مصحه ألم

مشهد

* نونه الزبيدي *
( مصحة ألم )

مشهد

كاعدين بالسياره طريقنه الى الكاظم ( عليه السلام )
الجو ممطر يادوب يبين الطريق منه صار المطر يدخل النه وحده شابكه بالثانيه من البرد وسنونه راحت من التطكطك

كل شويه قيس شاخط بالسياره يسابق ويه حيدر
وامي وابويه يحجون عليه خابرت على حيدر وكلت

- حيدر كافي سباق خل نوصل للامام بسلام

كال بضحك
- شبيج يعمري خايفه شوارع فارغه خل نتونس

- واذا الشوارع فارغه انتو تلعبون سباق حيدر كافي

- حبيبتي الخوافه اموت عليج

بقيت مثل الصنم ما اعرف احجي والانظار عليه
رديت عليه
- حيدر كافي سباق الخاطري خل نوصل بسلام

- ماشي

سديت الخط شويه هدئو صارو يمشون بطيئ
عبرنه السيطره اشو هذوله رجعو يسابقون
ضجت حيل منهم امي بقت تحجي على قيس

- لا تصير جاهل راح ننگلب من وراك

- يمه شبيج خايفه شوفي الشوارع فارغه
تدرين بيه اذا مزدحمه ما امشي سريع بس نسيبج
ما يفك ياخه مني

- انته بس اهدء لا تگلبنه يمه انعل الشيطان ومعليك ب حيدر

- ان شاء الله هاي خففت السرعه لعيونج

خفف السرعه بقه بس حيدر بقه بعناده
شويه ما حسينه غير سياره تمشي بسايدنه
حاول قيس يلوف عنه بس انكلبت بينه

من الهبطه ما حسيت بنفسي غير مشموره خارج السياره حسيت بحراره تجري من راسي بقيت اباوع
ادور على اهلي شفت جنات مشموره على الگاع
ركضت عليه ورجليه تجري دم حاولت اكعدهه ماكو

باوعت على الجهة الثانيه أمي وابويه الدشداشه البيضه صارت حمره من الدم بقيت مثل الصنم ما اعرف شسوي ودموعي تنزل ويه المطر التمت العالم علينه

رحت ركض على ابويه احاول اسوي اله اسعافات حتى يبقه وياي بس جان النبض ضعيف باوعت عليه وكلت

- بابا الخاطري لا تروح

حاول يحجي وياي ودموعه تنزل غمض عيونه واني
تخبلت بقيت اعيط والطم بهستريا بقيت اهز بي حتى يكعد بس ماكو جرني ولد من حضنه بقيت اعيط احاول اخلص نفسي منه حتى اروح اله بس جان كامشني حيل هزني حيل وعاط بوجهي

- اااهددئيي كاافي رجال مات بعد راح الدار حقه ميصير تعذبي انتي

- ابوويهه هذاا ابوويه تفههم شنو ميصير يروح ويعوفني هناا شلووون فكررر يعووفني لوحدي هناا كله متمددة بس اني مااا اعرف شسوي

- حاس بالي تمرين بي واني راح اساعدج بس اهدئي لازم تكونين قويه مو منهاره هسه تجي الاسعاف وناخذهم للمستشفى

خلصت نفسي منه وبقيت اركض مثل الخبله على امي الناس فوك راسه يحاولون يرفعوه كعدت بصفه وكلت

- يمممههه فدوووه لعينج لااا تعوفيني انتتيي كااافي عليه فررراك بابا يووووم لا تعوفيننني والله ااتيه واموت بلياااككمم يممه حتى نيشااان ما اريد والله بس فتحي عيونج ولا ازوج بس لا تعوفينني

اهز بيه بس ماكو نتيجه منه فاقده اجتي الاسعاف وشالوهم بقيت اتصفن وين اروح ويامن كلهم راحو وعافوني كعدت بالكاع ودموعي ينزلن

تقدم عليه نفس الولد وكال

- كومي اختي وياي ما يصير تبقين هنا والمطر على راسج وجروحج تلتهب

ردت اكوم ما كدرت سندني وكمت وياه صعدني بسيارته اريد احجي ما اكدر احس حنجرتي تجرحني من احجي وطلعت كلماتي بألم

- اخذني وياهم فدوه

- ان شاء الله

حرك سيارته واني باقيه على وضعيتي بدموعي تحرك خدي ....

قصه جديده
انتظروني