إغواء قلب (مُكتملة)

الثالث والعشرون

دام عناقهم لعدة دقائق طويلة وظلت هي تنتحب بقوة داخل احضان صديقتها التي افتقدتها كثيرًا وافتقدت حنانها

لتهمهم كوثر بعتاب وهي ترتب على ظهرها:
- كده برضو يا فتون تغيبي عني كل ده ومعرفش عنك حاجة انتِ وفرحة مكنش العشم يا ختي

اجابتها فتون بنبرة متحشرجة أثر بكائها المستديم:
- معلش يا كوثر الشديد القوي هو اللي منعني عنك

لتقطع كوثر عناقهم وتخبرها بجدية:
- عايز اعرف كل حاجة يا بت العايق واوعي تكدبي عليا علشان...انا حفظاكِ

أجابتها فتون بصدق:
-لو كدبت على الدنيا كلها مش هعرف أكدب عليكِ يا كوثر هحكيلك كل حاجة وهطلب منك خدمة محدش هيعرف يعملها غيرك

رحبت كوثر:
-قولي وانا مش هتأخر عنك يافتون

-عايزاكِ تروحي لفرحة مدرستها بس خلي بالك ليكون جمال مخلي حد من رجالته يراقبك

ضربت كوثر صدرها وهتفت بفطنة:
-لأ متقلقيش هأخد بالي بس انتِ قولي عايزة توصليلها ايه

-عايزاكِ تقوللها متخرجش من باب المدرسة إلا بعد امتحاناتها انا خايفة تيجي هنا وابويا يمنعها تحضر الامتحان وتروح عليها السنة وتعبها وتعبي يروح على الفاضي

قالت كوثر بعدم فهم :
-ابوكِ يمنعها ازاي وهو مسجون

أجابتها فتون بضيق:
- جمال قالي انه هيفرجو عنه بعد يومين

رفعت كوثر جانب فمها بأمتعاض وهمست بغيظ:
-منهم لله الاتنين ألعن من بعض

لتتسال كوثر بترقب:
-هو انتِ هتتجوزي جمال بجد

لتجيبها فتون بنبرة متألمة منكسرة اضنتها الحياة:
- انا تعبت يا كوثر لغاية امتى هفضل احارب في الدنيا وانا بحاول احمي نفسي من جمال وغيره وفي الآخر محدش يصدق اني شريفة
انا أقرب حد ليا هو اللي قسم ظهري وخلاني طول عمري مطاطية رأسي و شايلة شيلة تقيلة عليا، عارفة لما يكون الحد ده
المفروض ابويا و إن هو الراجل الوحيد الملزم بحمايتي والمفروض برضو انه سندي وظهري في الدنيا، هو اللي مرخصني وكسرني يبقى مفيش راجل هيجي يصوني ولا يحميني بالعكس ده هيجي عليا أكتر لما يحس اني مليش حد يزعل على زعلي واعتمد عليه، حتى اللي كنت فاكرة ربنا عوضني بيه وهيحميني منهم اتخلى عني وحكم عليا زيهم واكتشفت ان مستحيل واحد بمكانته يتقبل واحدة زي، انا اخري اتجوز واحد زي جمال من نفس توبي لتضيف بسخرية مريرة:
- يعني بت العايق عايزاها تتجوز ايه غير واحد سوابق وبلطجي ميتخيرش عن ابوها
اللي زي يا كوثر ملهمش سند غير ربنا وانا فوضت امري ليه

هتفت كوثر بعيون غائمة وهي تواسيها:
-ونعم بالله...بس ربنا مبيرضاش بالظلم وأكيد هينصفك

أجابتها فتون:
-ونعم بالله يا كوثر

لتبتسم كوثر وترتب على يدها وتقول بفضول:
-طب احكيلي بقى احسن دماغي بتودي وتجيب