إستمتعوا..♡
استند على الكرسي وتكتف بعد ما إنتهى من اكله
قطع شرود ذهنة صوت امه.: لؤي حبيبي كيف معدلك؟
هز رأسه بالإيجاب وقلب شفايفه.: يدخلني اي تخصص
نطق ابوه وهو يأكل بشويش بدون لايرفع نظره.: وش التخصص اللي تبغاه؟
لؤي.: مافكرت للحين
ضحك بسخرية وعدل نظارته.: ننتظرك
تنهد ومد يده للكاسه يشرب بتمهل متجاهل رغبته الجامحه بالرد طاقته منتهيه تمامًا
سارة.: بابا ممكن تشوف لي وظيفة بشركتك تلائمني
هز راسه ومسح فمه بعد ما سند شوكته على الصحن.: بشوف لك يا بابا بس اجتهدي على نفسك شوي
عقدت حواجبها بعدم فهم وناظرت لؤي اللي قلب شفايفه ونزل كاسته على الطاوله
ام سارة.: حاول تلاقي لها شغل زين ومرموق يليق ببنت المؤسس حتى لو تنحي احد موظفينك وتجيبها بداله
ابو سارة.: صاحية انتي؟ الشركات المنافسة بتستعمل هذا ضدي، بعطيها ضعف الراتب وهي بالبيت
سارة.: بابا انا مليت من البيت كل معارفي انشغلوا بحياتهم الوظيفيه
ابو سارة نطق باستهزاء مستعد للوقوف.: زين اجل تعلمي منهم و تعالي لي بعد خمس سنين خبره
لؤي ضحك وحط رجل على رجل وهو يحك انفه.: لحظه مو على اساس هالشركة لنا
قام ابو سارة وهو يعدل قميصه وجه نظره للؤي ونطق بصوت جهوري.: هالشركة للي يستحقها
لؤي حط عيونه بعيون ابوه بعد ما لحس شفايفه وتلاشت ابتسامته بالكامل.: جرب سارة طيب واكشف عن مدى استحقاقها، إلا اذا كنت تشعر بالخجل
تجاهل كلام لؤي اللي ما كان عنده القدره عشان ينكره طلع برا البيت تارك ام لؤي تبدل مكانها وتجلس جنب ولدها.: كم مره قلت لك لاتتشابك معاه تبغى تحرق لي قلبي؟
تنهد واحتضن يد امه بايدينه الثنتين.: بسم الله على قلبك، اذا بنجلس ساكتين بنبقى على حالنا
سارة نطقت وهي منزله نظرها لصحنها ومكتفه ايدينها.: لؤي كم لنا واحنا نتكلم من وانا بالثانوي وانا اسأله عن تخصص يفيده بالشركه ودرست لهالشركة وكرفت وبالاخير يتهرب وماله نيه يوظفني
نطق لؤي بجدية بعد ما ارتخت يدينه وصب نظره على سارة.: بتتوظفين هناك من فوق خشمه وان رفض وقاوم اكثر حرقت الشركه وهدمتها فوق راسه
حس بخطوات صغيره تمشي وراه وسكت وهو يتمعن بملامح امه اللي تناظر من وراه بابتسامه
تسللت بشويش خلف لؤي بخطوات متباعده وحذره مدت ايدينها الصغيره ودغدغت خصره
ابتسم ومسك يدها اليمين وسحبها قدامه ودغدغ بطنها تحت ضحكاتها العاليه اللي رنت في البيت،وقف واحتضنها مع بوسة على جبينها خلتها تشد ايدينها حول رقبته وتتسائل ببراءه.: لولي انت معصب على بابا؟
