(. بارت ٥)
الكاتبه......نماء الورد.........
صرت اتوقع غياب اي شخص بأي لحظة انمحى شعور الامان بقلبي. 🤎
فرقد : سلام عليكم .
صادق : وعليكم السلام ورحمه الله وبركاته شعجب اليوم هنا ليش ماسبقتني علبيت نتغده سوه .
فرقد : هوه أنا جيت حته اتغده عدكم واحجي وياك بموضوع .
صادق : خير نشالله نروح نتغده وترتاح ونحجي ياله يخوي امشينه.
ضويه :مرت شهرين على جيتنه لبغداد وانا مرتاحه ويه صادق الحمدلله وحملي زين مو متعب بطني برزت نوبات اشتاق لديرتي ولجوري صادق نوبات يأخذني بيت جده قريبين علينه ناس مثقفين وكلهم مكملين مدرسه وأخلاقهم حلوه من اروحن ماحسن بغرب عدهم كلش خوش ناس ونوبات يأخذني للسوك وانا من اشوفن أغراضهم الهنا تخبل مو مثل العدنه كمت كلما اروحن ششتري الي اشتري لجوريه واضمنهن من اروحن اخذلهه كاعده اصلي وكت الضهر خلصت صلاة ونفتح الباب وفات صادق كال .
صادق: قبل الله حبيبه .
ضويه: منا ومنكم صالح الأعمال.
صادق : حضري غده فرقد وياي .
ضويه:كل الهلا بي الغده جاهز بين متصلون اصبن .
صادق : طلعت للهول لكيت فرقد يصلي انا هم رحت توضيت وصليت خلصنه صلاة وطبت ضويه.
ضويه: شونك خويه شون كيفك .
فرقد : ياهلا بخيتي اليوم جيت شويه اضوجنكم هههه.
ضويه : افه انخليك على راسنه البيت بيتك امت ماتحب تنورنه .كملو الصلاه صبيت وكعدنه تغدينه وبعدهه صبيتلهم جاي وفتت للحجره حسيتهم عدهم حجي بينهم كلت اعوفنهم ياخضون راحتهم.
صادق : اي يخوي احجي شنهي الحسبه العندك .
فرقد : ماعرف منين ابدي راح احجيلك بدون مقدمات أنا رايد اتقدم لبنت خالي ضمد واريندك انت تفاتح ابوي بلموضوع عبن انت اخوي العود .
صادق : مو تدلل أنا هلشهر اروحن أحاجي ابوي وروح جدي هساع بس تسمع امي تفرح ماطول سبوع وزوجكم وخالي مايعارض يحبك ويريد خاطر امي .
فرقد : صحيح بس أنا أريدن بس احجزهه هسه خلي هيه تروح سادس وانا أرتب اموري ياله .
صادق :وليش الانتضار اخذهه وكعد يمي بلبيت شو جبير وفارغ .
فرقد: لا يخوي ماريدن هسه بس احجزهه وكطع حقهه .
صادق : هاي هيه أنا سبوع أكثر اروحن وانطي خبر لبوي .
فرقد : نشالله أنا حتمال ماجي وياكم عبن عدي شغل .
صادق : براحتك يخوي.
جوريه: بعد ما محمد كال نروح نعيش عد اهلي ثاني يوم اخذت غراضي ورحت ويه محمد لبيت اهله وصلنه مو كلش بعيد علينه مسافه ساعه أقل عبن البيت الكاعده أنا بي صاير بطرف البستان وبيوت قليله يمنه وهم بعيده عنه طبينه جانت أمه كاعده سلمت وبستهه براسهه وسلمت على مرت محمد ردتلي بس شكلهه ماقابله على جيتي
ام محمد: روحي للحجره حطي غراضج وتعالي ساعدي ضرتج صفيه بلخبز .
جورية :جيت اساعد صفيه مرت محمد كالت.
صفيه : روحي لمي الخبز راح اخلص .
جوريه: كعدت الم بلخبز وحجت صفيه وتسأل بيه.
صفيه : انتي بت صبريه يو بت جميله الفصليه.
جوريه : أنا بت الثانيه.
صفيه: يعني انتي بت الفصليه الاجت لصالح.
جوريه: جاوبت بغصه اي أنا بنت جميله .
صفيه : جا امج شون ماتت
جوري: حجيت بخنيك دنجت وحجيت عضتهه حيه وماتت.
صفيه : وانتو ضليتو وحدكم وره ما ماتت يعني ماعشتوا ويه بيت جدكم.
جوريه: اي اختي ضويه وأخوي مهدي وانا ضلينه بيت ابوي .
صفيه :سمعت اخوج كاطع بيكم جا شماله انتم مو خواته أنا اخوي دوم يجيني ويفكدني شنهي اخوج ماعنده حنيه.
جوريه:لا ما كاطع بس كاعد بغير محافظه وملتهي بعياله كملت الخبز وين اودي .
ام محمد : لفي وشيلي وتعالي احاجيج.
جوريه: تامرين أمر حجيه شلت الخبز وجيت لميت مكان الخبز وكعدت يم ام محمد .
ام محمد : شوفي اكلنج أنا عشت عمري واتجنب الحجي والمشاكل فأنا اريندج شيصير متوصلي لمحمد وسمعين جلمه الاكولنهه واي زايده منج أنا اتصرف غير تصرف مايعجبج.
جوريه: هويت راسي بخوف اي حجيه تامرين
صفيه : انتي تعرفين كلش زين محمد خذاج علخلفه وهاي صارلج قرب السنه وانتي كلشي ماكو فأنا اكولن انتي مالج أحد بعد غير محمد اخوج وختج وراحو من الديره وخلوج والسمعته عمامج زوجوج حته يخلصون من مسوليتج فأنا اريدنج تمشين على ماينه وسمعين الجلمه احسن ما تتهجولين وانتي مالج أحد .
جوريه: هزيت راسي ودموعي متجمعه بعيني للضهر اجه محمد وصبينه غده وانا احسن كلشي ختلف عندي مكاني ناسي احسن بستغراب وخوف محمد ياكل ويباوعلي وعيونه تحجي بس هوه مايكدر يحجي عبن أمه واخته وخوته كاعدين وراهه خلصو غده ورجعو للزرع عبن عدهم شغل بلكيعان لليل رجعوا وراح يم صفيه بات وانا نمت بغرفه الحجيه ثاني يوم كعدت الفجريه ويه الصلاة رحت اتوضه وشفته توه مخلص وضوء باوعلي وحجه.
محمد: صبحج الله بلخير حبيبه كونج نمتي زين عبن تغير عليج المكان.
جوريه : لا مرتاحه الحمدلله اهلك هم اهلي والمكان الراحتك بي أنا راحتي وياك .
محمد : بارك الله بتربيتج معدله وبت اصول .
جوريه: ويه هل حجي رفعت راسي واشوف صفيه واكفه وره محمد تخزر بيه أنا خفت من نضراتهه وهيه عيونهه شذر بلون السمه ترعب بلزايد راح محمد يصلي وانا اتوضه وتقربت صفيه عليه .
صفيه : شبيه محمد شجان يحاجيج بدينه بسوالفج مال تختل .
جورية: خلصت وضوء وجاوبت ماكو شي والله جان يسالني عن شغله وجاوبته هزت راسها مقتنعة وحجت
صفيه: خلصي صلاة وعجني حته تخبزين للريوك ولاضلين تتلزكين بي وتتشكين لا تشوفيني ساكته أنا مايعجبني جيتج هنا بس سكتت اريدن اشوفن وين تصفى وياج.
جورية: نشالله ما تشوفين مني اله الخير أنا لا نفسي اخرب بيتج ولا أخذن رجلج أنا حالي حالج ماكدرت أمانع على الزواج عبن عمامي وخوي نطو جلمه وانتي بت عرب وتعرفين الزلمه عدنه اذا رجع بجلمته شنهي معناهه عافتني وراحت مجاوبت شي وانا هم رحت صليت ورحت عجنت ونضفت الحوش وهيه سوت ريوك لمحمد وطلع اختمر العجين وكعدت اشنك طلعت الحجيه جانت تصلي كلتلهه صباح الخير حجيه جاوبتني صباح النور .
ام محمد : كملي البيدج وروحي انطي لكمه للحلال عبن من البارحه عايفي ولا تنسين تنضفين مجانهن وتلمين المطال .
جوريه : انشالله حجيه جيمت التنور وخبزت كملت الخبز رحت نطيت العلف للحلال ونضفت المكان بس شني هاي ريحته تكتل جا هنه شمالهن مايرحن مثلنه بيت الراحه ضالات بوصاختهن.
ويوم بعد يوم مشت الايام كمت احبن شغلي عبن التهي بلحلال ساعه انضفهن ساعه احلبهن وحتى تعلمت اسوي كيمر ولبن وجبن صارلي شهرين على جيتي بيت اهل محمد جيته للبيت قليله وبليل ينام عد صفيه بس نوبتين يو تلاثه اجه عدي عبن بيوم الينام عدي صفيه تكلبهه مناحه علينه اليوم كعدت الصبح بطني وضهري يوجعني كلش بيه ومابيه كمت لشغلي اكضي كملته وجيت اطبن اسبح وأشوفن شي ناز مني خفت وماعرفت شسوي سبحت ورحت كعدت ارجف عبن ماعرف شنهي جاريلي واخافن اسال عمتي عبنهه مره كويه ماتنطيني مجال احاجيهه وانا كاعده وحايره جتي صدفه اخت محمد حسنه شافتني وجهي اصفر ومكومه روحي جتي يمي وسألتني.
حسنه : شمالج حبيبه ليش وجهج مخطوف لونه امي مكدره خاطرج بشي أحد غاثج احجي حبيبه أنا حسبت اخيتج.
جوريه : هزيت راسي بلا.
حسنه : جا واجعج شي تشكين من حاجه.
جوريه : بجيت من الخوف تقربت مسحت على جتفي وكالت.
حسنه ؛ بداعت اهلج كليلي لا تضمين بلجم اكدر اسويلج شي .
جوريه : بطني وضهري صبحن يوجعني ومن طبيت اغسلن لكيت شي نازل وخفت خافن بيه مرض واموتن.
حسنه : بستغراب جا انتي ماتغسلين.
جوريه : لا وروح امي يوميه اغسل .
حسنه : ههههه موش هذا كصدي بس انا كصدي انتي هلساع بلغتي وصرتي مره وهلسالفه لازم ماتصلين عليه ليما تكضى ياله تصلين ياله حبيبه أنا اروحن عبن جيت اشوفن امي ولكيتهه نايمه عفت الجهال بلبيت ال روحن ليهم عندج العافيه .
جوريه : الله يعافيج حبيبه اله شمالهه حسنه تكلي صرتي مره جا أنا جنت رجال ومن جتني هاي المادري شسمهه ياله صرت مره حسنه اصغير من محمد بسنه متزوجه وكاعده قريب على اهلهه.. الايام مشت وخلصت المادري شسمهه وحتى نسيتهه ولتهيت بلحلال وبيوم كاعده اسوي جبن طبلي محمد طبعا طول هلفتره اشوفنه كلش قليل .
محمد: سلام عليكم
جاوبنا وعليكم السلام
محمد : لبسي عباتج ومشينه اخذنج لبيت عمج جايه رضيعتج من بغداد اليوم عمج ستاذن مني حته اخذنج ليهم وانا اردن عبن عفت شغلي وجيت.
ام محمد: خلهه تكمل البيدهه اختهه ماطايره وذا تريد تجي تشوف اختهه هنا جا شنهي احنه ناكل وادم
محمد : حجيه الله يرضه عليج قابل الجبن طاير شو نسوان خير من الله وإذا محد كدرت تكمله عود هيه من ترد تكمل أنا اريدن اوديهه عبن عندي شغل ولازم ارد .
ام محمد: أنا كلت تكمل شغلهه اول عدهه خبز بعد عجينهه هم تعوفه
جوريه: محمد راد يحجي وانا جاوبته بقهر اذا تكدر بليل أخذني شنهي عمي كالك ضويه ترد نفس اليوم يو تبات باوع لامه بعتب وحجه.
