تهزمني السمراء وأنا نّد فرسان بقلم الكاتبة أديم الراشد// مكتملة

البارت الثالث والثلاثين

«البارت الثالث والثلاثين»
.
.
عند ثنيان
اللي بعد ما تغدوا ورجع كل واحد لبيته حزتها حرفياً كان ثنيان مشتاق لبيته طلع من بيت ابوه وكالعاده الكل معاه تقدمت منيره وهي تمشي على يمين ثنيان اما ثنيان اللي كان يحاول يتاخر عشان تلحق الترف على خطوته ومشاعل اللي كانت تمشي بهدوء وهي تحس انها ثقيله اما الترف اللي كانت تمشي وهي تناظر خاتمها اللي متعلق بطرحتها وهي تسحبها وتسحبها لف ثنيان وهو يشوفها تمشي وتوقف ومنزله راسها
رجع وهو ينزل راسه يطالعها :وش تسوين انتي !
الترف وهي تعطيه الشنطه : امسك دقيقه
اخذها ثنيان وهو يشوفها تسحب الطرحه بكل قوتها عشان تطلع وانقطعت ابتسم ثنيان لما رفعت راسها الترف بطفش : وجع الله يهد حيلها هدت حيلي
ثنيان : وشوله قطعتيها طيب
الترف : ماتشوف كيف متعلقه فيها كأني عنز
ضحك ثنيان وهو يعطيها شنطتها: يلا امشي
تقدمت الترف وهي تمشي والكل يمشي من وراها وطبعا ما يخلى المشي من مجاكر الترف لعمر ومحمد وثنيان
دخلوا البيت والترف اللي اول ما دخلت ضاقت لما تذكرت ان مي تجهز لثنيان فوق ( على حسب ظنها )
ثنيان وقف وهو يتمغط :الله يا فيني تعب ونوم الدنيا
منيره: يلا الحمدلله على سلامتك والحين اجهز لك البانيو ترتاح وتنام
ثنيان : اي والله وقته
الترف اللي كانت متكتفه وهي مازالت ببرقعها وهمست بحلطمه:لا باقي ما شفت وقت مي ولا يطير ذا التعب حسبي للله يا ذا السحليه اعنبوها يا قوة حظها
ثنيان لف : تقولين شي
الترف : سلامتك
ثنيان: مشاعل تقدرين تطلعين فوق
مشاعل : والله مره تعب بجلس تحت فتره
ثنيان: تهون ان شاء الله ، الا صدق وين كنت اخر مره
منيره اللي جات معاها كوب مويه وهي تعطيه :عند مشاعل
ثنيان ابتسم لما صادفت الفرصه انه عند الترف وقبل يتكلم قال عمر: يبه اذا نمت وارتحت شوي بنطلع للحديقه معك
ثنيان: طيب انتم بعد نامو
منيره اللي تضايقت ان ثنيان بينام عند الترف انعفس وجهها وهي تاخذ محمد وعمر بضيق ( الله يا ذا الحظ للي على الترف يغيب 3 شهور ويطلع عندها وهو جاته من الله ) : انا بروح انوم العيال اجل
مشاعل : انا بارتاح شوي
الترف اللي ضاقت وهي تمسك مشاعل بغضب من احتمال ان ثنيان عند مي : عطيني يدتس يا مشاعل اساعدتس
مشاعل : حبيبتي يالترف لا تعبين نفسك اطلعي انتي انا الغرفه قريبه
راحت مشاعل والترف واقفه وتقدم ثنيان وهو يسحب البرقع من عليها :حلو بس وجهتس احلى
الترف سحبته منه بقهر : خل الحلو اللي ينتظرك
ثنيان قطب ببتسامه :مين ينتظرني !؟
الترف بعدته وهي عافسه وجهها وطلعت الدرج : هالسحليه لللي منقطعه عن الدنيا تجهز لا تخليها تتنظر
طلعت وثنيان يراقب ببتسامه وتعجب : من ذا السحليه اللي تجهز!
ضحك لما تذكر ان هذا اسم مي واتسعت ابتسامته اكثر لما ايقن ان الترف غيرانه ركض بسرعه وطلع قبل تدخل غرفتها وقال: اي والله صدقتي حرام من زمان تجهز
اتجه لغرفة مي والترف تناظره بحقد ابتسم ودخل وهو بس يبي يستفزها
سكر باب الغرفه بدون ما يخليها تشوف اي شي اما الترف اللي كانت تحاول تشوف اي شي بس ماش رمت البرقع بقهر وهي تجلس وتكتفت : والله ما اوصخ منها الا هو طار طار لها ما انتظر وانتي اجلسي يالخبله انقهري من صبح الله وانتي تمعطين في ذا الشوشه وتزينين وتتكشخين وانسحب عليتس احسسسن تستاهلين والا اللي مثلتس مايجي الا بعد طلعة الروح لكن هين اوريكم
ثنيان اللي كان يحاول يسمع وش تتحلطم بس ابد ماقدر لف وهو يضحك وناظر الغرفه بهدوء وسحب روب الاستحمام حقه ودخل يتروش عشان يصحصح ويمخمخ على استفزازاها طلع واتجهه للباب وفتحه بسرعه
الترف اللي بعد ماشافته طول انسدحت على الكنبه وهي تتحلطم لاحد الان كانت ميقنه انه مستحيل يطلع رفعت راسها وهي تناظره واتسعت عيونها وهي تشوفه واقف بالروب وشهقت: مسرع
ثنيان اللي كان واقف ببتسامه فوق راسها : وشو !؟
الترف تلخبطت ووقفت وهي تجمع اغراضها :ولا شي
ثنيان: وش عندتس تراقبين
الترف لفت وهي تخصر:وشو وشو وشو وش اراقب ومن اراقب يابعد تسبدي
ثنيان: مدري عنتس
الترف اللي عصبت : اقول اعقل بس وش دخلني فيكم رحت لها ولا ماراحت لها طولت ولا ما طولت مالي دخل انقعوا عند بعض بموت يعني ولا هاميني
ثنيان اللي انفجر يضحك : لا والله واضح انتس مب مهتمه
الترف : طبعا
الترف اللي كانت تخزه وهو واقف بالروب ولفت لغرفتها ودخلت وسكرت الباب رمت الاغراض وهي تتربع على السرير : الله ياخذتس يالترف تستاهلين منسدحه عند الباب لين طلع وغسل شراعتس
................••............
منيره اللي تنوم العيال
وطلعت وهي تشوف ثنيان واقف وهو متروش ناظرته وهي اول مره تشوف ثنيان طالع برا الغرفه بذا المنظر : ثنيان وش فيك كذا
ثنيان اعتدل : ولا شي ابي مويه بس
منيره: ليه ماقلت لترف تجيب مويه
ثنيان : شربت خلاص
رجع ثنيان لغرفة الترف ومنيره تناظر بصدمه ( باقي ماشفتي شي يامنيره )
دخلت غرفتها وهي تصفق الباب بقهر
وثنيان اللي دخل الغرفه ولفت الترف : عسى خير وش عندك
ثنيان وهو حاط يده ورا ظهره : والله قالت لي مي روح خذ لفه وتعال عندها مفاجاءه وجيت اشوف وش عندتس
الترف وقفت فوق السريروهي تناظره بحده: لا والله ضاقت الارض عليك ما تاخذ لفه الا عندي مب كفايه اللي فيني
ثنيان قرب وهو يسحبها من فوق ونزلها تحت : اول شي لا تكلمين فوق تكلمي تحت وثاني شي وش اللي فيتس وثالث شي الارض ارضي والمكان مكاني
الترف وخرته وهي ترجع توقف فوق السرير ؛ اول شي اتكلم وين ما ابي ثاني شي مب شغلك باللي فيني وثالث شي الارض هاذي ارضي والمكان مكاني انا وبعدين انت وش شايفن نفسك عليه هاه
ثنيان : اذا ما جلستي انتي وذا الهياط علمتك كيف تجلسين وبعدين وش محرق رزك انتي بيتي وحريمي
الترف : من زين سالفتك تماري بها
ثنيان: اقول انتي معتس الحكي فاضي وانا وراي شغل
الترف نطت من فوق السرير قبل يطلع وهي توقف على الباب : وش شغلك
ثنيان: وش دخلتس
الترف ناظرته بحقد ( والله ما تروح لها الليله اجل خذ لفه هاه ) ضحكت وهي تخبط كتفه: اي والله وش دخلني اقول تعال تعال بعلمك بسالفه يا زينها زيناه
ثنيان ابتسم وهو يوخرها: بعدين السالفه
الترف باستعجال : لا والله علي بالطلاق لتسمعها
طارت عيون ثنيان وهو يناظرها واتسعت عيون الترف فشله وضحكت: يووه ياخي والله مادريت المهم بتسمعها يا رجال
ثنيان :ماعندتس سالفه انا ادري
الترف: ياخي انت ماسمعت عشان تقول ماعندي سالفه
ثنيان جلس : هاه وشو
الترف اللي تورطت وهي تدور سالفه وجلست بضحكه متورطه وهي تمسح على شعرها: ا ا ايييه ابوي اشترى غنم جديده
ثنيان ناظرها بهدوء وببتسامه والترف تناظره بفشله وابتدت بسرعه تلفق سالفه عن الغنم والسالفه حرفياً تفشل وهي تحاول ترقعها وثنيان يناظرهم بنفس الوضع وكان داخلياً ميت ضحك على تخبطها
ابتسم وهو يتعدل بجلسته : انا اقول اروح احسن
الترف ( وش تسوين يالترف فشلتي عمرتس عشان مايروح خليه يذلف ): الله يستر عليك
ثنيان وقف : مسافر انا
الترف بحلطمه وقهر: والله مايندرى تدخل عندها ولا تطلع
ثنيان اللي انفجر يضحك: وش ذا الغيره ! يالسمراء !
الترف ناظرته بحقد : وش غيرته يا حبيبي لا غيره ولا شي تبي تروح روح
ضحك ثنيان وطلع ووقف عند الباب وفي هاللحظه طلعت منيره معاها اغراض وناظرته بصدمه للمره الثانيه وابتسم ثنيان بفشله من شكله
منيره: فيك شي!
ثنيان:لاااا اشم هوا
ناظرته منيره باستغراب : تبي شي
ثنيان : ا ا ايه ابي شاهي اخضر
منيره: وش تبي فيه
ثنيان: مثقل شوي بالاكل
منيره: ابشر
دخل ثنيان وطلعت الترف اول ماسمعت صوت غرفة منيره وهي تشهق ( حسبي الله عليه ذا ما يوفر يدخل عند وحده ويطلع من عند الثانيه ؟) .
دخلت وهي تسكر الباب وانسدحت وهي تطل من تحت الباب وشافت منيره راجعه ومعاها كوب
دخلت وهي تشوف ثنيان جالس اخذ الكوب وشربه بسرعه ووقف : يلا
منيره: اذا تعبان اسوي لك مساج
ثنيان: لا لا انتي ارتاحي
طلع واتجه لغرفة الترف مسرع وفتح الباب وصفق جبين الترف اللي صاحت ولف ثنيان يناظرها بصدمه: وش جابك هناا انتي
الترف بفشله: اكنس
ثنيان ناظرها بصدمه: انهبلتي انتي
الترف اللي ماكانت تدري وش ترقع ابتسمت لما طرت لها فكره ووقفت وهي ماسكها راسها وقالت وهي تمثل الالم : ااااه يا راسي بينفجر معاد اشوف
ثنيان اللي انصدم : ليييه
الترف : مدري مدري
كان ثنيان بيصدق لو ماشافها تناظر بطرف عين وابتسم وهو يرفع يدها:لا بسيطه مافيها شي نامي وتخف وانا بروح
سحبت الترف يدها بقوه وصدمه: وين تروح راسي بينفجر
ثنيان اللي ضحك وهو يمسح وجهه : وين بتوصلين يالترف
الترف ناظرته بصدمه: وين وين اوصل
ثنيان اللي قرب وهو يبوس مكان الضربه الوهميه بضحك: يا مسلمه قولي تغارين وارتاحي
الترف : حمدلله والشكر انت من وين تجيب ذا الخاثريدز
ثنيان : خلاص خلاص انا اخثردز بس تعالي انسدحي قبل ينفجر راستس
الترف اللي جمدت بخقه وهي تنسدح وثنيان اللي انسدح جنبها وهو يمسح بيده على مكان الضربه
الترف اللي كانت قريبه منه الا لازقه فيه وهي مبتسمه ما كان ودها تقول شي ويروح لمي
وثنيان اللي كان ماوده يتحرك وتبعد عنه واكتشف ان الترف من غيرتها تسوي اللي ما يتسوى كان مستانس على غيرتها بس كان يبي يشوف كيف ردة فعلها لو عرفت انه طلق وغير هذا مايبي يقول يخاف تسحب عليه
كان فترة صمت عرف فيها ثنيان ان الترف صارت نقطة ضعفه بشكل ما تخيله ابد
لف وهو يبي يتاكد للمره الاخيره هل الموضوع غيره ولا مجرد كيد في مي وكرهه لها
تحرك بيوقف وناظرت الترف له بحده: وين بتروح
ثنيان : بروح
الترف هنا زهقت وملت وهي تبيه يجلس وهو يتنحش لفت بضيق وقهر وصدت وهي تتلحف: تبي تروح روح الله يستر عليك
ثنيان : تبيني اروح وين !
الترف لنفس الضيق : اللي تبي تروح له روح له
ثنيان : والله لو هي علي بروح ..
الترف اللي ضاقت وجلست وهي تقاطعه : ياخي خلاص ريح نفسك وروح ماله داعي تجلس
ثنيان اللي سحب المخده وهي يخبطه على راسها :اللي مثلك يكسب زوجه وانتي ترسليني
الترف بحقد : عجزت فيك (وانقهرت لانها قالتها )
ضحك ثنيان وهو يجلس : تدرين وش اللي يخرب عليك لسانك لو بس تسمعين كان حنا بخير
الترف ميلت فمها بملل: بتروح ولا مابتروح
ثنيان: بروح بس بروح لك
الترف اللي عجزت تحدد نوع كلمته وش :كيف يعني
ثنيان اللي احتضنها: يعني اسكتي واحضنيني
الترف جمدت ببتسامه وبعد فتره ابتعد ثنيان : اول شي بعدين اسمعي وثم تكلمي
الترف: طيب
ثنيان : وثاني شي من بعد اليوم سحليه مافيه سحليه
الترف اللي بطبيعة الحال ما توقعت انه طلقها: شوف مابي نتهاوش عشانها وانت توك طالع من السجن بس مستحيل اناديها الا السحليه لا تحاول مره وهي ماتطيقني وانا ما دانيها
ثنيان نزل راسه بضحك : يا بنت الناس اسمعي اسمعي انا بموت وانا اقول اسمعي
الترف : طيب بسمع
ثنيان اللي اصلا كان جالس قبالها مباشره وسحب يده وهو يسمح عليها بهدوء وابتسامه ويراقب ملامحها : مي طلقتها من اول ما انسجنت
الترف اللي كانت تناظره وتناظره واتسعت عيونها بضحك ونطت وهي تقول : حلفتك بالله
ثنيان: والله
ضحكت الترف بفرح لكن خافت ان ثنيان يزعل لفت : دقيقه بروح وارجع
ركضت وهي تدخل غرفة الملابس سكرتها وهي تضحك وبفرح وترقص وبعد ما استانست وطلعت ورجعت وهي تحاول ماتبين فرحتها
ثنيان كان عارف وضعها وفرحتها وهو يعني بعد يقدر يقول فضى له الجو
جات الترف وجلست وثنيان يناظرها وحاولت تتماسك بس ضحكت اول ما ضحك ثنيان
ثنيان: يعني لك حق تفرحين
الترف : والله فكه ارتحنا اخيرا
ثنيان: راحت خلاص بخيرها وشرها
الترف اللي كانت ماهي منتبهه انه من اليوم يطقطق عليها رفعت راسها بسرعه وهي اللي كانت تضحك وراسها من قوة الضحك نزلته على ركبة ثنيان ووقفت وهي تقول : دامك مطلقها من اليوم وينك
ثنيان: اوووه جينا للحامي
الترف : وش تسوي هناك طيب
ثنيان ببتسامه: اطقطق عليتس
الترف ناظرتها بضيق وعيونها شبه مسكره وقالت بقهر : حسبي لله عليك ومن اليوم ما بقى بلاطه ما انسدحت عليها مابقى دعوة مادعيتها ولا بقى كذبه ما كذبتها ولا بقى باب الا وايقت معه وفالاخير كذا
ثنيان انفجر يضحك: وترا كل ذا مكشوفه فيه
الترف سحبت المويه وهي ترش جزء منها عليها بحقد وضحك ثنيان:والله مب شغلي انا اللي كنت معك وانتي فصلتي ودخلتيها براسي
ضحكت الترف بفشله: وراك ما قلتي لي عشان ما اتفشل
ضحك ثنيان: كتت معجب بغنم ابوك الوهميه
الترف لللي كانت تضحك بفشله وثنيان اللي كان من بين ضحكاته يراقبها يراقب الجمال الفريد اللي كان يحس انه يحتاج يشوفه اللي فقده من 3 شهور
حرفياً كان مب قادر حتى يرمش لاول مره يحس انه عنده الحريه في كل شي لاول مره يكون صريح حتى في نظرته لاول مره يفصح عن مشاعره رغم انه كان صاحب لسان معسول الا ان عنده تردد كبير في انه يقول مشاعره لاي وحده من زوجاته
كان راسه مايل وابتسامه عريضه عيونه اللي تفصل نظراته الهيمانه رمشته كانت الترف تضحك من شكلها هي تكذب وتخرف وثنيان كاشف ما كانت منتبهه زيين هي وش مسويه في ثنيان
اللي قال بكل صراحه : يا كثر ما اشتقت لتس يالترف يا كثر ما اشتقت لضحكتس
الترف اللي انقطع ضحكها تدريجياً وهي تناظره بإحراج وصدمه
ثنيان اللي كان حرفياً مستسلم لمشاعره: يا ليتني لقيتس بطريقي اول وحده
الترف عجزت حتى ترد او انها تناظره نزلت راسها لما داهمتها حراره فضيعه ملت جوها وتوترتها نزل راسه ثنيان بميلان ويناظرها : والله اني ما حبيت احد كثر حبي لك يالترف عز الله اللي استحليتي قلبي وحبي وكل شي
كان مثل هالاعتراف من واحد مثل ثنيان ثقيل على الترف وعجزت تصدقه الا لما احتضنها وهو يقول بصوت يهز القلب : والله اني احبك يالترف
هنا الترف اللي كانت تحلف ان لو مدري مين يقولها ذا الحكي ما يهزها ولا تهتم بس كلام ثنيان ما هزها بس الا اسرها وانجرفت معاه بحبه وهي لو يقول ثنيان ابي عيونك عطته حزتها ... 🌚
.................••............
في بيت سامي
وعند شوق اللي كانت تعيش بفرح خلال 3 شهور وهي كل شي تطلبه يحضر وكل شي تبيه يصير وزياد يلبي وحاضر وتم
وقفت وهي تناظر غرفتها ببتسامه وهي تشوف انها بدت تجهز لزواجها متجاهله امها واهلها وكل من له صله في خوالها
ابتسمت لما سمعت صوت اتصال زياد وردت بلهفه : هلا حبيبي
زياد اللي كان متناغم معها في انعطافات حبهم اللي تقليدي ولاهو حريص جدا على انه يحبها لكن المهم انه يتزوج
................••............
في بيت ابو محمد
محمد اللي من بعد ما طلع من بيت عمه وابوه اللي انتكست حالته كان جالس معاه في غرفه من غرف المستشفى بضيق وهو يناظر ابوه بخنقه
رفع جوالها وهو وده لو فيه شي يربطه برهام ويحاكيها ويحكي لها همه بس تنهد وهو يقول : هانت يا رهام هانت
وقف لما شاف الممرضه اللي قالت له يطلع لانهم بياخذونه لاشعه ما اشعه وقالوا له بيطولون وطلع وهو هالمره ناوي يحسم الموضوع دخل بيت عمه وهو ينادي ودخل المجلس لما سمع صوت عمه ينادي
ابو ثنيان: خير يا محمد وش فيك رحت ورجعت
محمد : والله يا عمي العلم سلامتك لكن النفس طلبت تكمل نص دينها
ابو ثنيان ابتسم بفرح: الله يبشرك بالخير ما بغيت
محمد ابتسم: والله يا عمي انا منحرج منك لكن وضعي واضح لك وانت اخبر
ابو ثنيان: ازين ما قلت ايه تزوج له حرمه تساعدك على الدنيا وتساعدها
محمد اللي كان متخوف انهم يرفضون وقال ابو ثنيان: ابد قولي بس من تبي وابشر بعزك
محمد : والله يا عمي اللي ابيها مب بعيد قريبه وهي ادرى بوضعي ولا بحصل احسن منها
ابو ثنيان: من ذي ؟!
محمد اللي كان يراقب الساعه وقال بجمله وحده وتوتر ملحوظ : انا يا عمي ابي بنتك رهام زوجه
ابو ثنيان اللي تفاجئ وهو يناظر محمد : بس يامحمد انت تدري بوضع رهام
محمد : انا ادري يا عمي وانا وصلني انها بعد اخر مراجعه لها انها ما عاد عندها اي مشكله
ابو ثنيان: هو هذا الوضع لكن ماندري بالوضع النهائي
محمد : انت هذ راحتك ياعمي واسأل الدكتور وشوف وضعك وان شاء الله خير
ابو ثنيان: الله يكتب اللي فيه الخير
محمد : امين وانا بطلع مابي اتأخر على ابوي
طلع محمد وهو يعرف دقه قلبه الخايفه زيييييين يعرف كيف شعور الخوف والتوتر من انه يخسر رهام بعد تردد سنين وقف وهو يستند على سيارته بخنقه ( يا رب لا تخيب لي صبر )
.................••............
في ديرة الترف
عند صالح اللي كان جالس هو وسلوى بالحوش وقهوتهم قدامهم ويضحكون ويسولفون دخلت نوره وهي معاها صينيه: سلام
الكل : عليكم السلام
نوره: كيفكم
سلوى: حمدلله انتي كيفتس وينتس غاطه من امس
نوره: ابد
صالح : وش ذا اللي بيدتس
نوره حطت الصينيه وجلست : ابشركم اني بعد معاناة تعلمت اسوي مطازيز والله ياهي تشكي بالله ذوقوها
سلوى شهقت : لا والله تبين تذبحينا من عمرتس ما تسوين المطازيز الا تسوين فيه كارثه مابي والله
نوره: اقول على شحم من زينها مطازيزتس
صالح: لحظه لحظه انا بذوق وبشوف
اخذ صالح الصينيه وهو متردد بس مايبي يكسر بخاطرها بعد ماذاقه ناظرها بهدوء: متى سويتيه
نوره: توني
صالح: والله تسلم يدينتس رهيب
سلوى : اذوق ولا خطر علي
صالح: انصحتس
قربت سلوى وصالح ياكلون بعد ما خلصوا قال صالح: اجل يا نوره بكره تعالي من بدري وصلحيها هنا وترا بكره عشاء ثنيان رتبوا اموركم واعرفوا وضعكم
نوره وسلوى: ابد ابشر
صالح طلع ولفت نوره: وينها الترف ما ترد
سلوى: مب فاضيتن لتس مشغوله من ثنيان
نوره: ياخي والله اني اعيش لحظات طفش فضيعه
سلوى:والله ليتس تزوجين بعد
نوره: من اتزوج يا حظي
سلوى: وش دراني
نوره: اجل اكلي وانتي ساكته
سلوى: هههههههههههه تزوجي عايض
نوره: اقول اص اص الله يديم النعمه
ضحكت سلوى وهي مكمله تطقطق على نوره
................••............
في بيت ابو ثنيان
رهام ونوف اللي كانوا جالسين بغرفة رهام
نوف اللي كانت جالسه بهدوء الدنيا وهي من بعد سالفة شوق صايره قليله كلام
رهام : اقول نوف ما تلاحظين ان ثنيان ساحب على الدنيا كلها ورايح مع الترف احسه مو مهتم لشي ثاني ابد
نوف : والله انا منحرجه من خالي مادققت فيه كثير
رهام : وشوله تنحرجين يا بنت الناس ماله داعي هذا فعل شوق وانتي ما سويتي شي
نوف : بس مهما كان اصلا حتى خالي معاد بيثق فيني
رهام: يا بنت وش ذا الحكي لايسمعك ثنيان اصلا هو يعتبرك شي ثاني ماله داعي تحسسينه انه مممكن يشك فيك
نوف: ما ادري
رهام: لا يا حبيبتي ادري انتي نوف هي الزفت شوق ما تستاهل اي شي نسويه عشانها عيشي جوك وانسيها وبعدين شوي بنروح نغير جو مع امك عند الترف
نوف : لا لا اكيد الكل مايبينا عشان شوق
رهام: نوووف لا اسمعك تقولين ذا الكلام انتم مالكم ذنب
سكتت نوف اللي مالها خلق انها تقابل احد كثير
.................••............
العشاء في بيت ثنيان
ثنيان اللي صحى على صوت حركة رفع راسه وهو يشوف الانوار كلها مفتوحه والشبابيك وشنط الترف بالارض وهي ترتب الاغراض وتغني
ابتسم وهو يتكي : يعني لو صحيت مره بس وشفت الوضع هادي بشك ان فيك شي كم مره اقول مابي نور ومابي ازعاج وتعاندين هاه
الترف اللي من بعد كلامه معها وهي صايره تخجل انها تعانده بس قالت وهي تأشر على الوقت : شوف الساعه كم الناس صلت العصر والمغرب والعشاء وانا اسحب فيك ولا دريت عني حشى وش ذا النوم ليته ابوي يشوفك والله ليتوطى في بطنك
ثنيان ارتمى ببتسامه : والله يدري والا مايدري الذنب الاول والاخير عليه
الترف : وشو وشو وش دخله هو اللي قالك تنام
ثنيان وقف وهو يتجهه لحمام : قول ما قال لكن جاب له موتٍ حمر
صغرت الترف عيونها وهي تعطيه نظرة الحقد الخجول : اقول روح صل وخاف ربك وعيالك من اليوم ينتظروك
دخل ثنيان وهو يحس ان صدره مليان فرح اما الترف اللي كانت تحس ان قلبها يتسع بشعور غريب عليها
................••............
عند منيره اللي كانت مع مشاعل المنسدحه بهدوء لفت منيره وهي تتأفف
مشاعل: وش فيك
منيره: يا اختي ثنيان ما صحى من النوم للحين ولا صلى
مشاعل: لا ما اتوقع اتوقع يصلي وينام
منيره بهمس : هذاك اول
مشاعل: وشو
منيره: : لا ولا شي
نزلت الترف وهي معاها ملابس دخلت غرفة الغسيل ونزلتها ورجعت جلست : مشاعل كيفتس الحين .
ورجعت جلست : مشاعل كيفتس الحين
مشاعل : حمدلله انتي وين غاطه
الترف :جلست ارتب اغراضي
منيره: ثنيان وينه طول النومه ولا صلى ولا قام
الترف ناظرت بمنيره وفي نفسها ( والله اني احبتس ولا ابي استلعن لكن ما تفهمين يا منيره ) : لااا صلى بس تاخر بالنومه والحين ينزل
منيره صدت وهي كارهه وابتسمت الترف اول ما سمعت صوت ثنيان اللي نزل وهو يكح
منيره فزت بخوف وهي تركض له : ثنيان فيك شي ليش تكح اجيب لك دواء
ثنيان : منيره بسم الله وش فيك عادي اكح وبعدين مافيه شي بسيطه
منيره: ليش تكح طيب ؟!صدرك اكيد تعبان
ثنيان: لا بس تروشت ونمت في المكيف
الترف لفت ببضحكه: لا ما عليك ذيب مايجيك شي تعال تقهوى بس
ابتسم ثنيان وراح وهو يجلس جنب مشاعل : هاه كيفك الحين
مشاعل: لا ما عليك بخير
منيره اللي كانت للحين بمكانها وهي تناظر الترف اللي تصب القهوه : سم
ثنيان اخذها : سم لله عدوتس
منيره بصوت شوي منفعل : ثنيان محمد وعمر من ساعه ينتظروك تصحى عشان توديهم الحديقه
كلهم ناظروها وقال ثنيان: بنتقهوى يا منيره بنتقهوى
عمر اللي جاء من فوق وهو يقول : محمد اركض ابوي صحى
نزل محمد وراه وهم يركضون لثنيان اللي نزل قهوته ووقفت الترف بمزح وهي تمنعهم يوصلون لثنيان وثنيان وراها
عمر: وخري يالترف
محمد : بتوخرين ولا ندفك
الترف : ماتقدرون
ركضوا عليها وهي تحاول تدفهم بشويش ومزح وضحك وهم يضحكون معها حتى ثنيان ومشاعل كانوا يضحكون لكن قالت منيره بغضب : بسسسس خلاص اتركي العيال وش فيك كأنك بزر معهم خليهم يشوفون ابوهم من 3 شهور ماشافوه
الكل لف على صوت منيره الضايق والغاضب بما فيهم ثنيان اللي احتدت ملامحه : خيير يا منيره وش بك تصارخين
منيره بنفس الانفعال : ولا شي
تركت الترف العيال اللي وقفوا وقال ثنيان بغضب : روحوا اجهزوا
راحوا عمر ومحمد ولف ثنيان على منيره بحده: ألحقيني برا
طلع بعد ما اخذ اغراضه وطلعت منيره بغضب وهي ساكته
لف ثنيان : انتي وش بلاك وش صاير بعقلك ما تشوفين انهم يلعبون ويمزحون وشوله ذا الصراخ والعصبيه هاااه وشوله
منيره : العيال طفشانين اصلا وهم من اليوم ينتظروون
ثنيان : منييييره والله لو اشوف هالتصرفات صدقيني يا منيره مايصير خيير اول مره وعديتها لكن ماعدت على خير وثاني مره بمشيها والثالثه ثابته يا منيره سكتت وهي معصبه وجوا عمر ومحمد وطلع ثنيان وهو يحاول يهدا .................••............
في حاوة عجاج
عند عجاج اللي كان جالس وهو يفكر بالكارثه اللي حلت عليييه رفع جواله بسرعه اول ماشاف ثنيان يتصل ضحك بفرح ان ثنيان طلع ورد بترحيب : ياااا حي ذا صوت جعله ما ينقطع
ثنيان : يا جعلني فداك يا عجاج وييينك مالك حس ولا جيت ولا سلمت
عجاج : والله قلت بيجلس مع اهله ومع الترف
ثنيان ابتسم : اجل اسمع خمس دقايق وبكون فالحديقه اللي قريبه من بيتكم خلك هناك
عجاج : اطلع للحاره
ثنيان: معي العيال
عجاج : يلا يلا
نزل عجاج مستعجل ناسي همه بوجود ثنيان وثنيان اللي اسرع للحديقه ناسي تصرف منيره بوجود عجاج
جلس عجاج على وحده من المراجيح وهو ينتظر ونزل ثنيان وهو يدخل عمر ومحمد وضحك وهو متجهه لعجاج وحضنه
عجاج وهو يضغطه : الناس تنسجن وتنحف وانت تربي شحوم
ضحك ثنيان: مب مني والله من واحد كأنه جحدر ( شخصيه في مسلسل ) يهرب لي الاكل
ضحك عجاج وبعد وهو يسلم على العيال وجلسوا ثنيان : ايييه واخبارك
عجاج : اخباري كارثيه
ثنيان: خير ان شاء لله
عجاج : ابوووي جاه بلاك
ثنيان سكتت بعدم فهم : هاه !؟
عجاج : ابوي يبي يتزوج
انفجر ثنيان يضحك: امااااا عاااد
عجاج: ضحكت من غير سنون وش يضحك
ثنيان :ههههههههههههههههههههههههههههههههههههههههههههههههه ههههههه ابوك الشايب بيتزوج
عجاج: لااا خل هذا ما يضحك اللي يضحك واللي يجلط بيتزوج بزر عمرها 20
ثنيان اتسعت عيونه وهو يضحك وعجاج يضحك بضيق : شفت يوم يقولون شر البليه ما يضحك هذا هو
ثنيان: وش جاه وش 20 وهو عمره 50 فرق 30 سنه يارجل
عجاج: هذا بدال ما يزوجني يتزوج هو
ثنيان: وش طرا عليه 20 سنه عزوبي الحين تذكر يتزوج
عجاج : تكفى اسكت بموت لي يومين وانا مدري وش اسوي اتركه بيتزوج يتزوج بس حرام بزر بزر
ثنيان: خرب عليه وتزوجها انت
عجاج هبده : انت خلاص صار كل شي في حياتك زواج اقولك المسأله خطيره
ثنيان ضحك: وش بتسوي طيب
عجاج : انا اسألك
ثنيان: تعرف الناس انت
عجاج: ايييه
ثنيان : خلاص روح وخرب الدنيا
عجاج : انت خبل والله ليذبحني
سكت ثنيان شوي ولف ببتسامه: هالناس كيف اطباعهم
عجاج: كيف يعني
ثنيان: متشددين متدينين والا الموضوع سهالات
عجاج : لا ناس شديدين ومتدينين وما يعرفون المزح
ثنيان : بس مالك الا هي
عجاج : وش
ثنيان : اسمع مالك الا ترسل احد يفركش الدنيا
عجاج: لا يا شيخ ابوي ذا
ثنيان: بس انت ادرى با ابوك ما عنده يا يمه خشيني بتروح المسكينه فيها
عجاج: بس ابوي عاد
ثنيان: خلاص خلك ساكت لين يدخلها البيت بكره والمسكينه تروح فيها عاد ابوك الله بس يعين
عجاج : والله صح اقشر بس اذاا خربنا هنا بكره بيتزوج ثانيه
ثنيان: لا عني معاد يعيدها ابوك عنده كبرياء
عجاج : وش نسوي ومن نرسل وش نقوله واذا ابوي عرفه ولعن خيره
ثنيان: بنرسل حرمه مب لازم رجال
عجاج : من نرسل ! مرزوقه
ثنيان: ابك لا هاذي بتذبح ابوك
عجاج: صادق
ثنيان: اقولك مالنا الا الترف تلعن ابو خيرهم تحوس مخهم حوس
عجاج : وش تلعن ياخي مانبيها تلعن
ثنيان: خلاص خلاص عندي ازهل بيشوتون ابوك شوت
عجاج ضربه: خييير ابوي ترا
ثنيان: اقصد يرفضون
عجاج : واذا فضحتنا ذا الخبله
ثنيان ضربه: زوجتي ترا
عجاج : يوووه المهم اذا فضحتنا
ثنيان: لا ما عليك وهي سمراء بعد بيصدوقنها والترف تغسل المخ ماعليك
عجاج: واضح انها تغسل المخ اشوفك مخبط
ضحك ثنيان: يا ويل قلبي بس
عجاج : طيب متى نبي بسرعه
ثنيان: متى!
عجاج: بكره
ثنيان: تم بكره بنجي وانت تدلنا
عجاج : يا ويلك تعيي يا ثنيان !
ثنيان : لا لا ، بس بنجي بدري لان بكره عشاء عند صالح وعازمك لازم تجي
عجاج : المهم تنحل ذا الكارثه وبعدين نشوف
ثنيان: بسيطه ما عليك
عجاج : قم قم بنروح نتقهوى
ثنيان : والعيال
عجاج : جبهم ياخي
ثنيان: بينشب لي ابو حمود
عجاج : يا رجال خله ينشب ماعليك
ثنيان: لا انتظر بتصل في نواف يجي ياخذهم
عجاج: نواف اخوك ترا مب سواق كل شي يوديه ويجيبه
ثنيان: وخر بس ماعنده شي
عجاج :اسمعني بندر وش صار عليه
ثنيان: والله امس سألت عنه وقالوا عادي ينفذ عقوباته وهادي
عجاج : اتوقع انه راكد
ثنيان: الله يهديه بس ، صح ياخي سيف مختفي حتى اتصل به مدري وينه
كلم ثنيان نواف وهو يقوله يجي
عجاج: مب تقول متزوج خلاص عند زوجته
ثنيان: وش ذا الزوجه اللي مختفيه ومخفيته
عجاج : حبيبي واضح عرق فيكم تخقون بسرعه وتروحون وطي
ثنيان: لا تبيني اتوطى في بطنك انت
عجاج ضحك وهو يقول : شرف نواف اللي ادعي له من كل قلبي ان ربي ينجيه من عايلة المزواجيه
نواف : سلام
عجاج وقف يسلم عليه وبعدها وقف يقرا عليه
ضحك نواف : وش فيك
عجاج : اسمعني وانا اخوك تحصن وكثر الدعاء ترا الموضوع يعدي صدقني
نواف: وش فيكم وش يعدي
ثنيان :ههههههههههههههههههههههههههههههههههههههههههههههههه ههههههه
عجاج : لا تصير مزواج مثل اخوانك انتبه
نواف ابتسم ابتسامه ضايقه: لا وين شكلهم بيسببون لي عقده من الزواج
ثنيان دقق بملامحه: وش فيك ليه ضقت
نواف : لا بس وين العيال
وقف ثنيان: اقول قل وش فيك
نواف بعد تردد : ياخي مافيه شي مشكله بسيطه
ثنيان : سييف فيه شي !! مختفي من مده وش صاير حتى بالزيارات مايجي نووواف تكلم
عجاج : ثنيان وش فيك انتظر
نواف جلس وهو يقول لثنيان السالفه وانهم ما لحقوا يقولون له من السالفه اللي صارت وانسجن
ثنيان: كيف تسكتون عن ذا الشي كيييف كيف
نواف : هذا الوضع وش نقول
ثنيان: خذ العيال خذهم
عجاج :وين بتروح
ثنيان: بروح لذا الللي ما يستحي اخر العمر يبيع امي وابوي عشان مره هذا اخرتها وتارك اهله وبنته اللي في حاجته وماشي
نواف : ثنيان فكنا من المشاكلً
ثنيان: اقول خذ العيال وتوكل
طلع ثنيان ونواف اللي توتر
عجاج : ما عليك ما بيسوي شي بيكلمه ويجي خذ العيال انت
نواف : يلا يا محمد عمر يلاا
اخذهم نواف وطلع وثنيان اللي راح لسيف
.
.
انتهى البارت💘