد ، بس قم ناد ذا المي كم مره اشرح الفطور تنزلون كلكم
محمد : طييب يبه
عمر : يبه اذا رحنا المخيم مانبي بندر معنا
ثنيان : هو يجي بس وانا اتفاهم معاه
منيره: ثنيان مانبي مشاكل
ثنيان: زين يا مناير ابشري
الترف وقفت ثنيان: وين ما فطرتي
الترف وهي تخبط على ذراعه بشويش : كثر خيره ابو محمد شبعت والله
ابتسم ثنيان ( وش بلاها ذي ) : بالعافيه اخت صالح
ضحكت الترف وطلعت وقابلتها مي نازله وطنشتها الترف وهي تدخل غرفتها جلست وهي تطلع جوالها واتصلت على سلوى وردت عليها نوره: حي ذا الصوت
الترف : حي صوتس يا نوره اشتقت لتس والله
نوره : يابعد قلبي وشلونتس
الترف : اسكتي يا نوره عندي كلام ٍ كثير بقوله
سلوى : لا تقولين بتطلق واتوطى في بطنتس
الترف : وجع سلمي اول
سلوى: سلام وشلونتس
الترف : بخير
سلوى : وش فيتس
الترف : قربوا بعلمكم
قربوا لسماعه وقالت كل شي لهم سكتوا
نوره: شوفي هم مالهم حق مره ومالهم داعي بس عاد انتي اجرمتي في مي
الترف : وش اسوي رفعت ضغطي
سلوى: احسن خليهم يعرفونك من البدايه
الترف : بس وش اسوي مع امه اذا بنروح المخيم اكيد بتغثني
نوره: عاد تحمليها حرمه كبيره
سلوى :اذا زودتها لا تسكتين
الترف : لا يا بنت كبيره ومريضه اخاف يجيها عله وحزتها وش يفكني
نوره: هي طنشيها
الترف : تهقون
نوره: طيعيني
سلوى: والله مدري
دخل ثنيان اللي شافها تكلم : الترف وين بدلتي
الترف وقفت وهي ما زالت تكلم : نوره شلون امتس
طلعتها وهي تعطيه ثنيان اللي يعيش صدمه كيف طلعتها له بدون صجه
سحب الجوال وهو يقول : بالله لحظه يا نوره
سكر الجوال الترف : وش فيك سكرت في وجهها
ثنيان: قلت لها لحظه ترا
الترف تخصرت: منن قالك تكلمها اصلا
ثنيان : خلينا منها وش فيتس انتي
الترف ابتسمت: حلوه عليك السين
ثنيان: لا تصرفين
الترف :تقول ما تبي مشاكل
ثنيان : الله هاذي هدنه يعني
الترف ابتسمت :والله ماعرفنا وش يعجبك بالضبط
ثنيان : يعني حلو السلام والله
الترف : طيب اذا خلصت خلني ارجع اتصل فالبنات
ثنيان: لو نخلي هالبنات على جنب شوي
الترف : تراني احاول ما اعاند لا ترفع ضغطي
ابتسم ثنيان وهو يحاوط كتفها: والله تعودت على عنادك
الترف تكتفت وهي تناظره ثنيان اللي قال : اسمعي عندك شي ثقيل للبرد لان المخيم بيكون بارد مره
الترف : ايه عندي
ثنيان : زين اجل ترا بنروح كلنا يعني
الترف : يعني وش بتقول بالضبط
ثنيان : والله ما اعرف احكي معك وانتي ساكته كذا
الترف ضحكت وهي تدفه بشويش : ياخي وش بلاك مب كفو حشيمه
ثنيان : ااااا وش ذا عاد
الترف : امزح امزح
ثنيان : ابد اقول تعالي بنروح لامي شوي ونفهمها الوضع
الترف : ماعندي مشكله بس تراني في وجهك
ثنيان ضرب راسها بشويش : افا عليتس والله انتس في قلبي و وجهي وجاهي
الترف ابتسمت : كفووو
ضحك ثنيان : اسمعي اسمعي
الترف : وشو
ثنيان : نبي نتفق اتفاق خليك كذا مع الناس هدنه لكن معي غير
الترف : لا والله وليش !؟
ثنيان : والله انتي كذا حلوه بالحيل وانا مابي الناس يشوفونك حلوه كذا
الترف اللي ماتدري كيف انها عطته وجهه يقول كذا بس انها تبي تسلك الامور بعد اكشن امس : والله اذا هي على الحلاوه يا كثر اللي بنقول لا تسويه
ثنيان اللي تنح : اووووه اوووه وغزل مخفي بعد
الترف : اجل محد يقول غزل الا انت
ثنيان: بس كذا كثير
الترف ضحكت: متى بنروح لامك
ثنيان : بروح اخلص كم شغله في الدوام وارجع
الترف : زيين
طلع ثنيان اللي مب مصدق ان هاذي الترف بس قال يلا ( رب ضاره نافعه )
................••............
عند محمد اللي كان بيطلع للمخيم من بدري وصل لعمه وهو يسلم عليه : هاه جاهزين
ابو ثنيان: ايه انا معك انا ودلال وبناتها ونواف بياخذ رهام وامها
محمد اللي تحطم : اجل زين
وقف محمد قريب الباب وهو يحمع الاغراض والكل كان يركب السيارات ورهام تنتظر يحطون لها مكان ترتاح فيه ولكن قبل ياخذ اخر غرض انصدم لما رمت عليه رهام السلسال بغضب وهو متقطع كم قطعه
محمد اللي تصلبت يده على الكيس وعجز انه يرفع نفسه لكن بسرعه اخذه وهو مصدوم وركب بهدو غريب ومنصدم
وكان الشاهد على اللي صارشوق اللي ما تركتهم وهي تراقبهم
تحرك محمد وهو جامد اما رهام اللي كانت تكافح دموعها .................••............................••. ...........
عند ثنيان
اللي خلص كل شغله وطلع لسوق وهو يلف واخيرا ابتسم لما حصل اللي يبيه اخذ جاكيت لترف وكم لبسه تناسبها وطلع متجهه للبيت بوناسه
وصل بيته و دخل وشافهم جالسين ينتظرونه بما فيهم الترف
ثنيان: جاهزين !
الكل : ايوه
ثنيان: طيب وين شنطتي
مشاعل مي ومنيره والترف كل وحده صارت تناظر الثانيه
ثنيان : خير وش فيكم
منيره: والله مدري وين شنطتك
مشاعل: ولا انا
مي : وانا بعد
الترف : وانا مدري
ثنيان : عجيييب والله ماشاءالله 4 حريييم ومحد يدري وين الشنطه
مشاعل: انا توقعت منيره بتسويها مثل العاده
منيره : انا والله اتذكر شنطتك عند الترف
ثنيان : يعني عند مين بالضبط
مي : انا ماعندي شي
منيره: خلاص انا بدورها وارتبها
ثنيان: لا خلاص بترتبها الترف انتم اطلعوا اركبوا مابي اتاخر ، محمد السياره مفتوحه خذ الاغراض
اللي تقدر عليها بس ودخلها واترك اللي ما تقدر
طلعوا واخذ ثنيان الترف للغرفه
الترف: وين حاط الشنطه انت
ثنيان نزل الكيس : اتركي الشنطه الحين نزلي عبايتس
الترف : وليييه
ثنيان: نزلي بوريتس شي
نزلتها الترف وطلع ثنيان الجاكيت وهو مبتسم : عساه بس يعجبتتس
الترف طارت عيونها بصدمه : وش ذا
ثنيان: جاكيت شفت ان ماعندك قلت اجيبه لا تبردين وتمرضين
اخذته الترف وهي متردده ماتبي تاخذ منه ولا شي او بالاصح ما تبي تشوف اي شي طيب في ثنيان وتتعود عليه
ثنيان سحبه من يدها وهو ياخذ ذراعها ويلبسها : يا ويلتس تعاندييين
الترف وهي تناظر في نفسها بهدوء ولفت : اقول مشكور !
ثنيان: لا لا ولا تقولين شي بس قولي اعجبتس
الترف : اووه شي يهول ( يعني مره حلو)
ضحك ثنيان : اجل يلا حطيه بالشنطه وانا برتب شنطتي ونطلع بسرعه تأخرنا
راح ثنيان يجمع اغراضه اللي عمره ما جمعها والترف اللي تناظر الكيس باللي فيه والجاكيت
دخلتها بالشنطه وطلعت وهي تشوف ثنيان جاي بشنطته ركضت وركض وكل واحد يبي يطلع قبل الثاني لكن دقروا فالباب كلهم الاثنين
ثنيان : بنت وخري بأطلع
الترف : وخر انت الحريم اول شي
ثنيان اللي ضغطها على الباب : اعنبوتس انا رجلتس
الترف : الله وانا بعد زوجتك
لف ثنيان يناظرها : بالله زوجتي وصدق ولاا
الترف صدت وهي تقول : يا ابن الحلال تراك مب بزر وخر
طلع ثنيان بسرعه لكن ما اسعفته نعاله اللي كانت تزحلق مع السراميك وتزحلق ثنيان هو وشنطته وطاح وعم الهدوء شووي وانفجرت الترف تضحك
وضحك ثنيان اللي كان متمدد على الارض : حسبي لله علييييتس
الترف : شفت شفت الحقد وش يسوي
ثنيان: اقول تعالي قوميني بس
جت الترف االلي تسحبه وهي تضحك وقف ثنيان وهو ياخذ الشنط وباقي يضحك ونزلوا
ركبوا السياره والترف باقي تضحك وثنيان مبتسم
منيره: وش فيك تضحكين
الترف اللي صارت تضحك بقوه : ولا شي تذكرت شي
مشاعل: ثنيان ثوبك عليه غبار
لف ثنيان يناظر ثوبه وضحك : محمد نظف ثوبي
وقف محمد وهو ينظفه
ومي تناظرهم بغضب وحقد الدنيا وهي تفكيرها بعيد : ثنيان احترينا شغل المكيف تاخرت مره
منيره: وين احترينا بالعكس الجو برد
ثنيان لف : عساكم اخذتوا فروتي
مشاعل: ايه اخذتها
ثنيان : واخذتوا ألحف
الكل : ايه
الترف : انا ما اخذت
ثنيان: زين اجل نمر الحين ناخذ
مي اللي كانت اخذه بس من الغيره قالت : انا اخذت بس خفيفه ما تدفي
ثنيان : وليه متعبه نفسك كان خليتيها ؟! عجيب والله
سكتت مي بقهر وقربت الترف : بالله عليك تشغل لنا شي يحمس ما احب النوم انا
ثنيان اللي دق جواله في ذا اللحظه : طيب بس بعد المكالمه ورد : هلا والله
عجاج : حي الله اخيرا سمعنا صوتك وينك انت رحت وما رجعت
ثنيان: سالفه يا رجال اقولك بعدين الحين طالعين المخيم وش رايك تدق سلف وتجي لنا
عجاج : لا يا حبيبي والله لو مدري وش يصير ما اجي فكنا من حركات ابوك
ثنيان: يا رجال والله ما يقول شي تعال بالله
عجاج : معصي تبي تعال لي انت
ثنيان: يا عجاج تكفى ما عليك عني ما تسمع اي شي يزعجك
عجاج : لاااا لاااا
ثنيان: وان طلبتك
عجاج : معصي
ثنيان: اقول تلايط وامش بس
عجاج : والله بتنشبني مع ابوك
ثنيان : عجاج والله والله ما يقول شي تعال بس اصلا عنده مناعه
عجاج : يعني بنتنا مسويه مناعه
ثنيان: اي والله بس تعال
عجاج: ارسلي الموقع طيب
ثنيان: اييييه الله يقلع ذا الوجهه كان قايل من البدايه
عجاج : تسب والله ما اجي
ثنيان: لا لا بس تعال
سكر ثنيان ولف وهو يشغل وكان سامري الترف اللي كانت تصفق وهي تمسك يد مشاعل وترقص معها شوي
منيره اللي لافه تناظرهم وتضحك وثنيان يناظرهم من المرايه ببتسامه
مشاعل بهمس : اهجدي يا بنت لا يهاوش ثنيان
الترف : لا معليتس بنستانس شوي
.................••............
بالطريق وعند محمد
اللي كان مسرح مره ووجهه باين عليه الضيق
ابو ثنيان: محمد وش فيك
محمد : هاه ولا شي يا عمي
شوق اللي كانت تناظر عيونه بقوه من المرايه ومحمد اللي توتر منها وغير المرايه وهو مايدري من من بينصدم بالضبط ................••............
وبعد ساعات فالمخيم
وصلو وابتدوا ينزلون شوي شوي وثنيان اللي راح يسلم على ابوه وامه ومسك امه : حي الله ام ثنيان
ام ثنيان: وخر بس
ثنيان وهو يحط يده على كتفها: تعالي بكلمك تعالي
اخذها وهي تهاوش وجلس بها ثنيان شوي بعيد : يمه حبيبتي اسمعيني قبل تقولين اي شي ما ينفع اللي يصير بينك وبين الترف اذا ما تبينها اقل شي طنشيها لا تعتبرينها موجوده بس مالها داعي هالمشاكل والكلام والمرادد
ام ثنيان: اقولك اص جاي بتعلمني بعد
ثنيان: يمه عشان خاطري يا يمه وبعدين حرام يتيمه ومالك في دموعها حاجه
ام ثنيان: ايه مسرع لعبت عليك
ثنيان : محد لعب على احد انتي اللي ماتبينها وما تقبلتيها عشان لونها وطبعها لكن اسمعيني يمه بطلبك بس تتجاهلينها مب لازم تحبينها بس مب لازم تضايقنها
ام ثنيان: طيب يا ثنيان طيب
نزل ثنيان يبوس يدها وقام وراح والكل انتشر في المخيم ومحمد يراقب رهام اللي رايحه مع دلال ( ياربي وش صار لها ذا البنت وش ذا التصرفات ، يوم ربي جاب الفرج يارهام وش صار لك )
اما رهام اللي ضايقه مره مره لا هي حتى قادره تنبسط مع الناس
اما الترف اللي كانت تساعد منيره وهي تغني وتطقطق ومعاها نوف
اما شوق اللي كانت جالسه هي ومي ويناظرونهم بقرف
دخل نواف وهو يقول : طريق يا ولد
دلال: وش عندك
نواف : يقول ثنيان قطعوا اللحم وكل مستلزمات المقلقل
دلال : من بيطبخ
نواف : الروس الكبار ابوي وثنيان
نوف : اخسسس وش عنده خالي
دلال: سيف ماجاء
نواف : لا
راح نواف وجات الترف : انا بقطع اللحم
منيره : وانا بساعدك
مشاعل: ودي اساعدكم بس وضعي مزري
نوف : انا بقطع الطماطم
دلال: وانا اسوي الباقي
................••............
عند ثنيان اللي كان يحاول يقول لابوه ان عجاج بيجي
وكان محمد يشب النار هو ونواف
ثنيان: يبه بيجينا ضيف ترا
ابو ثنيان : من ضيفك
ثنيان: عجاج
ابو ثنيان صد بضيق : وش تبي به جاي به
ثنيان: يبه تكفى عاد ما مليت من ذا الموال انت ماعرفته والا بتحبه
محمد : والله يا عمي انا اقول اعرفه وبعدين سو اللي تبي
نواف : يا محمد عمي صحى وينادي
ترك محمد اللي بيده وراح له ركض
ثنيان: عمممر محمد روحوا جيبوا لي اغراض القهوه
راحوا والكل صار يشتغل بحماس .
...............••............
عند البنات
كانوا يسولفون وطبعا الترف اللي كانت متصدره الجلسه بسوالفها
مشاعل وهي تضحك: يالله يالترف وش ذا الماضي الاسود
منيره: اهنيك صراحه ما قصرتي
الترف : ياخي هاذي فعاليات البدو
نوف: ياليتني صدق اسكن عندكم والله بفلها
رهام : ايوه كملي وش سوا ابوك فيكم
الترف : الله يسلمتس بعد ما سلوى ذبحت التيس بالغلط كلنا كنا مستعدين للهلاك لكن قام سبع البرومبا صالح وقال انا اللي ذبحته
وتحسبين ابوي قال روحوا لااا راحت تضيحته على الفاضي كفخنا كلنا انا وهو سلوى ونوره اللي له ذنب واللي ماله
منيره:هههههههههههههههههههههههههههههههههههههههههههه هههههههههههه مافهمت وضع سلوى غصب يشرب التيس ماء مايبي
نوف : الحين هو تيس كبير
الترف : لااا صغير بس كان تحبه المقروده وتغصبه يشرب عشان ما يموت وذبحته
شوق : ولله ما فهمت الفله في ذا القرف
لفوا كلهم عليها وقالت رهام: والله احنا فاهمين مب شغلك انتي
مشاعل: ايه تكفين قولي لنا كذا قصص تضحك
الترف : شوي نسولف زين الحين والله اني نسيت
نوف : عادي لو هي مب تضحك مغامرات ، ولا تدرين بسألك كيف عرفتوا خالي وكيف عرفكم
الترف اللي سكتت وهي تفكر من اي مصيبه تبدا بالضبط وهي ماتدري اذا ثنيان يبي احد يدري ولا لا
بس انقذها ثنيان اللي دخل : هاه شصار عليكم
دلال : خلاص بنخلص
ثنيان: ساعتين ما خلصتو
نوف: والله ياخالي خذتنا الترف باسالفة التيس اكيد انك تعرفها متنا ضحك عليها
ثنيان اللي ناظر الترف ببتسامه :اووه اذا بتسمعين ما بتشغلين بس بسرعه يلا
وقفت الترف : انا ومنيره مخلصين اللحم من زمان
ثنيان : يلا طيب وين اغراضكم
دخل ثنيان وهو يرفع اكمامه
دلال : ابوي بيجي
ثنيان: لا ابوي حط راسه وسحب
ابتداء ثنيان يحضر والترف اللي واقفه قريب وهي كل شي يحطه تعابطه ثنيان نزل الملح: تعالي تعالي بدالي
الترف : مابي اخرب مهاراتك والله لو اسويه انكم لتموتون من الزين
ثنيان: والله زين اجل بكره تسوين الفطور
الترف: ما طلبت شي الوعد باتسر
ثنيان: جيبي الطماطم
الترف : ما ينحط الحين اصبر شوي
ثنيان: اقول جيبيه
الترف : والله انك بتسممنا
ثنيان : عطيني بس شعرفك انتي
الترف اللي ضحكت : يا رجال لا تصير واثق ترا قد صارت لي ذا الثقه فالاخير اللي يبيض وجهه الغنم اللي تاكله
ضحك ثنيان : هذا انتي لكن انا غييير
الترف اللي تكت وهي تضحك : الله يستر على لحمنا بس والله ما كأني الا اشوف ثقتي
ثنيان : ليه وش خبصتي
الترف: طال عمرك ذبح ابوي ذبيحه لرجال ناموا عندنا بيسوي لهم فطور وكان ابوي بيسويه وتطقني النخوه قلت ابد مايسويه الا انا وكيييف تسويه يا يبه وعندك الترف والله واتزهلها عاد ذبيحه ليته شي بسيط
واقطعها والله لا يوريك التقطيع واحوسها حوس والله واحمد ربك انك ما شفتها يااااوك ياااوك صارت هريييسه وانادي صالح اللي جاه سكته قلبيه من اللي شافه
وطبعا جاء بيرقعها ووكب عليها مويه زياده وطبعا في ذا اللحظات دخل والله وهو يمسطنا بالعقال لييين صرنا نشوفها كوزي
ثنيان : هههههههههههههههههههههههههه والرجال وش صار عليهم
الترف : ابد الله يخلي النواشف
مشاعل: ههههههههههههههه متى ذا الكلام
الترف : قبل سنين بس من عقب التمسيط افا عليك صوت حريفه
ثنيان : نشوف بكره حريفه ولا
نوف بهمس لرهام: ما خبرت خالي يعطي احد وجهه كذا
رهام: والله مدري بس شكلها اكلت قلبه اصلا شوفي مي كيف وجهها
نوف : ايه يقولون طقتها امس طق وخالي ماسوى لها شي
رهام: الله يبرد قلبها
نوف: اي والله
وبعد شوي انتهى المقلقل واخذ ثنيان ملعقه منه وهو يمدها لترف : هاه جربي
الترف : والله لا تزعل اذا قلت لك شين
ثنيان وهو متكتف : يا شين الغيره
الترف بعد ما ذاقت: لا لا ما عليك محاوله جيده
طارت عيون ثنيان : اقول هاتي بس الشرهه مب عليتس
نوف : هههههههههههههههه ايوه ياخالي سين وحركات
منيره اللي كانت تراقب ثنيان اللي كان عفوي جداً مع الترف وهو اللي عمره ماكان عفوي وضحوك زي كذا انسحبت بهدوء وهي تجلس على طرف
ومشاعل اللي ملاحظه تغير ثنيان بس ما همها المهم انها مبسوطه
مي اللي كانت تشب حرايق بداخلها وتزيد
................••............
وعند عجاج اللي وصل وهو يقول : ياربي فكني من لسان الشايب
محمد شافه: هلااا هلااا بعجاج
عجاج :هلااا حمود
محمد: زارتنا البركه
عجاج بهمس: هذا رايك ولا راي عمك
محمد ضحك: مبدئياً رايي
عجاج: وينه ثنيان
محمد:يسوي الغداء وبيجي
نواف:اوووه اوووه عجه مشرفنا
عجاج: عاد احترمني ضيف ياخي
نوواف: بنحترمك ما عليك
دخل عجاج وهو متوتر وسلم على ابو ثنيان بهدوء وجلس
وابو ثنيان صاد وهو يسلم
محمد:عمر روح ناد ابوك
عمر :طيب
................••............
عند ثنيان
اللي بعد ما خلص ترك التحضير للحريم وطلع واخذ الترف
ثنيان :اسمعي ترا كلمت امي ويعني مبدئياً لا تحتكين فيها لين يطيح اللي براسها
الترف اللي ميلت فمها :خلاص طيب
ثنيان : وحاولي ما تمشكلين
الترف : واالله اني داريه ان اخر شي بتحوسها اللي يشوفك يقول كل يوم اطق احد
ثنيان ضحك : مب كذا بس حاولي تستكنين
الترف :طيب
راح ثنيان ورجعت الترف تجلس ومي تحرقها بنظراتها .
.
.
انتهي البارت✨