إغواء قلب (مُكتملة)

التاسع عشر

استعد للذهاب الى عمله لعله يلهي ذهنه عن التفكير فيما حدث فرغم حطام قلبه إلا أنه أصر على التماسك حتى لا يثير سخرية من حوله وعندما انتهى من ارتداء ملابسه تناهى الى مسامعه طرقات خافتة على باب غرفته، وحين أذن  للطارق بالدخول تقدمت فدوة منه وعلى ثغرها ابتسامة هادئة قائلة بنبرة مترقبة:
- صباح الخير يا صقر 
ممكن اتكلم معاك؟

أومأ لها وهو يرتدي سترته ويهندم من هيئته أمام المرآة لتهمهم هي: 
-انت احسن دلوقتي امبارح كانت حالتك صعبة اوي وخوفت عليك 

اجابها بإقتضاب: 
-انا كويس يا فدوة متقلقيش 

لتتسأل بحذر:
-مش هتحكيلي كان مالك وايه اللي عصبك اوي كده وخرجك عن شعورك

تنهد بعمق وجلس بجانبها على الأريكة التي تتوسط الغرفة وقال في ضيق: 
-كنت مضايق وخلاص

رتبت هي على ساقه وقالت بخفة قاصدة التخفيف عنه: 
-انا متأكدة ان اللي انت فيه ده وراه واحدة  و واحدة زي القمر كمان بيتهيألي انا عارفاها 
البنت اللي كانت في المكتب مش كده اللي كان اسمها فتون صح...

زفر بضيق بعدما شعر بأن خنجر مسموم انغرس بقلبه عند سماعه اسمها وقال يدعي الثبات:
- الحكاية خلصت قبل ما تبتدي يا فدوة اتغشيت فيها بس انتِ عارفاني مفيش حاجة هتأثر عليا 

رمشت عدة مرات بتفكير ثم قالت وهي تربت على يده:
- أزاي اتغشيت فيها يا صقر دي كان باين من نظراتها انها بتحبك انا فهمتها اول ماشوفتها صدقني...إحنا بنات ونفهم حركات بعض 

وضح هو بعصبية: 
-كل ده كان تمثيل علشان تلعب بيا 

أنكمشت معالمها وتسألت من جديد: 
-طب وايه مصلحتها بس 

أجابها هو يشعر انه على حافة الجنون: 
-مش عارف في شكوك كتير جوايا وخايف تطلع صح بس اللي اعرفه أن أكمل الصرفي عنده إجابة لكل اسئلتي 

انقبض قلبها حين ذكر أسمه لتردد بتلعثم وبعيون زائغة:

- أكمل...ايه علاقته؟

رد صقر بثقة نابعة من يقينه القوي: 
-هو اللي بعتها ليا ومتسأليش عن السبب علشان انا وانتِ عارفين كويس

غامت عيناها وهمهمت وهي تشعر أن كل ما حولها يدور بها بعدما تفهمت الى ماذا يرمي بحديثه:
- قصدك انا السبب مش كده علشان يبعدك عني
 
أومأ لها بضيق ثم نهض عازم الخروج ولكن قبل أن يلتفت يقول لها بنبرة صارمة غير قابلة للنقاش:
- عايزك تحطي في دماغك ان لو أكمل ده أخر راجل على وش الأرض مستحيل هتبقي ليه من تاني ليستأنف بتهكم تقصده:
 -واظن ده رأيك كمان وده نفس الكلام اللي قولتهولي قبل كده ولا انتِ عندك رأي تاني

أومأت له بضعف نافية بعدما انسلتت دمعة خائنة من عيناها ولا تعلم سبب لها 
ليستأنف هو:
- انا سألت عن آسر واتأكدت من المعلومات اللي انتِ عطيتهالي عنه  وعن دار الأزياء بتاعته اللي في باريس انا معنديش مانع تسافري في أقرب وقت وتشوفي مستقبلك وتبدأي من جديد الحياة اللي انتِ اخترتيها بإرادتك وإذا كان على امي انا هقنعها بنفسي