بارت (٤٧)
الجزء الثاني
رمضان كريم
حين تتغير الاقدار ❤️❤️❤️
الكاتبه نماء الورد
كلش كلش اسفه واعتذر عن التاخير بس الغايب عذره ويا
والله شاهد جنت مريضه وهسه رجعتلكم حبايبي ..............
#
مرات أگولن گضت
ماباقي حسبت وكت و أرتاح و تعدي ...
و مرات أكرهة العمر
و أسأل و أدور درب للمگبره يودي ...
~~~~~~~~~~~~~~~~~~~~~~~~~~~
نهاجر من أنفسنا بحثاً عن حياةٍ أخرى...
في لوحاتٍ لم نرسم تفاصيلها .. بل أملاهآ علينا القدر
تكتم :كبرت وفتحت عيني على حصار وجوع والناس تعبانه بسبب الأوضاع واني اشوف عمي الي فنه عمره لحسابنه يجي وكت الظهر العرك يصب من وجه يحير وين يشتغل حتى يعيشنه ويجيب بصعوبه طحين حتى تخبزه امي وناكل ونسد حجوعنه الحصار والجوع جانت تعاني منه كل اهل الجنوب أكثر محافظات العراق دمرت بسبب الحصار و عاشت هيج ازمه صعبه صح عمامي معافونه بس همه هم تاثروا بلحصار كبرنه وبسرعه برزت عدنه معالم الانوثه لان احنه طبيعه جسمنه طول وجسم مليان مرتب وبياض طالعين على عمامي دائما اني وختام من نمشي العالم تباوع علينه بضرات استغراب بسبب التشابه الجبير البيناتنه بدت العالم تتقدم النه واحنه بعمر صغير كاعده برحلتي ختام راحت تشتريلنه لفات لبلبي من الحانوت كاعدات طالبات بالرحله الكدامي اسمعهن يسولفن بيناتهن وحده تكل الصديقتهه ابن عمي خطبني وكال بس ترحين صف ثالث متوسط ابطلج وازوجج تحجي وفرحانه اني بس عيوني عليهن واذاني وياهن الثانيه جاوبتهه لا ولج ديربالج تزوجين تره الزواج مو لعب الزواج يخوف جتي وحده من صفنه بس تكعد بالرحله الاولى هل طالبه شويه خفيفه بمشيتهه بلبسهه كعدت بصفي وجاوبتهن خلتهن يلتفتن لرحلتي هوه وين اكو احلى من الزواج علوا اني ازوج واخلص من اهلي تحجي بمياعه اني فاكه حلكي عليهن عزااا هاي شيحجون كتلهه عفيه كومي مكان اختي تره هسه تجي متقبل احد ياخذ مكانهه كامت وجاوبتني وشصار عليج كاعده على كرسي الملكه تهي بهي تحجي وتفر ايدهه طلعت كتابي وكعدت اراجع بي وذني مستمرات التلث طالبات كدامي يحجن بالزواج ويقنعن بصديقتهن انو الزواج يخوف اني حلفت مازوج لان مبين صدك يخوف اجتي ختام جايبه الفات اخذتهه منهه اكل وافكر خلصت الفه وطبتلنه مدرسه العلوم شرحت وطلعت واني بالي بالحجو البنات توصلت لحل ماكو غيره الزواج يخوف لان بيوم العرس العروسه يدكون الطرحه الي براسهه بسامير وله شلون يثبتوهه براس العروسه رجعنه للبيت وسالت ااختي الجبيره اكلج هوه صدك الزواج يخوف .
: ولج شنو هل حجي منين جايبته .
تكتم : شبيج هوه سوال بنات الصف كلهن يسولفن ويكولن الزواج يخوف .
: خلي يولن معليج بيهن ولتكعدين يمهن سمعتي .
تكتم : اي اصلا اني معليه بيهن بس تدرين شنو يمكن العروسه بالعرس يدكون براسهه بسامير حتى يثبتون الطرحه .
: باوعتلهه وحجيت ايجوز والله المهم معلينه احنه كملي تبديل حتى تجين تغسيلن مواعين الغده اليوم عليج .
تكتم : البارحه جان دوري شنو نسيتي .
