جميع الحقوق محفوظة للكاتبة رحاب إبراهيم
ممنوع النقل والاقتباس......
شيطان الماضي يستبد من عقلها وقوتها ...والنبض يرتجف تمنيًا لأملا يختبئ بين الضلوع ....والحب الذي قتلها بالأمس سيقتله اليوم ....عذرا يا قلب ... فلا زلت اقيم الحداد ....ولا عزاء للع...
النهاردة تم بحمد الله الإعلان عن نزول رواية #حوركيديـــا ( حورية وشيطـان) .....المنتظرة منذ آواخر عام ٢٠١٩ ..... والمقرر نزولها غدًا بأذن الله بإحتفالية دار إبداع لموقعها الإلكتروني..❤
نتكلم عاميـة .... أولًا كلامي خاصةً لقراء الواتباد الأعزاء اللي بسبب إهانة بعضهم ليا عشان وقفت الرواية أنا بقالي أكتر من سنة مش بفتح صفحة الرواية على الواتباد نهائي ..... وللعلم أن الصفحة اللي منزلة الرواية تملكها شيماء جنة صديقتي ...يعني مش صفحتي الشخصية .....
بسبب توقف الرواية دي بعض القراء أرسلوا لي رسائل لا تليق بقراء أدب وكانت كفيلة تخليني أبعد عن المجال ده بشكل لا راجعة فيه .....ولكني بكتب بشغف ....بكتب لأني بعشق الكتابة مش لأي سبب تاني مهما كان مهم للبعض زي الشهرة وغيرها...
تحملت كل الكلام ده وكتبت بوستات كتير جدًا على صفحتي على الفيس بوك وعملت مليون بث صوتي واتكلمت بمنتهى الصراحة والصدق ..... وده مكنتش مكلفة بيه بأكتر من بوست واحد اتكلم فيه وشكرًا وعليكم الانتظار ..... ولكني لا اعمالكم ككاتبة بعاملكم كأخت وديمًا كنت برد على اد ما اقدر طبعا......
المشكلة اللي قابلتني وخلتني غصب عني أوقف الرواية :
بدايةً كده هذكر بالترتيب ..... * من بداية الرواية خالص من الفصل السادس تقريبًا بدأت اكتشف أن الرواية بتتسرق على صفحات ومواقع لأشخاص وبيتحط عليها أسماء تانية !!
* أو بيتمسح اسمي من الغلاف وبيتقص وتنزل الرواية من غير اسم اصلًا اللي هو الرواية أهي متاحة لأي سرقة لأي حد معندوش ضمير ...ماهي رواية اصلًا بتتنشر من غير اسم !!
*كنت بتواصل مع الصفحات دي وفي منهم كان بيغلط فيا وبيعملي بلوك وبتتنشر غصب عني برضو ! وقليل منهم جدًا اللي كان بيستجيب ....تقريبًا مرتين فقط من ضمن عشرات ! تخيلوا رواية قيد الكتابة بتتسرق وهي لسه في الفصل السادس !!
ورغم ده كله كملتها وما وقفتهاش .... ولا حتى كان في نيتي أوقفها بدليل أني لما وقفتها كان عند الحلقة ال ٤٩ .....
بعد نزول الحلقة ٤٩ تواصلت معايا واحدة وفهمت من الكلام بالعربي كده أنهم داخلين مشروع تخرج وعرضت عليا فلوس ..... طبعا انا رفضت وعملتلها بلوك ....بس الكلام خلاني أعرف أن الرواية هتتسرق سواء قبلت او رفضت .... الرواية بتتاخد حوار وفكرة ...والحوار بتاع الرواية دي تحديدًا كان مُلفت ويشد وفيه مجهود..... يعني من الآخر روايتي كانت هتتاخد كوبي ببست لحد تاني باسم تاني وهتتوثق باسمه كمان .....طب بالعقل كده كان قدامي إيه اعمله ؟ وكنا داخلين على كورونا والدنيا واقفة ولا عارفة اوثقها وحتى مكنش ينفع تتوثق غير لما اكملها ! يعني لو اتوثقت باسم حد تاني ولا أي شيء يقدر يرجعلي حقي فيها تاني وانسى بقى !!
لما قولت كده في بوستات اتصدمت في البعض ....عليكم أن تتخيلوا أن ناس تقولي وإيه يعني تتسرق نزليها احنا عايزين نكملها قراءة !!.... هل ده يرضي ربنا؟!
أنا لحد دلوقتي مش متخيلة أن في ناس بتستهون بمجهود غيرها ومعندهاش ضمير بالشكل ده ! ده لو كتبوا بوست من دماغهم ولقيوا حد سرقه باسمه هيتغاظوا وهيزعلوا ! ما بالكم دي رواية كاملة سرد وحوار ولغة وشيء بجد اجتهدت فيه شهور كتابة ومراجعة وتأليف ...سهر الليالي ووجع عيني واكتب واراجع وامسح واعيد برضو 💔
الرواية كنت هنشرها ورقي ولكن راجعت نفسي في اللحظات الآخيرة.... واتعرض عليا مؤخرًا من كذا دار تتنشر ورقي ومع ذلك رفضت ...... عارفة أن في ناس ممكن تكدبني بس اقسم بالله حصل ورفضت.... ولكن نزلتها إلكتروني على موقع أنا بثق فيه جدًا وفخورة أني بنشر فيه .... ونشرتها الكتروني وصممت لأن وعد الحر عليه دين ...وأنا نفذت وعدي ❤
أنا عارفة أني طولت عليكم ولكن الرواية تستحق القراءة وهستنى بلهفة كبيرة جدًا رأيكم .... وكلمة خاصة كده للناس اللي حقيقي دعمتني وشجعتني وصبرت عليا ووثقت فيا سواء على الفيس أو الواتباد .... أنا عمري في حياتي ما بنسى كلمة حلوة حد قالهالي وكل حد منكم وقف جانبي في اللي حصل في الرواية دي بالذات فكراها وكلامكم ومحبتكم على راسي من فوق والله.....
اوعوا حد يقراها ومايبعتليش رأيه 😊 وفي مفاجأة في آخر الرواية هستنى رأيكم فيها ....التحميل هيكون من موقع إبداع واللي مش عارف اللينك يدخل صفحتي على الفيس بوك باسم \الكاتبة رحاب إبراهيم حسن يوم الخميس الساعة 9 بالضبط كده هيكون نزل وهيكون لينك التحميل موجود بأذن الله ....🥰❤
أتمنى أني اترك بصمة خاصة ليا في قلوبكم وتذكروا رحاب إبراهيم حسن بكل خير ومحبة .....أحبكم في الله وكل سنة وأنتم بخير وإلى الله أقرب😍❤❤✨🎉 حقيقي محتاجة جدًا دعمكم على البوست ده وأشوف فرحتكم ومحبتكم 😘🥰❤
