تهزمني السمراء وأنا نّد فرسان بقلم الكاتبة أديم الراشد// مكتملة

البارت الثامن عشر

« البارت الثامن عشر »
.
.
في غرفة الترف
الترف اللي بعد كلام ثنيان بالمطعم توقعت انه لو مدري وش يصير ما يروح لمي لكن انتظرت يرجع بس ما رجع الترف ماكان يفرق معها الا ان مي اخذته قدام عينها قفلت باب الغرفه بغضب وبدلت وانسدحت وهي تتقلب وتتوعد في مي
................••............
ومن بكره في بيت ثنيان
نزلت الترف من بدري وحصلت مشاعل : سلام صبحها بالخير
مشاعل: اهلا صباح النور
الترف : شلونتس اليوم
مشاعل: ما عليك احنا بخير انتي كيفك بعد اللي صار
الترف : حمدلله بس شخبار رهام
مشاعل: بخير وبتطلع اليوم عشان كذا جالسه اجهز كيكه كذا اخذها معي بتروحين معنا
الترف : ايه اكيد ، وين منيره
مشاعل : عاد منيره قبل شوي اخذها اخوها عشان تشوف ابوها
الترف : لله يستر عليها
مشاعل : كنت احسبك عند اهلك وشلت هم اني اروح مع ذا السحليه شوي
الترف قربت : انتي بعد ماتدانينها
مشاعل: بينك وبينك اشوف الموت ولا اشوفها
الترف : اهبي يا وجهها ام براطم
مشاعل ضحكت : وينه ثنيان ما نزل توقعته يروح لرهام
الترف تكتفت وهي تقلد مي : نادته ام براطم امس تقول عندها موضوع وذهب ولم يعد
ضحكت مشاعل : وسكتي لها !؟
الترف : ماهموني يا لبى قلبتس يشبعون ببعض
مشاعل: عشان كذذذا امس مدهره ومعزله غرفتها
الترف : ليه هي ما تنظف
مشاعل: اسكتي تكفين مابي اتكلم
الترف سكتت وهي تفكر وقطع عليهم صوت ثنيان اللي نزل وهو يكلم امه اللي صارخها مسموع : طيب يا يمه طيب بفطر واجي الدنيا مب طايره
ام ثنيان : مب شغلي اخلص وتعال ترا ان طلعت رهام واننت مب هنا و الله والله لغضب عليك
ثنيان: ابشري يا يمه
سكر ولف واول ماشاف الترف حرفياً احتر وجهه وهو منحرج منها : سلام
الترف اللي كانت تساعد مشاعل ويحضرون الطاوله وقالت بدقه وهي تخنق صوتها مثل مي : ثنييييان زين انك نزلت تفطر كنا بناديك بس معك سحالي
ناظرها ثنيان وهو رافع حواجبه بتعجب : سحالي !
مشاعل اللي كانت مبتسمه وهي تنزل الاكل : اجلس قبل يبرد
الترف اللي كانت تحط الصحون بكل قوتها على الطاوله ولفت وبنفس النبره : مشااااعل سويتي شاهي ولا اسوي
مشاعل اللي كاتمه الضحكه : ايه سويت
ثنيان : خييير بشويش وش بك تصارخين
الترف اللي مرت من جنب اذنه وهي هالمره تصااارخ: ثنيييييان الخير بوجهك ما صارخت هذا صوتي ما اعرف اكون سحليه
ثنيان اللي فهم انها معصبه منه وابتسم وهو يبعدها وصرخ هو بعد في اذنها : الترررررف لا تصارخين احسن لك فجرتي اذني
الترف ناظرت فيه بطرف عينها وجلست وهي تصب لها شاهي
مشاعل اللي كانت مستغربه الوضع اصلا بس ابتسمت لانها بدت تحب الترف اللي تبرد قلبها ولا تفكر في احد
ثنيان لترف : عطيني الخبز
ناظرت فيه بملل وهي تاخذ الخبز وحطته قدامه بقوه وبنفس النبره : ثنييييييان هذا الخبز
ثنيان اللي سكر عيونه من صرختها وسحب الكيس وهو يهبده في راسها : التررررف اشوفه
مشاعل اللي حستهم شوي يتضاربون: انا اقول عمتي تستنى بالمستشفى
افطر ثنيان وهو طول وقته يناظر الترف وتناظره وكلها نظرات سخريه
مشاعل اللي كانت بصدمه وهي تناظر في ثنيان اللي لو وحده منهم سوت كذا ذبحها
مي نزلت : صباح الخير
محد رد عليها الا ثنيان اللي رفع راسه يناظرهم ليه ما يردون
الترف اللي اول ما شافت مي خزتها خزه محترمه
مي : ثنيان بروح معك لرهام
ثنيان: لا
مي : ليييه
ثنيان اللي تغيرت شخصيته: ميييي فكيينيي من الازعاج
مي : طيب
مشاعل : ترا شوي يا ثنيان بنروح لرهام ومنيره بتجي من هناك
ثنيان : اوووه ما كلمت منييييره
مشاعل: ليه فيهم شي
ثنيان : لا
وقف ثنيان واخذ اغراضه وطلع ضحكت مشاعل: اقول الترف تروحين معي المطبخ
فهمتها الترف وقالت وهي تقلد ثنيان : لا
مشاعل : ليييه
الترف : فكيني من الازعاج
ضحكت مشاعل وهي تقول : ناس تجيب لنفسها الكلام
مي : اقول اسمعيني انتي وياها امسكوا لسانكم والا والله لقول لثنيان
الترف وقفت وهي تشيل كل الفطور من قدام مي : يمدحون التبن !
مي : ليه مجربته
الترف : لاا كنت اعطيه اللي مثلتس
انفجرت مشاعل ضحك ووقفت مي وهي تهدد وطلعت والترف تضحك
اخذت جوالها وهي ادور رقم صالح واتصلت
صالح اللي كان يجهز نفسه لدوام : هلا الترف
الترف : كيفك وش اخبارك
صالح : حمدلله
الترف : لك ولا الذيب يا اخو الترف
صالح: افااا خسى الذيب
الترف : كفووووو والله اجل اسمع وانا اختك ابي ضب
صالح : هاااه وش تبين
الترف : ضب واذا صغير بعد يعطيك العافيه
صالح : والله اني لي اسبوع مرتاح من المجانين وش تبين بالضب يا خبله
الترف : كنت ألعب انا ومحمد وعمر طيب وعدتهم ان فازوا اجيب لهم ضب
صالح : ها يلا خذ ! انتي مهبوله ذولا عيال حضر يا بدويه وش يبون بالضب
الترف : يا رجال يعرفونه جبه بس
صالح: والله ماني فاضي
الترف : افا انت تزهلتها
صالح : اصبري اصبري امس شفت حمود معه واحد بشوفه
الترف : زين متى بتجي للمدينه
صالح : ماشي اصلا
الترف: كفو اخوي بس هاه حطه بكرتون
صالح : والله ماني مرتاح لتس
الترف : افا
صالح : يلا روحي
سكر صالح وبعد نص ساعه اتصل وهو يقول انه جاي ولازم تكون عند الباب عشان تاخذه بسرعه وهو مستعجل
................••............
في المستشفى
وعند رهام اللي كانت بالمستشفى وام ثنيان جالسه وهي تحلطم دخل ثنيان: سلام
ام ثنيان: اييه اخيرا فكتك بنت ابليس
ثنيان سكت وتقدم لرهام وهو يسلم عليها : حمدلله ع السلامه كييفك الحين
رهام : حمدلله
لف على دلال : ام شوق كيفك
دلال : بخير يا حبيبي
ثنيان: عطوها خروج
دلال : ايه
ثنيان : انا بروح اكلم الدكتور وانتم اجهزوا
طلع ثنيان وهو يكلم الدكتور ورهام تجهز
رجعوا واخذوها للبيت وثنيان يسساعدها لما نزلها على سريرها ورجع وهو يتكي على التسريحه ومسكت يده السلسال اخذه وهو يناظره باستغراب وبعد ما جلست رهام زين قال: وش ذا السلسال الحلو
رهام ناظرته وبرد وجهها بخوف : ايه حلو صح
ثنيان: من وين اخذتيه
رهام :من مول ... كانت رهام عينها عليه بخوف ودخلت شوق وهي تشوف ثنيان يقلب بالسلسال وسلمت على رهام وقفت جنب ثنيان : رهيب السلسال صح واضح انه غالي
ثنيان وهو يقلبه : ايه
رهام كانت خايفه انه يحصل الورقه نزله ثنيان وهو يشوف ثريا اللي دخلت وهي تناظره بكرهه وسلمت على رهام وطلعت
جلس وهو يسمع سوالفهم ويفكر وشلون يرضي الترف وطبعا في دوامه غضب امه على الترف
.................••............
في بيت ثنيان
عند الترف اخذت الضب من صالح وركضت فوق قبل احد يشوفها وصرخت لما شافتها 3 صغار : زين تعرفين تنظفين يا لمخنزه اوريتس كثر الله خيرك يا صويلح
طلعت وهي تشوف مي تحت تغسل ملابسها ابتسمت ودخلت وهي تفك الكرتون في غرفة مي وانطلقت الضبان ركضت وهي تسكر الباب ورمت الكرتون بسرعه وهي تجهز عشان تروح مع مشاعل اللي جهزت وجات وهي تدق الباب : الترف خلصتي
الترف وهي تلبس عباتها : اصبري خلصت بس باقي شوي
عمر اللي يناظر الترف ببتسامه وهو واقف جنب امه ومرت مي وهي تشمق وفتحت باب غرفتهاا ودخلت ولا هي ثواني الا انتشر صراخها في كل البيت ركضت مشاعل بفجعه من صراخها وفتحت الباب واول ما فتحته طلع واحد عليها وصرخت مشاعل وعمر والترف اللي كانت تصرخ بحماس
مشاعل اللي كان معها جوالها وهي تصارخ والضبان انتشروا واحد يطرد مي اللي تصارخ دقت على ثنيان وهي تقول : ثنيان اللحق اللحق
وصرخت وهي تنط للكنب الثاني
وثنيان اللي مايدري كيف نط وانطلق يركض ونواف انفجع وركض وراه فتح الباب ثنيان وهو يسمع الصراخ نواف : وش فييه
ثنيان : مدري مدري خلك هنا
طلع ثنيان وكانت مشاعل تصرخ: ضب يا ثنيان ضب
ثنيان: وشوو ضب وش جاب الضب
نط ثنيان لما شاف الضب جاي له مسرع ونزل لك الضب مع الدرج وصرخ ثنيان : نواااف الضب جاك امسكه
نواف : ضضضصضضب
ثنيان: اييه
انطلق نواف ورا الضب وثنيان اللي سمع صراخ مي والصدمه ان اللي عندها ويركضون وراها اثنين
مي اللي كانت تبكي بكى فضيع والترف ميته ميييته ضحك
مي : ألحقني بياكلوني
ثنيان سحبها من التسريحه وهو يوديها غرفة مشاعل واختفى واحد من الضبان فالغرفه وواحد مسكه ثنيان وهو ينزله لنواف : امسك
نواف : من وين جايبهم ذولي
ثنيان: مدري وش دراني
سيف اللي جاء يركض لما قالوا له : وش فيكم
نواف : ضبان
سيف رجع ورا اول ماشافها ونواف شافه خاف وهو ينطلق وراه وركض سيف ونواف وراه وثنيان رجع للغرفه يدور الضب وهو مصدوم وش جاب الضب
وبعد معاناه وبعد ما قلب الغرفه فوق تحت ما يدري وين راح الضب سكر الغرفه وطلع وهو حالته حاله راح لغرفه مشاعل
مي وهي تبكي :طلعتها يا ثنيان
ثنيان : طلع واحد و واحد مدري وينه لا تروحين للغرفه يمكن يطلع شوي
مي قامت تبكي ثنيان: الحين من وين جت ذا الضبان منن وين جت
مشاعل:مدري سمعتها تصارخ ورحت واول ما فتحه انطلق واحد معاد شفت شي
مي : مدري حتى انا بس اكيد من عند ذيك القرويه المقرفه
ثنيان اللي تذكر انه ما سمع لترف صوت والضبان اصلا وش يجيبها فالبيوت !! مشاعل نفس الشي تذكرت ان صالح توه جاء وراح بسرعه بينها وبين نفسها كان ودها تضحك من كل قلبها
ثنيان: اقول اص ويلا اطلعوا من هنا بجلس ادور عليه فالبيت كله
مشاعل اخذت عبايتها وعمر وطلعت ومي جاب ثنيان عبايتها وعطاها ولبست لكن بدون ما تشوف
ولا يمدي ثنيان وصل باب الغرفه الا وصرخت مي صرخه زلزلت الارض
وبعدها صرخت مشاعل وهي تقول : الضب على ظهرك
انهارت مي وهي تصارخ وتنطط في كل مكان ونزلت بلوزتها لكن الصدمه انه باقي على ظهرها
ثنيان اللي من قوه اللخمه عجز يركز زين ركض وهو يمسك مي بالقوه واخذ الضب من ظهرها وهي اللي على كثر ما صارخت وخافت صار وجهها اسووود
ثنيان : مشاعل تعالي امسكيها
مشاعل اللي جات وهي تعطيها مويه وجلست مي وهي تبكي بخوف شلع قلبها
................••............
عند الترف
اللي كانت تضحك من كل قلبها وهي تتجهز وتغني مبسوطه وهي تسمع صراخ مي في كل مكان وثنيان يركض في مكان
قطع عليها الباب اللي انفتح وكان ثنيان اللي معاه الضب لفت تناظر الترف وهو تلبس اساورها : يمممه ثنييييان وش ذا الصراخ
ثنيان وهو يناظرها بشك : عطيني شي واحد بس اقول انه مب انتي اللي جبتي الضب
الترف قربت وهي تناظر يد ثنيان: وش ذا الضضب البزر وش جابه هنا
ثنيان : تستهبلين يا شيخه ! انا متأكد مثل اسمي انك انتي اللي جبتيه وانتي اللي دخلتيها غرفة مي
الترف : نعم نعم نععععم اقول يالطيب بدري بدري على انك كل ما صار شي تحطه براسي وبعدين وش ابي بذا السحليه احط لها ضب واذا بحط احط ضب مهبوله انا !
ثنيان اللي سكت وهو يراقبها وقالت: يا رجال لا تغثني زود تراك فاقع مرارتي انت وياها
راحت وهي تاخذ عبايتها وثنيان اللي متأكد انها هي بس انه ابتسم وعداها خصوصاً بعد اللي سواه امس وسحبته عليها
طلعت الترف وراحت لمشاعل: وينتس يا مشاعل ابطينا
عمر اللي جاء يركض لثنيان: بابا وش ذا اللي بيدك
ثنيان جلس وهو يوريه عمر اللي يناظره
مي : انتي قد ذا الحركه الوقحه يا قرويه يا متخلفه
الترف لفت تناظرها: خييير وش بلاتس تصايحين من داس لتس على طرف
ثنيان : مييييي ، خير وش فيه
مي : انت تدري انها هي اللي جابت هالقرف هنا وحطته بغرفتي عشانها مقهوره مني
الترف : انتييي هييييه من لعب عليتس وقالتس
انتس تهميني عشان اجيب لتس ضب واحطه انا لا بغيت توطيت في بطنتس قدامهم كلهم مانيب خايفه من احد مير اطلعي من مخي ازين لتس
ثنيان :خير ان شاء الله انتي وياها احسن تضاربوا قدامي
مي وهي تمسح دموعها : انت تشوف ولا لااااا
مشاعل : خلاص فكونا تاخرنا ترا
ثنيان: اقول يلا بس انتي روحي لغرفتك وانتم روحوا من هنا
عمر: يبه بجلس معك ألعب فالضب
ثنيان : شوي مب الحين انا بطلع
راحت مي وهي مازالت تبكي ومشاعل والترف راحوو
ثنيان نزل وهو يشوف سيف اللي يركض هو وبندر ونواف وراهم
ضحك وهو يقول : نوافوه جبها
نواف رجع : من وين جت ذي شف كيف صغيييره
ثنيان : ايه جبتها من الدوام ونسيتها فالحوش واثاريها طلعت للبيت
نواف : بس رهييبه بروح اهبل فالبنات
ثنيان: هييه ياخبل رهام تعبانه لا تفجعنا فكنا من امي لا تحوسك حوس
نواف : اجل باخذ واحد اطقطق به على العيال
ثنيان: دامك بتاخذه لعب محمد وعمر معاه
نواف :زين
شاف ثنيان محمد جاي ومعاه منيره ومحمد ولده راح لهم وهو مخبيها وراه ظهره دق شباك محمد وفتحه : هلا
رمى ثنيان الضب عليه ونقز محمد وهو ينفضه وثنيان يضحك اخذه ثنيان ومحمد اللي عصب: عساك بالجرب يالوصخ وش ذا من وين جايبها
محمد ركض له: يبه وش ذا
ثنيان وهو يوريه : ضب
منيره : ثنيان من جايبه ذا
ثنيان اللي بسرعه رفعه يخوفها فيه وصرخت وهي تخبى ورا محمد وضحك ثنيان: افا يا مناير طلعتي خوافه
منيره: وش ذاااا ضب وما تبيني اخاف
محمد : ياحليله صغييير
نواف: حمود تعال شف واحد مع عمر
ركض محمد له ولف ثنيان لمحمد : كيف عمي
محمد : بخير كيف رهام
ثنيان: لا بخير الحمدلله
منيره: راحوا البنات
ثنيان: راحوا بعد الاعصار
منيره: ليش
ثنيان : روحي لهم يقولون لك ، محمد تخاويني
محمد : ودي بس بعد ساعه دوا ابوي لازم اجيبه واروح للبيت
ثنيان: سلم عليه راح محمد وثنيان ركب سيارته ومعاه الضبان وراح لعجاج
................••............
في حارة عجاج
عجاج اللي كالعاده بعد ما يطلع من الدوام يجلس عند البقاله لكن هالمره جالس ومعاه عيد
وعيد هذا معروف فالحاره بالصوت الشجي والعود المميز كانوا مستكنين وهم يسمعونه وهو يدق العود
جاء ثنيان اللي منطرب على الاخير وبعد ما خلص عيد
طلع ثنيان الضب وهو يرميه على عجاج اللي نط وهو مايدري وش رمى عليه وركض وركض ثنيان وراه هو وعيد ورمى عيد العود والكل صاروا يركضون وراهم ما يدرون وش السالفه
بعد عناء وقف عجاج لما شافه ضب: وجعععع وجعٍ يوجعك يا ثور وش ذا اخذت عقلي على غير سنع
عيد: ثنيان الله يهديك وش بك خرعتنا
ثنيان: امزح معكم وش فيكم
سالم : ثنيان تكفى ابي واحد
اخذ عجاج واحد وهو يناظره : منين جايبه ذاا
عطى ثنيان سالم واحد وراح سالم ورجع عيد ياخذ عوده
ثنيان وهو يتكتف : ابد فعاليات بنتكم
عجاج لف بصدمه: هاه بنتنا جايبته
ثنيان : اي والله
عجاج : يا رب يا موزع العقول ناظر فيها ، كيف كييف
ثنيان: ابد والله لا تسألني اصلا جحدت ام الضبان وليتها جايبه واحد لا ثلااااثه وحاطته بغرفة مي ولا احكي لك عن اللي صار
انفجر عجاج يضحك بكل قوته : لا لا والله انها رهيبه وقادحه ومي وش مسويه لها
ثنيان : غيرة حريييم
عجاج: انا اضمن لك انها بتصرعنا صدمه وضحك
ثنيان : هههههههههههههههههههه بيني وبينك والله اني اركض وراهم وفيني صدمه مع كميه ضحك ضحكت بالسياره لين دخت اصلا لو نويت اهاوشها بموت ضحك انت اصلا لو تشوف كيف جحدت
عجاج : والله الظاهر انها بتسوي روتين رهيب
ثنيان: ايه بس لو نقصر لسانها شوي
عجاج : الله الله وانت وينك ولا مالك قوه الا على مي ومشاعل بعد منيره ندري بك ما تقدر تقول لها شي هاذي ليه
ثنيان: ياخي مدري مقدر مقدر اول ما اشوفها انهبل احسني جالس معك
عجاج جمد وجهه : الحين ذبحتنا عيونها وجمالها وخرابيط فالاخير مثلي خييير ياخي
ثنيان: ليه انت ما تشوف نفسك حلو
عجاج: يا رجال لو الجمال راجع لي كان محد تزوج احد الا متغطي
ضحك ثنيان وهو يدفه: شف هي مثلك بالهباله لكن وجهه لا والله وش جاب لجاب
عجاج : انا قايل انك رخمه
ثنيان : اقول ناد عيد ناده خله يطربنا
عجاج : ما يبي لك عيد وجهه روعته و هبلته الظاهر ان حباله الصوتيه هاجه للحين يدورها
ثنيان:هههههههههههههههههههههههههههههههههههههههههههه هههههههههههه .................••............
في بيت ابو ثنيان
وعند الترف ومشاعل اللي دخلوا وهم يسلمون لكن ام ثنيان دخلت وهي تقول : وينها هاللي ما تستحي بعد بعد جايه
دلال : يا يمه اسمعيني
ام ثنيان اللي دفت الترف عن رهام : خير خيييير يا سويده وش تبين هنا
الترف وهي تناظرها بصدمها : انا
ام ثنيان: اييه من غيرك غثيث هنا
دلال: الترف ما عليش امي ما تقصد
ام ثنيان: الا اقصد ونص اقول اذلفي من بيتي اذلفي
الترف اللي كانت مصدومه
رهام: يمممه وش تقولين الترف ماعليه امي فاهمه غلط
ثريا : لا يا قلبي انتي وهي مافهمت غلط لو ما هالسويده قومت رهام ما صار اللي صار
منيره:ثريا قولي خير ولا اسكتي
الترف نزلت عصا ام ثنيان من كتفها وهي تقول : اسمعيني ياخاله بنتس مب انا اللي قومتها هي اللي قامت ورقصت وبعدين وش يدريني انها مريضه مادريت الا من ولدتس ، وبيتس ابذلف منه على قولتس لكن عشانتس كبر امي الله يسامحتس
ثريا : اقول يلا بسسسسس
التفت الترف لها بنظرات حاره : منيره قولي لاختس اني ساكته عشانتس والا كان عرفت شلون اتوطى بطنها
ثريا : يمممه خفت لا لا تعالي
فجر: يمه الله يهديك بس
نوف ركضت ورا الترف اللي طلعت معصبه : الترف الله يصلحك جدتي ما تقصد هي فاهمه غلط انتي فهميها
الترف : نوف فهمي جدتس ولا بكيفتس انا ما اجلس في بيت انطردت منه وانهنت فيه
منيره: الترف الترف اصبري يا حبيبتي الحين افهم عمتي وتفهم
الترف : مالي جلسه وانتهى الموضوع
طلعت الترف وهي معصبه وشافت نواف جالس وهو يلعب عمر ومحمد وابو ثنيان وسيف في المشب
لفت اول ماشافت ابو ثنيان وهي تهدي دخلت : سلام عليكم
توجهت لابو ثنيان وسلمت عليه
ابو ثنيان: وشلونك يالترف
الترف : بخير يا عمي انت شلونك
اابو ثنيان: بخير وينك رايحه بدري العشاء هنا
الترف: ما عليه يا عمي بيتي اولى بي ، فمان الله
سيف اللي كان ساكت ويسمع بهدوء لف على ابوه: كأنها تنافخ
ابو ثنيان: مدري كأنها زعلانه
الترف اللي طلعت وقبل تطلع من باب الحوش كان بندر جالس وقف وهو يلعب بسماعته وقال بهمس : اوووه هاذي سحارة ثنيان
وقفت كل خلية بجسم الترف ولفت تناظره بحده وهي صاد والكل يناظرها ونواف اللي سمعه وجاء مسرع وهو يسحب بندر بغضب : قطع الله لسانك يا قليل الخاتمه
الترف اللي شافت نواف اللي ضرب بندر كف وابتسمت وطلعت بقهرها للبيت
سيف فز: نواف وقص
ابو ثنيان : نواااااف نواف كسر وش تسوي انت
نواف : سيف لين متى يبقى ذا الحيوان ما تربى
سيف : اقول اقصر لسانك
بندر وقف وهو يدف نواف : تطقني عشان ال**** هاذي
ابو ثنيان: احشم لسان يا قليل المروووه
نواف: اضربك واللعن ابو خامسك
ابو ثنيان: وش مسوي ذا اللي مايستحي
نواف : يقول لزوجة ثنيان : جت ساحرة ثنيان
ابو ثنيان اللي رفع عصاه وهو يضرب كتف بندر : لعن الله ذا اللسان يا وصخ
سيف : يبه انا هنا موجود
ابو ثنيان : والله والتراب فيك وفييه هاذي تربيه يتكلم على الحريم وعلى الكبار والصغار
سيف اللي عصب واخذ بندر وطلع وهو يهاوشه وبندر اللي يرد الكلمه بمليون كلمه
................••............
في بيت ثنيان
الترف اللي دخلت بغضب وهي تفوور فووووور طلعت لغرفتها وشافت مي قالبتها قلب فووووق تحت ومرميه كل شي بالارض
مشاعل اللي رجعت وهي ومنيره وراها لكن سكتوا لما شافوا غرفتها نزلت الترف عباتها وهي تقول : ان ما لعنت خيرتس ما اكون انا بنت ابوي
منيره وقفت قدامها: تكفين يالترف فكينا من المشاكل كفايه عمتي
الترف : منيره الله يرحم امتس وخري والله والله لوريها وشلون تحط راسها براسي
حاولت منيره توقفها لكن الترف كانت الشياطين تلعب في راسها رفست باب مي ودخلت وششافتها منسدحه وتطقطق بجوالها طارت لها مثل الجني ووهي تسحبها من شعرها وكفختها تكففففففخ ومنيره المسكينه تحاول تفرق بس ابد مافيه امل وطلعت الترف قهر اللي صار كله فيها
مشاعل اللي كانت في قمه حماسها على تكفيخ مي كانت تضحك ولا سكتت الا بعد ماشافت الترف طالعه وهي تلعن وتسب
منيره: دقيتي على ثنيان
مشاعل: لا ليش ادق
منيره: يا بنت الحلال انتي وش فيك تشوفين اللي صار ولا لا مي وجهها راح فيه
مشاعل : احسن تستاهل
منيره اخذت جوالها وهي تدق
................••............
في حارة عجاج
ثنيان اللي كان في قمة انسجامه وهو منسدح على رجل عجاج والضب على صدره رفع جواله ورد : هلا مناير
منيره: ثنيان وينك
ثنيان: موجود ليه ؟!
منيره: تعال طيب البيت
ثنيان: وش فيكم
منيره : الترف ومي متهاوشين
ثنيان: تناديني عشان هوشه
منيره: مب اي هوشه الترف اخفت ملامح مي
وقف ثنيان وهو يعطي عجاج الضب : يلا يلا
عجاج: وين
ثنيان : بروح اشوف بنتكم الله يعيني على بنتكم
طار ثنيان للبيت ونزل وشاف عمر ومحمد جالسين عند الباب بخوف ثنيان: وش فيكم هنا
محمد : يبه الترف مره تخوف كفخت مي بقوه
عمر : مي طلع منها دم
دخل ثنيان مسرع وشاف منيره اللي تمسح وجهه مي ومشاعل جالسه بهدوء تراقبهم
ثنيان قرب وهو يلف مي عليه لكن انصدم الترف حرفياً شوهت ابو ابو ملامحها
مي وقفت وهي تبكي : الحين لا تسوي ما تشوف وش سوت فيني
ثنيان وهو يناظر منيره: وش صار
منيره:مدري
مي : ثنيان تكفى اخذ حقي منها
ثنيان هالمره عصب وطلع بغضب ووقفت مشاعل خوف ان ثنيان يطق الترف : ثنيان مي حوست غرفة الترف حوس قلبتها فوق تحت
ثنيان : ايييش
مي : تكذب عليييك
مشاعل: روح شوف بعينك
ثنيان : لو اروح واحصله صدق صدقيني لحوسك انا
مي جلست وهي تبكي وثنيان الي طلع وهو يطلع الدرج بدرجتين
ثنيان : لو اروح واحصله صدق صدقيني لحوسك انا
مي جلست وهي تبكي وثنيان الي طلع وهو يطلع الدرج بدرجتين وفتح باب غرفة الترف وشافها جالسه على السرير وهي ماسكه راسها لكن ماكان اي شي فالغرفه يدل انها غرفه كانت بإختصار خرابه
ثنيان هالمره جمد وهو يناظر
رفعت راسها الترف بغضب : اذا جاي تكمل الناقص اقولك من الحين فكني شرك ترا فيني للي مكفيني
ثنيان : خيررر ان شاء الله اربي مصارعين هنا عندي
وش قلة الحياء اللي جالسه تصير هنا
ما ردت الترف وهي تهمز راسها واسرع ثنيان وهو يسحب يدها : اذا تكلمت تفزين تسمعيييييني
الترف سحبت يدها بقوه : اقولك وخر عني بس مالي خلقك كفايه اهلك وذا الزفت اللي برا والحين جاي تصارخ هنا
اذا لك حييييل تهاوش لف وراك وناظر واطلع لولد اخوك وامسك لسانه وفهم امك اني مالي شغل ببنتها ولا خليتها تمرض ، انا ما جيت اكون ذليله عند احد واحد يطرد واحد يرمي كلام واحد يصارخ
وقول لسلقه اللي تحت انها لو فكرت تحارشني بلعن خيرها والكل يشوف وما علي من احد ولا بخاف لا منك ولا من غيرك
ختمت كلامها بدمعه زعزعت كل الكلام ولفت وهي تمسحها بسرعه
ثنيان اللي سكت بعد كلامها وهو يفكر وش قالوا اهله وطلع وتركها ونزل تحت لمي وبدون اي كلام سحبها وهو يقول : انطقي بحرف عشان اكفر فيك
مي : وش بتسوي ثنيان
منيره : ثنيان تكفى خلها
مارد ثنيان اللي طلع وقف قدام غرفة الترف: لو مايرجع كل شي زي ماكان تقشين قشك وتنقلعين بيت اهلك
مي شهقت ومنيره اللي رجعت لوراء بصدمه فتح ثنيان الباب : اخلصي
الترف الليي شافتها داخله وهي تناظرها بغضب وتقدمت مسرعه بس وقفها ثنيان: انتهييينا بتسوي اللي خربته وبس
دفت الترف يد ثنيان وطلعت ونزلت تحت للحوش ودخلت المشب وضربت الباب
ثنيان لمي : لو ادري انك مخربه شي زياده صدقيني بتندمين
طلع وهو ياخذ منيره: وش صار عند اهلي
منيره نزلت راسها بضيق : ثنيان تكفى لا تدخلني
ثنيان: منيره انا اسأل
منيره: تكفى يا ثنيان
تركها ثنيان ونزل لمشاعل : وش صار عند اهلي
مشاعل سككتت بخوف ثنيان: تكلمي
مشاعل قالت له كل شي بالحرف لكن سالفة بندر ما تدري عنها
ثنيان مسك راسه: وش مسوي بندر الزفت
مشاعل: مدري بس لما طلعنا كان يهاوشه سيف وعمي ونواف معصبين
طلع ثنيان بغضب متجهه لبيت ابوه .
.
.
انتهى البارت✨