جرأة خلفها طفله (مكتمله)

الحلقه الثانيه

تانى يوم نزلت بطلتنا بطلتها الواثقه و القويه وكانت لابسه بنطلون اسود و بلوزة نبيتى وطرحه مشجره وساعتها السوداء والكوتش الاسود والشنطه النبيتى قعدت شويه مع عيلتها ونبهت على سميه أن مدرس الكيميا هيكون عندها النهادرة هتجهزله و ودعتهم وراحت شركتها
نجوى : مروة ايه الجديد
مروة :مفيش لسه يا نجوى سليم مش هييجى بالسهولة دى انتى نسيتى شكل وشه لما عرف انك الى هتنافسيه ف السوق واحده واحده وهييجى لوحده
نجوى : وانا صبرى لى حدود بس النتيجه وانا عارفاها .....
مروة : ماشى يا نجوى بس هتعملى ايه لما يبقى ف شراكه بينكو يعنى انتى كده كده مش محتجاه وانتى اللى مكتسحه السوق
نجوى : لانى مش عايزة اظلمه كل اللى كانوا ف السوق انا شلتهم من قدامى وطلعت بالسوق بسبب.... وانتى عارفه ليه كويس لكن مش يبقى من ضمنهم مش ذنبه انا هديله فرصه يثبت نفسه بس
مروة : تمام براحتك يا نجوى وانا عارفه السبب كويس ..... طب انتى مفيش حاجه مهمه النهادرة هتروحى
نجوى : لاء طبعا مينفعش ف مشوار مهم اوى ولازم تيجى معايا فيه
مروة : وراكى ايه يختى انا عارفه انك عايزه تموتينى ناقصه عمر ..هنروح فين
نجوى : ايه يا مروتى مش عايزة تتعرفى على استاذ زياد العيسوى ولا ايه
مروة : وانتى هتقابليه فين 
نجوى : يعنى الباشا ييجى يعمل سباق ف المنطقه بتاعتى ومنسلمش عليه دا تبقى عيبه ف حقى
مروة : يلهوى يا نجوى انتى هتسابقى النهاردة ومقلتليش ليه وبعدين انتى هتجيبى العيله بالترتيب
نجوى : أولا انتى عارفه انى بسابق ومش بيفرق معايا مع مين ثانيا مقلتلكيش لأنك هترفضى وانا بحطك قدام أمر واقع ثالثا بقى ايوا بجيب العيله واحده واحده أمال انا هشارك حد معايا بالساهل ومتنسيش اللى داخلين عليه
مروة : لله الأمر من قبل ومن بعد قدامى يماما انتى هتشلينى
نجوى : بعد الشر عنك يا مروتى يلا بينا
مروة : اعند خلق الله يلا
__________________
مصطفى : وانت ضامن انك تكسب الرهان يا زياد
زياد : يا بنى دا انا زياد العيسوى وكمان العربيات دى لعبتى متقلقشى انت بس لو كسبت أسبوع شرم على حسابك
مصطفى :منك لله يا اخى يارب تخسر
زياد بثقة : بعينك
مروة ونجوى وصلوا ونجوى غيرت هدومها للبس السباقات ومصطفى شافها
مصطفى : ولا يا زياد الحق يلا بص
زياد : ايه يبنى مالك
مصطفى :دا بنت اللى هتتسابق معاك
زياد : مبروك ليها الخسارة
نجوى : تشجعينى وتصورينى ماشى
مروة : انتى عندك انفصام شخصيه يا بنتى انتى عارفه دا السباق الكام منا كل سباق بعمل كده صدعتينى
نجوى : الله بفكرك الحق عليا يعنى على العموم take care  يا بيبى
نجوى وزياد كانوا ف المقدمه وزياد كان بيبص لنجوى نظرة استهزاء ونجوى بادلته بابتسامه باردة ودا غاظ زياد
السباق ابتدى وزياد سبق نجوى ونجوى كانت وراه بتضحك باستهزاء عليه وزيادة ابتسم بثقة وفرحان انه كسب الرهان ومروة طبعا عارفه اللى صحبت عمرها بتعمله وبتضحك باستهزاء على زياد زياد كان مبسوط لحد ما لقى نجوى جمبه وبتسلم عليه من العربيه وبتضحك بثقة وسبقته وكانت النتيجه أن نجوى هيا اللى كسبت السباق
نزلت نجوى بثقه وراحت عند مروة و مصطفى راح عند زياد وزياد خارج من العربيه متعصب
نجوى : عرف
مروة : هيعرف حالا
نجوى :تمام أوى يلا بينا نمشى
مصطفى :أسبوع شرم عليك يشبح مش عليا
زياد بعصبيه : اسمها ايه
مصطفى : سمعت حد بيقول أن اسمها نجوى ..تقريبا نجوى العمراوى بيقولوا أنها أصغر business woman  و احسن مهندسه زراعيه ف مصر
زياد : سليم هوا إللى هيعرفلى كل حاجه عنها ...سلام
__________________________
مازن : هتعمل ايه
سليم : ف ايه
مازن : مع نجوى انت عارف أنها مش هتتنازل ابدا ...هتتشارك معاها
سليم : مش عارف يا مازن عقلى ملخبط اوى حاسس انها عايزة تدينى فرصه اظهر فيها نفسى وأنها معملتشى معايا زى الناس اللى قبلها ومره كبريائي يقول اتشارك مع واحده ست مش عارف يا مازن
مازن : من وجهه نظرى اتشارك معاها يا سليم شوف طباعها شوف السبب انت مش حاسس أنها حاجه غريبه يعنى الشراكات اللى دخلتها مع الشركات التانيه وكانت من أكبر الشركات وهيا اللى بتكسبها وهيا مكنتش هاديه كده دى بتضرب ضربتها وتكسبها وضربتها تموت جرب يا سليم مش هتخسر حاجه
زياد دخل متعصب وراح قعد على الكنبه وغمض عنيه
مازن : ايه يبنى هيا وكاله من غير بواب ولا انت داخل على يهود
سليم : مالك يا زياد
زياد : انت تعرف واحده اسمها نجوى العمراوى
سليم : وانت تعرفها منين
زياد : رد عليا
سليم :مالك يبنى ايوا أعرفها
مازن : مالها
زياد :علمت عليا
مازن بضحك :ازاى
زياد : النهادرة كان ف سباق وطبعا انا رحت لقيتها هناك وكسبتنى والواد مصطفى كسب الرهان
سليم : كسبت ف السباق ...
ف نفسه : منتيش سهله يا نجوى وراكى الغاز كتيره أوى بس قريب هنعرفها
مازن : والله وشفت اليوم اللى بنت تكسبك فيه يا زيزو هههه
زياد : مازن والله مش ناقصاك هيا
مازن :هاا هتعمل ايه
سليم : جهزلى معاد بعد يومين
مازن :تمام
_____________________________
مروة : زمانه عرف
نجوى : ويومين بالكتير و هييجى لو عليه هييجى بكره بس عشان خاطر كبريائه مش اكتر
مروة :تمام ..انا هروح انا بقى
نجوى :متخليكى شويه يا بنتى
مروة : لاء يحبيبتى عشان خاطر ماما
نجوى : سلميلى عليها كتير
مروة : يوصل يا قلبى مع السلامه
نجوى فضلت قاعده على اللاب بتاعها لحد ما دخلت ملكيه
ملكيه :القمر فاضى
نجوى : لو مش فاضى يفضيلك تعالى
ملكيه : جى جى عايزة أسألك على حاجه
نجوى :اسالى
ملكيه : هوا يعنى ....الناس دى هتيجى هنا تانى وهنرجع تانى
نجوى :معرفش ليه حد قال حاجه
سهام جت : كنت عارفه انك سمعتينى انا وابوكى وهتيجى تقولى لنجوى
Flash back
عادل : سهام عايز اقولك حاجه
سهام : قول يا حبيبى مالك
عادل : اخواتى هينزلوا من بره كمان شهر وبيقولوا عايزين يفتحوا صفحه جديده معانا من تانى ونرجع أهل من تانى
سهام : وانت عايز ايه يا حبيبى
عادل راح ف حضن سهام : مش عارف يا سهام مش عارف مش قادر أنسى اللى عملوه ولا اللى حصل لنجوى مش قادر ... ممكن يعنى .
سهام :ييجوا يقعدوا ويقولوا اللى عندهم وانت القرار عندك وانا معاك
عادل : ربنا يخليكى ليا يا روحى يارب وميحرمنيش منك ابدا ولا من بناتى ابدا
سهام : ربنا يديك الصحه وطوله العمر يا حبيبى
Back
سهام : نجوى اعمامك هييجوا بعد شهر وبيقولوا يبداو معانا صفحه جديده
مليكه : وانا بكرهم ومش عايزاهم يخشوا بيتنا و...
نجوى : مليكه ...ماشى يا ماما براحتك انتى وبابا ييجوا يقولوا اللى عندهم وبعدين دول ضيوف واكرام الضيف واجب
سهام : حبيبتى يا جى جى ربنا يحفظك يا قلبى يا رب انتى اخواتك انا هروح  انا اقول لبابا
مليكه : نجوى انتى بتتكلمى بجد يعنى انتى بتهزرى اكيد
نجوى : وهوا اللى ييجى بيت عادل العمراوى يخرج منه من غير واجب الضيافة
مليكه : مش عارفه يا نجوى كلامك ف الغاز  و مش  فاهمه حاجه
نجوى وبتغمض عنيها :بكره تعرفى وتفهمى كل حاجه ..متقلقيش قريب ...
مليكه : ماشى يا جى جى انا هروح انام بقى تصبحى على الجنه
نجوى :وانتى من اهلها
_________________________
عدى يومين عادى جدا من غير أحداث جديده وجه اليوم مقابله سليم لنجوى
مازن : جاهز
سليم : جاهز
نجوى : كل حاجه جاهزة
مروة : أمان متقلقيش
ف الشركه
مازن : لو سمحتى كان ف ميعاد مع انسه نجوى
السكرتيره : اقولها مين
سليم : سليم العيسوى
السكرتيره : اتفضل يا فندم انسه نجوى قالت اول ما حضرتكوا تيجوا تدخلوا على طول
السكرتيره خبطت على الباب : انسه نجوى استاذ سليم بره
نجوى : دخليه يا دنيا
دنيا : اتفضل يا سليم بيه
سليم دخل هوا و مازن
نجوى :اهلا سليم بيه
سليم : اهلا يا انسه نجوى
نجوى :اتفضل ...تشرب ايه
سليم : مفيش داع
نجوى :لا ازاى يعنى كده انت بتحرجنا
سليم : خلاص لو هتعبك قهوة مظبوطه
نجوى : وحضرتك يا مازن بيه
مازن : زيه بالظبط
نجوى : تمام ....2 قهوة مظبوطه و 2 ice coffee
سليم : هوا انتى عرفتى ازاى انى جاى
نجوى : توقع مش اكتر
سليم :تمام طبعا حضرتك عارفه انا جاى ليه ..فياريت نبدأ شراكه كويسه مع شركات الفهد والليث
نجوى : تمام بس ف شروط لازم تتنفذ
مازن :إلى هيا
نجوى : أولا اى اتفاق يتعمل ترجعلى الأول فيه أو أى ادويه هتتشرى متتصرفش من دماغك وتشترى كميات ترجعلى الأول واقولك تعمل ايه
مش اى عرض كويس يبهرك لازم تقرأ العقود الأول والبنود والا انت اللى هتخسر
ثانيا : أمضى على عقد لمده سنه متتعاملش مع أى شركه تانيه إلا لما المده تخلص
ثالثا أمضى على شيك انو لو فكرت تعمل حاجه من ورايا أو حصل اى غلط انت اللى هتتحملها انت وشركتك لان شركتى عمرها ما فى حاجه غلط حصلت فيها فاتمنى انك تحافظ على ده
سليم بشبه عصبيه : يعنى ايه ارجعلك ف كل حاجه هوا أنا عيل صغير عشان تقوليلى اعمل أيه ومعملش ايه ...
مازن : سليم أهدى معلش ..انسه نجوى حضرتك مش شايفه أن ف تحكمات زيادة شويه علينا احنا عمرنا ما نضر شركات بنتعامل معاها يعنى مش هناثر لانو بردو بيعود لينا بفايدة
نجوى : والله انا بضمن حقى انا شركاتى من أهم الشركات ف مصر وبره مصر فيعنى مش غلط أبقى بحميها ومش عايزة غلط فيها تقدر تقول ضمان حق
سليم : تمام بس كده ف تحكم زياده
نجوى :  والله دا اللى عندى لو حضرتك عايز وقت يومين والرد يوصلى انما لو مش ....
مازن : يومين أن شاء الله والرد يوصل عن اذنك
نجوى : تمام اتفضل
سليم ومازن خرجوا ونجوى قعدت باريحيه على الكرسى بتاعها
مروة : هيوافق
نجوى : لازم ..لازم يوافق ملوش حل غير دا
سليم : انت ازاى تتصرف من دماغك كده انا فتحت بقى وقلت عايز وقت
مازن : سليم دا الحل الوحيد وانك لازم توافق انا مردتش اقول أننا موافقين وعايزين وقت عشان تفكر بالراحه ..فكر بالراحه يا صحبى هيا معاها حق هيا عايزة الاحسن لشركتها وانت لو مكانها كنت عملت كده
_______________________________
على الفون
نجوى : يعنى هتنزل امتى بردو
=......................
نجوى : كتير أوى انت وحشتنى وعايزة اشوفك
=......................
نجوى : خلاص ماشى بس ابقى طمني عليك ماشى يا حبيبى ...يلا مع السلامه
_______________________________
اسراء: نوجه ممكن اتكلم معاكى شويه
نجوى :تعالى يا قلبى
اسراء :نوجه ماما وبابا بيقولوا أن اعمامنا هينزلوا هنا ويقعدوا عندنا شويه دا صح
نجوى :أمم ليه
اسراء: وأنك بردو وافقتى
نجوى : عايزة ايه يا اسراء
اسراء : نجوى بصراحه انا مش عايزة اشوفهم ولا اتكلم معاهم مش قادره أنسى اللى حصل وانا بخاف من عزيز دا نظراتوا كلها خبيثه و وحشه وبحس انى مش مطمنه له وكمان سميه مش عارفه حاجه احنا بقالنا سنين يا نجوى بعاد عن بعض أوى ارجوكى خلينى بعيده أو خلينى أسافر انا وسميه
نجوى اخدت إسراء ف حضنها :يعنى دى سوسو بنتى اللى مربياها على القوة والمواجهة وأنها متخافش غير من ربنا بس
إسراء : طبعا يا نجوى بس مش قادرة انا ..
نجوى : ششش أهدى انا فاهماكى بصى انتى تقعدى ف الأول لان الاصول بتقول كده ولو مستريحتيش ممكن اويدكى الفيلا اللى الساحل تقعدى فيها انتى وسميه وبعدين يا قلبى متقلقيش انا معاكى وهما كمان مش هيطولوا لا ف البيت ولا بره البيت
إسراء : يعنى ايه
نجوى  :بكره تعرفى
مليكه وسميه :هييييهه لااااااااا مش قادره اصدق اختى واختى خيااانه
نجوى واسراء بضحك :تعالى يموكوسه انتى وهيا
مليكه وسميه راحوا على نجوى واسراء وفضلوا يضحكوا ويتنططوا لحد ما نجوى اخدت اخواتها ف حضنها و ناموا سوى
________________________________
سليم راح لنجوى الشركه من غير ميعاد ومن غير مازن
سليم : ممكن تعرفى انسه نجوى ان سليم العيسوى بره
السكرتيره : طبعا يا فندم ثوانى ....اتفضل يا فندم
نجوى : اهلا سليم بيه نورتنا
سليم : دا بنورك يا انسه نجوى
نجوى :حضرتك متصلتش ليه قبل ما تيجى كنت دخلت على طول
سليم :ابدا حبيت نكون لوحدنا
نجوى :تمام اتفضل
سليم :أنا موافق على شروطك بس بردو إلى  بتعمليه تعرفينى بيه عشان نبقى متفاهمين مع بعض
نجوى : ولو انى مش مضطره بس تمام مادام هيبقى ف تفاهم وانتظام
سليم : تمام أوى على بركه الله. ..ممكن سؤال
نجوى :اتفضل
سليم :انتى عارفه زياد اخويا
نجوى بابتسامه : اخوك زياد ...اه أعرفه مش دا اللى علمت عليه ف السباق آخر مره
سليم بابتسامه :اه هوا  ..هوا بصراحه يستاهل بس انتى ليه عملتى كده
نجوى : يعنى الأستاذ زياد يبقى ف ملعبى ومنرحبش بيه ..من رأيك ينفع
سليم : لاء بس ..
نجوى : خلاص ..يلا نمضى على العقود الأول عشان ف شغل مهم اوى
سليم : تمام
ف نفسه :يخربيت فصلانك يا شيخه .. بس ابتسامتك قمر
__________________________________
عدى فتره بين سليم ونجوى والشغل ماشى كويس وما بين بردو أن نجوى بتستفز  سليم وان مازن بيحاول يقرب من مروة حتى لو بدايه صداقه أن عادل مستنى إخواته عشان يشوف يعمل ايه وسهام معاه و مليكه جايلها أنها تسافر عشان مشروع بتاعها وسميه واسراء كويسين ف الدراسه وزياد هيموت من نجوى من آخر مره وعمر مسافر بره وشهد اختهم لسه متعرفتش على سميه
________________________________
قبل ما نجوى تروح الشركه
ملكيه :نجوى
نجوى :ايه اللى حصل
مليكه :مفيش يا قلبى بس بصراحه يعنى ...الكليه مطلعانا الاقصر عشان امتحان عملى كده والمفروض انى اطلع
نجوى حاسه ان ف حاجه وحشه ممكن تحصل وقلبها وجعها : سيبيلى فرصه أفكر وهرد عليكى بالليل ..هيا المفروض امتى
مليكه :الاسبوع الجاى ...يعنى واعمامى هنا ..هما هييجوا من هنا وانا هسافر من هنا
نجوى وهيا هتمشى : هشوف واقولك مع السلامه
_____________
ف الشركه
نجوى قاعده سرحانه ومتوغوشه وخايفه أن ف حاجه تحصل
مروة : نجوييييي
نجوى :ايه يا مروة ف ايه
مروة :انتى اللى مالك سرحانه ف ايه 
نجوى :ملكيه هتروح الاقصر عشان امتحان عملى
مروة :طب وفيها ايه
نجوى :خايفه أوى قلبى واجعنى حاسه ان ف حاجه هتحصل .....
مروة :ان شاء الله خير متقلقيش هيا بس عشان هتبعد عنك
نجوى مسكت الفون بتاعها واتصلت برقم
نجوى :الو سلام عليكم. ..ازيك يا سيف عامل ايه
سيف ( زميل نجوى وكانوا  قريبين من بعض بحكم أن والده كان يعرف والد نجوى وكذلك والدته  ) : ايه دا نجوى بتتكلم دا الفون نور عامله ايه ...انا تمام
نجوى : انا الحمد لله ..سيف مكن طلب
سيف : انتى تؤمرى اتفضلى
نجوى : ربنا يخليك ..سيف مليكه اختى هتسافر الاقصر وحاسه انى ف حاجه غلط هتحصل ف ممكن يعنى لو ليك معارف تخلى حد يراقبها بس من غير ما تحس
سيف : طبعا يا نجوى انتى تؤمرى هيا هتسافر امتى
نجوى : الاسبوع الجاى
سيف :خلاص تمام
نجوى :بجد مش عارفه اقولك ايه يا سيف شكرا بجد
سيف : يبنتى هزعلك
نجوى بضحك :خلاص يعم ..يلا سلام
سيف : سلام