حين تتغير الاقدار
الكاتبه ......نماء الورد.......
قصه حقيقيه واقعيه ميه ميه من واقعنا
سلاما على المتفائلين وفي اعينهم دموع قتلت رغبتهم بلحياة💔 🥀🎶
ثِق أنهُ سَيَسّتَجيبْ وسَتُصبِحّ ،قِصةّ جَبرِكَ أمَلاً كَبيّراً للآخريّنَ 💛.
راح نبدي وياكم ونفتح باب من بيبان زمان قبل وشون جانو عايشين باب بي حياة الريف وبي حياة المدينه
باب يحجيلنه عن حياة أشخاص من سنه ١٩٣٤ الى وقتنا الحاضر يعني القصه اجيال وكل جيل اله قصه اجمل من القبلهه واكيد الحياة لا تخلو من الحزن والفرح
والفكاهة والتضحيه والانتضار. الحياة دروس وبعض الدروس حتكون قاسيه علينه بس لازم نمتحنهه وننجح
بيهه استمتعوا معي برحله الزمن .........
جميله: يمه يمه وينج هذا الخبز كملته خلي ازهار تلمه وتحضر غده لجيه اخوتي عبني هلكت ومابيه بعد حيل.
ام جميله: خوش انتي استعجلي تراهم عله جيه حته نصب ونتغده سويه ياله ولج ازهار كومي للغده .
ازهار: كايمه يمه وروح ابوي كايمه بس لا تصيحين عليه .
ام جميله : أصيح عبنج مامريحه كلبي مثل جميله .
جميله : فدوه اغديلج يبعد كلبي ييمه أنا شعندي غيرج .
جميله :انا اسمي جميله اسم على مسمى الديره كلهه تشهد بجمالي عمري ١٥سنه عايشه ويه امي وخوتي ثنين عباس وجاسم واختي ازهار وابوي متوفي الله يرحمه عايشين بأحد المناطق الجنوبيه ابوي مات وانا عمري ٧سنين وازهار ٦ أنا تسلسل الثالث بلعائله اخوي عباس اكبر مني ب٥سنوات بعده جاسم اصغر من عباس بسنتين بعدها انا ونوب ازهار بعد وفات ابوي اخوتي لزمو شغل الكاع الحمدلله عايشين بخيرهه ناكل منهه ونبيع محصولهه بكت الحصاد ويه طرت الفجر نطلع نحوش أنا وازهار وأمي وعباس وجاسم ويانه عباس من النوع العصبي وميتفاهم جاسم شوي احسن منه عباس علطول مشاكله ويه بيت الشيخ علكاع عبن كاعنه بصف بستانهم جمره رادو يشتروهه وخوتي ماقبلو لهذا صارت مشاحنات بينهم وحته المي كوه يوصلنه عبن ناعور صاير بتجاهم وهمه يوزعون المي على الأراضي اتذكر مره رحنه ويه طرت الفجر موسم حصاد تلثمنه ورحنه ممنوع وحده ذب لثامهه وصلنه لكاعنه ونشوف كلهه تزكي بزرعهه اله احنه ماكو مي نزكي حجه اخوي.
جاسم: أضن بيت الشيخ كاطعين المي علينه خلني اروح اشوفن شنهي السالفه .
عباس : خلك أنا راح اروحن اشوف وين يردون يوصلون بسوالفهم .
عباس : صبحكم الله بالخير يلربع .
ابو شلتاغ رجال فلاح يشتغل عند بيت الشيخ: هلا وليدي كواك الله.
عباس : الله يكويك عمي اله شنهي ماكو مي اليوم .
ابو شلتاغ : بارتباك مممم مكطوووع ابني م ممماكو اليوم مي عبن الناعورة مادور مادري شجاريلهه.
عباس: جا شو كاع حجي جلوب بيهه مي وكاع طلال وحتى بيت عبد العزيز شفتهم يزكون وانا جاي بطريجي شنهي القصه عمي احجيلي من الاخير .
ابو شلتاغ: ابني استهدي برحمانك وانعل الشيطان وروح منا هاي أوامر وانا عبد مأمور مابيدي شي عليك.
