تهزمني السمراء وأنا نّد فرسان بقلم الكاتبة أديم الراشد// مكتملة

البارت السابع والعشرين

«البارت السابع والعشرين »
.
.
عند باب بيت ابو ثنيان
رفع ثنيان يده وهو يناظر الساعه اللي كانت 12:30 من الليل
دخل بيت ابوه وهو تارك سيف بالسياره شاف دلال ورهام ونوف وشوق صاحين ونواف اللي منسدح وهو مابين صاحي ونايم
لفوا كلهم يناظرون ثنيان اللي وجهه ما يبشر بالخير وقال: ابوي وامي وين
نواف فز برعب : ثنيان وش صاير عمي صار له شي
ثنيان: لا
نواف تذكر : سيف صار له شي
ثنيان : لااااا
دلال: لا اله الا الله ثنيان وش فيك خوفتنا
ثنيان: امي وابوي وين
رهام : توهم طلعوا ينامون
ثنيان: قومي شوفي ناموا ولا باقي
طلعت رهام ووقفت دلال وهي تمسك في بدلة ثنيان برعب : حلفتك بالله تقول وش صاير يا ثنيان
ثنيان مسكها وهو يجلسها : اجلسي يا دلال
نواف وقف بخوف وهو يراقب ملامح ثنيان اللي اول مره يجي هالوقت وبالبدله ووجهه كذا
نزلت رهام : صاحين
ثنيان طلع لهم مسرع ودخل بهدوء
ابو ثنيان وقف بخوف : ثنيان علامك جاي ذا الحزه وش بك
ثنيان: خير يبه خير
ام ثنيان : وش صاير ، من مات
ثنيان اخذ دوا الضغط وهو يعطيه لابوه ونادى دلال تكون قريبه
ابو ثنيان: والله ان عندك مصيبه والله
ثنيان بتردد : يبه بيجون الحين فرقه من القسم بيفتشون البيت وبيت سيف
ابو ثنيان : ليه وش يجيب الشرطه هنا وليه يفتشون
ثنيان بعد سكوت نطق بصعوبه : يبه بندر مسكناه بجريمة ترويج مخدرات
ابوثنيان: هاااااه بندر ما غيره وش عرف بندر ذا كله لا لا حرام عليك تظلمه يا ثنيان
ام ثنيان: ثنييييان وش تقول انت كيف تتهم ولد اخوك كذا كيف
دلال : مستحيل بندر باقي صغير
اما نواف اللي توقف كل شي فيه بصدمه صح كان يشك بندر بس ما توقع يوصل لترويج
ثنيان : اللي ابيه منكم تكونون هادين وتستوعبون الوضع
ابو ثنيان : وينه سيف وينه
ثنيان: هذا هو تحت بس تكفى يبه انتبه على صحتك
وقف ولف لنواف واخذه وطلع
نواف : كيف كذا كيف بندر يسويها كيف وش بيصير فيه
ثنيان : نواف اسمعني كل شي تعرفه عن تصرفات بندر لازم تقوله لي وين يروح وين يجي من اخوياه
نواف : مدري يا ثنيان اصلا ماكان يجلس معي
ثنيان: نواف اسمعني ابي اساعد بندر وابي اعرف كل شي عنه لانه لو كان متورط مره بيقتلونه
نواف اللي اصفر وجهه من الصدمه: والله مدري والله
غمض ثنيان لما سمع صوت الشرطه: ادخل ودخل الحريم في مكان واحد
نواف راح وثنيان اللي راح لسيف اللي منهار : سيف ادخل لثريا وفجر وطلعهم من البيت يلا
سيف نزل وهو بالقوه يمشي وطلعوا كل الحريم وابو ثنيان وتقدم احمد لثنيان : يا ثنيان رح نفتش المكان وانت عارف النظام
ثنيان هز راسه بقهر: باشر وظيفتك يا احمد
ابتداء احمد وفريقه يفتشون كل مكان وكل زاويه وثنيان اللي جالس يهدي ابوه وامه وهو مقهور بشكل وسيف منهار وثريا اللي انقضت على ثنيان وهي تصارخ: كللله منك اخذت زوجي والحين بتاخذ ولدي الله ياخذك حسبي لله عليك
سيف سحبها وهو يسكتها ولف ثنيان : عطني مفتاح سيارة بندر
عطاه سيف وراح ثنيان وهو يفتشها انتهى التفتيش وطلعوا ما حصلوا شي وطلع ثنيان وسيف معهم ونواف اللي جلس يداري الوضع الكارثي
................••............
مرت ايام التحقيق ثقيله على الكل وطلع الصبح انتشر خبر بندر ومحمد اللي راح للمركز بصدمه وهو ماهو مستوعب ودق ثنيان على مشاعل ومي وقالهم يطلعون من البيت لبيت اهلهم لانه ما رح يكون فالبيت طول وقت القضيه
وبعد تحقيق وحوسه وضغط نفسي على الكل دخل ثنيان لمكتبه وهو يشوف ابوه وسيف ونواف ومحمد جالسين بقلق وخوف
سيف : هاه يا ثنيان طمني تكفى
ثنيان اخذ نفس : احمد ربك يا سيف ان بعد كل هالتحقيقات كان هذا اول مره يشارك بندر فالترويج ويكون من ضمنه
محمد : طيب وش بيكون وضعه
ثنيان : بما انه اول مره راح يكون حكمه سجن وجلد وغرامه ماليه وطبعا كلها يحددها القاضي بكره اما اللي معاه كلهم رح يقيمون عليهم الحد ويقتلونهم
ابو ثنيان مسك راسه بضيقه : اللهم لا نسألك رد القضاء بل نسألك اللطف فيه
ثنيان : يبه تكفى روح ريح نفسك الموضوع انتهى وبندر الحمدلله طلع منها بأقل الاضرار
سيف : كم سنه بيسجنونه وش بيسوون فيه
ثنيان : سيف كل هذا بكره بالمحكمه انتم تعبتوا روحوا للبيت وارتاحوا وان شاء الله بيكون خير
سيف اللي كان طول وقته يرجف خوف من انه يفقد ولده: تكفى ثنيان سو اللي تقدر عليه تكفى
ثنيان : ابشر ، نواف خذ سيف
طلعوا كلهم وبقى ثنيان اللي من اسبوع ما قدر انه ينام زين او حتى يسأل عن حريمه او شي كان فعلا تعبان من هالقضيه المتعبه ووضع سيف اللي كان يرثى له
طبعاً خبر بندر انتشر فالعايله كلها واثر تأثير سلبي جدا عليهم واتعبهم لكن الوحيده اللي كانت ردة فعلها عجيبه وغير متوقعه هي ثرياا اللي كانت بس تصلي وتدعي رغم اللي كان يصير ................••............
في ديرة الترف
الترف اللي كانت فعلاً خايفه من اختفى ثنيان اسبوع كامل لا حس ولا خبر رغم انشغالها في تجهيزها لزواج سلوى وصالح اللي مر الاسبوع عليهم بفرح ما يعلم فيه الا الله
................••............
عجاج اللي
كان عارف وضع بندر والمشكله كان يجي ويروح على ثنيان اللي كان متأزم من كل السالفه وكان عجاج حرفياً مب مستوعب هاللي صار
وقف قدام القسم وهو يشوف ثنيان اللي واقف ومتكتف وهو يراقبهم وهم ينقلون بندر واللي معاه لسجن العام
قرب عجاج وهو يخبط على كتفه: بتهون يا اخوي لف ثنيان بضيق بعد ما تحركوا : بس صعبه يا عجاج
عجاج : الله يعين ما تدري وش الخيره
ثنيان : انتظرني بسلم واجي
راح عجاج لسياره وثنيان اللي سلم وجاء وهو حتى في مشيته حزنه بين وضيقه
تحرك عجاج : وش صار
ثنيان: بكره بيحكم عليه القاضي وعاد مدري كم بيحكم
عجاج: يمكن هالسجن خير له
ثنيان: والله معاد ادري وين الخير يا عجاج
عجاج : بتهون يا اخوي بتهون
ثنيان: ماني مصدق ياربي عجزت عجزت اصدق
عجاج : الله يعين
................••............
طول هالوقت كان الخبر قوي وضاغط على الكل ومحد له خلف يكلم احد ومن بكره الكل كان بالمحكمه وانتهت الجلسه بالحكم على بندر ب سجن 7 سنوات و 100 جلده وغرامه ماليه
بندر اللي انهار حرفيا وهو يترجاهم يساعدونه بس ما كان حال سيف احسن ولا ابو ثنيان
وبسرعه اخذوا بندر ومحمد اخذ ابو ثنيان المنهار ونواف سيف والكل راح لبيته
اما ثنيان اللي رجع لبيته بعد ما ارتاح نسبياً كان سجن بندر اهون عليه مليون مره انه ينقتل
دخل وهو يشوف البيت مظلم مافيه احد
انسدح على اول كنبه واجهته وهو يحاول انه يستوعب الاحداث ويطلع منها لانها اتعبته مره
................••............
مر الاسبوع الثاني وتقريبا الكل ابتدا يتعود على سجن بندر ما عدى سيف اللي اكله الندم اكل
اما ثريا اللي في حالة سكون واعتكاف فضيعه وغريبه
وفجر اللي كانت حزينه على بندر بس كان اهون من موته
وطبعا حالها حال الكل
اما ثنيان اللي اسبوع لما حس انه استقر وتفادى هالكارثه
دق على عجاج وجاه صوت عجاج: ثنيان هلا
ثنيان : عجاج هلابك
عجاج : لا صوتك بخير
ثنيان: غصب لازم اكون بخير لو طولت كذا بنهبل
عجاج : اييه يقوله ابو 4 حريم له اسبوعين عزابي
ابتسم ثنيان: عشان كذا دقيت بمرك وبنروح ل الترف
عجاج : شوف عاد ترا اخر مره اروح معك مصخت ياخي تراك انذليت ياخي
ثنيان : قسم بالله يا عجاج ما عمري توقعت ان قلبي بيجيبني على وجهي واصير مثل الرخمه رايح جاي عشان حرمه
عجاج: ياخي وش الله حادك ما تبيك طلقها ارتاح وريحها
ثنيان: مب بيدي يا عجاج يوجعني قلبي وللله كل ما طرا لي اني في يوم ممكن اطلقها انهبل انهبل
عجاج: الله لا يبلاني بس
ثنيان: يلا بس
.................••............
في ديرة الترف
اللي كان بكره زواج صالح اللي مشتط ويرتب ويشتغل وكل شي يسويه وسلوى اللي من اسبوعين وهي تجهز وتغنى على فرحتها
نزلت الترف فستانها وتسمع صالح يقول : والله شكل ثنيان طفش وبيطلق
الترف : ليييه
صالح : وش بلاتس ضقتي مب انتي اللي تبين الطلاق
الترف : مب عن كذا بس ليه تقول كذا
صالح : مختفي مره حتى اني ادق عليه بأعزمه ولا يرد
الترف ماردت وهي تفكر لو صدق ثنيان خلاص بيطلق لكن اننقطع تفكيرها لما سمعت صوت سيارته وابتسمت : اخيراً ما بغى يجي
صالح طلع ببتسامه: حي الله النسيب اللي اختفى
ثنيان: هلا والله بصالح
سلموا على بعض وسلم عجاج
صالح : كنت ادق عليك وماترد
ثنيان: اي والله ذا الايام صار عندي مشاكل ما فضيت
صالح : خير ان شاءالله تحتاج شي تراني اعين واعاون
ثنيان: سلمت ولله يا ابو صلوح لكن حمدلله عدت على خير
صالح: عجاج كيف اوضاعك
عجاج.: اسعى في ارض الله وانت
صالح : والله انا كنت ادق ابي اعزمكم على عرسي بكره
ارتفع صوت ثنيان وعجاج وهو يباركون لصالح بحب
عجاج : اجل بتدخل القفص الذهبي
صالح : اي والله
ثنيان: الله يبارك لك والله تستااهل كل خير
صالح : الله يسلمك اقلطوا تقههوا
ثنيان : ألقطوا انتم وانا اليوم اما النصر ولا الشهاده
ضحك صالح : اجل من حظك ان ابوي مب فيه ادخل وضبط امورك تراني طفشت
عجاج: والله حتى انا طفشت
صالح : تعال بنتقهوى وانت ادخل ماعندك احد
دخل ثنيان وهو تايه مايدري وين بيروح بالضبط بس لف اول ما سمع صوت الترف اللي قالت وهي مصدومه انه دخل : ثنيان
ابتسم ثنيان : عيونه
دق قلب الترف وهي مصدومه: وش دخلك هنا !
ثنيان اللي كان حاط يدينه ورا ظهره تقدم بهدوء وهو مبتسم : جيت ادورتس يالسمراء
الترف : اقول عن الحكي اللي ماله داعي وش جايبك وش تبي
ثنيان دق جبينها بشويش وهو مبتسم :اللي مثلتس يشتاق وانتي تهاوشين
الترف تكتفت بهدوء وقال ثنيان : اهب ياوجهتس على ذا العناد شهر يا ظالمه وانا رايح جاي ومطنشه ولا تطلعين
الترف : عشان تفهم ان الدنيا مب على كيفك وبنات الناس مب لعبه
ثنيان : ما علينا كلنا غلطنا المهم الحين انا والله تعبت يالترف وجيت بقولتس للمره الاخيره اني جاي شاريتس وبرجعتس لبيتس ادحري الشيطان وتعوذي من ابليس وارجعي معي
الترف تكتفت : ارجع ، كان المفروض تفكر في ذا قبل تمد يدك
ثنيان : الترف صح اني غلطت بمدت يدي لكن انتي بعد غلطتك انك سكتي لما كبر الموضوع وصار غلط
الترف : ايه ارجع اليوم وبكره لا تثق فيني وارجع افهم غلط
ثنيان: ابد كل اللي بيصير إنا بنتفق انتي لا تخبين علي وانا ما افهم غلط واعصب
صدت الترف وجلست وجلس ثنيان : وش قلتي
الترف : افكر
ثنيان: شهر ما فكرتي !؟
الترف : اذا تبي تفكيري شهر ، فأحسن طلق
ثنيان اخذ نفس : اوك فكري وبكره ردي
الترف : يصير خير
ثنيان :الترف انا جالس اكلمك عدل
الترف لفت تناظره بهدوء : ايه انت كلامك دايم عدل لكن يدك! ما تنسي
صد ثنيان ولف : بكره بجي لك
الترف : لا تجي ولا تعب نفسك
توقف قلب ثنيان للحظات ولف ووجهه مرتعب وقالت الترف لما شافت الرعب بوجهه : عندي شروط اذا تممت عليها رجعت معك
ثنيان اللي زفر براحه وكان وده يقول تم على طول بس حس انه انذل كثير وده يحفظ شىي من كرامته : وش شروطك
الترف اللي كانت ما تبي شي الا انها تعانده وتقهره وتعلمه ان الدنيا مب على كيفه : اولا شي ابي دبل مهري من ذهب لكن فلوس تكفيني 5 الالاف
ثنيان اللي اتسعت عيونه بصدمه لكن قال : تم
الترف : ثاني شي ابي اغير غرفتي
ثنيان : غرفتك جديده مالها شهرين !؟
الترف : كلها اثاث و موقع
ثنيان : نعم من وين اجيب لك غرفه
الترف : انا فكرت فيه غرفه جنب غرفة العيال ابيها
ثنيان : بس صغيره
الترف : ادري وابيها
ثنيان: ليه ان شاء الله وش فيها غرفتك
الترف بضيق :كذا معاد اططيقها مواقفها شينه ما بيها كل شي فيها يكتمني ابي اغير كل شي غرفه واثاث
ثنيان : تم
الترف ابتسمت بنصر : واخر شي ترجع منيره
ثنيان استغرب وهو يدري ان الترف ماتدري عن سالفة منيره بس قال : تم
الترف قربت وهي تكتف واحتدت نظرتها: واهم شي يدك ماتمدها علي
ثنيان تكتف قدامها وهو يدري انها تلعب به بس قلبه مب قادر حتى انه يهاوشها وضاق وهو يقول : اذا ما غلطتي ماا امدها
الترف : انا ما اغلط
ثنيان: وانا ما امدها
الترف : يعني
ثنيان: تممي واتمم
الترف :تم
ثنيان: تم
ابتسمت الترف: اذا نفذت الشروط ارجع
ثنيان اخذ نفس: ارجعي وتنفذ
الترف : بكره زواج اخوي وبجلس وبعدين شروطي اول
ثنيان اللي كان يناظرها بهدوء ولف وهو يقول : دام الدعوه شروط زين يا الترف
الترف استغربت من كلامه بس قال : اشوفك بكره
وطلع
ابتسمت وهي ناويه تحوس ثنيان حوس
طلع ثنيان وهو يسلم على صالح وراحوا
عجاج : هااااه وش صار
ثنيان: رجعت بس بشروط
عجاج : وشو
ثنيان قاله الشروط وقال عجاج : يهبيييي وش ذا القوه اللي فيها وانت وافقت
ثنيان : وافقت والله اصلا انا في نفسي متمم قبل لا تقول
عجاج : ايوووه اخر مراحل الحب هاذي عندك
ثنيان : لا تلومني يا عجاج ايه صح متزوج وعندي حريم وكنت متوقع اني مستقر واحبهم كلهم لكن هاذي مدري وش تسوي فيني تخدرني تطلعني عن نفسي مدري ما اعرف احدد شخصيتي معها
عجاج: المهم ترجع وتفكنا بس الغريب وش عندها بمنيره
ثنيان: هي ما تدري عن سوات منيره اتوقع كلمت احد وقالها وهي تحب منيره
عجاج : الله يديم المحبه ياخي
ثنيان : جهز عمرك لاخر مهامك
عجاج :وشو
ثنيان: بنجيب رضوة الترف
عجاج: من جدك
ثنيان: من جدي بسوي اللي تبيه لكن اذا ما طلعت من عيونها ما اكون ثنيان
عجاج : حسبي للله تجمعوا المجنن
كمل ثنيان طريقه متجهه لسوق الذهب رغم انه حط اغلب فلوسه في غرامة بندر بس ما عليه تستاهل الترف
دخلوا السوق وهو يتهاوش هو عجاج على كل شي ثنيان وده ان ياخذ كل شي لها يعجبه بس عجاج قاعد له وهو كل شوي يقول ( ياخي بتنتقم منك وانت ما خليت شي )
طلعوا بعد ما نجلط عجاج من ثنيان
................••............
عند الترف
اللي طلعت وهي متجهه لبيت لسلوى وهي تشوف فرقتها السابقه يدقون ويغنون متجهين لبيت سلوى دخلت معهم وهي تغني وتزغرط
كان من العادات عندهم انهم يرحون لبيت البنت وهو يدقون يغنون طبعا حريم بس
صالح اللي كان جالس وهو يناظر ويبتسم ماكان مصدق انه خلاص كتب كتابه على سلوى وبكره بتكون رسمياً زوجته
جاء عايض : مبروك صالح
صالح اللي من بعد سالفة الترف صار معه فوبيا من عايض ابتسم : يبارك فيك يا عايض وعقبالك
عايض : على خير
.................••............
عند سلوى اللي كانت هالليله عندها ليلة حنا والكل حضر ونوره اللي شاده حيلها تركض من كل قلبها وبفرحه
ودخلت الترف وهي تغني وترقص وتصفق وسعيده والكل
سلوى فرحتها كان شي ثاني ما استحت ابد وكانت تردح معهم رغم انتقاد بعض الحريم الا انها ما همها
.................••............
في بيت ابو محمد
محمد اللي كان مقابل منيره وهو عينه على الرقم وفز اول ماشاف ان موقع الجوال تغير وصار في حي ثاني ولا شعوريا انذهل لما شاف الموقع كان بيت اهل شوق ونوف
مسك راسه وهو الحين تاكد شد على اسنانه بقهر ( هييين يا شوق الزفت هين انا اعرف اربيك انا )
.................••............
في بيت ثنيان
ثنيان اللي وصل بيته وهو يناظر غرفة الترف بهدوء وكان يشوفها جدا جديده لكن مب مشكله
اتصل على كم واحد يشترون الاثاث وقشوا كل شي
وراح للغرفة الثانيه اللي كانت مقابله غرفة منيره وقريبه منها فتحها ودخل العمال ينظفون وبعدها طلع يأخذ الغرفه الجديده وانهد حيله وهو يلف ويدور لما حصل شي ممكن انه يناسب الترف وطبعا الساعه 12 تماما كان منتهي من كل شي وختم على شروط الترف
انسدح بتعب وهو يبي ينام بكل مافيه من قوه يبي يصحصح ويصحى وراه بكره يوم عريض طويل
................••............
في بيت سلوى
اللي بعد ماراحوا الكل وجلسوا وهم كلهم حاطين الحنا وبما فيهم الترف
نوره: الترف اليوم جاء رجلتس
الترف : اووووه اسكتن ما قلت وش صار
سلوى: رغم اني 90٪ عقلي مب معتس بس قولي
الترف : اقول والله ان ماسمعتي لطلقتس من اخوي
نوره: قولي اسمعتس
ابتدت الترف وهي تشرح وش سوت في ثنيان
سلوى : والله يا شيخه لو رجلي مافيها حنا كان عطيتس رفسه تأدبتس
الترف : لييييه
سلوى : ابك والله لو اناديه ويقول عيوني اني لرضا في ثواني
الترف : حبيبتي هذا اذا صرتي عيونه لحالتس مب عنده 3 عيون غيرتس
نوره: بس كفو عليتس خليه خليييه يتربى
الترف : وش قررت بعد
نوره : وش
الترف: اللي بيجيبه بعطيتس وبعطي امتس وسلوى والباقي ببيعه واشتري فيه لابوي غنم
شهقت سلوى : والله انتس مريضه مرييضه انا بدق عليه اقوله يطلقتس
الترف : اقول انثبري لا اطلقتس انا
نوره: ترف يرحم امتس فيكنا اعقلي خلاص
الترف: مانيب عاقله عشان يعرف يمد يده ويشك
نوره: الله يعييينه ويعينتس
سلوى: اقول قومي اذلفي انتي وياها برقد بكره وراي زواج وانتم هنا تخربون بيوت
الترف رفستها وطلعت وطلعت نوره وهي تضحك
اما سلوى اللي حرفيا كانت هيمانه بحب
...............••............
من بكره العصر في بيت ابو ثنيان دخل ثنيان لابوه لللي كان جالس بضيق : مسه بالخير ابو ثنيان
ابو ثنيان: هلا يا ثنيان مساك الله بالخيير
باس راسه وجلس: كيفك اليوم
ابو ثنيان: ضايققن صدري
ثنيان: افا والله سلامة راسك وش يضيق صدرك
ابو ثنيان: الحين بندر مسجون وابوه متزوج وانت
ثنيان قاطعه وهو يبوس كتفه: انا كل اموري انتهت منيره وبرجعها البيت وبجيب الترف وكل شي بخير
ابوثنيان: تقوله صادق
ثنيان : ايه
ابو ثنيان : متى بترجعها
ثنيان : بكره اليوم جايك بعزيمة خص نص لك انت ونواف ومحمد وسيف
ابو ثنيان: عزيمة وين
ثنيان: صالح نسيبي عرسه اليوم وبنروح له وش قلت
ابو ثنيان: وش اقول والله بعيد ومانيب رايح
ثنيان: يبه الله يهديك تعال تغير جو وتنبسط
ابو ثنيان : زين اجل
ثنيان: خلاص انا ببلغ العيال وانا بطلع من بدري وتجي انت ونواف المغرب
ابو ثنيان: زين
طلع ثنيان وهو متجهه لحاره عجاج اللي حرفيا اشتاق لهم وكان ثنيان لابس وكاشخ جنبيه وحركات
وعجاج اللي كان بالمثل كاشخ ولابس جنبته واموره فالسليم كان واقف فوق بالحاره ينتظر ثنيان اللي جاء من اسفل الحاره وهو يعرض بجنبيته ويغني ونزل عجاج وهو يعرض ودخل ابو محمد اللي يغني معهم وينقز والكل يضحك
سالم : شعندكم وين رايحين
ثنيان: بتزوج الخامسه
ابو حمود : واالله وطلعت خبيث تكذب علينا لك مده ولا علمتنا
ابو سعيد: ايييه حظوظ ولا هاذي تصرفات ابو حريم
عجاج :ياعم اذكر للله ترانا لنا شهر وحنا نرجع في حريمه
ثنيان: لا تعطوني عين تكفون
سالم :والله اذا بتزوج خامسه بزوجك مرزوقه
عجاج نط على سالم : اي تكفى طلبناك
ثنيان: لا دخيلك بتزوج خل معروفك لولد حارتك وزوج عجاج
ابو حمود : اصلا ما يجوز له خامسه زوجها عجاج
ضحك عجاج : اقول عم ابو حمود شخبار حمود يده جبرت ولا باقي
ابوحمود بغضب: ايه جبرت تهبى ذا التريله كسرت ولدي
ثنيان صرخ :مرزوقه جت
فز ابو حمود بخوف وضحكوا كلهم عليه ونحاشو عجاج وثنيان اللي اخذو معاهم سالم وعيد و طلعو متجهين لديرة الترف
................••............
في ديرة الترف
وعند صالح اللي كان من صبح الله فارش الزل ومركب العقود والفرقه حاضره والسامري حاضر وقدور الضيافه زاهبه وابو الترف اللي من الصبح وهو يقهوي ويرحب ويهلي
وصالح اللي رايح جاي وهو وجهه شاقته الابتسامه
الترف اللي كانت هي نوره وام نوره من من الصبح وهم يجهزون حوش الحريم ويجهزون الضيافه والترف اللي كاشخه وتنتظر بس ثنيان يجي
لفت اول ما سمعت صوت السياره والرمي وكان ثنيان واللي معاه
نزل ثنيان وهو متجهه لابو الترف ويسلم عليه بحراره وسلم على صالح والكل
ابتسمت الترف بفخر وهي تشوف كيف له هيبه مابين الناس
شافته يكلم صالح وابتسم صالح وهو يأشر له على البيت عرفت انه يناديها ودخلت وهي تلقي نظره اخيره على نفسها وتعطر وسمعت صوته داخل معاه الاغراض اللي جايبها فزعه لزواج ومو بينهم شنطه ذهب ابتسمت وهي تقول : حياك الله
نزل ثنيان الاغراض وهو يرفع السلاحه وهو بالحوش ورمى كم رصاصه وهو يضحك: لعيون الترف
ضحكت الترف وتقدم ثنيان اللي ماقاوم انه ما يسلم عليها سلم عليها بحراره وهو مبتسم : اووه اووه وش ذا الززين وش ذا الملح والقبله
الترف :الله يسلمك
ثنيان وهويأشر على الشنطه: هاذي اول شروطتس والبيت ينتظرتس
الترف : كثر خيره
ثنيان : لبس العافيه
الترف اخذتها قبل تمشي مسك ثنيان يدها وهو مبتسم ويناظرها بإعجاب : محنيه يدينتس
الترف : ايه وش رايك
ثنيان : بعدين اقولتس رايي ، لكن من حسن الحظ لقيت احد يحب الحنا
الترف : ليه
ثنيان: محد عندنا يحب الحنا او يحطه رغم اني اموت بريحته
الترف بضحك: زين علمتني عشان معاد احط
ضحك ثنيان: ايه دوري اللي يقهرني وسويه
ضحكت الترف وطلع ثنيان بعد ما نزل وهو يبوس يدها
سحبت يدها بفرحه مختلطه بخوف وهي تفتح الشنطه اخذت بعض الذهب وطلعت وهي تعطي نوره وامها والمعازيم اللي كانوا منصدمين انها تعطيهم هذا الذهب
قالت الترف بصوت عالي : هاذي هديه من ثنيان لكم
ابتداء الهمس فالحوش وقربت نوره وهي تهمس : الله ينصر ثنيان
ضحكت الترف وهي تقول : امشي بنروح لسلوى قبل يكثرون الناس
اخذت اللي بتعطيه سلوى وطارت لبيتها بفرح
................••............
عند سلوى اللي كانت تجهز وهي تغني بفرح
ودخلت الترف ونوره وهم يغنون معها
الترف : يازينها زيييناه مرت اخوي
لفت سلوى وهي تقول : هاه بالله كيف شكلي
نوره: موووت حمممر
الترف : راح فيها صالح
ابتسمت سلوى بخجل وقربت الترف وهي تعطيها الذهب : اجل هاتس هدية ثنيان
ضحكت سلوى: على من تكذبين قصدتس دم قلب ثنيان
الترف : اعتبريها هديه علامتس انتي
نوره: الترف الناس بدو يجون
الترف : يلا يلا حنا بنروح ونجيتس شوي
سلوى : طيب
راحوا وسلوى رجعت وهي تجهز نفسها
.................••............
عند الرجال
عجاج وثنيان وسالم وعيد كانوا كلهم قايمين مع صالح وابوه من صب القهوه لرقص لترحيب لكل شي
المغرب وصل نواف ومحمد وابو ثنيان ونزلوا الكل يستقبلونهم
وابتدا فعلياً الزواج وابتدا الرقص والحماس ومحمد اللي كان مبسوط على الاخر هو ونواف ودخلوا معاهم بالرقص
................••............
عند الحريم
كانت سعديه مثل العاده شايله الحفل والترف اللي تردح من كل قلبها ونوره والكل والزغاريط والرقص
كان مختلط صوت رمي ودق وسامري وزغاريط ومدح وريحة العود والقهوه
والساعه 9 جاء وقت ان صالح ينزف لبيت سلوى وطلعت سعيده وفرقتها وراه وهو بالمقدمه هو ابوه والترف
ودخلوا على دق وزغاريط وقامت الترف وهي تقول: الف صلاة والسلام عليك يا حبيبي للله محمد
وارتفعت الاصوات وراها بالزغاريط وبدت سعديه تغني وتدق وهي تقول ( عجلوا صوب صالح ليحضر اعجلوا صوب صالح ليحضر ،وباركوا له عسى عمره طويل وافرحوا له خذا غاية مناه
وقال صالخ بصوت عالي : اي والله خذيتها
ونزلت الترف وصالح يرقصون وابوه اللي يرقص بعصاته وسلوى جامده في محلها
وحولت فورا تمدح سلوى ( سلوى بنت الاجواد زفوها ،وعلى المطيه حملناها... وكملت صالح اللي على كثر ما رقص عند الرجال الحين صار يرقص عنه وعن سلوى وطبعا وقفوا وسلم ابو الترف على سلوى وطلع واول ماطلع طلب صالح يدقون لعيون سلوى وانقلبت الغرفه ردح هو وياها والترف ونوره اللي كانت تصفق ولا تقدر تطب معهم
وبعد شوي ركدوا وسلموا عليهم وطلعوا ولف صالخ بكل حماس : اخييييرا يا سلوى
ابتسمت سلوى بخجل ما كأنها اللي قبل شوي ترقص
حتضنها صالح بفرح الدنيا وهو يتمنى ان العمركله حلو معها ................••............
وطبعا عند الترف
اللي مرت وهي تشوف عجاج وثنيان والكل يرقصون ابتسمت وهي تنادي بزر ينادي ثنيان
ثنيان اللي كان يرقص ووقفه البزر اللي قال : تقول الترف تعال
وقف ثنيان وهو معاه السيف وطلع متجهه للبيت
اما الترف اللي ركضت لسعديه وهي تقول : اسمعيني الحين بيدخل ثنيان ابيتس تدقين دق حماس
سعديه: ابشري ابخليه ينسدح هنا
الترف: لا يا بقره مابيه ينسدح ابيه يرقص ولا تحمسين مره يعني خليتس على سامري
سعديه: وش اغني طيب
الترف : عطينا حي الله اللي يغيب ويسرع الرده
سعديه : يا ويلهم
ضحكت الترف وراحت وهي تدخل البيت وشافت ثنياان اللي يمسح وجهه ويرتب شخصيه ولف ببتسامه : سمي يالسمراء
الترف مدت يدها : نبي منك تحي حفلنا
ثنيان : وشو
الترف : ابد شفتك تردح من قلبك قلت لي حق عليك ترقص معي
ثنيان اللي ما توقع ابد ابد وضحك: خبله انتي تبينهم يذبحوني
الترف: افااا تردني
ثنيان خق وقبل يرد سمع سعديه تقول ( حي الله اللي يغيب ويسرع الرده)
لا شعورياً ضرب صدره وهو يقول : يلعن ابو اللي يردتس
دخلت الترف بعد ماقالت لهم يتغطون ودخل ثنيان وهنا قام الصراخ كان واضح على ثنيان منحرج بس معاد يشوف الا الترف
قامت سعديه اللي تبدع فالدق وثنيان اللي جت الكلمات على الجرح وكان يغني معها يوم قالت ( يا صاحبي جارك الله ويش هالصده ، )
ضحكت الترف اللي كانت معاه على نفس الدقه ونفس الرقصه وكانوا حرفياً يأسرون برقصهم وكل واحد رقصه اقوى من الثاني
والترف رفعت صوتها مع صوت ثنيان اللي عطاها سيفه ترقص وهم يغنون ( ترا حلاة الهوى لا طالت المده )
انهبلوا مع الدق وبعد رقص عميق وقفت الترف وهي تضحك وثنيان اللي شاق الابتسامه
نوره جات وهي تضحك : ياهوه قلطي ضيوفتس عشاهم زهب
الترف : ابشري
دخلوا جوا واخذ ثنيان السيف : اجل حلاة الهوى لا طالت المده يالترف
الترف ضحكت وهي تحط شماغه على كتفه : اجل ما عندك اعتراض
ثنيان: لا عندي تكلمه
وقرب وهو يكمل الشطر قريب من اذنها ( ترا حلاة الهوى لا طالت المده ، ماهوب يوم صديق ويوم قوماني )
ضحكت الترف وطلعت وهي فاهمه كلمته وطلع ثنيان اللي على الشطر وهو يرقص وقابله عجاج يرقص معه على نفس اللحن : وين رحت يا ثنياني
ثنيان رد : رحت لبنتكم اللي بتجيب راسي
عجاج : اخلص العشاء جاء يلا
راحوا يضحكون وهم يوزعون العشاء وثنيان اللي كان يحس انه للحين يرقص على الدقه
.
.
انتهى بارت جداً سعيد😩🌟